MARKOS 6

1Is Hisos inlahaw wa ginya, nwali hat sadili banwanan. It manga katogbong natahin yadi hanya. 2No sas Sirang Kafahowayan, is Hisos igfaadal ya ngay has basad fanimbaan. Kaaywanon ka manga nadog in Hisos toltol, intaka wan, taglwang, To fag ama gindak nabol to? Kana fag kadonongan ka nafalobos hanya? Twa oman gibolon ka kitonya fag manga madolaw? 3Bohonwa awkin to ka famanday balay, in Mariya anak, inda Santyago, da Hosi, da Hodas, da Simon fadwasay? Idwa awkin istay yadit manga fadwasay ina no maoliyanan? Yakanga tadwa katalinga in Hisos. 4Ginyas Hisos nafwayong has taw, Nyawa siday manga taw magalang has fangampang, nodwa sat sadili banwanan, it sadili iba, ngatay sat sadili talanahan. 5Is Hisos idwa nasyagan naibolon manga madolaw sinya, no bonwa sayok odi kat nafafiya ista manga sagit no nandog is taw. 6Is Hisos ngap indolaw wan kawa tadwa katiwala hanya. Ginya madis Hisos nasafong has manga tifonan balay sas sokayan banwa, igtoltol yadi sinya. 7Ginyas Hisos nafatifonan ya ka Safolo-ha-Dowa, nafalobos has taw it kangayanan hasagfaalin manga labang gis taw. 8Natogon yadi hat manga katogbong kitay, Ham fag idwa ha balon ngadi kana sas lahawan, no bohonwa sokod odi hayo diya. Nyawa fanganon, nyawa boyog, nyawa kwarta sa hayo hagkos, fag idwa ha diya. 9Dapat fag ha lapak di, fag idwa gosniban hayo rotay. 10Ginya nafwayong yadi hat manga katogbong, Nyawa siday hayo nagdasogan fag balay, ham fag sinya wak gigya ham nodyag lahaw ginya fag banwanan. 11Nyawa sida fag foro ta nodwag fasakbaw hayo, nodwa yadig talinga hayo, ham no kalahaw ginya, fadagdagan ka fogis daga gi hayo manga bitis, bilang wagfaayfan ka taga sinya fag manga taw. Ginya madis Hisos nasogo ka Safolo-ha-Dowa ha sadik foro, ha sadik foro, myasa dowa, myasa dowa. 12Yakanga ka Safolo-ha-Dowa inlahaw wan, natoltol has taw kitay ta fag soyo wan. Ta fag dayo wasta manga ogali dwat. 13Aywan fag manga labang kasta nafaalin gis taw. Ta naasnahi lana ogbot sasta baba alfoyo nogfafiya aywan ka ha manga fagdogon. 14Gis nanya fag masohod, is Hirodis kasta gorangon sas sakop Galiliya, nadog yadi kan Hisos manga naibolon madolaw, maskin in Hisos ngayan inbantog wan. Tiba taw iglwang is Hisos kawas Hwan kagfatogna manga taw hyabi. Hanya hono, inbangon ya gis kahatayan, yakangas Hisos syagan gibolon manga madolaw. 15Tibag lwang, To is Iliyas wan. Tibag lwang, To in Diyos fangampang sadi, kito mandi ka hyabi it manga fangampang. 16Dapat is Hirodis, no nadog, nalwang, To kawa ngas Hwan, kangko nafalifong it liyog hyabi, dapat ay, inbangon ya. 17Maskin hyabi, is Hirodis mandi ka nafagamat has manga taw in Hwan, nafagafos yadi, nafaporiso wan, kawas Hwan gato in Hirodis maskin is Hirodis nabol in Hirodiyas, it tagyaw, in Filipi babay. 18Kawas Hwan igfwayong han Hirodis kitay, Idwa fiya haw no kagaw im tagyaw. 19Is Hirodiyas kahori in Hwan, kasaya wagfahatay hanya, dapat bago bago idya syagan, 20maskin is Hirodis kadala in Hwan. Is Hirodis natwa kitay is Hwan sadik ama fiya it ogali, maliyaw, yakangas Hirodis gapin in Hwan. Is Hirodis kasayag talinga in Hwan manga toltol madi ngap, nyawa gadowan it fangayofan. 21Dapat ay aban, is Hirodiyas nalag it halimbawan kaarakitay fahatayan in Hwan. Ta nogtohod in Hirodis kasagayan fag sirang, is Hirodis nafasyahod is taw kaaywanon fag manga hanon. Is Hirodis nafatawag it manga nahalig, ka ha manga kangayanan, ka manga fagtahinan has manga sondalo, hanggan kasta manga fakilalaon fag manga taw gis sakop Galiliya. 22Araw in Hirodiyas anak ina, nasakbaw, natayok sasta faglagan manga ama. Is Hirodis, hanggan ka manga ama matokawan yadi sinya, igbaya waglag ka dayaga nogtayok. Ginyas Hirodis, ka gorangon, nafwayong has dayaga, Ho domisag hyamo nyawa kana kam fagsagadon gingko, nalwang ya domwag, 23Is Diyos igdog wan aho noglwang, bonwa bohag, nyawa kanam fagsagadon, ho domisag hyamo, nyawa hanggan wagboknga angko sakop. 24Ginya ka dayaga hawat ina, naintaw hanya, Kana araw angko sagadon? It ina nalwang kitay, Fag kawas Hwan, kagfatogna manga taw, fag it alfoyo im fagsagadon. 25Ginya madi ka dayaga infwali ya madali has gorangon, nanagad madali, iglwang, Ho kasaya nangos, in Hwan alfoyo basad finggan, ka Hwan kagfatogna manga taw hyabi, fag tonya kam disagon angko. 26Ginya madi yabay, ka gorangon is Hirodis inrongkot wa dahol it fangayofan. Dapat idwa nasyagan nabawit hampang kawat manga fakilalaon nadog wat nafatohoyan has dayaga haraw. 27Is Hirodis dagos nasogo sadik sondalo, nalwang, Lifongan in Hwan liyog a, diyan it alfoyo hastay. Ka sondalo hanya wan, nalifong in Hwan liyog basad porisowan. 28Ginya ta nadiya it alfoyo basad finggan, nadisag has dayaga, ginya madi ka dayaga nadisag hat ina. 29In Hwan manga katogbong, no nadog kitay ta nafahatay in Hwan, ta hawas porisowan, nabol in Hwan habilogan a, nafwalid basad lohib fanlobgobanan. 30Ka manga Fandiya-Barita nwali ya gis famaritaan. Ta natoltol han Hisos it manga naibolon fagayo fagayo hanggan it manga natoltol has taw. 31Ginya madis Hisos nalwang hat manga katogbong, Tam hawas basad fakahyabogan, kaarakitay tam fahoway yap ogbot. Nalwang kitonya maskin kaaywanon fag manga taw igsaliwan wan, tadwa twa kwan hanon. 32Yakanga ta nasahay baloto, hawas difay sayo fakahyabogan ngay, masamanan nangos gis taw. 33Dapat aywan nalag wan ta no kaginan, nalag kitay da Hisos wa tonya fag manga taw. Ta nandalandanan sas baba daga gis fagayo fag manga banwa, has bahalan danom. Ta nagona man inda Hisos indasog. 34Is Hisos no nadokson gis sahayan sat nakadagsaan, iglag ka manga taw kaaywanon. Hanyan awa waglag is taw, maskin ka manga taw bilang wa topa idwa ha gano taw. Ginyas Hisos natoltol kaaywanon fag manga bagay has taw. 35Ka myanit no kasangday wan, in Hisos manga katogbong hawan Hisos, nalwang, 36Tam istay basad fakahyabogan, kayabi wan. Falahawan yap nangos has manga tifonan balay sas ligongan ka manga taw kaarakitay ta manali ista sadili fanganon. 37Dapat is Hisos nasagot hat manga katogbong kitay, Fag ham wa ka domisag fanganon has taw. Ginya ta nasagot han Hisos, Mi manali awkin 200 dinariyo tinapay, ginya fahoray has taw? 38Ginyas Hisos nalwang hat manga katogbong kitay, Kayodak tinapay hayo diya? Famantay ngay. Ginya ta no namantay, taglwang, Lima di hanggan dowak oyang. 39Ginyas Hisos nafatokaw sas baba lamnonan ka manga taw, malayonan. 40Ginya ka manga taw intokaw wan, malayonan ngay. Tibak layonan sadik daan, tibak layonan limak safolo. 41Ginya madis Hisos nabol ka limak tinapay, hanggan dowak oyang, natangdan has tongod a, nabaya in Diyos ka fanganon. Ginya nafaarogbotan ka tinapay a, nadisag hat manga katogbong kaarakitay homoray has taw. Ginya no nafaarogbotan ka dowak oyang, nahoray yadi has taw fagayo. 42Ginya madi fagayo nangwan wa a, napsog wan. 43Ta natifon ista sawad nakanan mafaarogbotan, safolo ha dowak boyog napno manga tinapay hanggan oyang. 44Manga 5,000 ka manga ama ka nangwan tinapay. 45Is Hisos nafasahay wa dagos it manga katogbong, has basad baloto nafagona wa has difay linaw dahol, hawas banwa Bitsayda. Is Hisos in-goyan, nafaoli yap ka fakaaywanan fag manga taw. 46Ka manga taw nonlahaw di ngay, is Hisos nalahaw yadi wan has baba moyod kaarakitay mandarangin. 47Araw, nonyabi wan, ka baloto sawas fakabokngan linaw, is Hisos sadi odi sas baba daga. 48Ginya madis Hisos nalag kitay it manga katogbong kahori waglowag, kawa bagyo igsibwa wa has bohid. Dapat no kayawa wan, is Hisos naoyan yadi wat manga katogbong, nalahaw sas baba danom, kawas Hisos kasaya nangos gomona hasta fagonan. 49Dapat in Hisos manga katogbong no nalag in Hisos iglahaw sas baba danom, ta gayfan ngan wa labang. Tagharokyawan wan, 50kawa ta gafalad wan Hisos. Dapat is Hisos dagos nahampang has taw, nalwang, Fag marigon hayo fangayofan, aho di, ham fag idwa kadala. 51Ginyas Hisos nasahay has basad sahayan. Ka bagyo dagos yadi wantolong. 52Ta kadolaw waglag, kawa tadya twagdog no kinday is Hisos nafatimawa no nafaaywan ka tinapay, maskin tadyag syag orangan in Hisos. 53Ta no nadifay ka linaw dahol, tandagsa wan sas banwa Ginisarit, natarabing it baloto sinya. 54Ta nondokson gis basad sahayan, ka manga dan sinya fag manga taw is difay, dagos wa nahilala in Hisos. 55Dagos nasonson ka ha manga sagit git manga balay sas ligongan. Ta naanggong sasta baba fangigyanan kaarakitay domiya han Hisos. Nyawa ta sidak nadog in Hisos, ta hanya yadi wan. 56Nyawas Hisos haday kandasog, ta nafaigyan ka manga ha sagit sas manga faktaban balay, nyawas Hisos has manga tifonan balay sayok, nyawa has manga banwa dahol, nyawa has moyod, tagsagad kitay, Ha fatawidan yap man ka manga ha sagit, ngadim tobwan rotay, kaarakitay tamfiya wan. Fagayo ka natawid infiya wan.

will be added

X\