MARKOS 4

1Sadi ya ginan is Hisos igtoltol sas bahalan linaw dahol. Kaaywanon kaaywanon fag manga taw igtifonan yadi sinya, yakangas Hisos nasakbaw has basad baloto, baba danom, matokawan yadi sinya. Ka fakaaywanan fag manga taw sinyas baba daga sas bahalan linaw. 2Yabay, is Hisos igfaadal has taw sinya, dapat sayapdis manga halimbawa. Nogtoltol, is Hisos iglwang, 3Ham fag matalingan. Sadik ama fangiyab hawat namay kaarakitay mamamgas. 4Hanya nogfamgas igsabod odit binhi, yakanga tibak bolhog indagdag has boknga dalan. Ka manga manok indasog a, nahwan wa tonya. 5Ha akwa yadi manga bolhog indagdag has daga libabaw, baba odi dalifi. No kitay di dagos wa natobo kawa libabaw maskin ka daga sinya. 6Ka myanit no nasalog sinya, myanit wa dahol dahol, kat manga tobo inlayong di, maskin idwa ha dalid abasad. 7Ha manga bolhog yadi indagdag ha sayo manga lamnon madogi. Ka manga lamnon inlangba, nasakfaw di ka manga tanom. Ka tanom idwa nabohad. 8Dapat ay, ha akwa yadi manga bolhog kandagdag has fiya fag daga. Yabay tonya ka natobo hanggan inabwat a, malangba, nabohad wan. Ha akwa nabohad tolok safolok bolhog, ha akwa nabohad onom ik safolok bolhog, hanggan ha akwa nabohad sadik daan bolhog. 9Is Hisos nalwang, Ham no ha manga talinga ya ngadi, fag talinga wan. 10Ginya madis Hisos nonboktong, ka tiba taw naintaw hanya, hanggan it manga katogbong, safolo ha dowa, naintaw yadi, kawa hat manga halimbawa no kanat kahologan. 11Is Hisos nalwang has taw, Kati indisag wa ha hayo kitay ham fag tomwa ka mangadyag fadogon kawa han Diyos sakop baliwa, dapat no has iba taw, fagayo sas manga halimbawa yapdi ta no domog. 12Kaarakitay, Nyawa tanyaya wagbantay, tadwa lomag. Nyawa tagtalinga wagtalinga wan, tadwa tomwagdog. Inbali kitonya kaarakitay tadwa somoyo faliyam ista manga naogali dwat. 13Is Hisos nalwang has taw kitay, Ham aw idwa twagdog to fag halimbawa? Kinda odi ham no tomwa wagdog fagayo fag halimbawa, ham gayfan? 14Kagsabod igsabod in Diyos hampang. 15Ka manga bolhog kandagdag sas boknga dalan, kito yadi nangos ka manga taw no nadog tonya fag hampang, is Satanas madali wagbol gista basad fangayofan ka nasabod hampang sinya. 16Kito yadi ka manga bolhog kandagdag sayo baba dalifi, sas daga libabaw. Ta no nadog tonya fag hampang, igtanggap wa dagos, masolong wan no kitay di. 17Dapat, idwa nadalid abasad sasta fangayofan. Ngalay di gagwanta. Dapat no ha donggon ya nga manga mahori, ngatay tagfahoriyan hanya maskin katiwala ka hampang, dagos wa nadayo. 18Ka manga bolhog kandagdag ha sayo lamnon madogi, igfahalimbawa ka mangag talinga has hampang, 19dapat kat manga fagisipon fagaba it manga kakorangan, ngatay kawili wa dahol kaakwaan, ngatay kasaya manga iba bagay. To fag manga fagisipon ka kalangba, ginyag sakfaw ka hampang sat basad fangayofan, yakanga tonya idwag bohad. 20Dapat ay, ka manga bolhog kansabod sas fiya fag daga, ka mangag talinga ka hampang, igfaanod yadi tonya, ginyag bohad wan, tiba tolok safolo, tibat bohad onom ik safolo, tibat bohad sadi wak daan. 21Is Hisos iglwang has taw, Tam awkin igdiya salong kaarakitay tam tomago ka salong sas daga gantangan, ngatay sas daga igyanan? Idwa awkin tam igsalifit ka salong sas tongod salangan, ham gayfan? 22Idwa ha matagowan, kadwam lag aban. Idwa yadi ha mafyaloman kadwam diya aban has faglagan. 23Ham no ha manga talinga ya ngadi, fag talinga wan. 24Ginyas Hisos iglwang has taw, Ham fag matagahan no kana ka hayo fagtalingaon. No kinday ham nogfalag has iba taw, ta aba kitonya yadi nogfalag ha hayo, hanggan bondi kitonya kat disagon ha hayo aban. 25Dapat ay, ka ha akwa, ha tanggapon ya domwag, hanggan kadwa ha akwa, nyawa ka ogbot sa hanya, imbol di tonya aban. 26Is Hisos iglwang has taw kitay, kito yadi nangos in Diyos sakop. Sadik taw igsabod manga botol sas baba daga. 27Ginya kagsabod, no yabi intoyog wan, no sirang mabangon. Dapat ka botol igtobo di, kaabwat wan, nyawa kagsabod idwa twagdog no kinday no kabali kitonya. 28Yabay, ka dagag fatobo wan it natanom. Bago bago igtorang, ginya kaabwat, ginya kaway, ginya ha afo wan. 29Ka manga bohad no loto wan, igdagos wagfangta, kawa fanganiyon wan. 30Ginyas Hisos iglwang, Kinday odi ngap intam fatoladan in Diyos sakop, ham gayfan? Kinday tam nogfahalimbawa tonya? 31Kitos sadik botol mostasa, ka ogbot man has fagayo fag botol kasta tanomon sadik baba daga, 32dapat tonya nontanom, kalangba aban, kabali dahol man has fagayo fag fangofiyon, somanga yadi dahol fag manga sanga, yakanga manga manok igfogad sinya. 33Is Hisos nafwayong has fakaaywanan fag manga taw kaaywanon fag manga halimbawa kitonya, no kinday ka manga taw no tomwa wagdog. 34Idwa yadig toltol no bohonwa las halimbawa. Dapat nafwayong it manga kahologan fagayo hat manga sadili katogbong, ka tiba taw nodwa matalingan. 35Araw no kayabi wan, is Hisos nalwang hat manga katogbong, Tam domifay wa has difay danom. 36Ginya ta no naobon ka fakaaywanan fag manga taw, ka manga katogbong nataban in Hisos, danwa masahayan, nafalahaw wat baloto has baba linaw. Tiba sahayan nahoyog yadi was taw. 37Yabay araw nabagyo dahol dahol, ka manga taob nabakbak ha boknga baloto, yakanga kapno wa ka danom sinyas basad baloto. 38Dapat is Hisos sa dis ginanan ginanan, basad habot sahayan matoyogan, matangyawanan. Ta nafolaw in Hisos, nalwang hanya, Haw kagfaadal hyami, haw awkin idwa galibitan tam nomlogom ha daga danom? 39Ginyas Hisos infolaw wan, nabando has bagyo, nalwang yadi has danom kitay, Fag kahalyaw wan, fag katohas wan. Ginya ka bagyo insiwang wa dagos, inhalyaw ya fiya fiya ka danom. 40Is Hisos nalwang hat manga katogbong, Yakana ham no kadala? Ham awkin idwag syag angko? 41Tandolaw wa dahol a, ta nangarintawan ha sadi ha sadi kitay, Yabay faktaw to? Nyawa manga bagyo, manga danom katanog it fwayong.

will be added

X\