MARKOS 3

1Sadi ya ginan is Hisos nasakbaw has basad fanimbaan Hodyo. Sinya ha sadik ama it gamat inrifis wan. 2Ha manga taw igbantay in Hisos, ngatay mamafiya basad Sirang Kafahowayan maskin tagsayak it fabangdanan iglaban in Hisos. 3Is Hisos iglwang has ama kanrifis it gamat kitay, Ha fag hastay. 4Ginya madis Hisos iglwang has fakaaywanan kitay, Sida ka maangay has Batasan Hodyo, ham gayfan, ngatay ka gibolon fiya, ngatay ka gibolon dwat sas Sirang Kafahowayan? Ngatay igbawi taw, ngatay igfahatay taw? Dapat idwa ha nasagot in Hisos. 5Ginyas Hisos namalantayon has taw sat ligongan, kahori wa dahol it fangayofan, maskin karongkot iglag manga taw myasa wa maganit it fangayofan. Ginya madis Hisos igfwayong has ama, Falogdayan im gamat. Ginya ka ama nafalogday ngat gamat, infiya wa dagos, ogali wan. 6Dapat ay, ka manga Farisiyo igdokson a, dagos wa goyonan igtoltolan han Hirodis sakop, no kindasta halimbawan kaarakitay fahatay in Hisos. 7Ginya madis Hisos nataban it manga katogbong, nafatawas wan, hawas linaw dahol. Aywan fag manga taw gis sakop Galiliya goyan is taw, hanggan gis sakop Hodiya, 8gis banwa Hirosalim, gis sakop Idomiya, hanggan gis difay Hordan, hanggan gis ligongan manga banwa Tiro hanggan Sidon, kaaywanon kaaywanon fag manga taw. Kawa tagdog in Hisos manga ibolon myasa wa fiya, ta gobok hanya. 9Ginya madis Hisos igfwayong hat manga katogbong kitay, Fag fatalaga hangko sadik baloto kawa taw kaaywanon, matohon wa dahol, ho ngandayo imlibit. 10Is Hisos iglwang kitonya maskin fagayo ka ha manga sagit igpilit han Hisos kaarakitay is Hisos mandog, manawid ka manga taw. Inbali kitonya kawa kaaywanon kan Hisos nafafiya. 11Nyawa ginahin ka manga labang noglag in Hisos, ka labang fagfahoriyon iglohoban san Hisos fon bitis, ginya ka labang igtawag marigon, iglwang, Haw in Diyos wa Anak. 12Is Hisos igbando marigon has manga labang kitay, Hagfahilala has taw no fakta aho. 13Ginyas Hisos hawas moyod, nafatawag it manga fakilalaon tiba. Tagtahin yadi wa hanya. 14Is Hisos nafatohoyan safolo ha dowak taw ka omofod hanya fagaba, it fagsogoon yadi kaarakitay manoltol has taw. 15Ha kangayanan yadi igfaalin manga labang gis taw. 16To kat manga ngayan ka safolo ha dowak katogbong. Bago bago is Simon, kan Hisos nafangayan is Pidro, 17hanggan da Santyago da Hwan, in Sibidiyo manga anak, kan Hisos nafangayan da Boanirgis, it kahologan, Manga anak dalogdog. 18Hanggan da Andris, da Filipi, da Bartolomi, da Matiyo, da Tomas, in Santyago sangay in Alpiyo anak, da Tadiyo, ginyan Simon sangay, ka goyon marigon it manga kapariho Hodyo, 19hanggan is Hodas Iskariyoti ka naoyon in Hisos kalaban. 20Ginya madi da Hisos nwali wan. Kaaywanon fag manga taw nanifonan sadi ya ginan, yakanga da Hisos idwa twa kwan hanon gis nanya. 21In Hisos manga kaiban no nadog kitay kitonya, ta naoyan kaarakitay tomaban in Hisos maskin taglwang, Is Hisos ngandayo kaliyam it fangayofan. 22Ka mangag faadal Batasan Hodyo kandasog gis banwa Hirosalim, iglwang kiti, Is Biilsibol, ka tahinan manga labang, kagfon in Hisos, yakangas Biilsibol, kagfasyagan hanya igfaalin manga labang. 23Ginyas Hisos nafaakbang hanya ka manga taw, nafahalimbawa kitay, Kinday araw is Satanas nogfalagyo it sadili, ham gayfan? 24Halimbawa, ka sadik gorangon sakop nombali dowak layonan, idwa domogay. 25Kitonya yadi nangos, no sadik talanahan imbali dowak layonan, idwa yadi domogay. 26Kitonya yadis Satanas, noglaban it sadili sakop, igfabali dowak layonan, idwa domogay, imliyam di. 27Dapat ay, kagfon balay no marigon, idwa ha somakbaw hat basad balay kaarakitay ignahaw it botang nodya gomafos yap hanya, ginya madi idwa somawad it manga botang. 28Hogfwayong ha hayo, bonwa bohag, kasta manga naogali dwat fagayo twam liyam hanggan ista hampang nogfadwat igdog in Diyos ngayan, 29dapat, nyawa faktaw nogfadwat igdog ka Maliyaw fag Falad, tonya sadik ogali dwat idwa twam liyam, nyawa ginahin. 30Is Hisos iglwang kitonya maskin taghalwang kitay, Ha sadik labang kagfon in Hisos. 31Yabay, in Hisos ina, hanggan it manga fadwasay indasog wan, mafanayan di sas sokayan a, igfatawag in Hisos. 32Gis nanya kaaywanon fag manga taw matokawan san Hisos ligongan. Ta nafadog hanya, iglwang, Im ina hanggan im manga fadwasay sas sokayan galingawan hyamo. 33Ginyas Hisos nasagot has taw, Fakta kangko ina, fakta kangko manga fadwasay, ham gayfan? 34Ginya, nogbarantayon it mata has manga taw ka matokawan sat ligongan, is Hisos iglwang, Yabay, to kangko ina, hanggan angko manga fadwasay. 35Maskin, nyawa faktaw no katanog in Diyos kafangayofanan, tonya wa kangko manga fadwasay, angko ina.

will be added

X\