MARKOS 2

1Idya bangan dogay, is Hisos no nwali has banwa Kapirnaom, manga taw nadog kitay is Hisos sawat oliyanan. 2Kaaywanon fag manga taw inbangkad, nanifonan sinya, iglabi di sasta balay hanggan wa sayo sokayan, 3hanggan is Hisos igtoltol has taw. Ha ofat ik ama inbangkad naosong sadik ama kadwa syagan kimot. 4Ta nodwa twa gakbang in Hisos kawa kaaywanon wa fag manga taw, ta nabol ka atop san Hisos tongod. Ginya nonlosbong ngay, ta natonton han Hisos akbang, ka ha sagit sat baba sagmak. 5Ginya madis Hisos no nalag kitay tagsyag marigon ha hanya, iglwang has ama kadwa syagan kimot, Anak, hogfaliyam im manga naogali dwat. 6Dapat gis nanya, ha akwa mangag faadal Batasan Hodyo matokawan sinya. Ista fangayofan iglwang, 7Yakana mayon to fag taw no kampang kitonya? Igsway odin Diyos. Bohonwa awkin is Diyos lamang ka ha kangayanan igfaliyam manga ogali dwat? 8Dapat is Hisos nasarom ista fangayofan kitay ta gisip kitonya. Yakanga nafwayong has taw, Kana mayon ham no nangarisipan kitonya? 9Sida ka malpos fwayongon has idwa syagan kimot, ngatay, Im manga naogali dwat fag imliyam wan, ngatay, Haw fag kabangon wan, anggongan wam sagmak, haw fag lomahaw wan. 10Dapat ho falag ha hayo kitay aho, Kanbali Taw, ha kangayanan istay sas baba daga, igfaliyam ista manga ogali dwat. 11Ginyas Hisos nafwayong has idwa syagan kimot, Aho wa kaglwang kitay, Haw fag kabangon wan, dyan wam sagmak, nyawa ha mwali wa kati. 12Ginya ka ama nalindog, dagos wa naanggong it sagmak, sasta faglagan fagayo, ginya nalahaw wan. Yakanga tandolaw wa dahol dahol, nafasayagdog in Diyos, iglwang, Nyawa ginahin, tam idwa ha lagan kitonya. 13Sadi ya ginan is Hisos inlahaw, hawas akbang linaw dahol. Kaaywanon fag manga taw naakbang hanya, hanggan is Hisos igfaadal has manga taw. 14Araw, da Hisos noglahaw yapdi, ta nalag in Libi, in Alpiyo anak, matokawan sas fanohotan bohis Roma. Is Hisos nafwayong hanya, Ha tahinan wangko. Ginyas Libi dagos wanlindog, natahin wa hanya. 15Ginya madi da Hisos no matokawan san Libi balay, sas bilog fanganan, aywan fag manga fanohot bohis hanggan tiba taw kadwa fiya it ogali, nanayowan kwan sinya, maskin kaaywanon naoyan in Hisos, hanggan in Hisos manga katogbong sinya yadi wan. 16Ka mangag faadal ka Batasan Hodyo hanggan manga Farisiyo, no nalag kitay is Hisos igsayowan kwan has manga ha ogali dwat hanggan manga fanohot bohis, taglwang han Hisos manga katogbong, Kana mayon is Hisos nogsayo has manga fanohot bohis Roma, hanggan has manga taw ka ha ogali dwat? 17Is Hisos no nadog ista fwayong, iglwang has manga taw kitay, Ka manga ha sagit ka kasaya has famolongan, no kadidwa ha manga sagit idwa kasaya hanya. Maskin ngay honbangkad hastay angko fagsayahon ka manga ha ogali dwat, bohonwa ka gayfan kitay it manga ogali fiya. 18Gis nanya fag manga masohod in Hwan manga katogbong, hanggan manga Farisiyo idwa kwan hanon kaarakitay mandarangin mahogod. Manga taw naakbang in Hisos, naintaw hanya kiti, Kana mayon in Hwan manga katogbong, hanggan ka manga Farisiyo manga katogbong, nomtoon idwa kwan hanon kaarakitay mandarangin mahogod, dapat kam manga katogbong idwa gogali kitonya? 19Is Hisos nasagot has taw, Ka mangag fasakop has famabayan idwa awkin kwan hanon kagbabay no gofod yapdi has taw, ham gayfan? Kagbabay no sinya yapdi, ta homwan yapdi hanon. 20Dapat ay, aban ha gomamat tomaban kagbabay. Gis nanya ta bago didwa kwan hanon kaarakitay mandarangin mahogod. 21Idwa haglonob rotay kadyan yamos has daanon fag rotay. Noglonob kitonya, ka daanon fag rotay labi wamdwat aban. Maskin ka bago no sas daanon, kadahol ya kat losbong. 22Idwa yadi ha taw somiblag bago fag alak ha basad daanon fag sohadan anit. Maskin ka alak bago fabosni ka anit daanon, ginya ka alak im-odolanan lamang. Ka fiya, fag somiblag bago fag alak has bago fag sohadan anit. 23Sadi ginan, sas Sirang Kafahowayan, da Hisos nadalan sasta namay ha tirigo. Ta nogdalan sinya, in Hisos manga katogbong igfabago igbol manga haway sayok. 24Manga Farisiyo iglwang han Hisos kitay, Yabay kana mayon im manga katogbong no gibolon kadwa maangay sas Batasan Hodyo, maskin sawas Sirang Kafahowayan? 25Is Hisos nasagot has taw kiti, Ham awkin idwa nabasa, nyawa ginahin, in Dabid naibolon hyabi, da Dabid hanggan it manga ofod nonhori kawa kalonos? 26Kawas Dabid nasakbaw han Diyos basad balay, nos Abiyatar kasta gorangon has manga fagalan-han-Diyos. Ginyas Dabid nahwan ka tinapay kandisag han Diyos. Ka Batasan Hodyo iglwang ka manga fagalan lamang ka fiya homwan tonya fag tinapay. Dapat ay, is Dabid nahwan, ginya nadisag yadi hat manga ofod. 27Is Hisos nalwang ya has taw, Ka Sirang Kafahowayan kagtogbong has taw, bonwa ka taw kagtogbong has Sirang Kafahowayan. 28Maskin ngay, aho, Kanbali Taw, kagbahala yadi has Sirang Kafahowayan.

will be added

X\