MARKOS 15

1Araw, no dayo kasirang, ka manga fagtahinan fagalan-han-Diyos, ka manga fagtahinan banwa, hanggan ka mangag faadal Batasan Hodyo hanggan ka fanifonan magorang Hodyo sadik dahonya nangampangan wan. Ginya ta nagafos in Hisos a, nataban hanya han Pilato. 2Ginya madis Pilato naintaw in Hisos, nalwang kitay, Haw awkin ka gorangon manga Hodyo? Is Hisos iglwang, Haw wa ngap kaglwang. 3Aywan ka manga fagtahinan fagalan-han-Diyos igbangdan han Hisos. 4Is Pilato naintaw ya domwag in Hisos, Kana kin ha nodwag sagot? Fandog kin kaaywanon ista manga sombong ha hyamo. 5Dapat is Hisos idwa nasagot domwag. Yakangas Pilato kataka wan. 6Ka manga Hodyo nogtohod ka Fanohodan Nagsagayan, is Pilato ha ogalig falfas sadik Hodyo kanporiso, no fakta ka manga Hodyo fakasayaon falfason. 7Itfagonan ha manga taw iglaban ista gorangon hanggan wa nangadkatayan noglaban. Insadi ka nalaban is Barabas, kati maporisowan. 8Ka fakaaywanan nalwang han Pilato, Haw fag idwag liyam im ogali. Ha fag falfas mandi sadik Hodyo kito ka nogbanwan. 9Ginyas Pilato nasagot has taw kitay, Kinda nangos hayo fangayofan? Fag ka gorangon manga Hodyo awkin kangko falfason? 10Maskin is Pilato naintaw ngatay fag is Hisos kat falfason, hanya natwa wa kitay kawa manga fagtahinan fag fagalan kaingli odin Hisos, yakanga ta nataban hanya han Pilato. 11Dapat ka manga fagtahinan fag fagalan nafasognod has manga taw kaaywanon kitay, ta fag somagad gin Pilato fag is Barabas kat falfason. 12Is Pilato naintaw has taw, iglwang sadi ya ginan, No kitonya, kana araw angko ibolonon has nwa fag ama ka hayo faglwangon gorangon manga Hodyo? 13Ta nanarawagan di ngap, Fapakowan wa hanya sas nafatimbangan hayo. 14Ginyas Pilato gintaw ya domwag has taw, Kana mayon? Kana kat naibolon dwat? Dapat ta labi wan nanarawagan marigon, Fapakowan hanya sas nafatimbangan hayo. 15Maskin is Pilato kasaya kitay ka fakaaywanan fag manga taw fag igbaya hanya, ya nafalfas in Barabas. Ginya madis Pilato no nafabakbak in Hisos it manga sondalo, nafabahala hanya has taw kaarakitay ta fapako hanya sas nafatimbangan hayo. 16Yakanga ka manga sondalo nataban in Hisos hasta gorangon basad balay dahol. Ta nafatifon sadi wak habanan sondalo san Hisos dayo. 17Ka manga sondalo nafasolong di nga hanya sadik rotay aba, boragaw. Ta nahoskos di lamnon madogi a, nafasangbaw tonya in Hisos baba alfoyo. 18Ginya ka manga sondalo igsway odi in Hisos, iglwang, Anod, kafiyaon mangharaw ka gorangon manga Hodyo. 19Ta nabakbak in Hisos boknga alfoyo pinotol bagahay. Tagtofay hanya hanggan igsway odig lingkohodan hanya. 20Ginya madi ta nonsagaya wagyod hanya, ta naloslos ya ka rotay boragaw, nafasolong ya in Hisos sadili rotay, hanggan nataban wa hanya has dayo, kaarakitay pomako wan sas nafatimbangan hayo. 21Araw, ta no sawas boknga dalan, ta nahablang sadik ama goli has banwa git iyab, kawas Simon, taga Sirini, inda Alihandro da Rofo ama. Ka manga sondalo napilit wa nafafasan hanya ka nafatimbangan hayo kasta fag fapakowan araw in Hisos. 22Ta nataban in Hisos ha sadik foyo, tagngayan Golgota, it kahologan Botol Alfoyo. 23Ka manga sondalo nafagamit in Hisos langgaw ha aktom lamnon mira. Dapat is Hisos nadayo di. 24Manga sondalo napako in Hisos sas nafatimbangan hayo, ginya ta nangafodan wan in Hisos manga rotay, tagpostahan no kinday nogfahafod. 25Myanit faginan wa kaabwat ta no napako in Hisos sas nafatimbangan hayo. 26Kasta sombong masoratan sat tongod alfoyo iglwang, Ka gorangon manga Hodyo. 27Gis nanya yadi ta nafapako dowak tolisan, insadi san Hisos balis sihon, insadi san Hisos balis wala. 28In-anod kansorat sas Kasoratan kitay, Ta nafatimbang hanya bilang sadik taw ha kasalanan. 29Ka manga taw kagdalan sinya, igmaswag, igyod, mabaringan odista alfoyo, taglwang, Nabi, anod, haw ka domwat nangos ka Fanimbaan-Dahol, ginya fatobo ya tolo lamang ik sirang, 30kati, bawiyan hyamo sadili. Fag dokson lamang gis nyamos fatimbangan hayo. 31Kitonya yadi ka manga fagtahinan fagalan-han-Diyos, hanggan ka mangag faadal Batasan Hodyo noglibak in Hisos, tagtoltolan, Bati hanya nabawi ongay ka tiba taw, dapat not sadili wa habilogan, idyadi wa syagan igbawi. 32Tagmaswag iglwang, Tonya fag in Diyos-natogon-Famawi, ka gorangon manga Israil, fag domokson nga kati gis nwa fag nafatimbangan hayo. Nontam wa mata lagan, tam imtiwala wan. Ka manga tolisan kanpako yadi san Hisos akbang nafasidyowan yadi hanya. 33Ginya madi yabay, gis boknga wa sirang fiya fiya, balis myanit kabohid wan, sadi wak dahonya banwanan inharom wan. 34Myanit no kabohid wan, is Hisos natawag marigon sas fangampangan Aramaik, Iloy, Iloy, lama sabaktani? It kahologan, Angko Diyos, angko Diyos, kana mayon haw nogfabayaan angko? 35Tiba taw ka sinya malindogan, no nadog kitay is Hisos igtawag kitonya, taglwang, Yabay, igtawag in Iliyas. 36Sadik taw nadalandan wan natogna famasopsop has basad langgaw maiglis, nasongkit sas tobwan bagahay, ginya nafasopsop in Hisos, iglwang has fakaaywanan, Faya, tam bomantay yap, ngatay is Iliyas imbangkad araw kaarakitay fadokson hanya. 37Is Hisos natawag ya domwag marigon, ginya nafos wat ipsaw. 38Ginya yabay, ka fanahop rotay sas fagbokngan Fanimbaan-Dahol inragyang sadi odi ginan, gis tongod has daga baliwa, namokngan wan. 39Ka fagtahinan sondalo ka masayangowan in Hisos, no nalag no kinday in Hisos ipsaw no nafos, iglwang kitay, Bonwa bohag to fag ama in Diyos wa Anak. 40Ha akwa yadi manga ina sinya mabantayan gis ayayo. Tonya fag manga ina tiba kawa da Mariya Magdalina, da Mariya inda Santyago sangay ina, hanggan in Hosi ina, hanggan is Salomi. 41Gi yapdis sakop Galiliya to fag manga ina nogtahin in Hisos hanggan igtogbong hanya. Ha akwa yadi sinya tibak ina aywan kan Hisos manga ofod no hawas Hirosalim itfagonan. 42Kawa myanit kasangday wan sas Sirang Famatalagan hanggan no marom Sirang Kafahowayan, is Hosi, gis banwa Arimatiya, inrigon it fangayofan, hawan Pilato, nasagad in Hisos habilogan. Is Hosi sadik ama ha kangayanan, sadi sas fanoltolan manga fagtahinan Hodyo. Hanyag fanaya no ginahin is Diyos nogfabago it sakop. 44Dapat is Pilato gadowan ngatay is Hisos idya ha lahaw natay. No nafatawag ka fagtahinan has manga sondalo, naintaw hanya is Hisos ngatay natay wa ngay. 45Is Pilato no nadog gis fagtahinan manga sondalo kawas Hisos natay wa ngay, nafaangay kitay is Hosi bol wa nga kan Hisos habilogan gis nafatimbangan hayo. 46Is Hosi nasali sadik homot madamol fag rotay kafiyaon, ginya nabol in Hisos habilogan, nasafot basad homot. Ginyas Hosi nafaigyan in Hisos habilogan sas basad natigib lohib bato. Ginya madi nafabalolang bato dahol dahol it tahop sas sakbawan lohib. 47Da Mariya Magdalina hanggan da Mariya in Hosi ina mabantayan yapdi hanggan ta nalag no sida nafwalid in Hisos habilogan.

will be added

X\