MARKOS 14

1Kati dowa yak yabi bago dista Fanohodan Nagsagayan, ta nogtohod ka anghil nogsagaya ista balay hyabi, hanggan ka Fanohodan Tinapay Mayangfis. Ka manga fagtahinan fagalan-han-Diyos, hanggan ka mangag faadal Batasan Hodyo, igsayak it halimbawan no kinday ara ta no gomamat mafyaloman in Hisos hanggan wagfahatay hanya. 2Maskin fag idwa hono sas Fanohodan, ngandayo manga taw mangagran wan. 3Da Hisos no sawas Bitanya san Simon balay, ka Simon ka ha kitong hyabi, sadik ina naakbang in Hisos, ha diya sohadan alabastoro fag bato, napno famabanglo nardo, idwa ha aktom iba, dahol it sali. Is Hisos no sas bilog fanganan, ka ina nabolang ka sohadan, nabohos ka famabanglo han Hisos boknga alfoyo. 4Dapat ha manga taw tiba sinya kahori odit manga fangayofan. Ista fangayofan iglwang, Anogon di famabanglo, 5balay balay no nafasali yapman tonya, bondi tolok gatos dinaryo haraw, ginyan disag has manga myabog it sali. Ta nangabaya ka ina. 6Dapat is Hisos nalwang kitay, Ham fabayaanan wa ka ina, kana ham no kabaya hanya? Kafiyaon to kat naibolon hangko. 7Maskin ka manga myabog idwa ha fagalinan gi hayo akbang, nyawa ginahin ham no kasayag togbong has myabog, ham tomwa wan, dapat aho idwa fagaba maofodan hayo aban. 8Ka ina naiblon kat fagsyaganon kati, nagona wa nabohos famabanglo, maskin igfatalaga angko habilogan has lobgoban aban. 9Hogfwayong hayo, bonwa bohag, nyawa siday, sadik baba daga, ta no tomoltol ka Fiya fag Barita aban, ta fagaba wa aba omowas to fag ina it naibolon, yakanga tomohod hanya fagaba. 10Ginyas Hodas Israkiyoti, ka sadi gis Safolo-ha-Dowa, hawas manga fagtahinan fagalan-han-Diyos kaarakitay goyon in Hisos manga kalaban. 11Ka manga fagtahinan fagalan igbaya wan ta no nadog kitay is Hodas goyon is taw. Taglwang ta tomangdan ara hanya. Ginya wa ginan is Hodas gisip no ginahin no somyagan wa fagamat has taw in Hisos. 12Ka sirang gona ta no kwan Tinapay Mayangfis indasog wan hanggan gis nanya yadi fag sirang tagsogba ka anak topa fangafiyan kawa hasta Yafon Fanohodan Nagsagayan. In Hisos manga katogbong naintaw hanya, kitay, Siday nangos araw hyamo fakasayaon hami nogfatalaga intam Yafon Fanohodan Nagsagayan? 13Is Hisos nasogot katogbong dowa, nalwang kitay, Ham, fag hawas basad banwa. Ham homablang araw sadik ama ka ha songgoy tapayan fwalidan danom. Ham tahinan wa hanya. 14Nyawa haday hanya no somakbaw, intawan hasagfon balay, fag lwang kitay, Kagfaadal has taw iglwang, Siday fag lingoban araw angko fasakbawan famaklay kaarakitay manayowan yadi, angko manga katogbong no kwan intam Yafon Fanohodan Nagsagayan? 15Hanya falag ara hayo sadik lingoban dahol, matalagaan, sas tongod fag salogan. Ham fag fatalaga intam Yafon sinya. 16Ginya madi in Hisos manga katogbong inlahaw wan, hawas banwa, hanggan ta nalag wa fagayo kito kan Hisos fwayong, yakanga ta sinya wak nafatalaga ista Yafon Fanohodan Nagsagayan. 17Ginya madi araw, no kayabi wan, is Hisos hanggan it manga katogbong, safolo ha dowa, ta fagayo sinya wan. 18Ta no sas bilog fanganan, kwan yapdi, is Hisos iglwang, Hogfwayong ha hayo, bonwa bohag, insadi sa hayo kaoyon angko kalaban, sadi kagsayo angko kati. 19Ginya madi ka manga katogbong inrongkot wagdog, igsadig sadi gintaw kitay, Aho awkin kam faglwangon? 20Is Hisos nasagot kitay, Sadi sas Safolo-ha-Dowa, angko kasayo kati igtogna tinapay sas basad mangkok. 21Maskin aho, Kanbali Taw, kaakbang wa kalahaw kito kansorat hyabi, kawa angko dalanon, dapat ay, isyay wan, angko ofod ka goyon angko manga kalaban. Fiya man hara ha hanya, hanya nodwan sagaya git ina hyabi. 22Ta no kwan yapdi, is Hisos nabol tinapay, nabaya in Diyos, nafaarogbotan, ginya nadisag has taw. Is Hisos iglwang, Toy angko habilogan, ham fag bol. 23Ginya madi is Hisos nabol ka fanginoman ka ha sohad danom obas, nabaya in Diyos, ginya nafagamit is taw. Ta fagayo nainom wan. 24Ginya madis Hisos nalwang has taw, Toy angko folot kagfaganit intam taranggapan. Angko folot kamwatwat kawa has fakaaywanan fag manga taw. 25Hogfwayong ha hayo, bonwa bohag, hodwa ominom domwag danom obas, nodwa aban ya aho no ominom bago fag danom obas san Diyos sakop banwanan. 26Ta no nangambahan sadik ambahan, tanlahaw wa a, hawas Moyod Oliboan. 27Ginyas Hisos iglwang hat manga katogbong, Ham fagayo omobon wangko, maskin insorat sas Kasoratan kitay, Ho fahatay ka fangano, ginya madit anoon fag manga topa manarowayan wan. 28Dapat ay aban, aho nomboyag ya domwag, aho gomona wa hayo has sakop Galiliya. 29Is Pidrog lwang han Hisos kitay, Nyawa ta fagayo omobon hyamo araw, hodwa omobon hyamo. 30Ginya madis Hisos nalwang han Pidro, Yatokitay, lag nga araw, araw basad yabi, bago it fadowa ginan fag kataraok tabag, tolo ginan haw tomangkod angko has taw. 31Dapat is Pidro marigon wagfwayong, Nyawa ta hanggan wa fahatay intam dowa, hodwa tomangkod hyamo has taw. Ka tibak manga katogbong iglwang yadi kitonya. 32Ginya madi da Hisos nalahaw wan, hawas sadik foyo, taglwang, Gitsimani. Is Hisos iglwang hat manga katogbong, Ham fag matokawan yap istay, aho nogdarangin yapdi. 33Ginyas Hisos nataban inda Pidro da Santyago da Hwan. In Hisos fangayofan igfabago wagdog marongkot, galibitan wan. 34Is Hisos nafwayong handa Pidro, Angko karongkotan bilang wa kodkod sangko basad fangayofan. Hogdog angko kahoriyan ho bilang wa kahatay wan. Ham fag mafanayan yapdistay, matagahan. 35Is Hisos nonayayo ogbot gis taw, iglohoban wan sas baba daga, igdarangin kitay, no katwa di nangos, ka gis nanya fag mahori fag kasohodan, fag somagaya lamang hanya. 36Nalwang kitay, Mama, angko Ama, idwa hagsagaya hyamo fagsyaganon. Fag bol nangos gingko to fag fanginoman kahoriyan kati. Dapat, nyawa hoglwang kitonya, fag hyamo kafangayofanan kam-anod, bohonwa angko. 37Is Hisos nonfwali ya hat manga katogbong tolo, nalag kitay ta matoyogan wan. Nafwayong han Pidro, Simon, haw awkin matoyogan? Haw awkin idwa gagwanta mafolawan matagahan mangharaw, ngadi sik tama sinyahod? 38Ham fag matagahan, fag darangin wan kaarakitay idwa hagfaloksowan hayo. Ka fangayofan orongan wa kasaya has fiya, dapat ka habilogan malombay. 39Fadowa ginan is Hisos nasaman ya gis taw a, nandarangin, kito mandi ka haraw. 40Sadi ya ginan is Hisos infwali ya hat manga ofod, ya mangharaw, ta matoyogan ya ngawan, maskin ista mata matapyaton. In Hisos manga katogbong kaya wan, idwa twag sagot hanya. 41It fatolo fag swali araw is Hisos naakbang ya, ginya nalwang handa Pidro kitay, Ham awkin matoyogan yapdi, mafahowayan odi, fiya wan. Yabay, kati wan, ka yadi angko ofod ka goyon angko kalaban igfagamat angko, aho Kanbali Taw, has manga taw dwat. 42Ham ha kalibang, fakabangon wan, tya wan, kangko ofod ka goyon has taw. 43Sadi wa ginan, is Hisos no kampang yapdi, is Hodas, sadi gis Safolo-ha-Dowa, indasog wan. Ha taban kaaywanon fag manga taw, salawidan manga talibong, mabitbitan manga pinotol. Ka manga fagtahinan fagalan-han-Diyos, mangag faadal Batasan Hodyo, hanggan manga fagtahinan sas banwa ka nasogo tonya fag manga taw. 44Ta nodyan dasog sinya, kanoyon has taw danwa nafatohoyan is taw, iglwang kitay, No sida kangko ayohon fag ama, tonya wan kantam iktanon. Gamatan wa dagos tonya. Tabanan wan. 45Is Hodas nondasog wa sinya, naakbang wa dagos han Hisos, iglwang kiti, Haw kagfaadal has taw. Ginyas Hodas naayok in Hisos faringfing. 46Manga taw natoklos in Hisos a, nagamat hanya. 47Dapat insadi ka malindogan akbang sinya nagonos it talibong a, nabasing ka gorangon fag fagalan sogowan, natigbas it talinga. 48Ginya madis Hisos nalwang has fakaaywanan fag manga taw kitay, Aho awkin tolisan, ham gayfan, maskin ham ha diya manga talibong, mabitbitan manga pinotol famogfog, kaarakitay gomamat angko? 49Sirang sirang ho gofod hayo igfaadal basad Fanimbaan-Dahol, bati ham idwa gamat angko gis nanya. Dapat fag im-anod wan no kinday kansorat sas Kasoratan. 50Ginya madi in Hisos manga katogbong fagayo naobon in Hisos idwam dowa, nalagyo dan. 51Sadik anahan maholimpayan homot goyan yadin Hisos. Manga sondalo nagamat yadi hanya, 52dapat ka anahan nalfas di, it homot odi kangoyan sasta gamat. Nalagyo idwa ha rotay. 53Ka manga nagamat in Hisos nataban hanya has gorangon fag fagalan-han-Diyos. Ka manga fagtahinan fagalan fagayo, ka manga fagtahinan sas banwa hanggan ka mangag faadal Batasan Hodyo matifonan yadi sinya. 54No kitay di, is Pidro goyan haraw in Hisos, dapat ayayo sat ginanan. Ginya, nondasog sas gorangon fag fagalan it balay, is Pidro nasakbaw has basad aladan, intokaw maofodan yadi has manga bantay sondalo, mafanayangan afoy. 55Yabay, ka manga fagtahinan fagalan-han-Diyos hanggan ka tifonan manga fagtahinan Hodyo fagayo igsayak manga taw ka bomangdan in Hisos kaarakitay ta fahatay hanya. Dapat tadwa ha lagan it fagbohagon han Hisos. 56Maskin ha akwag bangdan hanya, dapat idwa pariho ista fwayong. 57Dapat ha akwa yadi tiba nalindog, nabangdan in Hisos, iglwang kitay, 58Mi nadog to fag ama igfwayong kitay, Ho domwat to fag Fanimbaan-Dahol ista gamat nahalig. Dapat ay, sas tolo lamang ik sirang, ho fatobo ya sadi yak Fanimbaan-Dahol, bonwa gamat taw nahalig. 59Dapat nyawa kitonya, ista bangdan idwa myasa kitonya. 60Ginya madi ka gorangon fag fagalan-han-Diyos nalindog sasta fagbokngan, naintaw han Hisos, Haw awkin idwag sagot? Kana tonya kasta sombong kawa ha hyamo? 61Dapat is Hisos idwa naawang, idwa yadi nasagot. Ka Gorangon fag fagalan naintaw ya domwag in Hisos, nalwang kitay, Haw awkin in Diyos-natogon-Famawi? Haw awkin kantam Fagbayaon, it anak? 62Is Hisos iglwang, Ala, aho ngay. Aban ham lomag yadingko, aho Kanbali Taw, matokawan sat akbang, sat balis sihon, kadwa ha bosal. Ham lomag yadi wangko, kadasog aban sas baba manga linyabo gin Diyos banwanan sam tongod. 63Ginya madi, ka gorangon fag fagalan-han-Diyos naragyang it sadili solong rotay, nalwang, Kana mayon tam nogsayak yapdi ista sombong tiba taw? 64Ham ngap fadi wad nadog kati, gi wa ngap it sadili bibig, igsway wa orongan in Diyos. Kinday hayo fangayofan? Fagayo fagayo nafatohoyan kitay ka fiya fahatayan in Hisos. 65Ginya madi ka tiba igtofay in Hisos. Tagtaklob it mata, ginyag sontok hanya, bago diglwang, Sogi, boktongan. Ginya ka manga bantay sondalo natofa yadi marigon in Hisos. 66Is Pidro no sayapdista basad aladan, ka gorangon fag fagalan sogowan ina sadi inbangkad yadi sinya. 67No nalag in Pidro igfanayang afoy, nabantay hanya fiya fiya, ginyag lwang, Haw mangharaw tonya fag ama it ofod yadi, kawas Hisos taga Nasarit. 68Dapat is Pidro natangkod wan, iglwang wa hanya fag ina, Twa man. Hodwa twagdog im faglwangon. Is Pidro igfatawas wan, hawas bilog sakbawan alad. 69Ka sogowan ina nalag ya in Pidro, nafadahit ya has manga taw ka manga malindogan sinya kitay, To fag ama in Hisos wa nga ofod. 70Dapat is Pidro sadiya ginan natangkod. Ginya madi, araw araw ogbot, ka manga taw sinya, sadi ya ginan nalwang han Pidro, Yabay, haw it ofod yadi wa sadi, matohoyanan wan, haw taga Galiliya yadi. 71Dapat is Pidro natangkod marigon, iglwang, Nyawa ho matay wan, orongan wan hodwa kilala tonya fag ama hayo faglwangon. 72Ginya madi ka tabag dagos wa nataraok it fadowa ginan. Is Pidro bago di natohod in Hisos fwayong hanya kitay, Ka tabag nodyag taraok it fadowa ginan, tolo ginan haw tomangkod has taw angko. Ginya madis Pidro naoraw wa marigon.

will be added

X\