MARKOS 13

1Da Hisos nogdokson gis basad aladan Fanimbaan-Dahol, it katogbong sadi iglwang kitay, Haw kagfaadal, lag nga kin, to fag manga bato gorangon, hanggan dahol fag manga balay, kafiyaon kabantay. 2Dapat is Hisos nasagot kitay, Nyawa kitay kati haglag kafiyaon to fag manga balay gorangon, aban idwa hamgoyan dowak bato igtarongbawan, fagayo imrofad lamang. 3Araw, da Hisos no matokawan sas baba Moyod Oliboan, sas masohod Fanimbaan-Dahol, da Pidro da Santyago da Hwan da Andris naintaw in Hisos, idwa sasta fagdogan fakaaywanan, 4iglwang kitay, Ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay to fag manga bagay kaanod wan? 5Ginyas Hisos iglwang has taw kitay, Ham fag matagahan. Ham fag idwa gadayaan nyawa faktaw, 6maskin aywan kambangkad aban, ngomayan yadingko ngayan, lomwang hanya wa kan Diyos-natogon-Famawi. Ta fatalang aywan fag manga taw aban. 7Ham no domog aban ka manga madalagdog gis awayan, hanggan manga barita awayan dahol dahol, ham fag idwa galibitan, maskin talaga wa kitonya kamlag aban, dapat bonya tonya ka katabowanan. 8Maskin aban ka manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. No sida no siday aban ka daga lominog, ha manga banwanan idwa aba ha hanon hanon, dapat to fagayo kat fabagowanan lamang kahoriyan. 9Ham fag matagahan hayo sadili maskin ta fagamat hayo hasagtalinga hampangan aban. Ta fabakbak hayo sas manga fanimbaan Hodyo. Maskin aho hayo fagalwasiyon, ham aba lomindog sas atobangan manga gobirnador hanggan manga gorangon, ham mamaorongan yadi sasta fagdogan. 10Dapat ay, ta nodya natoltol fiya fiya ka Fiya fag Barita has fagayo fag manga layonan taw, ka katabowanan fagayo idyam lag. 11Ta nogtaban hayo hasagtalinga hampangan, hanggan fagamat hayo has taw, ham fag idwa galibitan hayo bato fwayongon, dapat no kana ka nafatohod hayo gis nanya, fag tonya wan kam fwayongon, maskin im hampang aban idwa gi hayo sadili fangayofan, dapat gis Falad Maliyaw ka faisip hayo. 12Gis nanya fag masohod aban, kayadit fadwasay kagfagamat it fadwasay has iba taw kaarakitay ta fahatay hanya, kitonya yadi kat ama hat sadili yadi anak. Manga anak lomaban it magorang, fasognod has iba taw kitay fahatayan wan. 13Maskin aho hayo fagalwasiyon, fagayo fag manga taw kadwat iglag hayo aban. Dapat kadwag fagomon hanggan wa has katabowanan, yabay hanya wa kambawi. 14Dapat aban ham lomag kagsagaya wa ogali fag dwat, idwa ha fag kitonyan infwalid sas idwa fiya fwalidan. Kagbasa fag tomwa wagdog tonya. Nom-anod aban, ka manga taw sas sakop Hodiya, fag dan waglagyo has moyod. 15Ka sas sokayan balay fag idwam libang somakbaw domwag has basad balay kaarakitay bomol it botang. 16Ka sas iyab, fag fawa goli kaarakitay bomol it rotay. 17Isyay wan, no ka yangadi manga gabosog hanggan ka ha manga anak ogbot, igfasoso yapdi gis nanya fag masohod aban. 18Ham fag darangin kakitay to fag manga bagay fag idwa tomoon dayo abagat. 19Maskin gis nanya fag manga sirang manga taw domog mahori wa dahol dahol. Gi yapdis hyabi, is Diyos no bago di nahalig ka daga, balis kati, tadya ha nagdogan kitonya fag mahori, hanggan idwa yadi domog mahori man inya aban. 20No bonwas Diyos kagfatohas ngalay tonya fag manga mahori, idwa hamsawad manga taw, ngadi sadi. Dapat ay, maskin is Diyos kaawa yapdit manga nafili fag manga taw, hanya ngalay digfatohas tonya fag manga mahori. 21Aban, no ha akwag fwayong ha hayo kitay, Istay wan kan Diyos-natogon-Famawi, ngatay sinya wan, ham fag idwa katiwala. 22Aban ha akwa mangag faniring in Diyos-natogon-Famawi. Ha akwa yadi manga bohagon fag fangampang imbangkad. Ta mamalag aban manga madolaw fag manga falagon, hanggan manga fatimawa, kaarakitay fatalang in Diyos manga nafili, no somyagan di. 23Yabay, ham fag matagahan. Ho dan wa nafadog hayo fagayo kamlag aban. 24Dapat gis nanya fag manga sirang, tonya fag manga kahoriyan nomtolas wan, Ka myanit imharom, Ka magdanon idwa yomawa. 25Ka manga fanggasan imdagdag yadi gis banwa sam tongod, Hanggan ka manga karigonan sam tongod sas boknga fakayawan imhadhawigan wan. 26Ginya madi ta lomag angko, aho Kanbali Taw, kadasog sas baba linyabo, ha karigonan dahol hanggan kangayanan abwat. 27Ginya madi aho, Kanbali Taw, somogo angko manga anghil, fatifon angko manga nafili fag manga taw gis ofat ik fongfongan daga gis fagayo fag manga banwanan. 28Ham fag twagdog ka adal kawa gis fon igos. Nogsalingsing, igsofot wan, tam twa kitay ka fangaraw kaakbang wan. 29Kitonya yadi ham noglag to kangko manga nafwayong kaanod wan, ham tomwa kitay aho, Kanbali Taw, kaakbang wa kadasog, sawas sakbawan alad. 30Hogfwayong hayo, bonwa bohag, to fagayo im-anod wan ka kati fag masohod fag manga taw no boyagan yapdi. 31Ka banwa sam tongod, hanggan ka daga imliyam wa aban, dapat ay angko hampang idwam liyam nyawa ginahin. 32Dapat idwa ha taw twa no ginahin fag sirang, no kana fag oras gis nanya tonya nom-anod. Nyawa ka manga anghil ka san Diyos banwanan sam tongod, nyawa aho in Diyos anak, no bohonwas Diyos angko Ama, idwa ha twa no ginahin. 33Ham fag matagahan, fag danwa matalagan maskin ham idwa twa no ginahin fag masohod kangko nafwayong nom-anod. 34Kitos sadik taw mamaklay has ayayo, halimbawa. No kalahaw igtogon yap igfaano it manga sangkap has taw, igfahafod hat manga sogowan ista bato ibolonon. Ginyag togon yadi hasagbantay sakbawan kitay, fag fagaba matanodan. 35Kitonya yadi ham fag matagahan maskin ham idwa twa no ginahin kagfon balay nomdasog, ngatay kayabi, ngatay boknga yabi, ngatay manok igtaraokan wan, ngatay dayo marom marom. 36Ngandayo hanyam dasog sadi odi ginan, tomahod hayo kalibang odi matoyogan. 37Kangko fwayong ha hayo, hogfadog yadi has fagayo fag manga taw, ham fag danwa matagahan.

will be added

X\