MARKOS 12

1Is Hisos igfabago igfahalimbawa ya has taw iglwang kitay, Ha sadik taw nananom manga obas sat baba daga, maaladan ya ngadi. Natigib dalifi yadi ista fanlidan obas. Nahalig sadik ansagan abwat, ista bantayan, nafabahala it obasan hat manga fangano, ginya nalahaw hawas ayayo. 2Nondasog was famohadon, famangtaon wan, kagfon obasan nasogo wat sogowan sadi kaarakitay mamol ista horay hanya bohad obas. 3Dapat ay ka manga gano obasan nabakbak di ngap kat fon sogowan. Ta nafaoli wa gominan, idwa ha diya. 4Ginya kagfon obasan nasogo has manga gano obas, sadi yak sogowan. Ta kaisog ya ngay hanya, nafabaran hat boknga alfoyo. Ta nafahayan ya ngadi hanya. 5Fatolo wa ginan kagfon obasan nasogot sogowan. Ta nafahatay wa hanya. Hanggan wa ka tiba sogowan ayo dogay dogay. Tiba ta nabakbak yap man, dapat tiba ta nafahatay wan. 6No dogay, ka odit fakaawaon fag anak ama kan-goyan sa hanya. Yakanga hanya ka goyan goyan kat nasogo. It fangayofan iglwang kitay, Gwadi ta gomalang wa nangos angko anak. 7Dapat ka manga gano tanom nanoltolan yap kiti, To wa aba ka omafo it ama kaakwaan. Kalibang, tam fahatay wa hanya, ngan aba tam wa ka omafo ka obasan. 8Yakanga ta nagamat hanggan wa nafahatay hanya, ginya naokas lamang it habilogan has dayo alad obasan. 9Kinday nangos ham gayfan, kagfon obasan ibolonon hat manga fangano? Anod, hanyam bangkad, fahatay yadi wa ka manga gano, ginya faano ya has iba taw. 10Ham idya awkin nabasa to fag toltolan gis Kasoratan? Ka manga fangalig balay fagdayoon fag bato, Tonya di ngap kagfaganit ka balay sas basad solok. 11Tam kadolaw waglag, To in Diyos naibolon. 12Yakangan Hisos manga kahampang kasaya gomamat hanya, maskin ta nasalom kitay hawa ngap ista manga sadili in Hisos fagfatangonon sat natoltol halimbawa. Dapat tadyapdi nagamat in Hisos kawa ta kadala ka fakaaywanan fag manga taw. Yakanga gis nanya ta nwali yapdi, naobon wan Hisos. 13Ginya madi ta nasogo han Hisos manga Farisiyo hanggan tiba gin Gorangon Hirodis manga sakop, kaarakitay igsayak fabangdanan gin Hisos hampang. 14Tagmaswag odi hanya, taglwang kitay, Haw kagfaadal has taw, mi twa kitay haw idwag bohag, haw idwa ha fagihidon taw, maskin hagfapariho wan di fagayo fag manga taw, hanggan sonson wa orongan kam faadalon has taw kan Diyos fakasayaon ista manga ogaliyon. Maangay awkin sas Batasan Hodyo tam nogbayad bohis han Sisar, ngatay idwan? 15Ngatay tam fag bohis yadi, ngatay fag idwan? Dapat maskin is Hisos twa kitay tagfataka odi, is Hisos igsagot has taw, iglwang kitay, Kana mayon ham nogtikis wa nangos igfasalan angko? Falagan angko sadik kwarta mabilog, diyan hastay. 16Ginya ta nafalag ngay sadik kwarta mabilog han Hisos. Is Hisos naintaw has manga taw kiti, Gafo tolad hanggan ngayan insorat istay? Tagsagot, In Sisar wa nga tolad tonya. 17Ginyas Hisos iglwang has taw, Kan Sisar disagan wa han Sisar, kan Diyos disagan wa han Diyos. Tandolaw wagdog in Hisos sagot. 18Ginya madi manga Sadosiyo, kagfabohag kitay ka manga natay idwam boyag ya domwag, gakbang han Hisos. Taglwang kitay, 19Haw kagfaadal has taw, is Mwisis nasorat it togon hantam kitay, Sadik ama no ha fadwasay ama natay, dapat it babay in-goyan dit indogan, idwa ha anak, ka ama fag babay kat tagyaw ka balo, kaarakitay no ganak, bilang man di ka natay it ama. 20Yabay ha tasayan fitok ama kagdowasayan. Kasta ahan nababay, ya ginya no katay idya ha anak. 21Ka masoson it ahan nababay yat tagyaw kanbalo, dapat natay yadi wan, idwa yadi ha anak. Kitonya yadit fatolo wan. 22Hanggan wa kat fafito fag indogan, ka ina idyadi wa naanak. No natay wa fagayo fag tasayan ama, hanggan ka ina natay yadi wan. 23Yabay, gafo babay tonya fag ina ta nomboyag ya aban, kawa ka fitok tasayan nababay hanya istay? 24Is Hisos nasagot is taw, nalwang kitay, Ham fagaba wagfalamang maskin ham idwa twa ka Kasoratan hanggan ham idwa yadi twa in Diyos karigonan. 25Maskin manga taw nomboyag ya gis kahatayan, manga taw fawag babay, gindogan gis nanya aban. Tambali kitos manga anghil san Diyos banwanan sam tongod kadwa yadig babay. 26Dapat ay, kawa has manga natay no kaboyag ya, ham idwa awkin nabasa gin Mwisis nasorat, kawa no sas kakbang fon hayo libaba hyabi, is Diyos nafwayong hanya kitay, Aho in Abraham wa Diyos, aho in Isaak wa Diyos, hanggan in Hakob yadi Diyos. 27Ka manga taw boyagan lamang kan Diyos fagsakopon, bonwa ka manga mahatayan. Ham noglwang kitay taw idwam boyag ya, ham igfalamang wa orongan. 28Kati kati haraw, sadik ama kagfaadal Batasan Hodyo naakbang inda Hisos. Nadog manga taw nogdaraogan hanggan nadog yadi in Hisos sagot kafiyaon. Yakanga, hanya naintaw yadin Hisos, Sida fag togon sas Batasan Hodyo ka marigon man has fagayo fagayo? 29In Hisos sagot kitay, To fag togon ka marigon man has fagayo fagayo kitay, Ham, in Israil manga ha sokfonan, ham fag matalingan, is Diyos kagfon intam sadi lamang, idwa ha akwa tiba Diyos. 30Haw fag galwasi in Diyos kagfon hyamo, fag sadi wak dahonya fangayofan, sadi wak dahonya isip hanggan sadi wak dahonya karigonan. 31It fadowa fag togon kiti, Haw fag galwasi im kapariho taw kito yadim sadili. Idwa ha togon iba marigon man to fag manga togon. 32Ginya kagfaadal Batasan Hodyo nalwang han Hisos kitay, Anod, haw kagfaadal is taw, orongan wan hyamo fwayong, Is Diyos sadi di. Idwa ha akwa tiba Diyos. 33No galwasi hanya sadi wak dahonya fangayofan, sadi wak dahonya isip, hanggan sadi wak dahonya karigonan, hanggan no galwasi intam kapariho taw, kito yadintam sadili, tonya fagayo nom anod, bondi kito kantam manga nasogba hayopan kan irog sadik dahonya, hanggan tiba disagon fangafiyan. 34Ginyas Hisos no nadog kafiyaon it sagot, iglwang kitay, Haw mangharaw akbang han Diyos sakop. Ginya wa ginan fagayo fag manga taw fawag fasolopan han Hisos kaarakitay omintaw hanya, maskin tadwa syagan igfasalan hanya. 35Is Hisos nogfaadal is taw basad aladan Fanimbaan-Dahol, iglwang kitay, Kana mayon ka mangag faadal Batasan Hodyo noglwang kitay, In Diyos-natogon-Famawi in Dabid wa hasokfonan anak? 36Kawa ka Maliyaw fag Falad nogfaisip in Dabid, hanya mandi kaglwang, Is Diyos nafwayong hasagfon angko, Haw fag matokawan yap sangko balis sihon, no baliday hodya nafasakop fiya fiya ha hyamo im manga kaaway. 37Yabay is Dabid mandi kagngayan in Diyos-natogon-Famawi, kagfon hanya. Kinday hanya nogfon in Dabid, not sadili odi hasokfonan anak, ham gayfan? Ka fakaaywanan fag manga taw nabaya wagdog in Hisos fwayong. 38Is Hisos nogfaadal has taw, igfwayong kiti, Ham fag idwag sokfon ka mangag faadal Batasan Hodyo it manga ogali. Ta kasayag solong manga rotay aba aba, hanggan ta gwayan wa kasayag dog manga taw nogbaya hanya ta noglahaw basad banwa. 39No sas basad manga fanimbaan ta kasayag tokaw sas fanokawan ka manga ha kangayanan, hanggan ka manga fanokawan akbang hasagfon balay no sasta fanyahodan hanon aywan. 40Bohondi tonya, taglogos wa ngap manga ina balo banwanan, hanggan ista odi famadogan is taw ta nogdarangin kadogayon. Ka fadosaan kamtohoyan has taw aban mahori man ka tiba taw. 41Is Hisos natokaw sas akbang haban ista fandisagan kwarta basad Fanimbaan-Dahol. Is Hisos mabantayan manga taw kaaywanon nogfwalid kwarta sinya. Kaaywanon fag manga taw maakwa, aywan it manga nafwalid kwarta sinya. 42Ginya madi sadik ina balo myabog naakbang has haban, nafwalid sinya dowak saga, it halga nangos idya sika walo. 43Ginyas Hisos nafaakbang hanya it manga katogbong, nalwang kitay, Hogfwayong hayo, bonwa bohag, to fag ina balo myabog, it disag mahalga man kasta disag fagayo. 44Maskin ka tiba nadisag gi odista sadili labi kwarta, dapat to fag ina balo myabog, nadisag wa ka hanya sadik kayonya.

will be added

X\