MARKOS 10

1Is Hisos nalahaw wa ginya, hawas manga banwanan sakop Hodiya, hawas difay safa Hordan yadi. Sadi ya ginan manga taw kaaywanon inbarangkadan ya ngay han Hisos. Is Hisos nafaadal has fakaaywanan kawa dandi kitonyat ogali. 2Ha manga Farisiyo gakbang han Hisos, igtikis wa nangos igfasalan hanya. Yakanga ta gintaw hanya kitay, Maangay di aw has Batasan Hodyo ka ama no omobon it babay? 3Ginya madis Hisos iglwang has taw, Kinday in Mwisis togon hayo? 4Ta nafwayong kiti, Is Mwisis igfaangay di ka ama no domisag yap fangobonan kasoratan hat babay bago di gobon hanya. 5Dapat is Hisos igfwayong has taw, Kawa maganit hayo fangayofan yakangas Mwisis nasorat tonya fag togon. 6Dapat gis bago bago, is Diyos no nahalig manga taw, nahalig ama hanggan ina. 7Maskin kitonya, ka ama somaman git ama hanggan git ina, omofod hat babay. 8Nyawa dowa haraw, tambali sadi di. Yakanga ginya ginan fawa dowa, inbali wa sadi. 9Yakanga kan Diyos nafasadi, fag idwa ha taw igfasarowayan. 10Araw no sas balay, in Hisos manga katogbong naintaw ya domwag in Hisos kawa has manga godgobonan. 11Ginyas Hisos nafwayong is taw, Nyawa fakta fag ama no gobon it babay, ginyag babay has iba ina, igfabayowan, ha kasalanan wan hat babay gona. 12Ka babay no omobon it indogan, ginya omindogan has iba ama igfabayowan yadi wan. 13Ginya madi tagtaban manga anak han Hisos kaarakitay is Hisos tomawid ista manga anak. Dapat in Hisos manga katogbong nangabaya was taw. 14Is Hisos no nalag it katogbong naibolon, inhori dit fangayofan, igfwayong hat manga katogbong kitay, Ham hawa kabaya ka manga anak no gakbang hangko. Ham fag idwag bando tonya, maskin ka manga ha fangayofan kitos anak ka omafo in Dios sakop. 15Ham fag tohod kitay nyawa faktaw kat fangayofan kadwa kitos anak ogbot nogfasakop han Diyos, tonya fag taw idwam-aktom san Diyos sakop. 16Ginya madis Hisos nasafofo ka manga anak a, nahampang mahoway, gayohap odi kaawa. 17Da Hisos no kalahaw wan, sadik ama nadalandan han Hisos, nalingkohodan sat atobangan, naintaw hanya, Haw kagfaadal kafiyaon, kana ara angko ibolonon kaarakitay hombali ha haboyagan idwa ha katabowanan? 18Ginyas Hisos naintaw ya hanya kitay, Kana haw no nalwang kitay aho fiya? Is Diyos lamang ka fiya. 19Haw fadi wadtwa ka manga Batasan Hodyo kitay, Haw fag idwag fahatay taw, haw fag idwag fabayowan, haw fag idwag nahaw, haw fag idwag bangdan is taw, haw fag idwag daya iba taw, haw fag idwag falamang im ama hanggan im ina. 20Ka ama nasagot in Hisos, No kitay di, gingko ogbot ginan, ho katanog wa tonya fagayo. 21Yabay is Hisos nogbantay hanya, kabaya waglag no kitay di. Ginyag lwang kiti, Dapat ha ha korang yapdi sadik fakatwawon. Haw fag goli yap, fag fasali im manga botang fagayo fagayo. Ginya fahafodan has manga myabog it manga sali. Yabay, no kitonya, haw ha kaakwaan san Diyos banwanan sam tongod. Ginya madi haw fag hayastay, tahinan wangko. 22Ka ama kabayong odi, nalahaw wan, maskin hanya maakwa wa dahol. 23Ginya madis Hisos namarantayon has manga taw sat ligongan, nalwang hat manga katogbong kitay, Ka maakwa fag manga taw, mahorig fasakop han Diyos. 24In Hisos manga katogbong indolaw wagdog in Hisos fwayong. Dapat is Hisos naolit yat hampang has taw, nalwang kitay, Angko manga anak, mahori wa dahol igfasakop han Diyos. 25Malpos man ka hayopan kamilyo nogdalan has basad toho dagom, ha sadik taw maakwa nogfasakop han Diyos. 26In Hisos manga katogbong indolaw wa dahol igdog, ta gintaw in Hisos, No kitonya mangharaw, fakta fag manga taw kambawi? 27Ginyas Hisos no mabantayan hat manga katogbong, iglwang, No taw di, idwa ha somyagan omibolon tonya, dapat is Diyos syagan di omibolon fagayo fag manga bagay. 28Is Pidro igfwayong han Hisos kitay, Lag nga hami kati toy, mi naobon wa hyami akwa fagayo a, migtahin wa hyamo. 29Ginyas Hisos iglwang kitay, Hogfwayong wa hayo, bonwa bohag, nyawa faktaw no omobon yap it balay, ngatay it manga fadwasay, ngatay it ina, ngatay it ama, ngatay it manga anak, ngatay hanggan it manga daga, kawa ahot fagalwasiyon, hanggan angko Fiya fag Barita, 30hanya tomanggap kati kayonya fag gatos, nyawa manga balay, manga fadwasay, hanggan manga bilang wat ina, hanggan it manga anak, hanggan manga daga. Nyawa kitonya, manga taw igfahoriyan yapdi hanya. Ginya madi yabay, hanya lomag yadi haboyagan kadwa ha katabowanan gis nanya fag masohod nomdasog aban. 31Nyawa kitonya, aywan ka gona omoyan man, hanggan ka goyan gomona wa aban. 32Ginya madi da Hisos noglahaw has bohid, hawas banwa Hirosalim, is Hisos gona wa gona was taw. In Hisos manga katogbong kadolaw kitay is Hisos hawas Hirosalim. Ta kadala odi goyan. Is Hisos sadi ya ginan nafasaramanan ka Safolo-ha-Dowa gis fakaaywanan manga taw, ginyag fabago iglwang no kinday hanya no lomag mahori aban. 33Iglwang kitay, Yabay, tam hawas bohid has Hirosalim kati. No sinya wan, ta fagamat angko, aho Kanbali Taw, hasta manga fagtahinan fagalan-han-Diyos, hanggan has mangag faadal Batasan Hodyo. Tonya fag manga taw fatohoyan angko has kahatayan. Ta fabahala yadingko has manga Hintil. 34Ka manga Hintil yomod wangko, manga tomofay, manga bomakbak hanggan wa fahatay angko. Dapat ay, nomsagaya wa tolok sirang, ahom boyag ya. 35Ginya da Santyago da Hwan, in Sibidiyo manga anak naakbang han Hisos, iglwang kitay, Haw kagfaadal hyami, mi ha fagsagadon nangos gi hyamo, haw faangayan nangos. 36Is Hisos nasagot handa Santyago da Hwan, iglwang kitay, Kana ka hayo fagsagadon gingko? 37Ta nasagot in Hisos kiti, Aban, tam no sawam kafiyan, haw faangayan hyami fag ha kangayanan igtokaw sa hyamo akbang, insadi sam balis sihon, insadi sam balis wala. 38Dapat is Hisos nalwang has taw, Ham idwa twa hayo fagsagadon. Ham awkin syagan omagwanta ominom gingko fanginoman kahoriyan aban? Ham awkin syagan yadi fatogna hayo sas mahori, kito yadingko no fatogna angko aban? 39Taglwang, Ala, mi somyagan di. Ginyas Hisos iglwang has taw, Ham ominom ngay gingko fanginoman kahoriyan aban, hanggan ham fatogna hayo kito yadingko aban. 40Dapat bonwa aho ka bahalag fili no faktaw ka tomokaw aban sangko balis sihon, ngatay balis wala, dapat ka hayo faglwangon tokawan, danwan talaga no fakta fag manga taw ka tomokaw sinya. 41Dapat in Hisos manga katogbong tiba, ka safolo, no nadog ista fagsagadon, ta kahori wa dahol inda Santyago da Hwan. 42Yakangas Hisos nafaakbang ha hanya it manga katogbong fagayo, ginyag lwang, Ham fadi wadtwa ka manga gayfan kitay, hanya ka manga fagtahinan Hintil, ha takan nogbahala has taw, hanggan ista manga gorangon igbaya wagfasognod it sakop. 43Dapat ham fagayo fag idwa kitonya. Yatokitay, nyawa fakta sa hayo ka kasaya kabali abwat it kangayanan, fag kabali di ngap hayo sogowan. 44Nyawa faktaw ka kasaya kabali fagtahinan, fag kabali di ngap bilang hayo nasali sogowan. 45Kitongko, aho Kanbali Taw kanbangkad hastay, bonwa kitay aho kasta fagtogbongon, fag aho di ngap ka tomogbong is taw, hanggan igdisag angko haboyagan ka fangafiyan, kaarakitay tomobos has fakaaywanan taw. 46Ginya tandasog has banwa Hiriko, dapat ta noglahaw wa ginya, in Hisos manga katogbong hanggan ka fakaaywanan fag manga taw nahoyog yadi wan. Sadik ama bota, is Bartimiyo, fanagad fanagad odi, in Timiyo anak, matokawan sas bilog dalan. 47Is Bartimiyo, no nadog kitay is Hisos taga Nasarit kagdalan sinya, igtawag marigon, iglwang, Hisos, in Dabid hasokfonan anak, haw fakaawa wangko. 48Ginya madi ka fakaaywanan fag manga taw nangabaya in Bartimiyo, tadwag faawang nangos. Dapat kadahol di ngap nogtawag, mapiit wan, igtawag, In Dabid hasokfonan anak, fakaawa wangko. 49Ginyas Hisos intorosan, iglwang has taw kitay, Tawagan tonya fag ama. Ginya ta natawag ka ama bota, iglwang kiti, Hadwa ha fakadalaon. Fag lindog wan, is Hisos igtawag hyamo. 50Ka ama bota nabol it homot, nalokso, nalindog, naakbang in Hisos. 51Ginyas Hisos naintaw hanya kitay, Kanam fakasayaon angko bato togbongon hyamo? Ginya ka ama bota nasagot hanya kitay, Haw kagfaadal has taw, angko mata fag imfoga ya nangos. 52Is Hisos nasagot hanya kitay, Nyawa ha mwali kati, kawa haw igsyag wangko, im mata imfoga wa yabay. Gis nanya yadi dagos wanfogat mata, nalag wa fiya fiya. Yabay ka ama natahin wan Hisos.

will be added

X\