MARKOS 1

1Kito ka Fiya fag Barita nogfabago kawa han Kiristo Hisos, in Diyos anak. 2Hyabi hyabi is Isayas, in Diyos fangampang nasorat kitay, is Diyos iglwang, Fandog ngay, hogsogo angko sogowan ha hyamo fagonan, Kaarakitay igyawa hyamo bato lahawan. 3Kiti kat fwayong kagtawag marigon marigon sas basad fakahyabogan, Fatalagaan in Diyos bato lahawan, Fahaslongan it manga dalan. 4Ginya madis Hwan kagfatogna manga taw inbangkad wa ngay, igbanwanan basad fakahyabogan. Is Hwan igfwayong kitay, no fakta ka somoyo hanggan fatogna hanya, is Diyos faliyam it manga naogali dwat. 5Fagayo gis sakop Hodiya hanggan ka manga gis banwa Hirosalim, fagayo nagobok in Hwan. Manga taw nogbaya ista manga sadili naogali dwat, is Hwan igfatogna hanya sas safa Hordan. 6Gis nanya in Hwan rotay olad kamilyo mahaligan, anit yadit fagyahos, manga fan, manga dyahot it fanganon. 7Is Hwan igtoltol has taw, iglwang kitay, Ha akwa omoyan sangko ginanan ha kangayanan abwat man angko, ho kaya wan ngadi manlohas it famaganit lapak. 8Sas danom aho nogfatogna hayo, dapat sas Maliyaw fag Falad hanya no fatogna hayo aban. 9Ginya madi, gis nanya fag manga masohod, is Hisos inbangkad gis banwa Nasarit, sakop Galiliya, hanggan is Hwan nafatogna in Hisos sas safa Hordan. 10Is Hisos no kabangon gis basad danom, hanya nalag ka manga banwa sas tongod dagos wanboklas hanggan ka Maliyaw fag Falad kayokfo ha hanya kitos salompati. 11Ha sadik hasnog gin Diyos banwanan sam tongod iglwang kitay, Haw wa kangko fagalwasiyon fag anak, hogbaya wa dahol dahol hyamo. 12Ka Maliyaw fag Falad nadagos wa nafalahaw in Hisos has basad fakahyabogan. 13Is Hisos nadogay sinya ofat ik safolok sirang hanggan is Satanas nasolay igfaloksowan hanya. Manga odi myala fag hayopan banwanan sinya, dapat ay, manga anghil nafarigon in Hisos gis nanya. 14Ginya madi, ta no nagamat in Hwan kaarakitay igfaporiso hanya, is Hisos hawas sakop Galiliya, nanoltol in Diyos Fiya fag Barita. Is Hisos iglwang, 15Kati wa fag masohod im-anod wan in Diyos sakop, yakanga ham fag soyo wan. Ham fag katiwala ka Fiya fag Barita. 16Is Hisos nogdalan sas bahalan linaw dahol, tagngayan Dagat Galiliya, nalag inda Simon da Andris dowasay. Da Simon gokas sarap has basad danom maskin manga fangoyang. 17Is Hisos nalwang handa Simon, Ham tahinan angko. Ho fabali hayo manga fangiktan manga taw. 18Ginya ginan ta nadagos wa naobon it manga sarap a, nahin wan Hisos. 19Ta noglahaw yapdi, is Hisos nalag inda Santyago, da Hwan dowasay, in Sibidiyo manga anak. Da Santyago masahayan yadi sat basad baloto, igsip it manga sarap. 20Is Hisos dagos natawag wa ka dowasay. Ta naobon wan Sibidiyo, it ama, sas basad sahayan, ha ofod yapdi manga famalo. Ginya madi ka dowasay nahin wan Hisos. 21Da Hisos indasog wa has banwa Kapirnaom. No sas Sirang Kafahowayan, is Hisos dagos wansakbaw ha basad fanimbaan Hodyo, igfaadal has taw. 22Tantaka wagdog is Hisos nogfaadal has taw, maskin kitos ha kangayanan hanya nogfaadal, idwag hono, bondi kitos mangag faadal Batasan Hodyo. 23Sadi odi ginan sadik ama nasakbaw has basad fanimbaan, labang wa kagfahoriyan hanya. 24Ka ama igtawag marigon, kitay, Haw, Hisos taga Nasarit, kana haw nogmawat hyami? Haw awkin hastay kaarakitay domaog wa hyami? Ho fadi wad twa no faktaw haw. Haw wa ka Maliyaw kanbangkad gin Diyos. 25Dapat is Hisos nangabaya ka labang, nalwang, Ha hawa gawang gawang. Haw fag galin gis nyamo fag taw. 26Ginya madi, ka labang no nafalimboyagan yapdi ka ama, narokyaw dahol, bago nalin gi hanya. 27Fagayo fag manga taw intaka wan, ta fagayo nangarintawan kitay, Kana to fag kadonongan? Ngatay sadik adal bago. Ha kangayanan igfasognod, hanggan ka manga labang katanog odi hanya. 28In Hisos naibolon dagos wandahit ha sadik dahonya manga banwanan sas ligongan, sas sakop Galiliya. 29Da Hisos dagos wa nalahaw gis basad fanimbaan, nasakbaw handa Simon da Andris balay. Da Santyago da Hwan naofod yadi wansakbaw. 30Gis nanya in Simon nogang ina maigyanan maskin it sagit kagnaw a, tadwa nafadogayon nafadog in Hisos kawa hanya. 31Is Hisos naakbang has ina, nagamit hanya, nafabangon. It hagnaw dagos wanfiya. Ginya madi ka ina natogbong is taw. 32Araw, no kayabi wan, myanit no kasangday wan, manga taw nataban han Hisos fagayo sinya fag banwanan ka ha manga sagit, hanggan ka ha manga labang igfahoriyan istaw. 33Sadik banwa dahonya, ta nanifonan dayo sakbawan. 34Is Hisos nafafiya kaaywanon fag manga taw ha sagit bokod bokod, nafaalin yadi aywan fag manga labang kagfahoriyan is taw. Is Hisos idwa nafaawang ka manga labang maskin ta kilala wan Hisos. 35Ginya madi, no marom, is Hisos inbangon, yabi yapdi, idya kasirang, hawas talon, nandarangin sinya. 36Araw, da Simon naoyan hanya. 37Ta no nalag in Hisos, ta nalwang hanya kitay, Fagayo fag manga taw igsayak hyamo. 38Is Hisos nasagot kitay, Tam hawas masoson fag manga banwa kaarakitay ho manoltol is taw sinya. Maskin tonya wa kangko bato ibolonon, ho nalahaw wa gintam ginanan. 39Is Hisos nasafong ka manga banwanan fagayo sas sakop Galiliya. Igtoltol sas basad manga fanimbaan Hodyo, igfaalin yadi ka manga labang gis taw. 40Sadik taw ka ha sagit kitong naakbang han Hisos, nanlingkohodan, iglwang hanya, Haw nangos no kasaya digfafiya angko, haw fadi wad somyagan. 41Kawas Hisos kaawa hanya, natawid hanya a, nalwang kitay, Ho kasaya ngay, haw fag imfiya wan. 42Ginya madit kitong dagos wanfiya, ogali wan it anit. 43Is Hisos nabando hanya fiya fiya, bago nafalahaw, 44nafwayong hanya, Hawag fwayong nyawa haday fag manga taw, dapat fag hayapdis fagalan-han-Diyos, fabantayan hanyam habilogan, ginya madi ha disagan kan Mwisis natogon bato disagon, bilang faorongan has taw kitay haw infiya wan. 45Dapat ka ama nonlahaw wan, dagos wagtoltol has manga taw, nafadahit wan. Kawa kitonya, is Hisos idwa has basad manga banwa, dapat nabaybay odi has manga ligongan. Nyawa kitonya, manga taw gis fagayo fag manga banwanan inbarangkadan wa hanya.

will be added

X\