LOKAS 9

1Ginya madi sadi ya ginan is Hisos nafatifonan ka Safolo-ha-Dowa, nafalobos has taw it kadonongan hanggan kangayanan igfalagyo manga labang gis taw, hanggan igfafiya yadi ka ha manga sagit. 2Is Hisos nafalahaw it manga katogbong kaarakitay igtoltol has taw kawa han Diyos sakop baliwa, hanggan fafiya yadi ka manga ha sagit. 3Is Hisos natogon kitay, Ham fag idwa ha balon nyawa kana, ham noglahaw, nyawa sokod, nyawa boyog, nyawa fanganon, nyawa kwarta, nyawa hayo tobos rotay, fag idwa ha diya. 4Nyawa siday hayo nagdasogan fag balay, ham fag sinya wak gigya ham nodyag lahaw ginya fag banwanan. 5No sida fag foro taw nodwag fasakbaw hayo, ham no lomahaw ginya, fadagdagan ka fogis daga gi hayo manga bitis, bilang wagfaayfan ka taga sinya fag manga taw. 6Yakanga ka manga katogbong inlahaw wan, hawas manga forowan balay sas ligongan, igtoltol ka Fiya fag Barita nyawa haday, igfafiya yadi ka manga ha sagit. 7Gis nanya, is Hirodis ka gorangon sas sakop Galiliya no nadog fagayo kan Hisos naibolon, gadowan it fangayofan maskin tibag lwang kitay, is Hwan inboyag ya kagfatogna manga taw hyabi. 8Tibag lwang is Iliyas inlag ya. Tibag lwang in Diyos fangampang sadi hyabi, kati inboyag ya. 9Yakangas Hirodis iglwang, Gwadi ho nafalifong wan in Hwan liyog. Fakta fag taw is nyamo hayo fagbaritaon ka gibolon kitonya? Yakangas Hirodis gwayan wa kasaya lomag in Hisos. 10Aban, ka manga Fandiya-Barita no nwali wan, ta natoltol han Hisos it manga naibolon fagayo. Ginyas Hisos nafasaman yapdi gis fakaaywanan, nataban ka Safolo-ha-Dowa hawas sadik banwa, banwa Bitsayda. 11Ka fakaaywanan fag manga taw no natwa kitay hanya wan, ta ngap naoyan ya inda Hisos. Is Hisos igbaya di ngap iglag ka manga taw ta nondasog wan. Is Hisos natoltol has taw kawa han Diyos sakop baliwa a, nafafiya yadi ka ha manga fagdogon. 12Araw, myanit no kalibaba wan, ka Safolo-ha-Dowa naakbang han Hisos, nalwang, Falahawan yap nangos has manga tifonan balay sas ligongan ka manga taw, kaarakitay ta somayak it hanon hanggan it manga toyogan. Tam istay sawas basad fakahyabogan. 13Dapat is Hisos nalwang, Fag ham wa ka domisag fanganon has taw. Taglwang han Hisos, Tam idwa hanon nodwa limak tinapay, dowak oyang odi, mi nodwa hawas tindahan somali fanganon kaarakitay has manga taw fagayo. 14Maskin ka manga ama sinya manga 5,000. Dapat is Hisos iglwang hat manga katogbong, Fatokawan ngakin ka manga taw malayonan, myasa limak safolo ka sadik layonan. 15Tantanog wan, yakangan tokaw ngay fagayo. 16Is Hisos nabol ka limak tinapay hanggan ka dowak oyang, natangdan has tongod a, nabaya han Diyos ka fanganon, nafaarogbotan, ginya nadisag hat manga katogbong kaarakitay homoray has manga taw. 17Fagayo nahwan wa a, napsog wan. Ka manga katogbong natifon ya kasta sawad nakanan mafaarogbotan, safolo ya ha dowak boyog ka napno. 18Ginya madi aban, is Hisos nogdarangin sadi sadi, it manga katogbong sinya yadi wan. Araw is Hisos gintaw hat manga katogbong, Fakta hono aho, manga taw noglwang? 19Ta nasagot, Tibag lwang kitay haw is Hwan kagfatogna manga taw hyabi, intibag lwang haw is Iliyas, intibag lwang haw kan Diyos fangampang sadi hyabi inboyag ya. 20Ginyas Hisos naintaw, No ham kaglwang, faktaw aho, ham gayfan? Is Pidro nasagot, Haw wa kan Diyos-natogon-Famawi. 21Is Hisos natogon marigon hat manga katogbong kitay, fag idyag fwayong nyawa hada fag taw kitay hanya kan Diyos-natogon-Famawi. 22Ginyas Hisos nafwayong kitay, Aho Kanbali Taw aywan angko fagagwantaon manga mahori aban. Ka manga fagtahinan sas banwa, hanggan ka manga fagtahinan fagalan-han-Diyos, hanggan ka mangag faadal Batasan Hodyo domayo hanggan wa fahatay angko. Dapat ay, aban, sas fatolo fag sirang ahom boyag ya. 23Is Hisos nafwayong has fagayo, Nyawa faktaw no kasayag tahin angko, falibangan fagaba it sadili fakasayaon, fasanan it sadili fatimbangan hayo sirang sirang, ginya madi tahinan wangko. 24Not sadili haboyagan it fagfahalgaon, tonyam liyam di, dapat ay, kadwa kwangit it haboyagan kawa hangko, it haboyagan idwam liyam. 25Kana kat fakinabangon, ham gayfan, sadik taw no omafo sadi wak dahonya baba daga, halimbawa, dapat ay, it sadili haboyagan nomliyam di aban? Yatokitay idwa ha fakinabang. 26Aho, Kanbali Taw, nombangkad ya aban, malagan sangko angko kafiyan, hanggan angko Ama kafiyan hanggan ka manga maliyaw fag anghil kafiyan. Gis nanya aban ho maya wagfadog ista ngayan nyawa faktaw, hanya no kayag fadog angko ngayan hanggan angko manga hampang has manga taw kati fag masohod. 27Dog ngay, bonwa bohag, tiba taw kastay idya matay nodya lomag in Diyos sakop. 28Ginya madi yabay, nonsagaya manga walok sirang is Hisos no natoltol kitonya, hanya nataban inda Pidro da Hwan da Santyago, hawas moyod kaarakitay mandarangin. 29Is Hisos nogdarangin yapdi, it walong in-oman, fiya wa dahol kabantay, it rotay in-abohay wa dahol, masilaw wan. 30Yabay ha dowak ama, da Mwisis da Iliyas, dagos wanbangkad, nangampangan han Hisos. 31Ka gim tongod fag kafiyan kalag sanda Mwisis. Inda Mwisis da Iliyas fagtoltolon kawas Hisos lomahaw wa aban ka kaakbang wamlag sas banwa Hirosalim. 32Da Pidro intoyog wa fiya fiya gis nanya, dapat ay, ta nonfolaw, ta nalag in Hisos kafiyan hanggan ka dowak ama ka malindogan sat akbang. 33Ka dowak ama no kalahaw wa gin Hisos akbang, is Pidro nafwayong han Hisos, Yabay, hyami Fon, kafiyaon, tam fag istay yapdik madogayan. Mi fomalo tolok dongdongan, insadi hyamo, insadi in Mwisis, insadi in Iliyas. Ka orongan wan is Pidro idwa yadi natwa it bato lwangon. 34Is Pidro no kampang yapdi, sadik linyabo dagos wa nalanbong is taw, yakanga tandala wa dahol dahol. 35Gis basad linyabo ha nahampang, iglwang kiti, To angko wa Anak, angko wa nafili. Fag tonya wan ka hayo fagtalingaon. 36Ka hasnog nontohas wan, yabay tadwa ha lagan taw no bohonwas Hisos lamang. Tadwa naawang, tadwa ha nafwayong yapdi gis nanya ista manga mata lagan nyawa haday fag taw. 37No bago wa marom da Hisos no nwali wa has lwad, kaaywanon fag manga taw natagbo hanya. 38Ha sadik ama sas basad fakaaywanan natawag marigon, iglwang, Haw kagfaadal, bantayan nangos angko anak ama, kawangko anak idwam dowa. 39Labang kagfahoriyan hanya, sadi odi ginan igrokyaw. Ginya kidkisayan wan hanggan wat bibig igboraan wan, igfabaran wat sadili habilogan. Ka labang kafang wa galin gi hanya. 40Hogfaaronganon ha hyamo manga katogbong kitay, ta nangos faalinan wa ka labang, dapat tadwa nasyagan nafaalin. 41Is Hisos nalwang has taw, Ham kawa ka kati fag masohod fag manga taw dwat wa dahol, kawa ham idwa yadig syag angko. Ginahin ya kin nangos aho fag omofod yapdi hayo, ham gayfan? Kandogay day aho fag gagwanta yapdi hayo? Ginya nalwang has ama, Tabanan im anak hastay. 42Ka anak no kaakbang wan Hisos, ka labang nafahakfo hanya ha baba daga, yakanga nangidkisayan ya ngawan. Is Hisos nangabaya ka labang, nafafiya ka anak, ginya nafaano ya hat ama. 43Ka manga taw indolaw wan in Diyos dahol fag kadonongan. Fagayo fag manga taw no kadolaw yapdin Hisos manga naibolon fagayo, is Hisos nalwang hat manga katogbong, 44Ham fag matohodan angko fwayong kitay, angko ofod im-oyon angko manga kalaban aban, fagamat has taw angko, aho Kanbali Taw. 45Dapat tadwa natwagdog kan Hisos faglwangon maskin is Diyos idyag faangay kitay ta fag tomwagdog it kahologan, hanggan ta kadala yadi gintaw hanya. 46Araw ogbot in Hisos manga katogbong igdaraogan no fakta sas taw ka abwat it kangayanan. 47Is Hisos no nasarom ista manga fangayofan, nagamit sadik anak ogbot a, nafalindog sat akbang. 48Ginyas Hisos nalwang has taw, No faktaw kagtanggap to fag anak maskin galwasi angko, aho yadi kat fagtanggapon. Kagtanggap angko, igtanggap yadi kagsogo angko. Ka ogbot man sa hayo it kangayanan, tonya ka dahol man has fagayo it kangayanan. 49Is Hwan nafwayong in Hisos kitay, Hyami Fon, mi nalag sadik taw ka gwas hyamo ngayan nogfaalin ka labang. Mi nabando hanya maskin idwa gofod intam. 50Dapat is Hisos iglwang kitay, Ham fag idwag bando hanya maskin kadwag laban intam, intam yadi wa kaoyon. 51Is Hisos no kaakbang wa aban kaalin han Diyos banwanan ham tongod, hanyag tikis waglahaw has banwa Hirosalim baliwa. 52Nafagona wa ka tiba. Tanlahaw wa ngay hawas sadik tifonan balay sas sakop Samariya, kaarakitay mamatalaga in Hisos bato hadasogan. 53Dapat ka manga taga Samariya kafang igtanggap inda Hisos maskin tagdog it hadasogan orongan hadis Hirosalim. 54Da Santyago da Hwan no natwa kitay ta kafang igfasakbaw in Hisos, taglwang, Hyami Fon, haw aw igfaangay di mi nogfadagdag afoy gis tongod kaarakitay tamsonog? 55Dapat is Hisos nabaringan dit liyog, nangabayas taw, nalwang, Ham idwa twa no kinday hayo manga fangayofan. Maskin aho, Kanbali Taw, inbangkad hastay, bohonwa kitay domaog manga taw, yatokitay, ahon bangkad kaarakitay bomawi manga taw. 56Yakanga ta nafadagos it lahawan ha sadi yak tifonan balay. 57Ta noglahaw yapdi, ha taw ya ngag lwang han Hisos, Ho mahin yadi wa hyamo nyawa ha hadawan. 58Dapat is Hisos nasagot hanya, Ka manga ido maisog ha oliyanan basad lohib, ka manga manok ha fogad yap man, dapat ay, aho, Kanbali Taw, idwa ha toyogan idwa ha fahowayan. 59Is Hisos iglwang ha sadi yak taw, Ha tahinan wangko. Dapat ka taw nasagot, Angko Fon, ha faoliyan yapdingko, ho manlobgob yap angko ama. 60Dapat is Hisos nafwayong hanya, Ha fabayaanan yapdi ka manga mahatayan, ta bahala waglobgob it sadili kapariho ka natay. Dapat kawa haw, haw fag lahaw wan, haw fag fadog has taw kawa han Diyos sakop baliwa. 61Insadig lwang, Angko Fon, ho tomahin wa hyamo, dapat ay, ha faoliyan yapdingko, ho manogon yap angko manga iba. 62Is Hisos iglwang, Nyawa faktaw nogtawid togda bago bago, mananom nangos, ginya haglibang yapdi hanya, idya maangay san Diyos sakop.

will be added

X\