LOKAS 8

1Ginya madi, idya dogay aban, is Hisos nanabang has iba banwanan a, nasafong wan ka manga banwa hanggan ka manga forowan balay sas dayo banwa. Natoltol hanggan nafaadal ka Fiya fag Barita kawa han Diyos sakop baliwa. Ka Safolo-ha-Dowa nahin yadi wan Hisos. 2Ha manga ofod yadi ina kan Hisos nafafiya it sagit hanggan nafalagyo ka manga labang. To fag manga ina kawa da Mariya taga Magdala, fitok labang kan Hisos nafalagyo ginya fag ina, 3hanggan da Hwana, in Kosa babay. Is Kosa in Gorangon Hirodis katogbong. Da Sosana hanggan aywan yapdi ka tiba ina. To fag manga ina natogbong in Hisos hanggan hat manga katogbong kawa gista sadili manga kaakwaan. 4Ginya madi, gi sadik banwa, gi sadik banwa, manga taw kabarangkadan wan, gakbang han Hisos. Ginyas Hisos natoltol to fag halimbawa, 5Sadik ama fangiyab hawat namay kaarakitay mamamgas. Hanya nogfamgas, igsabod odit binhi, yakanga tibak botol indagdag has boknga dalan a, ta nalid lamang, yakanga ka manga manok nahwan wa tonya. 6Ha akwa yadi manga botol indagdag has daga libabaw, baba odi dalifi. Tonya natobo ongay, dapat inlayong ya, maskin ka daga kamaya madali. 7Ha manga botol yadi indagdag ha sayo manga lamnon madogi. Ka manga lamnon inlangba, nasakfaw di ka manga tanom. 8Dapat ay, ha akwan dagdag has fiya fag daga a, natobo, nabohad, fagayo fag bolhog myasa sadik daan no nabohad. Ginyas Hisos nafwayong marigon, Ham no ha manga talinga ya ngadi, fag talinga wan. 9In Hisos manga katogbong naintaw in Hisos no kanat kahologan it natoltol halimbawa. 10Is Hisos nasagot, Indisag wa ha hayo kitay ham fag tomwa ka mangadyag fadogon kawa han Diyos sakop baliwa, dapat ka tiba, kawa gis manga halimbawa ta no domog kaarakitay, Nyawa ta bomantay, tadwa twaglag, Nyawa tagtalinga, tadwa yadi twagdog. 11Is Hisos igfadagos yapdit hampang, nalwang, Kito kat kahologan ka halimbawa. Ka binhi in Diyos wa hampang. 12Ka botol kandagdag has boknga dalan kawa ka mangag talinga, dapat is Fandaya indasog igfaliyam gista basad fangayofan kan Diyos hampang kaarakitay tadwa katiwala in Diyos, idwa yadim bawi. 13Ka mangan dagdag sas daga libabaw baba dalifi, kagtalinga in Diyos hampang a, igtanggap wa ongay, masolong wan, no kitay di, dapat idwag dalid abasad sat fangayofan. Sadik ngalay intiwala wan, dapat no hagsolay is taw, tagdayo wa dagos. 14Kandagdag ha sayo manga lamnon madogi, igfahalimbawa ka mangag talinga ongay, dapat ay, kat manga fagisipon fagaba hat manga kakorangan, ngatay has kaakwaan, ngatay has kasolongan baliwa, igsakfaw di in Diyos hampang, yakanga idwag bohad sasta basad fangayofan. 15Dapat ay, kansabod sas fiya fag daga, kawa mangag talinga han Diyos hampang, gano tonya fiya fiya sasta basad fangayofan, matanogon hanggan malinay. Ta gagwanta yadi, yakangan Diyos hampang igbohad sat manga ogali. 16Tam idwag santik salong ginyag fwalid sas daga polahan, ngatay sas daga igyanan. Yatokitay tam igsalifit ka salong sas salangan kaarakitay nyawa faktaw kagsakbaw lomag mayawa. 17Idwa ha matagowan kadwam lag aban, idwa yadi ha mafyaloman kadwam dog, hanggan imdiya has faglagan aban. 18Maskin ngay, ham fag matagahan no kinday ham nogtalinga. No ka ha akwa, ha tanggapon ya domwag, dapat kadwa ha akwa, nyawa hanya gayfan ha akwa wa ogbot, imbol di tonya aban. 19Ginyan Hisos ina hanggan it manga fadwasay inbangkad han Hisos, dapat tadwa syagan gakbang hanya kawa aywan wa dahol fag manga taw. 20Ka manga taw iglwang han Hisos, Im ina hanggan im manga fadwasay sawas sokayan kasaya hono lomag hyamo. 21Dapat is Hisos igsagot has taw, Ka mangag talinga in Diyos hampang hanggan katanog, tonya wa kangko ina hanggan angko manga fadwasay. 22Ginya madi aban, is Hisos hanggan it manga katogbong, nasahay has basad baloto. Is Hisos iglwang, Tam domifay wa has difay linaw. Yakanga tan-ginan wa ngay. 23Ka baloto noglahaw wan, is Hisos intoyog wan. Ginya madi araw nabagyo dahol dahol sas baba linaw. Ka baloto kapno wa danom, yakanga ta ganong wamlogom has daga danom. 24In Hisos manga katogbong nafolaw hanya, taglwang, Hyami Fon, hyami Fon, kalibang, tam kalogom wan ha daga danom. Is Hisos infolaw wan, nangabaya ka bagyo hanggan ka taob kagsaribwaan. Ginya madi intohas ya. Yabay inhalyaw ya ka dagat. 25Ginyas Hisos iglwang has taw, Kana ham nodwag syag angko? Dapat ay tandolaw waglag a, tandala yadi wa dahol, ta garintawan ha sadi ha sadi kitay, Yabay, faktaw to? Twa oman igfatohas ka bagyo, manga taob, ta katanog wat manga fwayong. 26Ginya madi araw tandagsa sas banwanan manga Girasino, sas masohod yadi sakop Galiliya. 27Is Hisos indokson di ngay, ha natagbo hanya sadik ama gis banwa, ha manga labang kagfahoriyan hanya. Tonya fag ama dogay wan fawag solong rotay, idwa goli hat balay, sa odi sayo manga lohib fanlobgobanan taw. 28Ka ama no nalag in Hisos, narokyaw marigon a, nanlibabaan san Hisos atobangan, iglwang, Hisos, is Diyos, ka Abwat-man-has-fagayo-fagayo, it Anak, kana haw nogmawat angko? Hogfaaronganon hyamo kitay, ha fag idwag fahoriyan angko. 29Hanyag lwang kitonya maskin haraw is Hisos nasogo ka labang kitay fag galin wa gis nyamo fag ama. Nogbanwan ka labang mahogod wagfahoriyan ka ama, hanggan nyawa hagbantay di hanya, nyawa tagbinggas, nyawa ta gafos wa manga lobid baol, hanyag bogloy lamang tonya, ginya ka labang igfatabog hanya has basad fakahyabogan. 30Ginyas Hisos naintaw hanya, Faktam ngayan? Maskin aywan fag manga labang kagfahoriyan tonya fag ama, hanya nasagot han Hisos, Ahos Mahabanan. 31Ka manga labang igfaawaon han Hisos kitay, Haw fag idyag sogo hyami has fakaabasadan. 32Gis nanya ha sadik tifonan baboy ayo ayo kwan manga lamnon sas akbang fag moyod. Ka manga labang nafaaronganon in Hisos kitay, Mi fag ha yap man has basad manga baboy nangos, yakanga is Hisos nafaangay wa ngay. 33Ginya ka manga labang nalin gis ama, hawas basad manga baboy. Ka tifonan manga baboy dagos nanhadalandanan wa madali has lwad indahodan, has basad linaw dahol, fagayo inlimos wan. 34Ka manga gano ista tifonan baboy no nalag ka manga baboy inlimos, ta nalagyo wan, namarita has manga basad banwa hanggan sas ligongan. 35Ka manga taw inbarangkadan namantay no kana ka sinya. Ta nondasog han Hisos, taglag ka ama ka ha manga labang haraw. Kati matokawan san Hisos dayo bitis, ha solong rotay a, it fangayofan ogali mandi. Tandala waglag. 36Ka manga nalag is Hisos nogfafiya ka ama natoltol has taw no kinda mayon nonfiya ka ama ka manga labang fagfahoriyon haraw. 37Ginya madi ka manga taw gis sakop banwanan manga Girasino fagayo nanagad kitay is Hisos fag lahaw gista banwanan kawa tandala wa dahol dahol. Yakanga da Hisos nasahay ya ngawa ha basad baloto a, infwali wan. 38No kitay di ka ama ka manga labang nagalinan haraw, garonganon wa kasaya mahin in Hisos, dapat is Hisos nafaoli yapdi, iglwang, 39Haw fag goli yapdi, haw fag toltol yap has taw kan Diyos naibolon kafiyaon ha hyamo. Ginya ka ama nwali wa ngay, igbarita has taw sadik dahonya banwa in Hisos naibolon ha hanya kafiyaon. 40Ginya madi, da Hisos nonfwali ya has difay linaw, ka manga taw igbaya waglag in Hisos, kawa fagayo fagayo fag manga taw igfanaya hanya. 41Ginya madi ha sadik ama, is Hayro, kagbahala sas fanimbaan Hodyo, indasog han Hisos, nanlibabaan san Hisos atobangan, igfaaronganon kitay, nangos fag hayap it balay. 42maskin it anak ina sadi sadi, manga safolo ha dowak fangaraw it kadogayan, kafos wa ipsaw. Is Hisos noglahaw yapdi, manga taw igdarotdotan wa hanya. 43Ha sadik ina mahoyogan yadi has taw, safolo ha dowak fangaraw idwa kafiya no kasagit ina. It manga botang namin wan kawat bayad nogfabolong has taw, dapat idwa ha syagan igfafiya hanya. 44Ka ina naakbang han Hisos gis ginanan, dayo goyoy, nasapkid in Hisos tobwan tobwan rotay, ginya madi dagos wanfiya it sagit ina. 45Ginyas Hisos naintaw has taw, Fakta ka nasapkid angko? Idwa ha nabaya, yakangas Pidro nalwang, Angko Fon, maskin ka fakaaywanan igligong wa hyamo, taw igdarotdotan wan, ta natanog odi hyamo rotay. 46Dapat is Hisos iglwang, Hogdog ha natawid angko. Hogdog hanbol wa karigonan gingko. 47Ka ina no natwa kitay idwa syagan igfyalom it naibolon, naakbang han Hisos, nanlibabaan hat atobangan, karokog wa kadala. Sasta fagdogan fagayo, ka ina nafwayong no kana mayon no nasapkid in Hisos, hanggan no kinday nonfiya wa dagos. 48Is Hisos iglwang hanya, Anak ina, maskin hagsyag angko, haw infiya wan. Nyawa ha goli wa kati, im fangayofan fag imhoway wan. 49Is Hisos no kampang yapdi has ina, sadik ama inbangkad gin Hayro balay. Nafwayong han Hayro, Hyamo anak ina natay wan. Hawag falibang yapdi kagfaadal has taw. 50Is Hisos no nadog di ngay tonya, nalwang han Hayro, Haw fag idwa kadala, haw fag syag di ngay hangko, ginyam anak imfiya ya. 51Da Hisos nondasog hasta balay, idwa nafaofod istaw has basad balay, no bohonwa da Pidro, da Hwan, da Santyago, hanggan ka anak ina it ama hanggan ina. 52Fagayo fag manga taw ka sas sokayan igwaraywayan wan, ta goraw wan ka anak natay. Dapat is Hisos iglwang, Ham fag idwa goraw, ka anak idwa natay, matoyogan di. 53Dapat ta kasay odin Hisos maskin ta natwa kitay ka anak ina natay wan. 54Dapat is Hisos natawid ka anak ina gamat, ginya nalwang, Anak, haw fag kabangon wan. 55Ginya madi ha ipsaw ya, inbangon wa dagos. Is Hisos nalwang ya has taw kitay, Ham fahwanan fafa has anak ina. 56It manga magorang indolaw wan dapat is Hisos natogon has taw kitay, Ham fag idwag fwayong nyawa haday ka hayo mata lagan.

will be added

X\