LOKAS 7

1Ginyas Hisos nontabo wagfaadal tonya fagayo hasta fagdogan, hawas basad banwa Kapirnaom. 2Yabay, sinya ha sadik fagtahinan sondalo taga Roma, mahoway wa dahol hat nasali sogowan ka ha sagit, kaakbang wa kahatay. 3Ka sondalo fagtahinan no nadog kawa han Hisos, nasogo manga fagtahinan Hodyo tiba, kaarakitay fomwayong han Hisos, Fag hayap ista balay fagtahinan sondalo, fafiyaan nangos it nasali sogowan. 4Ka manga Hodyo no nalag in Hisos, tagfahowayon wa no kampang, iglwang, To fag fagtahinan sondalo fiya wa fagtogbongon, 5kawa hanya kaawa wa dahol intam layonan taw, manga Hodyo. Hanya yadi ka nafahalig intam fanimbaan sas Kapirnaom. 6Ginyas Hisos naofod is taw. Ta no kaakbang wa bangan has fagtahinan sondalo balay, ka fagtahinan sondalo nasogo it manga fakilalaon kaarakitay tomagbo in Hisos, iglwang, Ham fag fwayong kiti han Hisos, Ama, hawag fayaya ngap hyamo, ho kaya wa hyamo, nyawa hadwam dasog hangko balay. 7Aho idwa fiya hampangon ha hyamo, yakanga hodwa has nyamo. Ka fiya, haw fag lomwang yap man kitay, Ka sondalo sogowan fag imfiya wan, ginya hanya fag imfiya ngay. 8Kawa aho sadi yadik taw kagfasakop has manga abwat fag kangayanan, dapat ay, aho ha fagsogoon yadi manga sondalo. Aho noglwang ha sadi, Ha fag hanya wan, yakanga hanyan tanog wan. Aho noglwang ha sadi ya, Haw fag hastay, hanyam bangkad wan. Aho noglwang hangko nasali sogowan, Haw fag gibolon kito, hanya omibolon wa tonya. 9Yakangas Hisos no nadog it hampang, indolaw wan, nasayango has fakaaywanan fag manga taw ka goyan hanya, ginyag lwang, Hogfadog ha hayo, hodya ha donggon no kitay iba taw kitonya wa kagsyag angko marigon, nyawa sawan Israil manga hasokfonan. 10Ka fagtahinan sondalo manga nasogo haraw, no nwali hasta balay, ta nalag kitay kat nasali sogowan infiya wa yabay. 11Ngalay di aban is Hisos haya sadik banwa, banwa Nain. It manga katogbong naofod hanya hanggang ka fakaaywanan fag manga taw natahin yadi. 12Da Hisos no kaakbang wan has sakbawan alad banwa, ta natoon nahablang ka manga manlobgob sadik ama ka natay. Kat ina danwa balo, hanggan to kasta faglobgobon, it anak ama sadi sadi. Kaaywanon ka gofod hat ina, ka manlobgob. 13Kagfon intam no nalag ka ina balo, in-awa hanya, iglwang has ina, Haw fag idwa goraw. 14Is Hisos naakbang a, natawid ka fwalidan natay, yakanga kagdiya intorosan yadi. Is Hisos nahampang has natay, nalwang, Bago ama, hoglwang ha hyamo, haw fag kabangon wan. 15Ka natay haraw, intokaw ya, dagos wa nahampang. Is Hisos nafaano ya hat ina it anak bago ama. 16Ka manga taw indala wa dahol dahol iglag, dapat igfasayagdog yapdi han Diyos, taglwang, In Diyos fangampang sadi, madonong wa dahol, inbangkad hantam. Is Diyos in-awa waglag it sakop. 17To kan Hisos naibolon indog wa has fagayo sas sakop Hodiya hanggan sadi wak dahonya banwanan sas ligongan. 18Is Hwan kagfatogna manga taw, it manga katogbong nabarita hanya to fagayo kan Hisos naibolon. 19Ginyas Hwan nafili it katogbong dowa, nasogo hasagfon intam kaarakitay omintaw, Haw awkin kawan Diyos natogon kitay imbangkad hastay, ngatay mi ha fagfanayaon yapdi sadi ya. 20In Hwan katogbong dowa, nondasog han Hisos, nalwang, Is Hwan kagfatogna manga taw itfagonan, nasogo hyami hastay kaarakitay mi omintaw hyamo ngatay haw awkin kan Diyos natogon kitay imbangkad hastay, ngatay mi ha fagfanayaon yapdi sadi ya? 21Gis nanya yadi fag manga masohod, in Hisos nafafiya kaaywanon, ka manga inhori it sagit, hanggan ka ha manga labang kagfahoriyan hanya. Nafafoga ya aywan ka manga bota. 22Ginya madis Hisos nafwayong has taw, Ham fag goli ya ngawan han Hwan, ham fwayongan ka hayo lagan hanggan donggon. Fag fwayong kitay, ka manga bota infoga ya ngat mata, ka manga infihong it bitis iglahaw ya, ka manga ha kitong infiya yadi wan, hanggan ka manga bongkok igdog ya, ka manga natay inboyag ya, hanggan ka Fiya fag Barita nafaadal has manga myabog yadi. 23Ka taw kadwa gadowan igsyag angko bomaya wan. 24In Hwan manga sogowan nonlahaw wan, is Hisos nafwayong has manga taw kawa han Hwan, iglwang, Kana mayon hyabi, ham no hawas basad fakahyabogan? Kana ka hayo fagasolopon sinya? Ham awkin kasayag lag ka bagyo nogfarayfayan igfarayfayan ka iyano? 25Kana ham no hanya? Ngatay hayo fagasolopon sinya sadik taw myasa wa fiya it manga solong rotay? Gwadi sawas gorangon balay ka myasa wa fiya it solong rotay, kawa maakwa wa dahol, idwa ha korang. 26Kana orongan ka hayo fagasolopon sinya? Ngatay in Diyos fangampang sadi? Ala ngay, tonya wan, hanggan hogfwayong ha hayo, ka hayo lagan sinya it kangayanan bohondi kito kan Diyos manga fangampang. 27Maskin is Hwan kat faglwangon sas Kasoratan noglwang kitay, Fanlag ngay, hogsogo angko sogowan ka gomona hyamo. Hanya mamatalaga hyamo bato lahawan. 28Hogfwayong ha hayo idya ha anak kansagaya git ina ka abwat man in Hwan it kangayanan, is Hwan kagfatogna manga taw. Dapat, ka ogbot man has fagayo san Diyos sakop it kangayanan, abwat man in Hwan. 29Ka manga fanohot bohis Roma inaktom has manga taga sinya fag manga taw igfasayagdog in Diyos no nadog in Hisos fwayong. Tonya fag manga taw kan Hwan nafatogna itfagonan. 30Dapat ka manga Farisiyo hanggan ka mangag faadal Batasan Hodyo igdayo di in Diyos fasadan has taw, idwa yadi han Hwan kaarakitay igfatogna. 31Is Hisos nalwang has taw, Kinda odi kin angko fatoladan ka kati fag manga taw, ham gayfan? 32Kito odis manga anak matokawan sas famahowayan, igtawag hat manga ofod anak, iglwang, Mi fadi wad nafaoni palawta, dapat ham kafang digtayok. Nyawa hami nangodgorawan, ham kafang yadi goraw. 33Kawas Hwan, kagfatogna manga taw nonbangkad hyabi, nomtoon idwa kwan hanon kaarakitay mandarangin mahogod, idwa yadi ginom alak. Yakanga ham iglwang kitay Labang wa kagfon hanya. 34Ginya madi, aho man, Kanbali Taw, inbangkad hastay, kwan yadi hanon hanggan ginom kitos iba taw, ginya ham iglwang, Yabay, to fag taw mahogod wa kwan a, iglango ya ngadi, koyog yadi has manga fanohot bohis Roma, hanggan has tiba taw ka ha dwat fag manga ogali. 35Nyawa ham iglwang kitonya, in Diyos manga anak ogali kagfatohoyan kitay in Diyos kadonongan myasa wa fiya. 36Ginya madi aban, sadik Farisiyo nataban in Hisos hat balay kaarakitay manayowan kwan. Is Hisos hawas balay Farisiyo a, masorayan dayo fanganan. 37Sinya fag banwa ha sadik ina, manga taw twa wa kitay dwat wa dahol it ogali. Tonya fag ina nadog kitay is Hisos kwan sas balay Farisiyo, yakanga ka ina nadiya sadik sohadan, alabastoro fag bato, napno famabanglo. 38Ka ina naakbang han Hisos dayo goyoy hat akbang bitis. Ka ina goraw a, dagos wagfayamos wan in Hisos bitis it lowa, ginya madi it famyad it bok wan, naayok ya ngadi in Hisos bitis, ginya nalidgid ya ngadi famabanglo. 39Ka Farisiyo kagtaban in Hisos hat balay, no nalag ka ina ibolon, it fangayofan iglwang, To fag ama non Diyos wa fangampang orongan, hanya fadi wad twa no faktaw, hanggan no kindat ogali ka ina kagsapkid hanya, gwadi dwat wa dahol it ogali. 40Is Hisos nasagot in Simon fagayfanon, nalwang, Simon, aho ha fagfwayongon hyamo. Is Simon iglwang, Haw kagfaadal, kana ara tonya? 41Is Hisos igtoltol kiti, Ha dowak taw ha bayadan ha sadik taw. Ka sadi kat bayadan limak daan dinaryo, insadi lima dik safolok dinaryo. 42Ta nodwa nasyagan nabayad, ka nafaoyam idwa yadi nasohot ka fagayo dowa. Da fag taw gis dowak taw ka ha bayadan kwarta ka bohondi kito ka sadi nogbaya ka nafaoyam? 43Is Simon nasagot, Angko fangayofan kagbaya wa dahol hanya, ka dahol it halga kat bayadon. Is Hisos nalwang, Anod, tonya wa ngay. 44Ginyas Hisos igbantay has ina a, dapat iglwang han Simon, Ha awkin iglag to fag ina? Gwadi aho nonsakbaw ha hyamo balay, hadwa nadisag angko danom fanggonaw angko bitis, dapat to fag ina nafayamos it lowa angko bitis, it famyad it bok ya ngadi. 45Hadwa yadi naayok angko, dapat aho indasog di ngay, idwa nafagomon naayok angko bitis. 46Hadwa yadi nalidgid langis olibo angko alfoyo, dapat hanya nalidgid famabanglo angko bitis. 47Yakanga hogfwayong ha hyamo, maskin hanya galwasi wa dahol angko, kalag wa kitay fagayo it manga naogali dwat kaaywanon, inliyam wan. Dapat ay, no sayok ista naogali dwat kanliyam, idwa bangan igfalag kitay hanya galwasi angko. 48Ginyas Hisos nafwayong has ina, Im manga naogali dwat fagayo inliyam wan. 49Ginya madi ka mangag sayo in Hisos, it manga fangayofan iglwang, Kana mayon to fag ama nogfaliyam ista manga naogali dwat, fakta kin nangos tonya? 50Dapat is Hisos nalwang has ina, Maskin haw igsyag hangko haw inbawi wan, nyawa ha mwali wan kati, im fangayofan inhoway wan.

will be added

X\