LOKAS 6

1Sadi ginan, sas Sirang Kafahowayan, da Hisos igdalan sasta namay ha tirigo. In Hisos manga katogbong nabol manga haway tirigo sayok, ginya no naligis basad dalohap, ta nahwan wan. 2Tibak Farisiyo nangabaya has taw, taglwang, Kana ham no gibolon kadwa maangay sas Batasan Hodyo maskin sawas Sirang Kafahowayan? 3Is Hisos nasagot has taw, nalwang, Ham awkin idwa nabasa in Dabid naibolon hyabi no kalonos, hanggan wat manga ofod kalonos yadi? 4Is Dabid nasakbaw han Diyos basad balay a, nabol ka tinapay kandisag han Diyos, ginya madi nahwan wan. Is Dabid nadisag ya ngadi hat manga ofod. Ka Batasan Hodyo iglwang kitay ka manga fagalan-han-Diyos lamang ka fiya homwan tonya fag tinapay. 5Ginyas Hisos nalwang yadi kitay, Aho, Kanbali Taw, kagbahala has Sirang Kafahowayan. 6Ginya, aban sa sadi yak Sirang Kafahowayan, is Hisos igsakbaw ya has basad fanimbaan a, igfaadal has taw. Sinya ha sadik ama it gamat balis sihon inrifis wan. 7Ka mangag faadal Batasan Hodyo hanggan ka manga Farisiyo igbantay ya ngay in Hisos, ngatay fafiya ya nga araw sas basad Sirang Kafahowayan, maskin tagsayak it fabangdanan hanya. 8Dapat is Hisos fadi wad twa ista manga fagisipon, yakanga hanya nafwayong has ama kanrifis it gamat, Ha fag hastay is fagonan. Ka ama naakbang han Hisos, nalindog ya ngadi sasta fagonan. 9Is Hisos nafwayong has fakaaywanan kiti, Ho mangintaw hayo, sida ka maangay has Batasan Hodyo, ham gayfan, ngatay ka gibolon fiya, ngatay ka gibolon dwat sas Sirang Kafahowayan? Ngatay igbawi taw, ngatay igfahatay? 10Is Hisos namarantayon yapdi has taw sat ligongan, bago di nahampang has ama kanrifis it gamat, nalwang, Falogdayan yap im gamat. Ka ama nafalogday ngat gamat, infiya wa dagos, ogali wan. 11Ka mangag faadal Batasan Hodyo hanggan manga Farisiyo it mata di myasa wa bayong kawa kaisog wa dahol in Hisos. Yakanga tagtoltolan no kana kasta ibolonon hanya aban. 12Ginya madi, gis nanya fag masohod, is Hisos hawas moyod kaarakitay mandarangin. Hanya nandarangin han Diyos sadi wak yabi hanggan wa kayawa. 13Yakanga, no sirang wan, nafatawag it manga katogbong, ginyas Hisos nafili ka Safolo-ha-Dowa, kat nangayan it manga Fandiya-Barita. 14To kat manga nafili, is Simon, kawan Hisos nangayan is Pidro, hanggan is Andris it fadwasay, da Santyago, da Hwan, da Filipi, da Bartolomi, 15da Matiyo, da Tomas, in Santyago yadi sangay in Alfiyo anak, ginyan Simon yadi sangay ka goyon marigon it manga kapariho Hodyo, 16da Hodas in Santyago anak, hanggan da Hodas Iskariyoti ka naoyon it ofod kalaban. 17Is Hisos hanggan it manga ofod haya nga was lwad baliwa, hawas basad datag. In Hisos manga katogbong fagayo sinya yadi wan. Kaaywanan wa fag manga taw inbarangkadan wan gis sakop Hodiya hanggan gis banwa Hirosalim, ka yadi gis manga banwa Tiro hanggan banwa Sidon sas bahalan dagat. Ta fagayo nagobok in Hisos kaarakitay tomalinga hanya hanggan igfafiya ista manga sagit. 18Is Hisos nafafiya yadi ka ha manga labang igfahoriyan hanya. 19Maskin ha karigonan gin Hisos kagfafiya has fagayo, fagayo fag manga taw gwayan wa kasaya ngadi somapkid, ta fag somapkid wan Hisos. 20Is Hisos nabantay hat manga katogbong a, nalwang, Nyawa ham manga myabog, ham bomaya wan maskin in Diyos sakop hayo wan. 21Nyawa ham kalonos kati, ham bomaya wan maskin ham mapsog aban. Nyawa ham ha karongkotan kati, ham bomaya wan, maskin ham ha kasolongan aban. 22Manga taw no kadwat iglag hayo, kawa ham galwasi angko, Kanbali Taw, ta nogsogo hayo, ta nogyod hayo, nyawa taglingo wa hayo manga ngayan, ham bomaya wan. 23Nyawa hamlag kitonya, ham fag masolong wa dahol dahol, fag lokso ya ngadi, maskin dahol aban hayo tanggapon fasalamat san Diyos banwanan sam tongod. Ista manga hafofowan magorang naibolon yadi kitonya han Diyos manga fangampang hyabi. 24Dapat ay, isyay wan, ka hayo lagon aban, ham ka manga maakwa, maskin ham nadog wa hayo kafiyan kati. 25Isyay wa ka ham ka fagaba wa mahapsogan kati, Aban ham imlonos wan. Isyay wan aban, ka ham, ka fagaba wa mahasayan, Aban ham imhori wan, mangodgorawan ya ngadi. 26Isyay wan no aba fagayo fag manga taw igfasayagdog hayo, maskin ista manga hafofowan magorang igfasayagdog yadi kitonya has manga bohagon fag fangampang hyabi. 27Dapat, ham ka mangag talinga angko, hogfwayong ha hayo kitay, ham fakaawa hayo manga kaaway. Ham fag fiya has manga taw ka kadwat iglag hayo. 28Ham fag kampang mahoway has mangag fadwat igdog hayo. Ham fag darangin yadi kawa has mangag fahoriyan hayo. 29No hagtofa hayo marigon sas faringfing, fag kaman balis baliw. Ta nogbol hayo balokas ka aba-aba, disagan yadi wa ka agod kat famabasad. 30Ham disagan has fagayo kagsagad gi hayo, no nabol hayo manga botang, ham hawag bawi. 31Fag maangay hayo manga ogali has taw, no kinday hayo fakasayaon nangos taw no gogali ha hayo, ham fag kitonya yadi has taw. 32Ham idwa fiya man has taw hayo ogali, no ka lamang kaawa hayo ka hayo fakaawaon. Nyawa ka ha manga ogali dwat fadi wad twa kaawa ka manga kaawa has taw. 33Ham idwa fiya man has taw hayo ogali no ka lamang syagan igtogbong hayo ka hayo fagtogbongon. Nyawa ka ha manga ogali dwat fadi wad tomogbong has syagan igtogbong hanya. 34Ham idwa fiya man has taw hayo ogali no hayo fagfaoyamon ka lamang syagan igbayad. Nyawa ka ha manga ogali dwat igfaodoyaman ha sadi ha sadi, ta no twa di kitay bomayad di aban. 35Yatokitay, ham ngap fag kaawa hayo manga kaaway, fag falag has fiya. Ham fag faoyam has taw nyawa ham idwa ha faglagon ista bato bayadon. Hayo ogali no kitonya, dahol hayo tanggapon fasalamat aban, hanggan ham imbali in Diyos manga anak. Is Diyos, ka abwat man has fagayo fagayo it kangayanan, fiya it ogali has manga taw kadyapdig baya hanya, has mangag sadili odi. 36Ham fag maawaon kito yadi hayo Ama. 37Ham fag idwa gato fagaba hayo kapariho, ginya madis Diyos idwa yadi gato hayo. Ham fag idwag fatohoyan hayo manga iba has fadosaan, ginya madis Diyos idwa yadi fatohoyan hayo has fadosaan. Ham fag idwa ha bodbotangan ha sadi ha sadi, ginyas Diyos idwa yadig botang hayo manga ogali dwat. 38Ham fag madisagon has taw, ginyas Diyos domisag yadi ha hayo napno wa gantangan, maaligigan ya ngadi, hanggan wa nafaambobong wan. Maskin no kinday hayo gantangan has taw, kitonya yadis Diyos no gomantang ha hayo. 39Ginya madis Hisos nafalimbay ya ngay has manga bota baliwa, naintaw, Sadik bota syagan awkin gomamat ka sadik bota, ham gayfan? No kitonya ta pariho imdagdag has gobang, idwa aw? 40Idwa ha katogbong ka madonong man kagfaadal hanya, dapat kagfaadal no nafwayong wa fiya fiya, ka katogbong imlobos yadi kito kagfaadal hanya. 41Kana mayon haw nogbantay ka dihot sam fadwasay basad mata, dapat hagfabayaan ka sa hyamo sadili mata, bilang wa dahos batang? 42Kinda araw haw no lomwang ha hyamo fadwasay, Ho nangos bomol ka dihot gi hyamo mata, dapat hadyag lag kitay ka sa hyamo mata, manghara, daho was batang. Hagfataka odi, gwadi bol yap ka daho was batang ka sa hyamo sadili mata, ha bago di lomag fiya fiya, ginya madi ha tomwa bomol ka dihot gim fadwasay mata. 43Idwa ha fiya fag fon hayo kagbohad dwat. Idwa yadi ha dwat fag fon hayo kagbohad fiya. 44Ka bohad kagfalag no kana fag hayo it fon. Tam idwag bol bohad igos gis fon madogi, idwa yadig fangta manga bohad obas gis hayahaya. 45Ka taw no fiya it ogali, it fwayong fagaba yadi wa fiya, maskin it fagayfanon fagaba wa fiya. Dapat ka taw no dwat it ogali, it fwayong fagaba yadi wa dwat, maskin it fagayfanon fagaba wa dwat. No kindawasta fangayofan, kitonya yadi ka kadog. 46Kana mayon ham no fagabag ngayan angko, Hayo wa Fon, dapat ham idwa katanog angko manga fwayong? 47Ho homalimbawa hayo kawa has fagayo fag manga taw ka omakbang hangko, igtalinga angko manga hampang, hanggan katanog yadi. 48Hanya kito wa sadik taw ka nahodkod abasad hanggan wa nadasog bato, bago di natorok it balay. Ginya madi, no nabaha, ka danom fadi wad nadalan hanya fag balay, dapat idwan hawig maskin abasad it hodkod. 49Dapat ay, kagtalinga angko manga hampang, dapat idwa katanog, kito sadik taw nahalig balay idwa abasad it hodkod. Ginya madi no nabaha, ka danom no nadalan hanya fag balay, dagos wa nakfo, insarowayan lamang.

will be added

X\