LOKAS 4

1Gis nanya ka Maliyaw fag Falad sawan Hisos fangayofan sadi wak dahonya, hanggan is Hisos nwali ya gis safa Hordan. Ka Maliyaw fag Falad nataban in Hisos has basad fakahyabogan. 2Is Hisos no sinya wan, is Fandaya nasolay igfaloksowan hanya ofat ik safolok sirang. Is Hisos idwa ha nahwan hanon kandogay inya, yakanga kalonos wa dahol dahol. 3Ginyas Fandayag lwang han Hisos, Haw non Diyos wa nga Anak, haw fag lwang has nwa fag bato, Fag imbali tinapay. 4Dapat is Hisos nasagot hanya, Insorat kitay, Bohondi ka odi fanganon kagfaboyag manga taw. 5Ginyas Fandaya nataban in Hisos has abwat, sas fakabantayan, nafalag hanya, sadi wa ginan, ka manga gorangon sakop fagayo fagayo sadik dahonya baba daga. 6Ginyas Fandayag lwang han Hisos, Haw no ha ngangkok manimba, ho domisag ha hyamo to fag manga gorangon sakop, it manga kangayanan hanggan kafiyan fagayo, maskin to fagayo indisag wa hangko a, kati ho domisag wan nyawa faktaw kangko fakasayaon disagan. 8Is Hisos nasagot, nalwang, Insorat kitay, Fag is Diyos kagfon hyamo kam fagsimbaon. Fag hanya lamang kam fakatanogon. 9Ginya madis Fandaya nataban ya in Hisos has baba atop Fanimbaan-Dahol sas Hirosalim, iglwang han Hisos, Haw non Diyos wa nga Anak, fadagdagan hyamo gistay is baba atop, ham daga is baba daga, 10maskin insorat kitay, Hanya tomogon it manga anghil kitay, ta fag omano hyamo, 11insorat yadi kitay, Ta somambot di hyamo kaarakitay im bitis idwam-iktan has bato. 12Dapat is Hisos nasagot, Ka Kasoratan iglwang, Haw fag idwag tikis igsolay kagfon hyamo, hyamo Diyos. 13Is Fandaya nontabo wagsolay igfaloksowan in Hisos git manga halimbawan fagayo, naobon ya nga wan Hisos a, igfanaya nangos no ginahin fag masohod aban no somolay ya hanya. 14Is Hisos infwali ya has sakop Galiliya a, in Diyos Maliyaw fag Falad karigonan sawa hanya. In Hisos manga toltol hanggan ibolon indahit wan sas ligongan. 15Is Hisos nafaadal has taw sasta manga basad fanimbaan. Fagayo fag manga taw nafasayagdog hanya. 16Ginyas Hisos nwali has banwa Nasarit hat nakadaholan fag banwa. Is Hisos nasakbaw has basad fanimbaan sas Sirang Kafahowayan kito kat ogali nogbanwan. Is Hisos nalindog kaarakitay bomasa gis Kasoratan. 17Ta nafagamit hanya in Isayas, in Diyos fangampang kasoratan malohotan. Is Hisos naladlad ka kasoratan kansorat kito, ginya nabasa wan, 18Kati in Diyos Maliyaw fag Falad sawangko Maskin hanya nafili wangko kaarakitay ho manoltol ka Fiya fag Barita has manga myabog. Hanya nasogo angko kaarakitay igfadog hasta manga napilit nataban kitay, ta malfas ya, Fadog yadi has manga bota kitay, ista manga mata imfoga ya, Kaarakitay fomalfas kasta fagfahoriyon. 19Fadog yadi has taw kitay, kati fag fangaraw kagfon intam falag it kahowayan has taw. 20Is Hisos nalohot ya ngawan ka Kasoratan, nafwali ya hasag bahala, ginya madis Hisos intokaw ya. Fagayo ka sas basad fanimbaan indolaw wagdog, ta nabantay in Hisos. 21Ginya madis Hisos igfwayong has taw, Ka hayo donggon gis Kasoratan in-anod wa kati. 22Fagayo nafasayagdog hanya a, tandolaw wa dahol kawa kafiyaon maskin nogtoltol. Ta garintawan, Bohonwa awkin in Hosi anak to? 23Yakangas Hisos iglwang, Ham ngandayo somokfon to fag fwayongon, Haw kagbolong has taw, fag im sadili yap im fagbolongon. Ham lomwang yadi hangko, Ibolonan yadistay sam sadili banwanan kito ka hyami donggon kam naibolon sas banwa Kapirnaom. 24Is Hisos igfadagos yapdig fwayong kitay, Hogfwayong ha hayo kitay orongan wan, idwa ha akwa in Diyos fangampang kabantog sat sadili banwanan. 25Dapat hogfwayong hayo kitay, hyabi hyabi, san Iliyas fag kasohodan, nodwa nahwayan tolok fangaraw hagboknga, yakanga malonos wa dahol sadi wak dahonya banwanan, gis nanya, bonwa bohag, aywan ka manga ina balo sas Israil. 26Dapat ay, is Diyos idwa nafalahaw in Iliyas has ina balo sas Israil, dapat ha sadik ina balo sas Saripta, sakop Sidon. 27San Ilisiyo man fag kasohodan, no kitay di, kaaywanon fag manga taw ka ha sagit kitong sas banwanan manga Israil, dapat idwa hanfiya ngadi sadi. Kan Diyos nafafiya is Naaman lamang, gis sakop Siriya. 28Ta no nadog in Hisos manga hampang, fagayo ka sas basad fanimbaan kaisog wa dahol. 29Ta nanhalindogan, natawid marigon in Hisos boknga takyay ginya nataban hanya has sokayan banwa has bohid has baba dalifi kaarakitay ta fomolid hanya ha basad gobang. 30Dapat ay, is Hisos nalahaw lamang hasta fagbokngan a, nwali wan. 31Ginya madis Hisos hawas lwad has banwa Kapirnaom, sakop Galiliya. Sas Sirang Kafahowayan, is Hisos igfaadal has manga taw sinya. 32Tantaka wagdog is Hisos nogfaadal is taw maskin kitos ha kangayanan no kampang, idwag hono. 33Sinyas basad fanimbaan, ha sadik ama, labang wa kagfahoriyan hanya, igtawag marigon kitay, 34Yabay, haw Hisos taga Nasarit, kana haw nogmawat hyami. Haw awkin hastay kaarakitay domaog wa hyami? Ho fadi wadtwa no fakta haw. Haw ka Maliyaw kanbangkad gin Diyos. 35Dapat is Hisos nangabaya ka labang, nalwang, Ha hawa gawang gawang. Haw fag galin wa gis nyamo fag taw. Ginya madi, sasta faglagan fagayo, ka labang nafahakfo wa dagos ka ama, ginya madi nalin lamang, idwa nafabaran ka ama. 36Fagayo fag manga taw intaka wan, ta nangarintawan ha sadi ha sadi kitay, Kana ti fag manga hampang? Ha kangayanan, marigon ya ngadi, nogfasognod ka manga labang, ta katanog yadi wa galin. 37Ka barita kawan Hisos manga ibolon indahit ha sadik dahonya sinya fag manga banwanan. 38Is Hisos nalahaw wa gis fanimbaan, nasakbaw han Simon balay. Gis nanya in Simon nogang ina ha sagit, kagnaw wa dahol dahol, yakanga tagfaaronganon han Hisos kitay, Haw nangos fafiyaan yap hanya. 39Is Hisos nalindog sas ina dayo igyanan a, nasogo kitay ka hagnaw fag galin wa gi hanya. Ka ina infiya wan, dagos wanbangon, ogali man di, nanogbong was taw. 40Araw, myanit no kasangday wan, ista manga kahilala nataban han Hisos fagayo fagayo ka ha manga sagit, bokod bokod. Is Hisos nafwalid it gamat ha sadi ha sadi, hanggan nafafiya fagayo. 41Manga labang nalin wa gis aywan fag manga taw, igsohodan wagharokyawan kitay, Haw in Diyos wa Anak. Dapat is Hisos nangabaya ka manga labang, idwa nafaawang maskin ka manga labang kilala wa kitay is Hisos wa kan Diyos-natogon-Famawi. 42Ginya madi, no bago marom, is Hisos nabisok has talon. Ka manga taw galingawan in Hisos. Ta no nalag ya nga hanya, taglwang, Ha hayap iglahaw gistay. 43Dapat is Hisos iglwang has taw, Ho fag mamaadal yapdi has iba fag manga banwanan ka Fiya fag Barita han Diyos sakop baliwa. Maskin nga is Diyos nasogo angko hastay, tonya wa kangko bato ibolonon. 44Ginyas Hisos igtoltol yapdi sas manga fanimbaan Hodyo sas sakop Hodiya.

will be added

X\