LOKAS 3

1Ginya madi aban, sas fasafolo ha lima fag fangaraw, nos Tibiriyo Sisar kasta abwat fag gorangon sas manga layonan daga ka sakop Roma, is Ponsiyo Pilato ka gobirnador sas sakop Hodiya, is Hirodis kasta gorangon, no sas sakop di Galiliya, hanggan kaman it fadwasay, is Filipi, ka gorangon sas manga sakop di Itoriya hanggan Tarakoniti. Is Lisaniyas ka gorangon sas sakop di Abiliniya. 2Gis nanya da Anas da Kayfas ka tarogbongan gorangon fag fagalan-han-Diyos. Gis nanya fag masohod is Hwan, in Sakariyas anak no maoliyanan sas basad fakahyabogan, is Diyos nafadog hanya it bato toltolon has taw. 3Yakangas Hwan nasafong wa bali bali difay safa Hordan, igfaadal has taw. Hanyag lwang, Ham fag soyo, fag dayo yadi hayo manga ogali dwat. Ham fag fatogna hayo kaarakitay ha tandaan sas danom kagfatohoyan has taw kitay ham igsoyo, hanggan is Diyos faliyam wa fagayo hayo manga naogali dwat. 4Kito kansorat san Isayas, in Diyos fangampang, sorat kitay, Kiti kat nafwayong kagtawag marigon marigon, gis basad fakahyabogan, Fatalagaan in Diyos bato lahawan, Fahaslongan it manga dalan fagayo. 5Dafogan ka manga losot, Hodkodan, fadatagan ka manga moyod, manga fongso, Fahaslongan ka dalan igbarikwangan, Fasohodan fiya fiya ka manga losot garogbot garogbot. 6Ginya madi fagayo fag manga taw lomag no kinday is Diyos nogbawi manga taw. 7Aywan fag manga taw ka nagobok in Hwan kaarakitay mamatogna. Is Hwan iglwang has manga taw, Ham bilang odi manga abyanon no madaya. Fakta kagfatagak hayo kitay ham fag lagyo wan gin Diyos fadosaan ka kadasog aban? 8Fag hanggan wa hayo manga bohad ogali kagfalag kitay ham igsoyo wan. Ham fag idwa kasyag kitay maskin ham in Abraham manga hasokfonan, ya fiya wan. Gwadi hogfwayong ha hayo kitay gistay fag manga bato is Diyos syagan kalig in Abraham manga hasokfonan orongan. 9Gis kati ginan ka wasay danwan hatak sas dalid hayo, omobang fagayo fagayo fag manga fon hayo kadwa fiya it bohad a, omokas wa has basad afoy. 10Ginya ka fakaaywanan fag manga taw gintaw in Hwan, No kitonya mangharaw, kana ka hyami bato ibolonon kaarakitay midwam sakop has fadosaan? 11Is Hwan nasagot, Hayo balokas no dowa, disagan wa ka sadi hasadwa akwa. Ka manga ha hanon fag kitonya yadi, disagan hasadwa akwa. 12Mangag falo igsohot ka gobirno Roma bohis indasog wan han Hwan maskin kasaya mamatogna. Ta naintaw yadi han Hwan kitay, Haw kagfaadal, kinda odi hami? 13Is Hwan iglwang has manga fanohot bohis, Ham fag idwag sagad iglabi ka fiya hayo fagsagadon. 14Ka manga sondalo naintaw yadin Hwan, Hami yadi, kinda odi? Hanyag lwang, Nyawa ham igsagad, fag idwag logos is taw. Fag idwag fadala nodwa orongan. Ham fag idwag manaw hayo tangdanan. 15Gis nanya fag masohod aywan fag manga taw mafanayan odi no ginahin in Diyos-natogon-Famawi nombangkad, yakanga kat fakaaywanan naayfan kitay ngatay is Hwan kasta fagfanayaon. 16Dapat is Hwan nafwayong has taw, No kitay di, sas danom aho nogfatogna hayo, dapat ha akwa ya kadasog aban, ka madonong man angko, hanya ka fatogna hayo sas Maliyaw fag Falad, hanggan sas afoy. Ho kaya wa manlohas it siyok lapak. 17Hanya ha bitbit fanayang kaarakitay falayon it opa, manga ohot. Tomifon it tirigo sas basad dongdong, dapat ay, somonog wa ka manga ohot sas afoy kadwa kapsa. 18Yakanga aywan yapdi fag manga fatagak in Hwan fagtoltolon has taw nogfadog ka Fiya fag Barita. 19Dapat is Hwan nangabaya in Hirodis, kasta gorangon, maskin kahagaw in Filipi babay, is Hirodiyas, it tagyaw yadi. Bohondi tonya kan Hirodis naibolon dwat kan Hwan fakabayaon. 20Yakangas Hirodis nadogang ya to kat kasalanan, hanya nafaporiso yadin Hwan. 21Itfagonan, fagayo fagayo fag manga taw no nafatogna wan, hanggan is Hisos nafatogna yadi. Ginyas Hisos nogdarangin yapdi, ka banwa sas tongod inboklas wan. 22Ka Maliyaw fag Falad, bilang wa salompati, nayokfo han Hisos. Ginya ha nahasnog gin Diyos banwanan sam tongod, iglwang kitay, Haw wa kangko fagalwasiyon fag Anak, hogbaya wa dahol dahol hyamo. 23Is Hisos manga wa tolok safolok fangaraw it kagorangan bago digfaadal has taw. Ista fangayofan is Hisos in Hosi odi anak. In Hosi hafofowan gin Adan ginan kiti, 24Bago bago is Adan bilang wan Diyos anak. Ginyan Adan anak is Sit. Ginyan Sit anak is Inos. Ginyan Inos anak is Kainan. In Kainan anak is Mahalalil. In Mahalalil anak is Harid. In Harid anak is Inok. In Inok anak is Matosalim. In Matosalim anak is Lamik. In Lamik anak is Nowi. In Nowi anak is Sim. In Sim anak is Arfaksad. In Arfaksad anak is Kainan. In Kainan anak is Sala. In Sala anak is Hibir. In Hibir anak is Pilig. In Pilig anak is Ragaw. In Ragaw anak is Sirog. In Sirog anak is Nakor. In Nakor anak is Tira. In Tira anak is Abraham. In Abraham anak is Isaak. In Isaak anak is Hakob. In Hakob anak is Hoda. In Hoda anak is Faris. In Faris anak is Isrom. In Isrom anak is Arni. In Arni anak is Admin. In Admin anak is Aminadab. In Aminadab anak is Naason. In Naason anak is Salmon. In Salmon anak is Boos. In Boos anak is Obid. In Obid anak is Hisi. In Hisi anak is Dabid. In Dabid anak is Natan. In Natan anak is Matata. In Matata anak is Mainan. In Mainan anak is Miliya. In Miliya anak is Iliyakim. In Iliyakim anak is Honan. In Honan anak is Hosi. In Hosi anak is Hoda. In Hoda anak is Simyon. In Simyon anak is Libi. In Libi anak is Matat. In Matat anak is Horin. In Horin anak is Ilyasar. In Ilyasar anak is Hoswi. In Hoswi anak is Ir. In Ir anak is Ilmodam. In Ilmodam anak is Kosam. In Kosam anak is Adi. In Adi anak is Milki. In Milki anak is Niri. In Niri anak is Saltiyal. In Saltiyal anak is Sorobabil. In Sorobabil anak is Risa. In Risa anak is Hoana. In Hoana anak is Hoda. In Hoda anak is Hosi. In Hosi anak is Simi. In Simi anak is Matatiyas. In Matatiyas anak is Maat. In Maat anak is Nagi. In Nagi anak is Isli. In Isli anak is Nahom. In Nahom anak is Amos. In Amos anak is Matatiyas. In Matatiyas anak is Hosi. In Hosi anak is Hanan. In Hanan anak is Milki. In Milki anak is Libi. In Libi anak is Matat. In Matat anak is Ili. Ginya madin Ili anak kawas Hosi. To fag is Hosi kasta fangayofan in Hisos wa ama.

will be added

X\