1 Dapat ay, no marom marom yapdi sas sirang gona sa sadik simba, ka manga ina hawas lobgoban nagtigiban bato, ha diya it manga nafatalaga famabanglo. 2 Ta nondasog wan, taglag ka lohib fanahop bato inoson wan has dayo sakbawan. 3 Yakanga ta nasakbaw, dapat tadwa ha lagan in Hisos habilogan sinya. 4 Yabay, ta no nangarisipon yapdi, sadi odi ginan ta nalag dowak ama sasta akbang, it rotay di masilaw wan. 5 Maskin tandala wa dahol dahol, ka manga ina matarohongan wa fiya fiya, ista walong di matignaan wa fiya fiya has boknga daga. Ginya ka manga ama nalwang has manga ina, Kana mayon ham nogsayak ka boyagan sasta nagfwalidan natay? 6 Idwastay, hanyan boyag ya domwag. Ham fag tohod kat fwayong ha hayo ham no sayapdis sakop Galiliya. Hanya danwa nalwang kitay, 7 Ka fiya hanya, Kanbali taw, ta fag fagamat has manga taw ha kasalanan, fag impako yadi sas nafatimbangan hayo, ginya madi fag imboyag ya sas fatolo fag sirang. 8 Ginya madi ka manga ina bago di natohod in Hisos fwayong. 9 Ka manga ina no nwali gis lobgoban, ta natoltol han Hisos manga katogbong kasta lagan fagayo, natoltol has Safolo-ha-Sadi hanggan hasta ofod tiba. 10 To fag manga ina kawa da Mariya Magdalina, da Hwana hanggan da Mariya in Santyago ina. To fag manga ina, hanggan it manga ofod tibak ina, ka natoltol tonya has manga Fandiya-Barita. 11 Dapat ka manga Fandiya-Barita naayfan ka manga ina igfatoga odi, yakanga tadwa katiwala. 12 Nyawa kitonya, is Pidro inlindog wan, igdalandan, namantay wa has naglobgoban. Is Pidro natalonggaw has basad nagfwalidan, dapat idwa nga hanlag, no bohonwa ka odista nagsafotan it habilogan. Yakangas Pidro nwali wa a, nataka wa ngay kat lagan. 13 Gis nanya yadi fag sirang in Hisos katogbong dowa hawas sadik forowan balay sayok, Imaos. It kaayayowan gis Hirosalim manga safolo ha sadik liho. 14 Ta no boknga wa dalan, tagtoltolan kasta lagan fagayo madayo. 15 Ta nogtoltolan yapdi, is Hisos wan ka natahod is taw, ginya ta koyogan wan. 16 Ka dowak katogbong iglag in Hisos, dapat tadyapdi kilala hanya. 17 Is Hisos gintaw has taw, Kana ka hayo fagtoltolon boknga dalan? Ta natorosan wa a, marongkotan odi. 18 Ginyan sadi, kat ngayan is Kilyopas iglwang kiti, Haw laya ka sadi dik famaklay has Hirosalim kadya nadog ka manga bagay ka ngalay yapdin lag sinya. 19 Is Hisos naintaw, Kana fag manga bagay tonya? Ta nasagot kiti, Kawas Hisos, taga Nasarit, in Diyos fangampang sadi, nyawa gibolon, nyawa kampang, idwa ha bosal san Diyos faglagan, hanggan sasta faglagan fagayo fag manga taw. 20 Hyami yadi manga fagtahinan fagalan-han-Diyos hanggan manga fagtahinan banwa nafagamat hanya has taw kaarakitay fatohoyan has kahatayan. Ta napako yadi hanya sas nafatimbangan hayo. 21 No kitay di migsyag kitay hanya ka fomalfas ka manga taga Israil. Bohondi tonya ka hyami fagisipon. Kati madayowan nonlag kitonya, 22 hanggan mindolaw wan ka tiba hyami ofod manga ina no nabarita ha hyami. Ta marom yapdi, hono, namantay has lobgoban, 23 dapat tadwa ha lagan in Hisos habilogan sinya. Tanfwali ya, taglwang, Mi ha lagan sadik madolaw, manga anghil kaglwang kitay is Hisos boyagan. 24 Hyami manga ofod tiba ginya yadi was lobgoban, kitonya nga kasta lagan, dapat tadwa ha lagan in Hisos. 25 Ginyas Hisos iglwang has taw, Yabay yabay ham. Kana mayon ham nodwa katiwala fagayo kan Diyos manga fangampang fwayong. 26 Idwa awkin ka fiya kan Diyos-natogon-Famawi fag omagwanta to fag manga bagay fagayo bago domog it kafiyan? 27 Is Hisos nafatwagdog has taw kansorat sas manga Kasoratan fagayo kawa hat sadili. Gin Mwisis manga nasorat has taw nogfabago igfatwagdog, hanggan wa han Diyos manga fangampang nasorat. 28 Araw ta no kaakbang wa hasta hadasogan fag forowan balay. No kalag di, is Hisos igfadagos yapdit lahawan. 29 Dapat ta kwangit yapdig falahaw hanya, taglwang, Haw fag hawa hyami balay, maskin ka myanit kasangday wa a, kaharom wan. Yakangas Hisos nasakbaw wa sinya. 30 Ta nogsayowan wa kwan sas fanganan, is Hisos nabol tinapay a, nabaya han Diyos, ginya nafaarogbotan, nadisag yadi has taw. 31 Ta bago di nahilala kitay, is Hisos wa ngap mangharaw. Ginya madi is Hisos idwa hanlag domwag. 32 Ginya tagtoltolan kiti, Yabay yabay, maskin manghara kitonya wak masayagdog nogtoltol intam sas boknga dalan, hanggan igfatwagdog intam gis Kasoratan manga fwayong. 33 Ka dowak katogbong dagos wanlindog a, nwali has Hirosalim. Ta nondasog, taglag ka Safolo-ha-Sadi matifonan hanggan ista manga ofod tiba. 34 Tagtoltolan kitay, Orongan wan kagfon intam inboyag ya. Nafalag wa han Simon. 35 Ka dowak katogbong natoltol yadi has taw kat lagan sas boknga dalan, hanggan no kinday ta no nahilala in Hisos, hanya no nafaarogbotan ka tinapay. 36 Ginya ta nogtoltolan yapdi kitonya, is Hisos mandi kandasog sasta fagbokngan. Is Hisos igfwayong has taw, Fag sawa hayo ka kahowayan kati. 37 Dapat ay tanhinol wa ngap, tandala wan, ta gayfan ngan di falad ka sasta fagbokngan. 38 Yakangas Hisos igfwayong has taw, Kana ham no marongkotan odi? Kana ham no gadowan yapdi? 39 Bantayan angko manga gamat, manga bitis, aho wa ngay. Sapkidan angko, bantayan wa fiya fiya. Ka falad idwa ha botol, idwa ha faknol, dapat ham iglag kitay aho ha habilogan mandi. 40 Is Hisos nalwang di nga kitonya, nafalag has taw it manga gamat hanggan it manga bitis. 41 Sas kabayaan ngap tadya katiwala fiya fiya, ta gadowan yapdi. Yakangas Hisos gintaw has taw, Tam ha fanganon yapdi awkin is nyamo? 42 Tagdisag hanya sadik lifong oyang masogban. 43 Is Hisos nabol a, nahwan wa sasta faglagan. 44 Ginyas Hisos igfwayong has taw, Ka manga nadalanan sangko, kangko nafwayong ha hayo tam no gofodan yapdi, kitay, ka fiya, fag im-anod fagayo kansorat kawa hangko san Mwisis Togon, san Diyos manga fangampang manga famasaan, hanggan sas manga Ambahan fag famasaan. 45 Ginyas Hisos naboklas ista manga fangayofan kaarakitay ta tomwagdog ka manga Kasoratan fwayong. 46 Ginyag lwang, Kito kansorat, ka fiya, aho, in Diyos-natogon-Famawi, fag omagwanta mahori, ginya fag imboyag ya gis kahatayan sas fatolo fag sirang. 47 Ginya ka fiya, manga taw kagsyag hangko fag tomoltol has taw sas fagayo fag layonan banwanan. Fag imbarita kitay manga taw fag soyo wan, ginyat manga naogali dwat imliyam wan. Fag gis Hirosalim nogfabago igbarita. 48 Ham ka nalag angko manga nadalanan fagayo, yakanga ham fadogan yadi wan has tiba taw. 49 Yabay, ho somogo ha hayo kangko Ama nagtogonan ha hayo. Dapat ham fag idyag lahaw gis banwa Hirosalim no baliday ham idya ha natanggap karigonan fagsyaganon gin Diyos banwanan sam tongod. 50 Ginya madis Hisos nataban it manga katogbong has dayo banwa. Ta nondasog sas Bitanya, is Hisos nafaabwat it gamat has tongod, ginyag lwang has taw, Ham bomaya wan. 51 Is Hisos, nyawa kampang yapdi, igfabago wa kaabwat has tongod. 52 Kan Hisos manga katogbong nafasayagdog hanya. Ginya madi ta nwali ya nga has banwa Hirosalim, kasolong wa dahol dahol. 53 Ta fagaba wa sas basad Fanimbaan-Dahol igfasayagdog in Diyos sinya.
