1 Ginya madi yabay sadik kayonya tifonan inlindog a, nataban wan Hisos han Pilato. 2 Gis nanya tagfabago wagsombong han Pilato, taglwang, To fag taw mi naiktan maskin igfasognod hyami kapariho iglaban has manga ha kangayanan, igbando yadi fag idwag bayad bohis han Sisar. Igfasayagdog ya ngadi has taw kitay hanya wa hono kan Diyos-natogon-Famawi, ka sadik gorangon. 3 Ginyas Pilato gintaw in Hisos kiti, Haw awkin ka Gorangon manga Hodyo? Is Hisos nasagot, Haw wa ngap kaglwang. 4 Is Pilato igfwayong has manga fagtahinan fagalan-han-Diyos hanggan has fakaaywanan fag manga taw, Hodwa ha donggon it kasalanan to fag taw. 5 Dapat tagpilit wagsombong, taglwang, Hanya wa kagfasognod sadi wak dahonya sakop Hodiya, igfwayong has taw kitay fag lomaban ka manga ha kangayanan. Gi yapdis sakop Galiliya nogfabago igfasognod ka manga taw hanggan wandasog hastay kati. 6 Is Pilato no nadog kitay is Hisos gis Galiliya, hono, nogfabago igfasognod has manga taw, naintaw has taw ngatay is Hisos taga yadi Galiliya. 7 Yakangas Pilato no nadog kitay is Hisos giwas Gorangon Hirodis sakop fag banwanan, is Pilato nasogo in Hisos han Hirodis maskin is Hirodis sawas Hirosalim gis nanya. 8 Is Hirodis nabaya wa dahol dahol iglag in Hisos, maskin aywan it donggon ista fwayong gin Hisos. Hanya dogay wa kasaya lomag hanya. In Hirodis fakasayaon, is Hisos nangos fag omibolon sadik bagay madolaw san Hirodis faglagan. 9 Yakangas Hirodis, nyawa gintaw wa gintaw wan Hisos, is Hisos fawa nasagot ngadi sadik hampang. 10 Ka manga fagtahinan fagalan-han-Diyos hanggan ka mangag faadal Batasan Hodyo sinya yadi wan idwag fagomon igtawag marigon, igsombong kan Hisos naibolon. 11 Is Hirodis hanggan it manga sondalo nayod in Hisos hanggan nafaniring kitay hanya sadik gorangon. Ta nafasolong rotay ha kangayanan, fiya kabantay, han Hisos, ginya ta nafafwali ya han Pilato. 12 Gis nanya lamang fag sirang da Hirodis da Pilato nangamigosan yadi wan, nyawat fagonan haraw kahodhoriyan. 13 Is Pilato nafatawag ka manga fagtahinan fagalan-han-Diyos hanggan ka manga fagtahinan sas banwa Hirosalim hanggan ka fakaaywanan fag manga taw. 14 Ginyas Pilato iglwang has taw, Ham no nataban hastay to fag ama, hayo sombong hangko kitay, to fag taw kawag fasognod manga taw fag lomaban ka ha manga kangayanan. Kati yabay ho no nasaysay hanya sa hayo fagdogan, ho nadog hayo manga sombong ha hanya idwa ha fakaoronganan. 15 Is Hirodis kito yadingko idwag dog kitay hanya ha kasalanan, yakanga nafafwali ya hantam. Idwa fiya igfatohoyan hanya has kahatayan, maskin hanya idwa ha kasalanan daho wasagfahatay hanya. 16 Yakanga ho fabakbak lamang is taw hanya, ginya ho fomalfas ya. 17 Fagaba sas masohod Fanohodan Nagsagayan, is Pilato fag ha falfason ka sadik Hodyo kanporiso kaarakitay ka manga Hodyo bomaya hanya. 18 Dapat ay, ka fakaaywanan fag manga taw nanarawagan di ngap igsohodan, taglwang, Mi dayo tyamo fag taw. Fag is Barabas kantam fagfalfason. 19 Is Barabas kasta nafaporiso itfagonan, kawa hanya nafasognod ngay has taw ka nalaban has manga ha kangayanan sas banwa Hirosalim, hanggan ha nafahatay yadi taw. 20 Sadi ya ginan is Pilato nahampang has taw maskin hanya kasayag falfas in Hisos. 21 Dapat ta nanarawagan di ngap kitay, Fapakowan in Hisos, fapakowan hanya sas nafatimbangan hayo. 22 Fatolo wak olit is Pilato gintaw has manga taw, Kana mayon, kanat naibolon dwat ham gayfan? Hodwa ha lagan in Hisos fabangdanan no kitay daho wasagfahatay hanya. Yakanga ho fabakbak lamang is taw hanya, ginya ho fomalfas wan. 23 Ta ngap inbagat wan, inlabi wa ngap igtarawagan kitay, Fapakowan in Hisos sas nafatimbangan hayo. No dogay ista tawag nadaog wan Pilato fwayong. 24 Yakangas Pilato nafatohoyan kitay hanyag faangay no kinda kasta fagsagadon. 25 Nafalfas kasta fagsagadon, ka taw kanporiso maskin iglaban has manga ha kangayanan hanggan ha nafahatay taw, ginya nafabahala in Hisos has taw kaarakitay ta omibolon nyawa kana kasta fakasayaon ha hanya. 26 Ka manga sondalo nogtaban in Hisos kaarakitay igfapako hanya, ta ha nahablang sadik ama, is Simon, taga Sirini, goli has banwa git iyab. Tagpilit igtaban hanggan nafafasan hanya ka nafatimbangan hayo, balin Hisos ginanan. 27 Kaaywanon fag manga taw goyan san Hisos ginanan, ha akwa manga ina ayo goraw wa dahol maskin kaawa hanya. 28 Dapat is Hisos natakfili ginyag lwang has manga ina, Manga anak ina, taga Hirosalim, ham fag idwa goraw angko. Fag ka hayo sadili hanggan hayo sadili manga anak ka hayo fakaawaon. 29 Yabay, aban fag manga sirang ta lomwang, Fiya man mangharaw ka manga galayos, kadwa naanak, kadwa yadi ha nagfasosowan. 30 Gis nanya fag manga sirang aban, manga taw lomwang has manga fongso, Ham fag katono ha hyami, hanggan has manga moyod, Ham fag tomabon wa hyami. 31 Maskin halimbawa, ta no gibolon kito ka fon hayo no latoy yapdi, kinday aban, ista ibolonon ka hayo no tonga wan, ham gayfan? 32 Ka manga sondalo nataban yadi dowak ama ka ha kasalanan orongan kaarakitay ta fasohod yadi wan Hisos nogfahatay. 33 Ta nondasog sa sadik foyo, tagngayan Botol Alfoyo, ta nafapako in Hisos sas nafatimbangan hayo sinya. Ta nafapako yadi ka dowak ama tolisan, insadi san Hisos balis sihon, insadi sat balis wala. 34 Ginyas Hisos iglwang, Mama, haw fag faliyam ista ibolon dwat, fag idwa kahori is taw, maskin tadwa twa kasta kasalanan ta nogfapako angko. Ginya ka manga sondalo namostahan no fakta ka omafo in Hisos manga rotay. 35 Ka manga taw malindogan sas ligongan mabantayan odi in Hisos. Dapat ka manga fagtahinan gis banwa igfasidyowan odi hanya, taglwang, Hanyag bawi tiba taw, no hanya nga kan Diyos-natogon-Famawi, kan Diyos nafili, gwadi hanya fag bomawi yadit sadili habilogan. 36 Ka manga sondalo nayod yadin Hisos, gakbang hanya, igfagamit ha hanya langgaw. 37 Taglwang yadi hanya, No haw wa nga ka Gorangon manga Hodyo, gwadi bawiyan wam sadili. 38 Masoratan yadi san Hisos tongod alfoyo ista sombong sas manga fangampangan manga Girigo, manga taga Roma, manga Hibriyo, kitay, To wa ka gorangon manga Hodyo. 39 Ka sadi ka ha kasalanan, ka mapakowan yadi sinya, igmaswag odin Hisos iglwang, Bohonwa awkin haw kan Diyos-natogon-Famawi? Gwadi bawiyan hyamo sadili, bawiyan yadi hyami gistay. 40 Dapat it fadowa nangabaya hanya, nalwang, Hadwa awkin kadala in Diyos? Bati tagfadosa yadi hyamo kito hanya. 41 Tam wa ngap ka fiya fadosaon kito, kawa ganti intam manga kasalanan, dapat ay, to fag taw idwa ha naibolon dwat. 42 Ginyag lwang yadi han Hisos, Hisos, haw nangos fag tomohod yadingko haw no kabali wa hari aban. 43 Is Hisos nasagot hanya, Hogfwayong ha hyamo, tam araw mangoyogan wan has fiya fag oliyanan ka manga natay. 44 Araw, no manga boknga wa sirang, sadi wak dahonya banwanan inharom wan, hanggan wa myanit kabohid. 45 Ka kandogay inya ka myanit fawa nasalog, inliyam wan, hanggan ka fanahop rotay sas fagbokngan Fanimbaan-Dahol dagos wanragyang, namokngan wan. 46 Ginyas Hisos igtawag marigon, iglwang, Mama hogfaano ha hyamo angko falad. Hanya nalwang di nga kitonya, nafalfas wat ipsaw. 47 Ka fagtahinan sondalo no nalag to fag manga bagay, nafasayagdog in Diyos, iglwang, To fag taw orongan wadwa ha kasalanan. 48 Fagayo fag manga taw ka matifonan mabantayan sinya nalag wa fagayo no kinda kananod, tandala wan, yakanga no goli hat manga balay, tagbakbak hat manga sadili boknga dobdob. 49 In Hisos manga fakilalaon fagayo malindogan yadi sas dayo ogbot, hanggan ka manga ina ka natahin in Hisos gi yapdis sakop Galiliya sinya yadi wan. Ta fagayo nalag tonya fag manga bagay. 50 Yabay, ha sadik ama is Hosi, gis banwa Arimatiya, sadik banwa Hodyo. To fag ama it fangayofan hanggan it ogali kafiyaon. Hanya mafanayan yadi no ginahin is Diyos nogfabago it sakop. Nyawa kitay is Hosi sadi gis fanoltolan manga fagtahinan Hodyo, hanyadwa goyon is taw ista naibolon han Hisos. 52 Is Hosi hawan Pilato, nasagad in Hisos habilogan. 53 No nabol wa gis tongod fatimbangan hayo in Hisos habilogan, nasafot basad homot madamol, ginya nafaigyan sasta basad natigib dalifi, tadyapdi ha naglobgobanan taw sinya. 54 Gis nanya fag sirang, sirang Famatalaga, faginan yadi wa has Sirang Kafahowayan. 55 Ka manga ina ka natahin in Hisos gi yapdis sakop Galiliya naoyan in Hosi a, ta nalag yadi wa kat nagfwalidan in Hisos hanggan no kinday no mafwalidan sinya. 56 Ginya madi ka manga ina nwali wan, igfatalaga manga famabanglo hanggan lana. Ka Sirang Kafahowayan nondasog wan, ka manga ina nafahoway no kinday ka Batasan Hodyo fwayong.
