LOKAS 22

1Gis nanya ka Fanohodan Tinapay Mayangfis kaakbang wan. Tonya fag fanohodan tagngayan yadi Fanohodan Nagsagayan, ta nogtohod ka anghil no nasagaya ista balay hyabi. 2Gis nanya ka manga fagtahinan fagalan-han-Diyos hanggan ka mangag faadal Batasan Hodyo igsayak yapdit halimbawan kaarakitay fahatay in Hisos maskin ta kadala ka fakaaywanan fag manga taw. 3Ginyas Satanas hawan Hodas basad fangayofan. In Hodas bansagan is Iskariyoti, hanya sadi ka gis Safolo-ha-Dowa. 4Yakangas Hodas inlahaw wan, igtoltol has manga fagtahinan fagalan-han-Diyos, hanggan has manga fagtahinan kagbahala sas Fanimbaan-Dahol, no kinday hanya no fagamat has taw in Hisos. 5Tagbaya wan, taglwang han Hodas, Mi tomangdan wa hyamo. 6Is Hodas nafaoyon was taw, hanggan gisip gis nanya no ginahin no somyagan fagamat has taw in Hisos nomsaman di gis fakaaywanan. 7Aban ka sirang ta no kwan Tinapay Mayangfis indasog wan, hanggan gis nanya yadi fag sirang tagsogba ka anak topa fangafiyan, kawa hasta Yafon Fanohodan Nagsagayan. 8Yakangas Hisos igsogo inda Pidro da Hwan, igtogon kitay, Ham fag hanya wan fatalagaan intam Yafon Fanohodan Nagsagayan. 9Da Pidro naintaw in Hisos, Siday nangos hyamo fakasayaon mi nogfatalaga? 10Is Hisos iglwang, Yabay, nomdasog has basad banwa, ham homablang araw sadik ama ka ha songgoy tapayan fwalidan danom. Ham tahinan wa hanya hat fagsakbawan fag balay. 11Ham fag lwang hasagfon balay kiti, Kagfaadal has taw gintaw hyamo kitay siday angko fasakbawan famaklay fag lingoban araw, kaarakitay manayowan yadi angko manga katogbong no kwan intam Yafon Fanohodan? 12Hanya falag ara hayo sadik lingoban dahol, matalagaan sas tongod fag salogan. Ham fag fatalaga intam Yafon sinya. 13Da Pidro inlahaw wan hanggan ta nalag wa fagayo kito kan Hisos fwayong. Yakanga ta sinya wak nafatalaga ista Yafon Fanohodan Nagsagayan. 14Nondasog gis nanya fag masohod ta nogyafon, is Hisos ha yadi was bilog fanganan hanggan it manga Fandiya-Barita. 15Is Hisos igfwayong has taw, Ho danwa kasaya wa dahol kitay, tam fag manayowan yapdi kwan intam Yafon Fanohodan Nagsagayan, ho bago domog mahori. 16Hogfwayong ha hayo hodwa yapdi homwan domwag kito, to nodyam anod san Diyos sakop banwanan. 17Ginyas Hisos nabol fanginoman ka ha sabahan obas, nabaya in Diyos, nafagamit has taw, iglwang, Ham fag bol toy, ham fagayo fag golbosan ginom gistay fag fanginoman. 18Hogfwayong ha hayo hodwa ominom domwag sabahan obas no baliday is Diyos nodyag sakop fagayo. 19Ginya madis Hisos nabol tinapay, nabaya in Diyos, nafaarogbotan, ginya nadisag has taw, iglwang has taw, Toy angko habilogan kangko fagdisagon kaarakitay ha hayo. Ham fag sokfon yadi aban to fag ogali kaarakitay ham maayfanan ya angko. 20Kitonya yadi, ta nontabo wagyafon, is Hisos nabol ka fanginoman, iglwang, To fag fanginoman ka bago fag taranggapan kan-ganit sangko folot kamwatwat kaarakitay ha hayo. 21Dapat istay yadi wan ka kaoyon angko manga kalaban, igsayo yadi wangko. 22Maskin aho, Kanbali Taw, kaakbang wa kalahaw, kito kan Diyos nafatohoyan, dapat ay, isyay wan kangko ofod ka kaoyon angko manga kalaban. 23In Hisos manga katogbong garintawan ha sadi ha sadi kitay, Faktaw santam kam-oyon in Hisos kalaban? 24Araw araw ogbot, in Hisos manga katogbong igdaraogan no faktaw kambali abwat man it kangayanan. 25Is Hisos igfwayong has taw, Ka manga gorangon istay sas baba daga igfatakat manga sakop hanggan ka manga ha kangayanan istay kagfasayagdog it sadili has taw. 26Dapat ham fag idwa kitonya. Ka abwat man has fagayo it kangayanan sa hayo, hanya fag fatimbang kitay hanya ka libaba man has taw it kangayanan. Ka hayo fagtahinan fag hanya ka matogbongon is taw. 27Fakta ka abwat man is taw it kangayanan, ham gayfan? Ngatay kagtokaw odi sasta bilog fanganan, ngatay kat sogowan kagfalo igsyahod? Bohonwa awkin ka matokawan sas bilog fanganan ka abwat man it kangayanan? Dapat tam no gofodan, aho bilang odi sadik famalo yadi. 28Ham ka naofod angko fagaba nyawa sawangko basad fakahoriyan kagsolay angko. 29Yakanga no kinday angko Ama igfatalaga angko bato sakopon aban, kitonya yadi ahog fatalaga hayo kangayanan sangko sakop aban. 30Tam fagaba wagsayowan kwan, manga ginom gis nanya aban hanggan ho fatokaw yadi wa hayo sas manga tokawan fanokawan gorangon aban, kaarakitay ham kabali manga fangabaya han Israil manga hasokfonan safolo ha dowak layonan. 31Ginyas Hisos iglwang, Simon, Simon, yabay is Satanas nanagad kitay hanya fag somolay hayo kitos igfalayon fayay gis manga opa sas nigo. 32Dapat ahog darangin wa kitay, haw fag idwag fagomon igsyag hangko. Ginya, im fangayofan nogsoyo ya, farigonan yadim manga fadwasay fangayofan. 33Is Pidro nasagot, Angko Fon, gwadi hodwa kafang omofod hyamo kati, nyawa hanggan wamporiso hanggan wa matay. 34Is Hisos iglwang, Yatokitay, Pidro, hogfwayong hyamo, ka tabag idyag taraok, ha tomangkod araw hangko tolo ginan kitay, hadwa kilala angko. 35Ginya madis Hisos gintaw hat manga katogbong kiti, Aho no nasogo hayo igbarita itfagonan, ha korang awkin sa hayo, nyawa kana, nyawa ham idwa ha diya ngadi sokloban, manga sopot, idwa yadi ha diya lapak? Taglwang, Idwa ha korang. 36Is Hisos iglwang, Dapat kati, ham no ha sokloban, ngatay sopot, ham fag diya mandi. Kadwa ha binagaw, fasaliyan wat balokas, ginya madi, saliyan sadik binagaw. 37Maskin hogfwayong ha hayo kitay ka Kasoratan fwayong kawa hangko, fag im-anod wan. Ka Kasoratan iglwang kiti, Ta nafatimbang hanya bilang sadik taw ha kasalanan. Maskin kansorat kawa hangko kaanod wa kati. 38In Hisos manga katogbong iglwang, Hyami Fon, yabay to wa ka dowak binagaw. Is Hisos nasagot, Hosto wa tonya. 39Da Hisos nadokson gis lingoban sas tongod fag salogan, nalahaw ya ngawan, hawas Moyod Oliboan kito kan Hisos ogali nogbanwan, hanggan it manga katogbong natahin yadi wa hanya. 40Ta nondasog wa sinya, is Hisos igfwayong has taw, Ham fag darangin kaarakitay idwa hagfaloksowan hayo. 41Is Hisos nasaman yapdi ogbot it manga katogbong, manga kayos bintohan bato, ginya nalingkohodan hanggan nandarangin. 42Is Hisos iglwang, Mama, no maangay sa hyamo, fag bol nangos gingko to fag fanginoman kahoriyan kati. Dapat nyawa hoglwang kitonya, fag hyamo wa kafangayofanan kam-anod, bohonwa kangko. 43Ginya sadik anghil gin Diyos banwanan sam tongod inbangkad han Hisos, nafarigon hanya. 44Dapat in Hisos fangayofan inhori wa dahol dahol, yakanga bohondi kito ka haraw nogdarangin, hanggan dit gayamon bilang dahol fag tiktik folot kantigna has baba daga. 45Nontabo wagdarangin, is Hisos nalindog ya ngawan, infwali ya hat manga katogbong, iglag mangharaw, ta matoyogan wan, maskin inrongkot wa dahol dahol haraw. 46Is Hisos iglwang has taw, Kana mayon ham no matoyogan? Ham fag kabangon wan, ham fag darangin wan kaarakitay idwa hagfaloksowan hayo. 47Is Hisos no kampang yapdi, sadik habanan taw kadasog wan, igtahin in Hodas, sadik ama gis Safolo-ha-Dowa. Is Hodas gakbang in Hisos kaarakitay omayok hanya. 48Dapat is Hisos igfwayong hanya, Hodas, haw awkin omayok angko, aho Kanbali Taw, haw no kaoyon angko manga kalaban? 49In Hisos manga ofod katogbong no nalag ista bato ibolonon, taglwang, Hyami Fon, ngatay mi bomasing yadi was taw? 50Ginya ka sadik katogbong nabasing ka gorangon fag fagalan sogowan a, natigbas ka balis sihon fag talinga. 51Dapat is Hisos iglwang hat manga katogbong, Ham fag idwa kityamo, ham. Ginyas Hisos natawid ya ka sogowan talinga, yakangan somag ya. 52Ginya madis Hisos igfwayong has fagtahinan fagalan, hanggan has manga fagtahinan igbahala sas Fanimbaan-Dahol, hanggan has manga fagtahinan sas banwa, kanbangkad yadi wan kaarakitay gomamat in Hisos, iglwang kitay, Aho awkin tolisan, ham gayfan, maskin ham masalawidan manga talibong, mabitbitan manga pinotol kaarakitay gomamat angko? 53Aho fagaba gofod hayo sirang sirang sas Fanimbaan-Dahol, bati ham idwa gamat angko gis nanya. Dapat kati ya, basad yabi ka hayo fakasayaon hanggan ka karigonan marom kagbahala kati. 54Ginya ta nagamat wa ngay in Hisos hanggan nataban hanya has Gorangon fag fagalan balay. No kitay di is Pidro goyan haraw in Hisos, dapat ayayo sat ginanan. 55Ta no nafagba afoy sas basad aladan, is Pidro matodtodan sasta akbang, mafanayangan yadi. 56Ginya sadik sogowan ina nalag in Pidro sinya, ka yawa afoy nogsakop in Pidro hanggan nabantay wa hanya fiya fiya, iglwang, To fag taw in Hisos yadi wa ofod hoglag. 57Dapat is Pidro igtangkod yapdi, hanyag lwang, Yabay ina, hodwa kilala hanya. 58Araw araw ogbot, sadi yak taw sinya, nalag in Pidro, iglwang, Haw yadi kat ofod sadi, ha? Dapat is Pidro nasagot, Yabay yabay ama, aho bohonwat ofod. 59Nonsagaya manga sadik tama sinyahod, sadi yak taw igfaaronganon iglwang, Matohoyanan to fag ama it ofod sadi, maskin pariho gis sakop Galiliya. 60Dapat is Pidro igsagot ya, Ama, hodwa natwagdog kam faglwangon. Is Pidro no kampang yapdi, ka tabag dagos wa nanaraok. 61Ginya kagfon intam naolingan han Pidro, nabantay hanya fiya fiya. Ginya madi yabay is Pidro bago di natohod kagfon intam it fwayong kitay, Ka tabag bago tomaraok araw, haw tolo wa ginan tomangkod has taw angko. 62Is Pidro nadokson gis basad aladan, naoraw marigon. 63Gis nanya yadi fag masohod ka mangag bantay in Hisos igyod, igfasidyowan odi hanya, igsontok ya ngadi. 64Ta nataklob yadin Hisos mata, ginya taglwang, Fanlag ngay boktongan fakta nga kagsontok hyamo kati? 65Aywan yapdi ista manga hampang dwat kawa han Hisos igfasidyowan odi hanya. 66No bago marom ka manga fagtahinan fanifonan Hodyo fagayo, ka manga fagtahinan fagalan-han-Diyos hanggan ka mangag faadal Batasan Hodyo matifonan wan. Ta nataban in Hisos has Fanoltolan Hodyo ka ha manga kangayanan. 67Taglwang han Hisos, Fwayongan hyami, haw awkin kan Diyos-natogon-Famawi? Dapat is Hisos igsagot, Nyawa ho fomwayong hayo, ham idwa yadim tiwala. 68Hanggan aho no mangintaw hayo, ham idwa yadi somagot. 69Dapat ay, gis kati ginan, aho, Kanbali Taw, tomokaw san Diyos karigonan akbang, sat balis sihon. 70Ta fagayo gintaw in Hisos, Haw wa awkin kan Diyos Anak, mangharaw? Is Hisos nasagot, Ham mandi ngap ka gwas kitonya. 71Yakanga ta nanoltolan ha sadi ha sadi, taglwang, Kana yapdi fag sombong kantam fagfanayaon? Tam ngap nadog wa fiya fiya gi wat sadili bibig ka nafwayong.

will be added

X\