1 Gis nanyas Hisos mabantayan has manga taw maakwa ta nogfwalid it manga disag basad haban fandisagan kwarta sas Fanimbaan-Dahol. 2 Ginyas Hisos nalag sadik ina balo myabog igfwalid yadi ka hanya, dowa odik saga. 3 Is Hisos iglwang, Hogfwayong ha hayo, bonwa bohag, to fag ina balo myabog, it disag mahalga man kasta disag ka manga maakwa. 4 Maskin ka tiba nadisag gi odista labi, dapat to fag ina balo myabog nadisag wa ka hanya sadik kayonya. 5 Gis nanya yadi tiba taw nabaya ka Fanimbaan-Dahol kawa fiya wa kabantay ka manga bato ista nahalig sinya hanggan kasta manga nadisag kanfwalid sinya, myasa wa fiya kabantay. Dapat is Hisos iglwang, 6 Nomdasog gis nanya fag masohod aban, ka hayo faglagon kati tyamo, idwa hamgoyan ngadi dowak bato igtarongbawan, fagayo imrofad lamang. 7 Yakanga ta gintaw in Hisos, Haw kagfaadal hyami, ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay to kaanod wan? 8 Is Hisos nasagot is taw, Ham fag matagahan, ham fag idwa gadayaan nyawa faktaw, maskin aywan kambangkad aban, ngomayan yadingko ngayan, lomwang kitay, hanya wa kan Diyos-natogon-Famawi. Ka manga taw lomwang yadi, Kati fag masohod kan Diyos nafatohoyan. Ham fag idwag tahin kaglwang kitonya. 9 Ham no domog aban manga barita awayan, ngatay kaid-isogan, ham fag idwa galibitan, maskin talaga wa kitonya kamlag aban, dapat bonya tonya ka katabowanan dagos. 10 Ginyas Hisos iglwang has taw, Manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. 11 Ha manga linog dahol dahol hanggan no siday no siday fag banwanan, idwa aba ha hanon hanon, hanggan ha manga fanalafod. Manga fakadalaon hanggan manga falagon madolaw imlag yadi gis banwa sam tongod. 12 Dapat bagom-anod to fag manga bagay fagayo, ta gomamat yapdi hayo hanggan fahoriyan hayo. Ta fagamat hayo hasagbahala sas manga fanimbaan hanggan sas manga porisowan. Maskin aho hayo fagalwasiyon, ta tomaban hayo has manga gorangon hanggan has manga gobirnador. 13 Gis nanya fag masohod ham mamaorongan yadi sasta fagdogan. 14 Ham fag danwag fatohoyan sa hayo manga basad fangayofan gis kati kitay, ham idwa galibitan hayo bato sagoton gis nanya aban. 15 Maskin gis nanya ho domisag ha hayo kadonongan hanggan fatohod hayo hayo bato hampangon has taw. Ngadi sadi sa hayo manga kalaban idwa syagan lomaban hanggan igfabohag hayo. 16 Ka yadi hayo manga magorang, ngatay manga fadwasay, manga kaiban, manga fakilalaon ka fagamat hayo has taw. Ta fahatay yadi tiba sa hayo. 17 Maskin aho hayo fagalwasiyon, fagayo fag manga taw kadwat iglag hayo aban. 18 Dapat ay, ngadi sadik ogat bok gi hayo alfoyo idwa hambohin. 19 Ham nodwag fagomon, ham tomanggap haboyagan orongan. 20 Dapat ham noglag manga tifonan sondalo igsafong wa ka banwa Hirosalim, ham fag twa kitay tonya fag banwa kaakbang wamdwat. 21 Gis nanya aban ka manga taw sas sakop Hodiya fag danwag lagyo has moyod. Ka manga sas basad banwa Hirosalim, faglahaw wan, hanggan ka manga sas moyod, hawa goli has banwa. 22 Maskin gis nanya fag masohod aban, ka manga sirang fadosaan kawam anod fagayo ka Kasoratan fwayong. 23 Isyay wan no ka yangadi manga gabosog hanggan ka ha manga anak ogbot, igfasoso yapdi gis nanya fag masohod aban. Maskin ka manga taw sas baba daga domog mahori wa dahol dahol gis nanya. Hanggan is Diyos omisog to fag layonan taw. 24 Tiba ista kalaban fahatay. Tiba ta pomilit tomaban has fagayo fag manga layonan banwanan. Ka manga Hintil domaog, hanggan yomod wa fiya fiya ka banwa Hirosalim, no kandogay day kaanod kitay, manga Hintil kagbahala yapdi sinya. 25 Aban ha manga falagon madolaw sas myanit, sas magdanon hanggan sas manga fanggasan. Ka manga taw sas manga layonan daga fagayo sadik baba daga imhinol wan, tamdala yadi wan kawa ka dagat nomsaribwaan, ka manga taob homatok wan. 26 Manga taw imlobay wasdala kawa ta no gisip wa gisip wan ka mahori kamlag aban istay is baba daga, maskin ka manga karigonan sas boknga fakayawan imhadhawigan wan. 27 Ginya madi yabay ta lomag wangko, aho Kanbali Taw, kadasog sas baba linyabo, ha karigonan dahol hanggan kangayanan abwat. 28 Yabay, ham, no ha lagan wa kitonya fag manga bagay igfabago, ham fag kasolong wan, ya kaakbang wa ka bomawi hayo. 29 Ginyas Hisos igfahalimbawa ya ngay, iglwang, Lag nga ka manga fon igos hanggan ka tiba fon hayo. 30 Kat manga sanga nogfalongfong wan, tam twa wa kitay kafangaraw wan. 31 Kitonya yadi ham noglag to kangko manga nafwayong kaanod wan, is Diyos kaakbang wa somakop fagayo. 32 Hogfwayong hayo kitay, bonwa bohag, to fagayo im-anod wan ka kati fag masohod fag manga taw no boyagan yapdi. 33 Ka banwa sam tongod hanggan ka daga imliyam wa aban, dapat ay, angko hampang idwam liyam, nyawa ginahin. 34 Ham fag danwa matagahan, ham fag idwa kalibang has kasolongan fagaba, has manga fakalangoon, hanggan ha hayo manga fagisipon istay is baba daga tiba, kaarakitay tonya fag Mahalga fag Sirang idwa omiktan hayo kitos bitik. 35 Maskin ka Mahalga fag Sirang tomahod has fagayo fag manga taw sadik baba daga. 36 Yakanga nyawa ginahin ham fag matalagaan wan, fag fagabag darangin, kaarakitay ham syagan imtolas to fag manga bagay fagayo kam-anod aban, ginya somayango hangko, Aho Kanbali Taw. 37 Gis nanya fag manga masohod, no sirang, is Hisos igfaadal sas basad Fanimbaan-Dahol, no yabi is Hisos sawas baba Moyod Oliboan hanggan wagfasirang. 38 Yakanga marom yapdi ka manga taw hawas Fanimbaan-Dahol kaarakitay tomalingat toltol.
