LOKAS 2

1Gis nanya fag manga masohod, is Sisar Agosto ka gorangon sas fagayo fag layonan daga ka banwa Roma sakop sadi wak dahonya. Is Sisar Agosto nalwang kitay fagayo fagayo fag manga taw sas sakop Roma fag falistat manga ngayan. 2Toy ka gona fag nafalista nos Kiriniyo hyabi ka gobirnador sas Siriya. 3Yakanga fagayo fag manga taw nwali hat magorang banwanan kaarakitay mamalista it manga ngayan. 4Is Hosi nalahaw gis banwa Nasarit, sakop Galiliya, hawas sakop Hodiya, has banwa Bitlihim kan Dabid nakasagayan fag banwa hyabi, maskin is Hosi in Dabid hasokfonan. 5Is Mariya, kan Hosi bato babayon, nahin yadi wan Hosi kaarakitay mamalista yadit ngayan. Is Mariya danwa gabosog gis nanya. 6Ta no sinya yapdi, natoon wa ngap sinyat anak kasagayan. 7Ginyas Mariya nafasagaya wa sinya, sas banwa Bitlihim, kat anak ahan, anak ya ngadi ama. Is Mariya nafasafot manga rotay hat anak dararag. Ginya madi, kawa napno wa manga taw kasta balay bato hadasogan, yakanga ta nafaigyan odi ka anak dararag sas basad fanganan manga hayopan. 8Dayo gis nanya fag manga masohod, ha manga gano topa basad yabi sas bahalan banwa, hawas talon baliwa. 9Ginya madi, sadi wa ginan, in Diyos anghil sadi inbangkad hasta akbang a, in Diyos masilaw wa dahol fag kayawaan nayawa sasta ligongan. Ka manga gano topa indala wa dahol dahol iglag. 10Dapat ka anghil nalwang has taw, Ham fag idwa kadala. Fandog ngay, aho ha fwayongon ha hayo fiya fag barita a, fagayo fag manga taw imsaya wagdog. 11Maskin kati hayo Famawi insagaya wan san Dabid banwa, kawan Diyos-natogon-Famawi, kagfon intam. 12Ka fatohoyan hayo no sida fag anak, ham lomag tonya fag anak dararag masafotan manga rotay a, maigyanan sas basad fanganan hayopan. 13Ginya madi, sadi wa ginan, sadik habanan anghil gin Diyos banwanan sam tongod, inbangkad has anghil gona akbang. Tagfasayagdog in Diyos kiti, 14Fag fasayagdog in Diyos sat banwanan sam tongod, Hanggan kan Diyos fagbayaon fag manga taw istay is baba daga fag lomag yadi kahowayan. 15Ginya madi, ka manga anghil no nwali han Diyos banwanan sam tongod, ka manga gano topa nanoltolan a, taglwang, Kalibang, tam hawas basad banwa Bitlihim. Tam mamantay ngay ka madolaw sinya kagfon intam nafadog hantam. 16Ginya ta nalahaw madali hanya a, ta nasayak inda Mariya, da Hosi hanggan ta nalag yadi anak dararag sinya, maigyanan basad fanganan hayopan. 17Ta no nalag di ngay, ta natoltol has taw it donggon ka anghil fwayong, kawa has nwa fag anak dararag. 18Fagayo fag manga taw ka nadog ka manga gano topa fwayong indolaw wa dahol. 19Dapat is Mariya fagaba wa maayfanan to fagayo kan-anod kitonya. 20Ka manga gano topa nwali wa a, igfasayagdog in Diyos, igbaya hanya kawat donggon hanggan it manga lagan fagayo, kito kan anghil fwayong has taw. 21Nondasog ka fawalo fag sirang git kasagayan, ta natoli ka anak dararag, hanggan nafangayan hanya is Hisos. Is Mariya nodya gabosog, ka anghil danwa nadisag it ngayan tonya. 22Ginya madi, nondasog ka sirang gis nanya ta nogfatonglos ka ogali kan Mwisis natogon kawa has manga nafasagaya anak, hasaglinay baliwa, ka talanahan nalahaw has banwa Hirosalim. Maskin in Diyos togon iglwang, Fagayo fag anak ama it ahan, ham fakoray hasagfon intam, yakanga, ta nadiya yadi wa ka anak dararag kaarakitay fabangkad has fagalan-han-Diyos faglagan. 24Ta nadisag yadi kasta bato disagon no kana kan Diyos togon iglwang, kitos sadik talsawa manok bilang tokmo, ngatay dowak anak salompati. 25Gis nanya fag manga masohod ha sadik ama sas Hirosalim, it ngayan is Simyon. Kalag wa kitay hanya galwasi in Diyos maskin matanogon a, igfanaya odi kitay no ginahin nangos is Diyos nogbawi in Israil sakop. Ka Maliyaw fag Falad sawan Simyon fangayofan, 26hanggan nafatagak hanya kitay, hadya matay ha lomag yapdin Diyos-natogon-Famawi. 27Ka Maliyaw fag Falad nataban in Simyon has basad Fanimbaan-Dahol. Ginya madi, it manga magorang no nadiya ka anak, kawas Hisos, ha basad Fanimbaan-Dahol kaarakitay igfatonglos kan Diyos togon fagsagadon, 28is Simyon nababa ka anak, nabaya in Diyos, nalwang kiti, 29Haw kagfon angko, maskin angko wa mata lagan ka Famawi manga taw, Kam nafatalaga sasta faglagan fagayo, ka mamayawa has manga Hintil, Hanggan gi hanya, manga taw mamasayag dog ha hyamo sakop sas Israil. Yakanga, in-anod wan kam fwayong angko. Nyawa aho, im sogowan, gomona was taw kati, fiya was fangayofan. 33Ka anak dararag manga magorang indolaw wagdog in Simyon fwayong kawa han Hisos. 34Is Simyon nafasayag dog inda Hosi kitay ta bomaya wan, ginya madi nafwayong han Mariya kitay, Haw fag danwa twa kitay, to fag anak danwan talaga kaarakitay aywan fag manga taga Israil omayayo gin Diyos, dapat aywan yadi ka omakbang. Is Diyos nasogo to fag anak hastay, sadik falagon madolaw, dapat aywan ka yomod hanya. 35Yakanga ista manga basad fangayofan imlag wa fiya fiya. Haw domog yadi aban kitay, bilang wa ha dagom matobohan sa hyamo basad fangayofan. 36Gis nanya yadi ha sadik ina in Diyos fangampang sinyas basad Fanimbaan-Dahol, it ngayan is Ana, in Fanwil anak, in Asir hasokfonan. Is Ana magorang wa dahol. Fitok fangaraw lamang hyabi, hanya no gofodan hat indogan, 37ginya madit indogan natay wan, yakanga hanyan balo yadi wan kati. It kagorangan walok safolo ha ofat ik fangaraw. In Ana ibolon ha odis basad Fanimbaan-Dahol, yabi sirang, igfasayagdog in Diyos. Nomtoon idwa kwan hanon kaarakitay mandarangin. 38Gis nanya yadi, is Ana naakbang handa Hosi, nafasalamat han Diyos. Hanya natoltol yadi, kawa han Hisos baliwa, has fagayo ka manga mafanayan no ginahin is Diyos no bomawi ka banwa Hirosalim gis mahori. 39Da Hosi da Mariya, no nafatonglos fagayo fag manga bagay ka maangay han Diyos togon has manga Hodyo, ta nwali ya ngawan hat sadili banwanan has banwa Nasarit, sakop Galiliya. 40Ka anak kadahol wan a, inbali marigon it fangayofan hanggan madonong ya ngadi, maskin in Diyos kafiyan sawa hanya. 41Yabay, fangaraw fangaraw, sas Fanohodan Nagsagayan, manga Hodyo nogtohod ka anghil no nasagaya ista manga balay hyabi, in Hisos manga magorang has banwa Hirosalim. 42Is Hisos no safolo wa ha dowak fangaraw it kadogayan, hanyag tahin yadi wat manga magorang, ta no has Hirosalim kito kasta ogali nogbanwan. 43Nonsagaya ka Fanohodan, ta nwali ya nga wan. Is Hisos in-goyan yapdi sas Hirosalim dapat it manga magorang idwa naisip kitay hanyan goyan. 44Ta gayfan ngatay is Hisos nahoyog yapdi has iba taw, yakanga ta nafadagos yapdit lahawan sadi wak sirangan. Ta no nasayak hat manga kaiban hanggan hat manga fakilalaon, ta bago di natwa kitay, is Hisos idwa mangharaw natahin it manga magorang. 45Ta nodwa nalag in Hisos, tanfwali ya has banwa Hirosalim kaarakitay somayak hanya. 46Sayas fatolo fag sirang ta bago di nalag in Hisos, ya mangharaw, sadis basad Fanimbaan-Dahol, matokawan sinya maofodan yadi ka mangag faadal. Hanya matalingan has taw, ginya gintaw yadi. 47Fagayo ka nadog in Hisos hampang tandolaw wa dahol kitay hanya madonong mangharaw, twa yadig sagot has taw. 48Hanggan it manga magorang intaka wan, ta no nalag hanya, it inag lwang, Anak, kana mayon haw no kitonya ha hyami? Aho hanggan im ama, minyaya wa galingawan hyamo mi nogsayak hyamo. 49Is Hisos nasagot, Kana mayon ham nogsayak angko? Ham awkin idwa natwa kitay aho fag sawangko Ama balay? 50Dapat tadwa natwagdog in Hisos nafwayong, no kanat kahologan. 51Is Hisos natahin ya ngawan it manga magorang a, nwali ya has banwa Nasarit, nafasakop fiya fiya hat manga magorang. It ina naayfan fiya fiya to fag manga bagay fagayo sat basad fangayofan. 52Is Hisos kadahol wan gis nanya, madonong ya ngadi. Labi was Diyos hanggan manga taw igbaya wa dahol dahol hanya.

will be added

X\