LOKAS 19

1Ginya da Hisos igdalan has banwa Hiriko. 2Ha akwa sinya fag banwa sadik maakwa fag fagtahinan fanohot bohis Roma, kawas Sakiyo. 3Hanya gwayan wa kasaya lomag no faktas Hisos. Dapat, maskin hanya sadik ama libaba libaba odi, aywan fag taw igfarom hanya, hanyadwag lag in Hisos. 4Yakanga hanya nadalandan hasta fagonan madali madali a, nafanyak has tongod fon hayo sikomoro kaarakitay lomag in Hisos, ta nogdalan sinya. 5Is Hisos nondasog sinya sat masohod, natangdan has tongod a, iglwang han Sakiyo, Sakiyo, kalibang, haw fag dokson gis nyamo, maskin kati aho fag migya wa ham balay. 6Yakangas Sakiyo madali odin dokson gis tongod sikomoro, igbaya wa dahol dahol igtaban in Hisos. 7Fagayo ka nalag kitay is Hisos igtahin in Sakiyo, ta gidginasan gidginasan wan, taglwang, Is Hisos igtahin ha sadik taw ha ogali dwat, migya hat balay. 8Ginya madi araw, is Sakiyo nafwayong hasagfon intam kiti, Angko Fon, hogfabokngan wan kangko kaakwaan. Kati yabay ho domisag wa has manga myabog it baliw. Hanggan aho no ha nadaya nyawa faktaw, no sadi kangko nadaya hanya, ho domogang ya tolo ya, yabay inbali ofat kangko fafwaliyon hanya. 9Is Hisos iglwang han Sakiyo, Kati ka Famawi ibolon igsakop wa hastay fag talanahan kawas Sakiyo in Abraham yadi hasokfonan. 10Maskin Aho, Kanbali Taw inbangkad hastay, kaarakitay ho somayak, bomawi ya ka mangan liyam. 11Manga taw no matalingan yapdin Hisos, is Hisos dagos wagtoltol sadi yak halimbawa. Is Hisos natoltol to fag halimbawa maskin hanya kadasog wa has banwa Hirosalim, hanggan manga taw gasolop kitay, ngandayo is Hisos dagos wa farigon in Diyos sakop sinya. 12Yakangas Hisos igtoltol kiti, Ha sadik ama it manga hafofowan ha kangayanan abwat, iglahaw has ayayo fag banwanan kaarakitay ta fabali hanya gorangon. Ginya aban, nombali wa gorangon, goli ya. 13To fag ama, nodyan ginan git balay, nafatawag it manga sogowan safolo a, nafahafod myasa sadik daan piso. Nafwayong hat manga sogowan, No baliday hodya mwali, to fag kwarta ngatay ham fag sali, ginyag fasali ya domwag kaarakitay lomag tobo. 14Dapat kat manga sakop, ka bohonwat sogowan, ka myasa wa ginya, kadwat wa dahol iglag ka kabali ista gorangon. Yakanga hanya nonlahaw wan, ta nafasonson it manga sogowan hasagbahala kaarakitay lomwang, Mi dayo kitay to fag taw fag idwam bali hyami gorangon. 15Ginya madi aban, hanya nonbali wa gorangon, nwali ya ngawat balay, nafatawag ya nga kat manga sogowan it nagdisagan manga kwarta kaarakitay tomwa no dahoday fagayo kasta nafatobo. 16Ka bago bago fag sogowan naakbang has gorangon, nalwang, Angko fon, hyamo nafaano angko kwarta sadik daan piso, ho nafatobo safolok daan. 17Ka gorangon nasagot, Yabay kafiyaon, haw fiya fag sogowan, kawa haw naano fiya, nyawa ogbot fag halga, kati aho fabahala hyamo ha safolok banwa. 18Ginya madi kat fadowa fag sogowan naakbang yadi hanya, nalwang, Angko fon, hyamo nafaano angko kwarta sadik daan piso, ho nafatobo limak daan. 19Ka gorangon iglwang ha hanya, Ho fabahala hyamo has limak banwa. 20Ka sadi yak sogowan naakbang has gorangon a, nalwang, Angko fon, to kam nafaano kwarta hangko sadik daan piso. Ho nasafot sas basad taong, ho natago odi. 21Hondala digfatobo maskin haw mahigpit wan nogsohot, nyawa ka bohonwa hyamo naano, haw igbol di, ha gani wan, nyawa bohonwa ka hyamo nafamgas. 22Kat fon iglwang, Idwa fiya fag sogowan haw. Gim sadili bibig hampang hogfatohoyan hyamo has fadosaan. Gwadi ha mangharaw danwa twa kitay aho mahigpit, haglwang kitay ahogbol ka bohonwa angko, aho gani ka bohonwa angko nafamgas. 23No kitonya, kana mayon ha nodwa nafwalid angko kwarta sas fanifonan has famotangan? Ginya ha tobo yap man araw aho nogbol ginya, aho no nwali. 24Ka gorangon iglwang hat manga ofod sinya, Ham bol wa gi hanya ka kwarta sadik daan piso, disagan tonya fag sogowan ka ha safolok daan. 25Taglwang, Hyami fon, gwadi ka hanya aywan man, safolok daan piso. 26Ka gorangon iglwang, Hogfwayong ha hayo, fagayo ka ha nafatobo wan ha tanggapon ya domwag, dapat kangko nadisag kadwa ha nafatobo, ho ngap bomawi ya ginya. 27No ka man has mangag laban angko, kagdayo angko, fag nangos bohonwa aho kasta gorangon, tabanan hastay tonya fag manga taw, fahatayan sangko faglagan. 28Nontabo wagtoltol kitonya, da Hisos nadagos wa has bohid has banwa Hirosalim baliwa. 29Ta no gakbang has tifonan balay sas Bitfagi hanggan Bitanya, sas Moyod Oliboan, is Hisos nafagonat manga katogbong dowa. 30Is Hisos igtogon kitay, Ham fag hawas masoson fag tifonan balay. Ham araw nomdasog sinya, ham dagos lomag sadik anak habayo libaba, matarabingan, idyapdi ha taw nasahay sinya. Lohasan it tarabing a, goyodan hastay. 31No ha gintaw hayo kitay, Kana ham noglohas tonya? Ham fag lwang, Kagfon intam kasayag sahay to. 32Yakangan Hisos nasogo hanya wan. Ta nalag nga ka anak habayo, no kinday in Hisos fwayong. 33Ta noglohas yapdi ka anak habayo tarabing, it manga fon gintaw, Kana ham noglohas tyamo? 34Taglwang, Kagfon intam kasayag sahay to. 35Yakanga ta nagoyod ka habayo libaba han Hisos, ginya madi ta no nasagmak wan it manga rotay aba has baba goyoy habayo, ta nafasahay in Hisos. 36Is Hisos noglahaw, manga taw igladlad it manga rotay san Hisos fagonan lahawan. 37Is Hisos no kaakbang has banwa Hirosalim igloslos has lwad Moyod Oliboan, kat tifonan manga katogbong fagayo fagayo igtarawagan wa kasolong iglag, igfasayagdog han Diyos kawasta lagan in Hisos manga naibolon madolaw fagayo. 38Taglwang kiti, Ka Gorangon ka kadasog hastay kati, san Diyos ngayan, fag bomaya wan. Fag ha kahowayan san Diyos banwanan sam tongod, hanggan fag kafiyan kamlag sam tongod im tongod. 39Dapat ay, tibak Farisiyo ka koyog has fakaaywanan iglwang han Hisos, Haw kagfaadal, haw fag kabayam manga katogbong. 40Is Hisos nasagot kitay, Hogfwayong ha hayo, taw nodwa omawang, matohoyanan wan ka odi manga bato ka romokyaw mamasayagdog angko. 41Is Hisos no gakbang, kabantay has banwa Hirosalim, goraw wan. 42Hanyag lwang, Hirosalim, haw nangos no dandi twa kati fag manga masohod, no kana fag manga bagay kagdisag kahowayan ha hyamo. Dapat kati to fag manga bagay inharom gi hyamo. 43Maskin no ginahin aba fag manga sirang, im manga kalaban somafong wa hyamo, fasafong yadi wa alad dahol dahol, ta somaklawan wa hyamo bali bali banwa. 44Ta homamin wa domwat hyamo aban, hanggan im manga anak basad balay dahol, ta mamin wa fahatay. Ngadi sadik bato idwa hamgoyan kagtarongbawan ha sadi ha sadi, maskin hadwa nabati in Diyos, dayo kadasog kaarakitay bomawi hyamo. 45Is Hisos nasakbaw basad aladan Fanimbaan-Dahol a, dagos nasogo has dayo alad ka mangag balidya. 46Nalwang has taw, Insorat san Diyos kasoratan kitay, Ngayanan angko balay, balay fandaranginan, Dapat ham nafabali angko balay, oliyanan odi manga fangnahaw. 47Is Hisos igfaadal sirang sirang basad aladan Fanimbaan-Dahol. Ka manga fagtahinan fagalan-han-Diyos hanggan ka mangag faadal Batasan Hodyo hanggan ka manga fagtahinan sas banwa Hirosalim, igsayak wa yabay no kinday no fahatay in Hisos. 48Dapat tadwag lag it halimbawan kaarakitay fahatay hanya, maskin fagayo fag manga taw igtalinga wa fiya fiya is Hisos nogfaadal.

will be added

X\