1 Ginya madis Hisos igfwayong has taw sadik halimbawa, kaarakitay igfaadal has taw kitay, ta fag fagabag darangin, fag idwa kalombay ista manga fangayofan. 2 Is Hisos iglwang, Sa sadik banwa ha sadik fangabaya kadwa kadala in Diyos, idwa yadi magalang has taw. 3 Ha akwa yadi sadik ina balo sinya fag banwa ka fagabag syag has fangabaya. Ka ina fagabag sagad kitay, Togbongan angko, fatabo hyami hampangan maskin ha akwa igfahoriyan angko. 4 No kayodak swali ka fangabaya kafang yapdig togbong ka ina balo. Dapat no dogay, it fangayofan iglwang, Nyawa ahodwa kadala in Diyos, idwa yadi gomalang nyawa hada fag taw, 5 ho tomogbong fafiyan to fag ina fakahoriyon, maskin hanya fagaba waglibang angko, homyaya waglag hanya nogswaliyan wagswaliyan nogsyag hangko. 6 Kagfon intam iglwang, Yabay, ham nadog ka dwat fag fangabaya fwayong. 7 Dapat is Diyos idwa kafang igfafiyan no ha taw igfahoriyan it manga nafili kagsagad togbong gi hanya yabi sirang. Hanya dogay aw bago digtogbong, ham gayfan? 8 Yatokitay hogfwayong hayo, is Diyos dagos wagfafiyan ista fakahoriyon. Dapat ay, aho Kanbali Taw nombangkad hastay is baba daga, aho awkin ha lagon manga taw igsyag hangko, ham gayfan? 9 Is Hisos igfwayong to sadi yak halimbawa, igfatangon has manga taw kagfadaholon it sadili, kagsyag hat sadili kafiyan, dapat igyod ka tiba taw. 10 Is Hisos iglwang, Ha dowak ama, insadi Farisiyo, insadi fanohot bohis Roma, hawas Fanimbaan-Dahol kaarakitay mandarangin. 11 Ka Farisiyo nalindog a, nogdarangin bilang odi ginas kiti, Diyos, hogbaya wa hyamo kitay ahodwa kito ka tiba taw ka mangag nahaw, mangag daya, mangag fabayowan, hodwa yadi kito kas nwa fag fanohot bohis. 12 Dowa ginan sadik simba ahodwa kwan hanon kaarakitay igdarangin. Hogdisag yadi angko fasafolo gingko lagan fagayo. 13 Dapat ay, ka fanohot bohis Roma nalindog sas bahalan bahalan Fanimbaan-Dahol, idwa yadig bantay has tongod, igfogfog it sadili dobdob, maskin karongkot it fangayofan. Ginyag lwang, Diyos, haw fag kaawangko, ho sadik taw ha ogali dwat. 14 Hogfwayong hayo kitay hanya fag taw no nwali hat balay, it fangayofan inbali fiya san Diyos faglagan, dapat ka sadi idwan. Maskin nyawa faktaw kagfaabwaton it sadili, is Diyos igfalibaba di hanya, dapat kagfalibaba it sadili, is Diyos igfaabwat hanya. 15 Tiba taw nadiya han Hisos ista manga anak garogbot kaarakitay is Hisos tomawid it manga anak. In Hisos manga katogbong, no nalag kasta taban manga anak garogbot, ta nangabaya was taw. 16 Dapat is Hisos nafaakbang it manga katogbong, iglwang, Ham hawa kabaya ka manga anak no gakbang angko, fiya di. Ham fag idwag bando tonya, maskin ka manga ha fangayofan kitos anak ka omafo in Diyos sakop. 17 Ham fag tohod kitay nyawa faktaw kat fangayofan kadwa kitos anak ogbot nogfasakop han Diyos, tonya fag taw idwam aktom san Diyos sakop. 18 Ginya sadik fagtahinan Hodyo gintaw in Hisos, kiti, Haw kagfaadal kafiyaon, kana ara angko bato ibolonon kaarakitay ho omafo haboyagan kadwa ha katabowanan? 19 Is Hisos naintaw hanya, Kana haw nogngayan angko kafiyaon? Is Diyos lamang ka kafiyaon. 20 Haw fadi wadtwa ka manga Batasan Hodyo kitay, Haw fag idwag fabayowan, haw fag idwag fahatay taw, haw fag idwag nahaw, haw fag idwag bangdan is taw, haw fag idwag falamang im ama hanggan im ina. 21 Ka ama nasagot in Hisos, No kitay di, gingko yapdi ogbot ginan, ho katanog wa tonya fagayo. 22 Is Hisos no nadog it sagot, hanyag lwang, Dapat haw ha korang yapdi sadik fakatwawon. Haw fag fasali im manga botang fagayo, ginya fahafodan has manga myabog it manga sali. Yabay no kitonya, haw ha akwa wa kaakwaan san Diyos banwanan sam tongod. Ginya madi ha fag hayastay, tahinan wangko. 23 Dapat ay ka ama inrongkot no nadog kitonya maskin hanya maakwa wa dahol a, nahwangit it kaakwaan. 24 Is Hisos nogbantay yapdi hanya, iglwang kitay, Ka maakwa fag manga taw mahorig fasakop han Diyos. 25 Malpos man ka hayopan kamilyo nogdalan has basad toho dagom has taw maakwa nogfasakop han Diyos. 26 Ka manga nadog is Hisos nogfalimbay kitonya naintaw, No kitonya mangharaw, fakta fag manga taw kambawi? 27 Is Hisos nasagot is taw, Is Diyos syagan gibolon kagsagaya fagsyaganon taw. 28 Ginyas Pidro iglwang han Hisos, Lag nga hami, mi naobon hyami manga banwanan hanggan igtahin wa hyamo. 29 Ginyas Hisos nafwayong has taw, Hogfwayong ha hayo, bonwa bohag, nyawa faktaw ka gobon yap it balay, ngatay it babay, ngatay it manga fadwasay, ngatay it manga magorang, ngatay it manga anak maskin galwasi in Diyos sakop, 30 hanya tomanggap yadi aywan ginan iglabi man kat naobon ka kati fag masohod, ginya madi, gis nanya fag masohod aban nomdasog, ha akwa yadi haboyagan kadwa ha katabowanan. 31 Is Hisos nafasaman ka Safolo-ha-Dowa gis fakaaywanan fag manga taw, ginyag lwang has taw, Yabay, tam hawam bohid has Hirosalim kati. Fagayo kan Diyos manga fangampang nasorat hyabi, kawa hangko, aho Kanbali Taw, im-anod wa sinya. 32 Ta fabahala angko has manga Hintil. Ka manga Hintil yomod angko, mahaya yadi it ibolonon hangko aban, ta tomofay ya ngadingko. 33 Ta bomakbak angko, fahatay yadi, dapat ay, homboyag ya sas fatolo fag sirang. 34 Dapat in Hisos manga katogbong idwa natwagdog it donggon. Idyan angay kitay ta fag tomwa yapdi, tadwa nasalom no kana tonya kan Hisos nafwayong. 35 Da Hisos no kaakbang has banwa Hiriko, sinya ha sadik ama bota matokawan sas bilog dalan, igsagad igsagad odi. 36 Ka ama bota no nadog kitay kaaywanon fag manga taw igdalan sat akbang, naintaw no kana ka sinya. 37 Taglwang hanya kitay, is Hisos, taga Nasarit, igdalan wan. 38 Ginya madi yabay, ka ama bota igtawag marigon, iglwang, Hisos, in Dabid hasokfonan anak, haw fakaawa wangko. 39 Ka manga taw balis fagonan fakaaywanan nangabaya hanya, idwag faawang nangos, dapat ka ama bota kadahol di ngap nogtawag, igsakitan wan, In Dabid hasokfonan, haw fakaawa wangko. 40 Yakangas Hisos intorosan sinya, ginya nafasognod has taw, iglwang, Tabanan hastay tonya fag ama. No naakbang, is Hisos gintaw hanya, 41 Kana kam fakasayaon angko togbongon ha hyamo? Hanyag lwang, Angko Fon, angko mata fag imfoga ya nangos. 42 Is Hisos nafwayong hanya, Im mata fag imfoga ya kati. Haw infiya wan maskin haw igsyag wa hangko. 43 Gis nanya yadi dagos wanfiyat mata. Yakanga ka amag tahin wan Hisos, igbaya han Diyos. Manga taw no nalag kitay infoga it mata, fagayo nafasayagdog in Diyos.
