LOKAS 16

1Ginyas Hisos nafwayong sadi yak halimbawa hat manga katogbong, iglwang, Ha sadik taw maakwa nafaano it manga kaakwaan hat sogowan sadi. Ginya madi aban, tiba taw natoltol hasagfon kitay, Kam sogowan idwa gano fiya fiya im botang, anogon. 2Yakanga hanya nafatawag kat sogowan, naintaw hanya, Kana kin angko donggon kawa ha hyamo? Falagan angko im manga sorat maskin ha sakwa gano angko manga botang aban. 3Ka sogowan fangayofan iglwang, Kinda odi angko halimbawan? Angko fon domayo angko, fawa faano angko it manga botang. Hodwa marigon mangodkod sas iyab hogdog. Ho kaya yadi ho nogsagad igsagad odi. 4Ala, kati, ho twa wan angko bato ibolonon. Angko fon no domayo angko gingko ibolon gano it botang, tiba tomanggap yapdingko sat manga balay. 5Yakanga kat sogowan nafatawag, igsadig sadi ka ha manga bayadan hasagfon. Ginya naintaw kandasog bago bago, Dahoda kin im bayadan hangko fon? 6Ka ha otang nasagot, Angko bayadan sadik daan siboran langis. Ka gano it fon botang nalwang, Dahos nwa kanfwalid sas sorat. Kalibang wan, haw fag matokawan is nwa, ha fag fwalid im ngayan, hanggan fag sorat kitay lima dik safolo siboran langis kam bayadan. 7Ginya madi naintaw yadi ka sadi, Ka hyamo bayadan, dahoday yadi? Ka ha bayadan nasagot, Sadik daan sako tirigo. Ka gano it fon botang iglwang, Dahos nwa kanfwalid sas sorat. Ha fag fwalid im ngayan hanggan fag sorat kitay walo dik safolok sako kam bayadan. 8Kat fon nafaanod yadi kitay kat sogowan madaya madonong yadi kalig it halimbawan. Maskin ka taga istay is baba daga madonong man in Diyos sakop no gamigosan hat manga kapariho. 9Is Hisos igfadagos wat toltol, iglwang, Yakanga hogfwayong hayo, nyawa ham domisag hayo kaakwaan has taw istay is baba daga, kaarakitay ham ha akwa fakilalaon, nyawa hayo kaakwaan mamin wan, ha tomanggap yapdi hayo sas oliyanan kadwa ha katabowanan. 10Ka taw no fiya no gano ka ogbot fag bagay, omano yadi fiya ka dahol fag bagay. Kagdaya has ogbot di fag bagay, igdaya man di has dahol fag bagay. 11Ham nodwa twa gano kastay sas baba daga fag manga kaakwaan, fakta ka faano ha hayo ka orongan wa kaakwaan ham gayfan? 12Ham nodwa twa gano kasta kaakwaan iba taw, fakta ka domisag kaakwaan orongan ha hayo sadili, ham gayfan? 13Halimbawa, it fon no dowa, idwa ha taw ka syagan igfasohodan katanog fagayo dowa pariho. Matohoyanan ha fagfiliyon, ngatay kawili it fon sadi, ginya kadwat iglag kat fadowa, ngatay katanog fiya fiya ka sadi, dapat igfasigpala wa kat fadowa. Ham idwa syagan katanog in Diyos igsohodan has kaakwaan. 14Manga Farisiyo ka kaingli has kwarta baliwa nayod wan Hisos no nadog it toltol kitonya. 15Yakangas Hisos nafwayong has manga Farisiyo kiti, Ham igfalagon odi has taw kitay hayo ogali fiya, dapat is Diyos fadi wadaglag hayo manga fangayofan. Maskin ka manga taw fagfadaholon ka manga ogali kadwa fiya san Diyos faglagan. 16In Mwisis togon hanggan in Diyos manga fangampang nasorat igdasog yadi wa han Hwan kagfatogna manga taw. Ginya wa ginan ka Fiya fag Barita indog wan kawa han Diyos sakop baliwa. Yakanga fagayo fag manga taw igpilit wa kasakbaw han Diyos sakop. 17Dapat ay malpos man nangos ka banwa sam tongod hanggan ka daga nomliyam, halimbawa, hasagfaliyam ngadi sadik sorat it karigonan sas Batasan Hodyo. 18Ginyas Hisos iglwang, Ka ama ka gobon it babay, ginyag babay has iba ina, yagfabayowan wa tonya. Hanggan ka ama kagbabay hasta nagobonan ina, yagfabayowan yadi. 19Ginyas Hisos nafahalimbawa ya ngay, iglwang, Ha sadik ama, it manga rotay kawa myasa wa dahol it sali, aywan ya ngadit manga fanganon fiya, sirang sirang. 20Ha akwa yadi sadik ama is Lasaro, myabog myabog, maigyanan odi dayo sakbawan balay maakwa. Sadi wak habilogan bangbangon wan. 21Is Lasaro kasamok ngadi ka manga tingaw ka kadagdag gis maakwa fanganan basad nigo. Bohondi tonya, ka manga ido gakbang han Lasaro, igtimos it manga bangbang. 22Aban is Lasaro natay wan, ginya manga anghil nataban in Lasaro, nafatokaw hanya san Abraham sayangowan. Ka ama maakwa natay yadi wa a, ta nalobgob wa hanya. 23Tonya fag taw maakwa hawas sadik hadasogan, sinya wa ka manga natay kamdosa basad afoy. No kahori wa dahol dahol, natangdan has tongod, nalag in Abraham sas ayayo sas tongod, hanggan is Lasaro matokawan san Abraham sayangowan. 24Ginya ka ama maakwa natawag marigon, Hyami ama Abraham, ha fakaawa wangko. Ha sogowan in Lasaro fatolsokan it tobwan timoyo ha basad danom, ginya fayamosan angko dila, kawa ho gwayan wa kahori istay basad afoy. 25Dapat is Abraham nalwang hanya, Gwadi anak, haw fag tohod kitay myasa wa fiya im lagan haw no sas baba daga yapdi, dapat ay, kan Lasaro nadalanan mahori fagaba sinya. Kati hanya ka ha kahowayan istay, haw man ka galibitan fagaba sas fadosaan. 26Ginya madi, labi man inya, santam fagbokngan ha sadik gobang abwat abwat, kaarakitay ka gistay idwa somyagan has nyamo hayo hanggan ka gis nyamo hayo idwa yadi somyagan hastay. 27Yakanga ka taw maakwa nalwang, Hyami ama Abraham, no kitonya, hogfaaronganon hyamo kitay, ha sogowan nangos in Lasaro hangko ama balay, 28maskin angko fadwasay ama lima ya sinya. Sogowan in Lasaro hanya kaarakitay igfatagak angko manga fadwasay, fag idwa hastay nangos has fadosaan ista hadasogan. 29Dapat is Abraham igfwayong ya hanya, Gwadi in Mwisis manga togon hanggan in Diyos manga fangampang nasorat sadis taw, ta fag tomalinga wa tonya. 30Ka ama maakwa iglwang ya, Hyami ama Abraham, korang di tonya, dapat sadik natay inboyag ya no somabang has taw, yabay ta somoyo wat manga ogali dwat. 31Is Abraham nasagot hanya, Ta no dayog talinga in Mwisis togon hanggan in Diyos manga fangampang nasorat, nyawa sadik taw imboyag ya, tadwa yadim tiwala.

will be added

X\