LOKAS 15

1Ginya madi ka manga fanohot bohis hanggan ka manga tiba, kasta faglwangon ha manga ogali dwat, fagayo gakbang han Hisos kaarakitay tomalinga hanya. 2Yakanga ka manga Farisiyo hanggan ka mangag faadal Batasan Hodyo gidginasan a, taglwang kiti, Long madi ngap, to fag taw igsayo has manga taw ha ogali dwat. 3Yakangas Hisos natoltol to fag halimbawa has taw. 4Halimbawa, insadi sa hayo no ha akwa sadik daan topa, ka sadi nomliyam wan, idwa awkin omobon yapdi ka siyam ik safolo ha siyam ik topa sas basad lamnonan, ginya igsayak kanliyam hanggan wa lomag, ham gayfan? 5Hanya no nalag ngay ka topa kanliyam, kabaya wagsonggoy, igdiya a, goli wan. 6Nondasog sat balay, fatawag it manga fakilalaon, it manga faakbang balay, lomwang kitay, Tam fag hastay sangko balay, fag fagayo wagbaya, maskin ho nalag ya angko topa kanliyam. 7Hogfwayong hayo, kitonya yadi ka san Diyos banwanan sam tongod nogbaya. Labi man ta nogbayag lag ka sadik taw ka ha ogali dwat nogsoyo, has siyam ik safolo ha siyam ka gayfan kitay fiya it ogali, idwa ha fagsoyoon. 8Sadi yak halimbawa, ngatay sadik ina no ha safolok bilog pilak, ginya madi ka sadi inliyam, kinda odi ham gayfan it halimbawan? Idwa aw somonog it salong, ginya fomaris it baba salog, somayak wa fiya fiya hanggan wa lomag tonya? 9No nalag ya tonya fag pilak, fatawag it manga fakilalaon, manga faakbang balay, fomwayong has taw, Tam fag hastay sangko balay, fag fagayo wagbaya maskin ho nalag ya ka sadik bilog pilak kanliyam. 10Hogfwayong ha hayo kitay, kitonya yadi in Diyos manga anghil nogbayag lag sadik taw ka ha ogali dwat nogsoyo. 11Ginyas Hisos iglwang, Halimbawa, ha sadik ama ha anak ama dowa. 12It anak foyo iglwang hat ama, Mama, ha disagan wa nangos hangko kati kangko fag kahorayan im botang kangko tanggapon aban. Yakangat ama nahoray hat manga anak dowa, it manga botang. 13Tansagaya di nga korayan, kat anak foyo nafasali wa ka hanya it manga kaakwaan, ginya madi, no kayo da odik sirang, nalahaw has fakaayayowan fag banwanan, nadiya wa fagayo it kaakwaan. Nondasog wa sinya, naolan odit kwarta, idwa has fiya fag kasolongan. 14Ginya madi, no namin wat kwarta, gis nanya fag masohod ka manga taw sinya fag banwanan inlodlonosan yadi. Yakanga ka anak foyo inhyabog wa dahol dahol. 15Yakanga nasayak it ibolon sinya fag banwanan. Ka nafaibolon hanya nasogo hanya hat tifonan baboy maaladan, kaarakitay gano a, bomahog. 16Maskin ka anahan kalonos wa dahol dahol, hanya kasamok wan ngadi kat bahog baboy yayos fayay, dapat fawa hagdisag hanya nyawa kana. 17Dapat ay, ka anahan no bago di naayfan it naogali, it fangayofan iglwang, Gwadi ngadi angko ama manga sogowan hosto it fanganon, ha labi ya ngadi, dapat hogdog ho kahatay wa kalonos istay. 18Ho goli ya nangos hangko ama hogdog, ho lomwang ha hanya, Mama, ho ha kasalanan han Diyos hanggan ha hyamo. 19Gis kati ginan sakwag ngayan angko im anak. Aho fag bilang odim sogowan. 20Ginya madi in-anod wan, hanyan lindog wa a, inlahaw wan, hawat ama. Ginya madi, kat ama nalag it anak ama foyo sas ayayo yapdi, danwa kaawa wa dahol dahol hanya, yakangat ama nadalandan natagbo, nafohot, naayok it anak. 21Ginyat anak iglwang, Mama, ho ha kasalanan han Diyos hanggan ha hyamo. Gis kati sakwag ngayan angko im anak. 22Dapat it amag lwang hat manga sogowan, Kalibang, diyan hastay ka fiya man has fagayo fag manga rotay, fabalokasan hanya. Ham fasingsingan hanya, falapakan ya ngadi. 23Diyan hastay kantam fagfalakbogon fag anak baka, tam somogba wan, tam ara mangwan, tam kasolong wan yabay, 24maskin tongko anak ho gayfan natay wan, dapat kati, bilang wanboyag ya. Inliyam wa haraw a, ginyan lag ya. Ta ngap nafanolodan ya ngadi kawag baya wa dahol dahol. 25Gis nanya yadi ka ama anak ahan sawat iyab. Ginya madi araw goli mandi. No kaakbang wa has balay, hanya nadog ha manga gagong, mangag tayok. 26Ka anak ahan natawag ha sadik sogowan, ginya naintaw hanya, Kana ka hanya intam? 27Ka sogowan nasagot hanya kiti, Gwadi im fadwasay nwali ya. Hayo ama nafasogba intam fagfalakbogon anak baka maskin nalag yam fadwasay, boyagan di mangharaw, idwa ha sagit. 28Kat ahan kahori wa dahol it fangayofan, dayo wagsakbaw ha basad balay. Yakangat ama nadokson, nahampang hanya mayan mayan. 29Dapat it anak ahan igsogat it ama, iglwang, Gwadi fagaba wa katanog hyamo, aho, aywan wak fangaraw kandalan. Dapat no hadingko, hadwag disag ngadi sadik anak hambing kaarakitay migbaya, aho hanggan angko manga fakilalaon. 30Dapat indasog di ngay kam anak ka naolan hyamo kaakwaan ha sayo manga ina kadwa fiya it ogali, ginya ha nasogba ya ngadi kantam fagfalakbogon anak baka. 31Kat ama nasagot hanya kiti, Angko anak, gwadi tam fagaba gofodan. Angko manga botang fagayo fagayo hawa hyamo. 32Dapat fiya tam nogbaya, kasolong wan, maskin im fadwasay, ho gayfan di natay wan, dapat bilang wanboyag ya, inliyam wa haraw a, ginya tam nalag ya kati.

will be added

X\