1 Aban sa sadik Sirang Kafahowayan, is Hisos hawas sadik fagtahinan Farisiyo balay kaarakitay manayowan kwan sinya. In Hisos manga kasayo igtikis igbantay wa fiya fiya it manga fangimotan. 2 Yabay, ha sadik ama kabadbagaan it habilogan san Hisos dayo. 3 Yakangas Hisos naintaw has manga Farisiyo hanggan has mangag faadal Batasan Hodyo kitay, Ngatay fiya di awkin sas Batasan Hodyo nogfafiya sagit sas Sirang Kafahowayan, ngatay idwan? 4 Dapat tadwa ha naawang, yakangas Hisos natawid ka ha sagit, nafafiya hanya, ginya nafalahaw wan. 5 Ginya madis Hisos nafwayong has taw kitay, Fakta sa hayo no ha anak, ngatay baka kandagdag basad hodkodan, ham awkin idwa bomawi ginya, nyawa sawas Sirang Kafahowayan? 6 Tadwa twag sagot, tadwa ha naawang. 7 Gis nanyas Hisos iglag kitay, kasta manga nataban hasta balay igsaringgonaan it manga tokawan, igfili kasta fanokawan kasta fakilalaon fiya fiya. Yakangas Hisos nafwayong has taw to fag halimbawa. 8 Ta nogtaban hyamo hasta fangsawan, ha fag idwag fili kasta fanokawan fakilalaon. Ngandayo ta ha taban ya kasta fakilalaon fiya man hyamo. 9 Ginya kagtaban hayo fagayo dowa, homampang ha hyamo, lomwang, Fiya di awkin haw nogfatokaw to fag taw sa hyamo nagtokawan? No kitonya haw maya wan, haw ngap ara tomokaw sa odis tokawan kadwa bangan. 10 Ka fiya, ta nogtaban hyamo hasta balay, haw nogtokaw, fag sa yap man idwa bangan fag tokawan, sas hadasogan yapdi gis sokayan. Maskin kagtaban hyamo lomwang hyamo araw, Haw fag istay yadi gwadi, sangko akbang. No kitonya ta ara fadog ya hyamo ngayan has manga taw kagsabang sinya. 11 Maskin kagfadaholon it sadili, ha falibaba di hanya, hanggan kagfalibaba it sadili, hagfaabwat hanya. 12 Ginya madi hasagtaban man hanya, is Hisos iglwang kiti, Haw no ha nafatalaga fanganon, fag bohon yapdi kam manga fakilalaon, ngatay kam manga fadwasay, manga kaiban, ngatay ka manga maakwa, im faakbang balay, kam fagtabanon. Maskin ta aba somabang yadi hyamo, ta naganti yadi hyamo, ya balinya wan. 13 Dapat ha no ha nafatalaga fanganon ayo ayo, fag ha yap man is manga myabog myabog, manga rifis, manga fihong, manga bota kam fagtabanon. 14 Tadwa syagan gomanti hyamo, yakangas Diyos iglwang kitay, ka manga ha akwa in Diyos kafiyan nomboyag ya aban, ham bomaya wan, maskin is Diyos domisag ha hyamo fasalamat gis nanya. 15 Ka sadi kagsayo in Hisos sas fanganan sinya, no nadog in Hisos hampang, iglwang hanya, Kagsayo san Diyos sakop fanganan bomaya wan. 16 Dapat is Hisos iglwang, Ha sadik ama nafatalaga fanganon ayo ayo, aywan ya ngadi kat nasabang. 17 Nondasog gis nanya fag masohod, yagsogban wa gis nanya, kagfon balay nafasabang ya kat sogowan has taw kat manga nafadog itfagonan, iglwang kitay, Ham fag kabangkad wa kati, intalaga wan fagayo. 18 Dapat fagayo pariho ha fabangdanan wan. Ka bago bago iglwang, Ho ha nasali sadik iyab. Ka fiya ho bomantay yapdi tonya. Haw fag idwa kahori angko, nyawa hodwam bangkad has nyamo. 19 Ka sadi iglwang yadi, Ho ha nasali baka, lima kagtimbangan. Ka fiya ho somolay yap somingkaw tonya. Haw nangos fag idwa kahori angko nyawa hodwam bangkad has nyamo hayo. 20 Ka sadi iglwang yadi, Mi bago dintalsawa, midwa has nyamo hayo. 21 Ginya madi ka sogowan infwali ya ngawan, nafwayong hasagfon balay kitay, ka manga taw idwa kabangkad hastay, hono. Yakanga kagfon balay kahori wa dahol dahol, iglwang hat sogowan kiti, Haw fag lahaw ya madali. Fwayongan ka sayo basad manga karsada, ka sayo basad dalan ogbot basad banwa, tabanan hastay ka manga myabog, ka manga rifis, manga bota, manga fihong. 22 Ka sogowan no nwali ya domwag hasagfon balay, iglwang kiti, Angko fon, kati hontanog wan hyamo manga sogo angko, no kitay di, dapat tam idya napno. 23 Ginyat fon nafwayong ya hat sogowan, Haw fag haya ngawas basad karsada sas dayo banwa, ha fag pilit wa ka manga taw fag kabangkad hastay kaarakitay angko balay mapno. 24 Hogfwayong ha hayo, ngadi sadi kangko nasabang gona idwa ha hagaton angko nafatalaga. 25 Kaaywanon fag manga taw igtahin in Hisos. Ginyas Hisos nasayango has taw, iglwang kiti, 26 Nyawa faktaw ka gakbang angko, idwa fiya imbali angko katogbong nodwa galwasi angko bondi kito kat ama, ngatay kat ina, ngatay kat babay, ngatay kat indogan, ngatay kat manga anak, ngatay kat fwadwasay, nyawa ina, nyawa ama, ngatay hanggan wat sadili haboyagan. Fag aho kat fagalwasiyon bago bago. 27 Nyawa faktaw idwa fiyam bali angko katogbong nodwa gagwanta mahori bilang wagfasan it sadili fatimbangan hayo hanggan idwag tahin angko. 28 Halimbawa, insadi sa hayo no ha fangayofan mangalig balay abwat abwat, idwa aw tomokaw yapdi, ham gayfan, kaarakitay omisip yap it bato bayadon kaarakitay tomwa ngatay it kwarta homosto wa fatabo? 29 Ngandayo torok yapdi kat falindogon, no mangharaw idwa tomabo, fagayo ka lomag, ta fasidyowan odi hanya. 30 Taglwang, Tonya fag taw nafabago wa nahalig, dapat idwa nasyagan nafatabo. 31 Yabay, fakta fag gorangon, ham gayfan, it sondalo no safolo dik libo, ka lomaban nga ha sadik gorangon ka ha dowak safolo libo it manga sondalo, ham gayfan? Idwa aw tomokaw yap kaarakitay omisip ngatay syagan domaog it kalaban. 32 Hanya nogdog kitay idwa somyagan domaog, hanya somogo yapdit fanonson hat kalaban, ta no ayayo yapdi kaarakitay somagad kitay, ta fag taranggapan yapdi, fag idwa lomaban nangos. 33 Yakanga nyawa faktaw idwa fiya imbali angko katogbong nomlibang di hat sadili fakasayaon. 34 Tam fadi wadtwa kitay ka asin kafiyaon. Dapat ay, nonbol wat tamis, kinda odi nogfatamis ya ka asin, ham gayfan? 35 Idwa ha fakinabang nogsabog sas baba daga, idwa yadi fiya igfaaktom has manga famalangba tanom. Yakanga manga taw gokas odi tonya fag asin. Ham no ha manga talinga ya ngadi, fag talinga wan.
