LOKAS 13

1Gis nanya handasog tiba taw ka nafadahit han Hisos kitay, is Pilato, ka Gobirnador taga Roma, ha nafahatay manga Hodyo tiba, taga Galiliya, ta nogdisag yapdi manga sogbaon han Diyos. 2Is Hisos nafwayong has taw, Ham gayfan awkin bohondi kito ka tibak taga Galiliya no ha ogali dwat tonya fag manga taw maskin ta nalag kitonya? 3Bohonwa mawat. Dapat hogfwayong ha hayo, ham nodwag soyo, ham fagayo lomag yadi kadwatan. 4Kitonya yadi ka safolo ha walok taw ka natay, ka balay abwat abwat sas Siloi no nakfo, natokob wa ka manga taw. Ham awkin gayfan bohondi kito ka tiba taga Hirosalim no ha ogali dwat maskin inlag kitonya? 5Bohonwa mawat. Dapat, hogfwayong ha hayo, ham nodwag soyo, ham fagayo lomag yadi kadwatan. 6Ginyas Hisos natoltol has taw sadik halimbawa, iglwang, Ha sadik ama ha tanom sadik fon igos sat basad iyab. Namantay ya ngay ka fon igos ngatay igbohad wan, dapat ay, hanyadwa ha lagan it bohad. 7Yakanga nafwayong hat sogowan ka gano sinya fag iyab, Gwadi tolo wak fangaraw aho nogtibaw angko halamanan, hodya ha lagan it bohad tonya fag fon igos. Ha obangan wan. Maskin igtoplan di ka tiba. 8Dapat ka gano sinya fag halamanan iglwang, Tam faya gobang kati fag fangaraw. Ho homodkod yapdi sat ligongan dalid, ho fomwalid famalangba sinya. 9Nomdasog aba sa sadik fangaraw, no bomohad ngay, salamat wan, dapat nodwa bomohad gis nanya fag fangaraw aban, tam omobang wan. 10Aban, sas Sirang Kafahowayan, is Hisos igfaadal basad fanimbaan Hodyo. 11Ha sadik ina sinya yadi, safolo ha walok fangaraw ha sagit, bokong bokong odi, idwa syagan katadlong maskin labang kagfahoriyan hanya. 12Is Hisos no nalag ka ina, natawag a, nalwang kiti, Ina, kati kam fagdogon infiya wan. 13Is Hisos natawid ka ina, ginya madi ka ina intadlong wa dagos, yakangag fasayagdog in Diyos. 14Dapat kagbahala sas fanimbaan kaisog in Hisos maskin sawas Sirang Kafahowayan is Hisos no nafafiya ka ina. Yakangag fwayong has manga taw, Gwadi onom ik sirang sa sadik simba kantohoyan kaarakitay omibolon. Fag gis nanya fag manga sirang ham no kabangkad kaarakitay igfafiya hayo manga sagit, fag idwa sas Sirang Kafahowayan. 15Is Hisos nasagot hasagbahala, Ham ha takan wan. Bati, nyawa basad wa Sirang Kafahowayan, ham lomohas hayo baka ngatay habayo gi hayo nagsiyokan basad lamnonan kaarakitay igfainom. 16Gwadi idwa aw fiya nogfalfas to fag ina, kan Abraham yadi hasokfonan, nyawa basad Sirang Kafahowayan, maskin safolo wa ha walok fangaraw is Satanas no bilang wa nagafos hanya. 17In Hisos manga kalaban naya wagdog yadi, dapat ka fakaaywanan nabaya waglag in Hisos manga naibolon madolaw fagayo fagayo. 18Ginya madis Hisos iglwang has taw, Kinday in Diyos sakop? Kinda odi ngap angko fatoladan tonya, ham gayfan? 19Kitos sadik botol mostasa sadik taw natanom sat basad iyab. Ginya madi natobo wan, indahol, inbali wa fon hayo, manok digfogad wan sat baba sanga. 20Sadi ya ginan is Hisos iglwang, Kinda odi ngap angko fatoladan in Diyos sakop, ham gayfan? 21In Diyos sakop kitos famadahol tinapay ka sadik ina nafaaktom has tolok sarok harina, hanggan wandahol sadi wak dahonya. 22Ginyas Hisos igfadagos wat lahawan, hawas Hirosalim baliwa. Is Hisos igfaadal has fagayo kat nagdalanan banwa hanggan manga forowan balay sayok sayok. 23Ha sadik taw gintaw in Hisos, iglwang, Ama, sayok di awkin fag manga taw kambawi? Is Hisos nasagot hanya, 24Ham fag tikis wagsakbaw has ogbot fag sakbawan. Hogfwayong ha hayo, no kitay di, kaaywanon fag manga taw ka kasaya somakbaw has ogbot fag sakbawan, dapat tadwa somyagan. 25Aban kagfon balay no natahop wa ka sakbawan, ham kadwa nasakbaw, ham fag bayai mandis nyamo sas sokayan, igsagam wagsagam wan. Nyawa hamyayag lwang kitay, Ama, ha fasakbawan yadi hyami, hanya somagot yadi hayo, Hodwa twa ham no ginda fag manga taw, no ginda hayo banwanan. 26Ham lomwang yadi hanya kitay, Gwadi tam igsayowan yadi wa kwan, manga ginom, itfagonan, hagfaadal ya ngadi sa hyami manga fagbokngan balay. 27Dapat hanya omolit ya aban kitay, Hodwa kilala hayo ham no ginday fag manga taw. Ham fagayo ka gogali dwat, fag ayayo gingko. 28Aban ham mangoraw wan hanggan hayo ngifon di mangarigitan wa sinya, ham no lomag inda Abraham da Isaak da Hakob hanggan in Diyos manga fangampang fagayo san Diyos sakop, dapat ham man im-okas has dayo. 29Aban hamdasog gis salogan myanit baliwa, gis sangdayan myanit baliwa, hanggan gis manga balitangan, ta mangaraktoman aban sas fanganan san Diyos sakop. 30Orongan wan ha akwa tiba ka goyan ka gomona man ka gona, hanggan ka tiba ka gona imgoyan man ka goyan. 31Gis nanya yadi fag masohod, tibak Farisiyo inbangkad yadi sinya, iglwang han Hisos, Haw fag lahaw wa gistay maskin is Hirodis kasayag fahatay hyamo. 32Is Hisos nasagot kiti, Ham fag fwayong han Hirodis, ka bilang sadik hayopan idwag falagon kitay homagat, fag lwang kitay, Yabay, hogfaalin yapdi manga labang kagfahoriyan manga taw, hanggan igfafiya yapdi manga taw ka ha manga sagit kati, hanggan kitonya mandi bago marom, ginya madi sat dayo aban, angko ibolon imtabo wan. 33Dapat kati, hogfadagos yapdi angko lahawan, hanggan bago marom, hanggan sat dayo aban, maskin idwa fiya in Diyos fangampang sadi no matay nodwa sas banwa Hirosalim. 34Ginyas Hisos iglwang kawa has banwa Hirosalim, Haw, Hirosalim, Hirosalim, haw igfahatay in Diyos manga fangampang hanggan igbintok ya ngadi kan Diyos manga nasogo ha hyamo. Kayoda wa ginan ho kasayag lohob hyamo sakop fag manga taw, kitos ina ofa noglohob it anak sat daga fakfak, dapat haw, Hirosalim, ha dayo di ngap. 35Yakanga kati ho orongan wa fabayaan lamang im oliyanan. Hogfwayong hyamo, haw fawa lomag angko domwag, nodyam dasog gis nanya fag masohod haw no lomwang, Ka kadasog hastay san Diyos ngayan, fag bomaya wan.

will be added

X\