LOKAS 12

1Gis nanya yadi fag masohod kaaywanan wa kaaywanan wan fag manga taw kadasog, igtarahidan ista ginanan bitis sas kaaywanan. Ginyas Hisos nafwayong yapdi hat manga katogbong kiti, Ham fag idwag sokfon ka ogali manga Farisiyo, ka bilang libadora, ka famadahol tinapay. Kawa ka manga Farisiyo ogali famalagon odistaw kitay fiya. 2Ka manga matagowan kati fadi wadamlag aban. Fadi wamfyalom aban, imdog wan has fagayo. 3Yakanga nyawa kana ka hayo fwayong sas basad marom, imdog di aban has basad mayawa a, ka hayo faginason sas basad lingoban imdog wa aban fiya fiya sas sokayan, sasta fanifonan. 4Angko manga fakilalaon, hogfwayong hayo kitay ham fag idwa kadala kagfahatay habilogan taw, maskin balinya odi no kadi fagsyaganon taw. 5Ho fomwayong hayo no fakta ka hayo fakadalaon fiya fiya, fag ka syagan igbol hayo ipsaw, ginya hanya bahala yadig fatohoyan no fakta fag manga taw ha sadik hadasogan, sinya wa kamdosa basad afoy. Hogfwayong hayo, anod, fag tonya wa ka hayo fakadalaon. 6Idwa awkin tam nogfasali limak maya dowa odik sagat halga? Nyawa kitonya is Diyos idwag falamang ngadi sadik maya. 7Gwadi nyawa hayo manga ogat bok sas alfoyo, is Diyos twa wa no kayoday. Ham fag idwa kadala. Gwadi ham mahalga man has kaaywanon fag manga maya. 8Hogfwayong hayo nyawa faktaw kagbaya sas manga taw fagdogan kitay hanya angko wa sakop, aho, Kanbali Taw, bomaya yadi aban san Diyos manga anghil fagdogan kitay, tonya fag taw angko wa sakop ngay. 9Dapat ay, kagtangkod angko sasta fagdogan manga taw, ho tomangkod yadi hanya aban san Diyos manga anghil fagdogan. 10Nyawa faktaw ka kampang dwat donggon kawa hangko, aho Kanbali Taw, fiya digfaliyam ista hampang dwat, dapat ay, ka kampang dwat donggon kawa has Maliyaw fag Falad, tonya fag taw ista naogali kitonya idwam liyam, nyawa ginahin. 11Ta no tomaban hayo has manga fanimbaan Hodyo aban, hanggan has faglagan manga gorangon, has manga ha kangayanan, kaarakitay omintaw hayo, ham fag idwa galibitan hayo sagot is taw, ngatay hayo bato fwayongon, 12maskin, nomdasog gis nanya fag masohod aban, ka Maliyaw fag Falad faisip hayo no kana ka hayo sagot. 13Ka sadik taw sinya sas fakaaywanan nafwayong han Hisos kiti, Haw kagfaadal, fwayongan angko fadwasay kitay, horayan yadingko hyami ama nafaobon ha hyami. 14Is Hisos nasagot, Ama, fakta kagfabali angko igbahala igfafiyowan igfahorayan ha hayo dowa hayo ama faobonan hayo, ha gayfan? 15Ginyas Hisos nafwayong has fagayo, Ham fag matagahan, ham fag idwa maingliyon, nyawa kana, maskin bohonwa kitay hayo kaakwaan no ayo kagfaboyag hayo. 16Ginya madis Hisos igtoltol to fag halimbawa, iglwang, Ha sadik taw maakwa ha manga namay, manga iyab, aywan it ani. 17Yakangat fangayofan iglwang kitay, Kinda odi angko halimbawan? Hada odi ara angko fwalidan angko ani? 18Hanyag lwang kiti, Yabay, aho mangharaw omiklas kangko manga dongdong gona, ho homalig tiba, fag dahol man inya. Fag sinya wan aho no fomwalid angko manga ani hanggan angko botang fagayo. 19Ginya madi angko sadili fangayofan bomaya wan, lomwang kitay, Nabi, kaaywanon angko manga botang kati. Aywan fag fangaraw idwa komorang angko manga fakasayaon. Yakanga ho fag mafahowayan odi, manga kwan, manga ginom, aho fag masolong odi fagaba. 20Dapat is Diyos nafwayong hanya fag taw maakwa kitay, Paong paong haw. Araw basad yabi ho bomol wam ipsaw. Fakta nga araw ka omafo im manga botang, ha gayfan? 21Kitonya kasta lagon aban kagtifon kaakwaan kaarakitay hat sadili, dapat no han Diyos baliwa myabog di. 22Ginyas Hisos nafwayong hat manga katogbong, Yakanga hogfwayong hayo, ham fag idwa galibitan hayo fanganon kaarakitay ham kaboyag, ngatay hayo rotay bato solongon, 23maskin ka haboyagan bohondi kitos fanganon no mahalga, hanggan ka habilogan bohondi kitos rotay. 24Yabay, bantayan ka manga ahak, idwag famgas, idwa yadi gani, idwa ha halongkong, idwa yadi ha dongdong, dapat ay, nyawa kitonya, is Diyos kagfahwan di ka manga ahak. Gwadi ham bohondi kitos manga manok ik mahalga. 25Fakta fag taw sa hayo ka syagan igfadogay it haboyagan sas baba daga, ngadi sadik tama sinyahod kawa no galibitan, ham gayfan? 26Gwadi ham nodwa syagan gibolon to fag ogbot fag manga bagay, kana mayon ham no fagaba wa galibitan ka manga iba bagay? 27Yabay ka manga borahan sas dayo, gwadi tonya idwag bonang, idwa yadi kalig rotay. Dapat hogfwayong hayo, nyawas Salomon igsolong it rotay ka fiya man has fagayo, sadi dik borahan fiya man inya kabantay, idwa ha matoga. 28Is Diyos no bilang wagfasolong rotay kafiyaon kabantay has manga lamnon ka kati malangba basad talon, dapat ay, no marom, ngandayo imsonog lamang, labi man is Diyos wa ka farotay hayo. Laya ogbot yapdi ham nogsyag in Diyos. 29Yakanga ham fag idwa galibitan igsayak hayo fanganon, ngatay inomon. 30Maskin tonya fag manga bagay ka manga layonan taw kadyag syag in Diyos, tonya ista fagalibiton. Gwadi hayo Ama fadi wad twa kitay, korang yadi ha hayo ham nodwa ha akwa tonya fag manga bagay. 31Ka fiya, ham fag fasakop fiya fiya han Diyos, ginya madi ham tomanggap yadi hayo manga kakorangan fagayo. 32Angko tifonan, nyawa ham sayok, ham fag idwa kadala, maskin hayo Ama sat banwanan sam tongod igfaangay kitay ham aban fag ha akwa kangayanan sat sakop. 33Ham fag fasali hayo manga botang, ginya fag disag it sali has manga myabog. Ham fag ha loka kadwa kadaanon a, ka sohadan hayo kaakwaan san Diyos banwanan sam tongod kadwa kamin sinya, maskin idwa ha domasog fangnahaw, idwa yadi ha tipakong domwat sinya. 34Maskin no sidak mabotangan hayo kaakwaan, hayo fangayofan sinya yadi wak maisipan fagaba. 35Ham fag danwa masalawidan hayo fotol, hayo salong fag danwa masonogan. 36Ham fag tolad ka manga sogowan kagfanaya it fon no goli gis fangsawan kaarakitay dagos wa bomoklas ka tahop, hanya no kadasog igsagam. 37Kat manga sogowan bomaya wan no mafolawan yapdi hanggan mafanayan it fon nomdasog wan. Hogfwayong hayo, bonwa bohag, ka mandi ista fon ka somolong rotay fangibolon a, fatokaw it manga sogowan sas fanganan, ginya fahwan fafa has taw. 38It manga sogowan bomaya wan it fon noglag ta matalagaan wan, nyawa boknga yabi, nyawa kasirang wan hanya nomdasog. 39Dapat ay, ham fag twa kitay kagfon balay no nadog kitay ha kadasog fangnahaw gis nanya fag masohod, hanya idwag fasigpala it balay, idwag fasakbaw hat basad balay. 40Ham yadi, ham fag danwa matalagaan fagaba maskin aho, Kanbali Taw, imbangkad ya aban no ginahin fag masohod ham nodwa ha fagasolopon kitay aho kadasog gis nanya. 41Is Pidro naintaw in Hisos kiti, To kam nafwayong halimbawa ngatay matoonan di ha hyami, ngatay has fagayo? 42Kagfon intam nasagot, Fakta ka matanogon, hanggan madonong fag sogowan, ham gayfan? Kat fon nagtogonan kitay anowan it manga sogowan tiba, kaarakitay fahafod has taw ista fanganon no ginahin fag masohod ka fiya. 43Tonya fag sogowan bomaya wan it fon nogtahod hanyag fadagos it fon togon kitonya. 44Hogfwayong hayo, bohonwa bohag, it fon faano hanya it manga kaakwaan fagayo. 45Dapat ay, halimbawa, tonya fag ista nagtogonan, not fangayofan iglwang, Angko fon inlibang yapdi, dogay di aban bago mwali. Yakanga hanyag bakbak ka tibak sogowan, manga ina, manga ama, hanggan kwan kwan odi, manga ginom, iglango ya ngadi. 46Ginya madi ista fon mwali sas sirang kat nagtogonan fag sogowan nodwa tagak tagak, gis nanya fag masohod myanit hanya idwa twa kitay it fon kadasog. Yakangat fon fadosa wa fiya fiya, faofod hanya has mangadwa matanogon. 47Kasta sogowan no natwa it fon faibolonon hanya, dapat idwan talaga, idwa yadin tanog, it fon aban bomakbak hanya marigon. 48Dapat kasta sogowan nodwa natwa it fon faibolonon hanya, ginyat ibolon fiya wa fadosaon, it fon no bomakbak hanya, idwa bangan marigon maskin kawadwa natwa it fon faibolonon hanya. Kagtanggap aywan fag manga anoon, aywan yadi abat sagoton. Ta no nafabahala aywan man ha sadik taw, aywan man yadi abat sagoton. 49Honbangkad hastay kaarakitay igdiya afoy has baba daga. Fag imtongo wa nangos. 50Ha sadi yak tandaan kahoriyan kitos igfatogna, kangko bato fatandaan yapdi sangko, hanggan aho gwayan wa kahori tonya nodyapdin anod. 51Aho awkin inbangkad hastay kaarakitay igdiya kahowayan hastay is baba daga, ham gayfan? Hogfwayong hayo, bohonwa kahowayan kangko taban, yatokitay igfasarowayan wa ngap manga taw. 52Gis kati ginan no ha limak taw sa sadik talanahan, imbali dowak layonan, tolo iglaban has dowa, hanggan dowa iglaban has tolo. 53Kat ama hanggan it anak ama iglabanan. It ina hanggan it anak ina iglabanan yadi, Kitonya yadi ka manga almanogang ina iglabanan. 54Ginya madis Hisos nafwayong yadi has fakaaywanan fag manga taw, Ham noglag manga linyabo masding sas sangdayan myanit baliwa, ham iglwang, araw kahwayan wan, hanggan fagaba wa ngap kaanod. 55Ginya madi, ka bagyo no gis balitangan, ham iglwang, Myanit wa dahol dahol araw. Kitonya ngay ka kaanod. 56Ham igfataka odigdog. Ham bilang yadi wagbasa ka hayo manga faglagon sas banwa sam tongod hanggan sas baba daga, kana mayon ham nodwa twaglag ka hayo manga lagan ka madalanan kati fag masohod? 57Ginyas Hisos iglwang, Kana mayon ham nodwa syagan igfatohoyan no kana ka fiya. 58Halimbawa, no hagtaban hyamo has fangabaya, ka fiya ham fakafiyan mandi, ham no katabo di. Nodwa kitonya, ta ngandayo gomoyod hyamo has fangabaya, ginya ka fangabaya fagamat hyamo hasagbantay sas porisowan, ginya faporiso hyamo. 59Hogfwayong hyamo hadwa malfas ginya aban, haw nodya nabayad hanggan wa kat kahaminan fag saga.

will be added

X\