LOKAS 10

1Ginya madi aban, kagfon intam nafili ya fitok safolo ha dowak manga katogbong. Is Hisos nafagona was taw ha banwanan ha banwanan, myasa dowak taw, han Hisos bato hadasogan aban. 2Is Hisos nafwayong has taw, Kaaywanon ka aniyon kati, dapat ay, sayok di ka manga fangani. Yakanga ham fag darangin hasagfon namay kaarakitay somogo ya ka manga fangani hat namay. 3Hogsogo hayo igbarita, ham fag lahaw wan. Yabay, aho nogsogo hayo, ham bilang wa manga anak topa, magop magop, sas fagbokngan ido maisog. 4Ham fag idwag diya sokloban, nyawa bay-ong, nyawa lapak. Ham fag idwa kalibang igtoltolan boknga dalan, nyawa faktaw. 5Nyawa haday fag balay ham nomdasog, fag lwang yap has taw, In Diyos kahowayan fag somakop hayo talanahan nangos. 6Kagfon balay sinya no kasaya kahowayan, im kahowayan somakop hanya, dapat ay, nodwa kasaya kahowayan, yadwa somakop. 7Ham fag sawa hayo nagdasogan fag balay. Ham fag sinya wak kwan, manga ginom, nyawa kana kasta nadisag, maskin ka fangibolon idwa kayag tanggap it tangdan. Ham fag idwa galin galin, ha balay ha balay. 8Nyawa haday fag banwa hayo hadasogan, ta nogtanggap hayo, ham fakwan ista disag fanganon, nyawa kana. 9Fafiyaan ka manga ha sagit sinya. Faglwang yadi has taw sinya fag banwa kitay, In Diyos sakop kaakbang wa has taw. 10Dapat nyawa siday fag banwa ta nodwag tanggap hayo, ham sagayaan wa ginya, ham fag lwang, 11Ngadi hayo lotok kantokba sa hyami yapyafa migfadagdag wan, bilang wagfaorongan kitay ham dayog dog hyami barita. Dapat ham fag twa wa kitay in Diyos sakop naakbang hayo banwanan. 12Hogfwayong ha hayo ka manga taw sinya fag banwa it fadosa aban mahori man has fadosa manga taga banwa Sodoma hyabi. 13Isyay wa, isyay wan, haw banwa Korasin. Isyay wa, isyay wan haw, banwa Bitsayda, maskin ka manga taga Tiro, hanggan taga Sidon, no nalag di ka hayo manga lagan madolaw, ta dan wa nasolong manga sako hyabi yapdi, hanggan natokaw sas fogis dafog, kaarakitay igfalag kitay tagsoyo wan. 14Dapat aban, sas Sirang Fangabayan, ka fadosaan kamtohoyan ha hayo bohondi kito kamtohoyan has manga taga Tiro hanggan manga taga Sidon. 15Haw yadi, banwa Kapirnaom, Haw aw kasayag faabwaton hyamo han Diyos banwanan sam tongod? Dapat ho fadagdag lamang hyamo hawas Daga Salad. 16Ginyas Hisos nafwayong hat manga katogbong, Kagtalinga ha hayo, igtalinga yadingko. Kagdayo hayo, igdayo yadingko. Hanggan kagdayo angko, igdayo yadi kagsogo angko. 17Ginya madi aban, ka Fitok-Safolo-ha-Dowa no nwali han Hisos, igbaya wa dahol dahol, taglwang, Hyami Fon, hami nogngayan hyamo ngayan, nyawa ka manga labang galin wan. 18Is Hisos nasagot has taw, Ho nalag was Satanas no kadagdag gis banwa sam tongod, bilang wa hilat gim tongod has daga. 19Yabay, ho nafalobos hayo angko kangayanan nyawa ham lomid manga abyanon, manga inonay, hanggan domaog intam kalaban karigonan, ham idwam kinday. 20Nyawa kitonya, hayo fagbayaon fag bohonwa kitay kawa ham igfaalin labang, dapat kawa hayo manga ngayan insorat san Diyos banwanan sam tongod. 21Gis nanya mandi fag masohod, ka Maliyaw fag Falad kasolongan sawan Hisos fangayofan sadi wak dahonya. Ginyas Hisos iglwang, Mama, haw kagfon im banwanan sam tongod hanggan ka daga, hogbaya hyamo maskin no hadis manga madonong, manga ha nagadalan, hadyag fatwagdog to fag manga kadonongan, dapat hagfatwagdog fiya fiya has manga taw kat fangayofan kito yadis manga anak it fakatwawon. Anod, Mama, maskin kitonya ngay kam fakasayaon. 22Ginyas Hisos nalwang has taw, Angko Ama ka nafaano hangko fagayo fag manga kadonongan. Idwa ha kilala angko, in Diyos Anak, no bohonwa angko Ama. Idwa yadi ha kilala in Diyos angko Ama, no bohonwa aho kat Anak, hanggan no kayoday angko faangayon mamahilala has taw angko Ama. 23Is Hisos insayangowan hat manga katogbong, ginya, idwa sasta fagdogan fakaaywanan iba taw, nalwang, Ham igbaya wan ka hayo mata lagan madolaw kati. 24Kawa hogfwayong hayo, aywan in Diyos manga fangampang hanggan manga gorangon hyabi kasaya wa dahol lomag ka hayo lagan kati, no kitay di, dapat tadyapdi nalag hyabi. Ta kasaya nangos fag domog haraw ka hayo donggon kati, dapat tadyapdi nadog hyabi. 25Ginya madi sadi kagfaadal Batasan Hodyo naakbang han Hisos kaarakitay igsolay hanya, iglwang, Haw kagfaadal, kana araw kangko bato ibolonon kaarakitay ho lomag haboyagan kadwa ha katabowanan? 26Is Hisos nasagot, Kana kansorat sas Batasan Hodyo? Kana kam nabasa sinya? 27Hanyag lwang, Haw fag galwasi in Diyos kagfon hyamo, sadi wak dahonya fangayofan, sadi wak dahonya karigonan, sadi wak dahonya isip, hanggan fag galwasi im kapariho kito yadim sadili. 28Is Hisos iglwang has ama, Im sagot idwa nalway, fag kitonya wa kam fakatanogon, ginya hamboyag wan. 29Kagfaadal Batasan Hodyo kafang yapdi kadaog sas toltol, yakanga naintaw ya domwag in Hisos, Fakta kangko kapariho nangos? 30Is Hisos nafahalimbawa, nasagot, Ha sadik taw iglahaw gis banwa Hirosalim hawas lwad has banwa Hiriko. Nahablang manga tolisan boknga dalan. Ta nabol wat balokas a, nabakbak ya ngadi ka ama. Ka ama bilang wa mahatayan, ka tolisan no naobon wa hanya. 31Natoonan araw ogbot, ha sadik fagalan-han-Diyos nadalan sinya. No nalag ka ama mafolidan, hanya nabaybay lamang sas bali karsada, igfadagos it lahawan. 32Ginyan Libi hasokfonan sadi igdalan yadi sinya, nalag yadi ka ama mafolidan, dapat nabaybay yadi wan. 33Ginya madi araw araw, ha sadik taga Samariya igdalan yadi sinya. Noglag ka tolisan nahablang, hanyan awa waglag. 34Naakbang hanya a, nalidgid lana hanggan alak hat manga baran, natamong, nafasahay wa ka ama hat baba habayo, ginya nadiya hasta fandasogan fag balay, hanggan naano yadi sinya. 35No bago wa marom hanyag bangkad dowak kwarta dinaryo, igdisag hasagfon balay. Hanya nogtogon, iglwang hasagfon balay kitay, Ha anowan to fag taw. No kayoday ka korang, ho bomayad ya hyamo, ho nogdalan ya aban, aho no goli. 36Ginyas Hisos naintaw hasagfaadal Batasan Hodyo kitay, Faktaw sinyas tolo kagdalan hasta nadaog kagfalag kitay hanyag fapariho wan has taw ka manga tolisan nahablang, ha gayfan? 37Kagfaadal Batasan Hodyo iglwang, Kan-awa hanya kagfalag kitay igfapariho wan. Ginyas Hisos iglwang hanya, Sogi, fag kitonya yadim ogali. 38Da Hisos nogfadagos wat lahawan has banwa Hirosalim baliwa, indasog ha sadik forowan balay. Sadik ina, is Marta nafasakbaw inda Hisos. 39To fag ina ha fadwasay ina, is Mariya. Is Mariya matokawan san Hisos bilog bitis a, igtalinga is Hisos nogfaadal. 40Dapat is Marta kasaliwawa wagfatalaga fanganon. Yakanga gakbang han Hisos, iglwang, Fiya di awkin, ha gayfan, angko fadwasay nogfabayaan angko? Haw fag fwayong hanya nangos kitay, togbongan yap angko. 41Dapat kagfon intam nasagot hanya, Marta, Marta, aywan fag manga bagay im fakasaliwawaon, 42dapat sadi odik bagay ka orongan fagfiliyon. Is Mariya ka ha nafili ka fiya, yakanga hodwa bomol tonya gi hanya.

will be added

X\