LOKAS 1

1Hogsorat ha hyamo, Tiyofilo, sadik taw ha kangayanan. Aywan fag manga taw danwa nasorat kawa hantam donggon ka manga nadalanan sa hyami banwanan itfagonan. 2Ka manga nalag to fag manga bagay gis fabagowanan hanggan nafaadal in Diyos hampang, ka nafwayong ha hyami it mata lagan, ginya hyami ofod tiba nasorat yadi kasta nafwayong. 3Ginya madi, aho no naintaw wa fiya fiya fagayo fag mangan anod gis fabagowanan, ho naisip yadi kitay hanggan aho somorat yadi wan sadik toltolan fiya wa donggon, idwa ha labi, idwa ha korang. 4Hogsorat ha hyamo kaarakitay haw tomwa matohoyanan kitay, kam manga donggon orongan wan-anod kitonya. 5Hyabi, nos Hirodis ka gorangon sas sakop Hodiya, ha sadik fagalan-han-Diyos san Abiyas habanan, it ngayan is Sakariyas, in Aaron hasokfonan. In Sakariyas babay is Ilisabit gi yadin Aaron hasokfonan. 6Ka talsawa myasa wa kitonya in Diyos wa fagbayaon, katanog it manga togon fagayo fagayo. 7Dapat ay, hanggan wa magorang tadya ha anak maskin is Ilisabit malayos. 8Ginya madi yabay, in Sakariyas fag habanan, no gibolon ka fagalan bato ibolonon san Diyos faglagan, tagbahala sas Fanimbaan-Dahol. 9Gis nanya, ta no nafaaraktoman ista manga ngayan, kito kasta ogali manga fagalan, in Sakariyas ngayan kasta nabol gis sohadan, yakanga hanya ka domiya sonogon kamangyan. Yakanga gis nanya fag masohod ta nogsonog kamangyan, is Sakariyas insakbaw han Diyos basad Fanimbaan-Dahol a, 10kat fakaaywanan fag manga taw matifonan sas sokayan, igdarangin. 11Ginyan sadi odi ginan, in Diyos anghil sadi dagos wa nafalag han Sakariyas, sawas balis sihon baliwa fagsonogan kamangyan. 12Is Sakariyas no nalag ka anghil, inhinol wa a, indala wa dahol dahol. 13Dapat ka anghil nafwayong han Sakariyas kitay, Haw fag idwa kadala, Sakariyas. Is Diyos nadog wa hyamo darangin. Ham da Ilisabit omanak yapdi anak ama aban. Fag is Hwan ham no ngomayan hanya. 14Ham bomaya wa a, hamsolong yadi waglag, hanggan fagayo fag manga taw, ta bomaya waglag hanya no bago sagaya. 15Hanyam bali wa ha kangayanan dahol aban san Diyos faglagan. Hayo anak aban fag idwa ominom alak, nyawa kana fag fakalangoon. Gi yapdit ina basad tiyan, ka Maliyaw fag Falad danwa sa hanya sadi wak dahonya fangayofan aban. 16Tonya hayo anak ama ka fafwali ya aban hasta fakatiwalaon fag Diyos, hasagfon has taw, kaaywanon in Israil manga hasokfonan fag manga taw. 17Tonya hayo anak ama ka gomona man kagfon intam, hanggan ka fangayofan hanggan karigonan ka nafasyagan in Diyos fangampang is Iliyas hyabi, mamasyagan yadi hanya. Imbali wa kitonya kaarakitay hanyag faamigosan ya ka manga ama hat manga anak, hanggan fafwali ya ka mangag sway has fiya fag ogali. Ginya madi yabay, sadik tifonan taw imtalaga han Diyos. 18Is Sakariyas nalwang has anghil kitay, Kinday ho no tomwa matohoyanan kitay ha akwa anak aban, maskin aho magorang wa dahol kati, hanggan angko babay, mi myasa wa kitonya. 19Ka anghil nasagot, Ahos Gabriyal ka gibolon san Diyos atobangan. Is Diyos nasogo angko ha hyamo kaarakitay fomwayong hyamo kangko nafadog fiya fag barita ha hyamo kati haraw. 20Maskin hadwa katiwala kangko fwayong hyamo, gis kati ginan haw imbali wa boyon hanggan bongkok no kandogay day nodyam anod. 21Gis nanya yabay, no bali day is Sakariyas idyan dokson, ka manga taw mafanayan yapdi sas sokayan. Tandolaw wan no kana mayon nondogay sas basad Fanimbaan-Dahol. 22Ginya hanya nondokson wan, fawa twa kampang has taw, igfaaman odi. Yakanga ta natwa wa kitay hanya ha lagan madolaw sas basad Fanimbaan-Dahol. 23Nonsagaya in Sakariyas habanan taranggapan ibolon, is Sakariyas nwali wa hat balay. 24Ginya madi yabay, fawa dogay, is Ilisabit gabosog wan. Manga limak magdanon, is Ilisabit idwa galin galin git balay. 25Is Ilisabit nalwang, Kati yabay is Diyos bago dinawa angko, naibolon kito kaarakitay tadwa ha fagwason aban kitay, hodwa ha anak. 26Is Ilisabit no onom wak magdanon gabosog, is Diyos nasogo ya ka anghil Gabriyal 27has banwa Nasarit, sakop Galiliya, ha sadik dayaga, it ngayan is Mariya. Is Mariya idya nangindogan. No kitay di, is Mariya ha bato wa indoganon, is Hosi, sadik ama gin Dabid ha sokfonan, ka gorangon fag Dabid. 28Ka anghil nondasog has oliyanan dayaga, naakbang wa a, nafasayagdog hanya kiti, Yabay yabay, is Diyos igbaya wa hyamo, sawa yadi hyamo. 29Dapat is Mariya indolaw wa dahol dahol igdog kat nafwayong a, nangayfanan wa fiya fiya no kanat kahologan ka anghil no kampang kitonya. 30Yakanga ka anghil nafwayong hanya, Mariya, haw fag idwa kadala, maskin haw in Diyos wa fagbayaon. 31Haw fag talinga wan. Haw imbali gabosog hanggan omanak yadi sadik anak ama. Haw aban ngomayan hanya is Hisos. 32Hanyam bali dahol it kangayanan hanggan ta lomwang yadi kitay kat Ama is Diyos ka ha kangayanan abwat man has fagayo fagayo. Is Diyos, kagfon intam, fatokaw yadim Anak, san Dabid it hafofowan nagtokawan fanokawan gorangon hyabi. 33Ginya madi hanya bomahala han Hakob manga hasokfonan hanggan aban aban. Hanya nombali wa gorangon idwa ha katabowanan nogbahala. 34Is Mariya naintaw has anghil, Kinday nom-anod tonya kawa hodyan saya ama? 35Ka anghil nasagot, Ka Maliyaw fag Falad domokson ha hyamo a, ka Abwat-man-has-Fagayo-Fagayo it karigonan ka lomanbong ha hyamo. Yakanga kam fasagayaon fag anak aban imtohoyan han Diyos, hanggan it ngayan in Diyos wa Anak. 36Ha awkin idwag tohod in Ilisabit im kaiban? Nyawa magorang wan, gabosog kati a, sadik anak ama aban it fagfasagayaon. Kati faonom wa fag magdanon hanya no gabosog, nyawa hyabi taglwang hanya baog. 37Maskin nyawa kana fag madolaw idwa hagsagaya in Diyos fagsyaganon. 38Is Mariya nasagot, Aho intam Fon sogowan. Nyawa kana kam nafwayong angko fag im-anod wan. Ginya yabay ka anghil naobon wan Mariya. 39Ginya madis Mariya idwa dogay nadagos wan has manga moyod sakop Hoda hawas sadik banwa sinya. 40Is Mariya nonsakbaw han Sakariyas balay, nahampang masaya wagdog han Ilisabit. 41Is Ilisabit no nadog in Mariya hampang, ka anak san Ilisabit basad tiyan nahimot marigon. Ka Maliyaw fag Falad sawan Ilisabit basad fangayofan sadi wak dahonya, 42ginyas Ilisabit nahampang marigon a, nalwang han Mariya, Haw bomaya wan bohondi kitos iba ina hanggan kam fagfasagayaon fag anak aban bomaya yadi. 43Hodwa ha fangayofan kitay, kambali angko Fon it ina manabang angko. 44Maskin aho no nadog hyamo hampang, haw no kadasog, ka anak sangko basad tiyan nabaya wan, nahimot marigon. 45Maskin haw nasyag kitay, im-anod wan kagfon intam nafwayong ha hyamo, git anghil, haw bomaya wan. 46Ginya madis Mariya nasagot in Ilisabit kiti, Angko fangayofan igfasayagdog kagfon intam, 47Angko fangayofan igbaya in Diyos angko Famawi, 48Maskin nyawa ahot sogowan odi, hanyan-awa wangko. Gis kati ginan hanggan wa aban, maskin is Diyos kadwa ha bosal 49Naibolon sangko madolaw, fagayo fag manga taw lomwang kitay, aho ka bomaya wan. Is Diyos maliyaw wan. 50Hanya kaawa ka manga katanog hanya gis fagayo fagayo fag manga hasokfonan taw. 51In Diyos manga ibolon igfalag has taw it karigonan, Hanyag fasarowayan yadi ka manga ha takan. 52Hanya nafaalin manga gorangon git kangayanan a, Nafaabwat it kangayanan ka mangadwa ha takan. 53Nafahapsog manga fiya fag fanganon ka manga kalonos, Dapat ay, nasogo ka manga maakwa, nyawadwa ha nahwan. 54Maskin igfaanod it togonan hantam manga magorang, Hanya natogbong in Israil manga hasokfonan, in Diyos manga sogowan, 55Kawa tonya wat togonan han Abraham hanggan hat manga hasokfonan hanggan aban aban. 56Is Mariya nandogayan san Ilisabit balay tolok magdanon, ginya madi nwali wan. 57Ginya madi aban, nondasog in Ilisabit anak kasagayan fag masohod, yabay insagaya anak nga ama. 58It manga faakbang balay hanggan kaiban, no nadog kitay kagfon intam inawa wa dahol in Ilisabit, ta nagobok wa ngap hanya, igbaya yadi wa ngap iglag. 59Ginya madi, ta nogfatoli ka anak dararag sas fawalo fag sirang, tonya fag manga taw nafasakop yadi sinya. Ta gayfan kitay is Sakariyas nogfangayan it anak, is Sakariyas mandi, kito mandi it ama. 60Dapat ay, it ina nalwang, Bohonwas Sakariyas, is Hwan di kat ngayan. 61Dapat taglwang, Ngadi sadi sa hayo kaiban idwa ha ngayan kitonya. 62Yakanga ta nafaaman odin Sakariyas it ama, ta no gintaw hanya no faktaw kat fakasayaon it anak ngayan. 63Is Sakariyas nafaaman, nanagad soratan a, ginya nasorat kiti, It ngayan is Hwan. Fagayo indolaw wan. 64Ginya sadi wa ginan is Sakariyas nahampang ya, nafasayagdog in Diyos. 65Ka manga taga sinya fag banwanan, fagayo fagayo, indolaw wa dahol, yakanga igfadadahitan ha sadi ha sadi kat manga lagan, sadi wak dahonya manga banwanan sas manga moyod sakop Hodiya. 66Fagayo ka nadog naayfan wa fiya fiya no kanat kahologan, maskin kalag wa kitay, is Diyos sinya wa fag anak, ka manga taw garintawan yadi, Kinday mayon aban to fag anak? 67Ginya madi ka Maliyaw fag Falad sawan Sakariyas in Hwan ama, sadi wak dahonya fangayofan. Ginyas Sakariyas inbalin Diyos fangampang, nalwang kito, 68Maskin kagfon in Israil manga hasokfonan, is Diyos, in-awa waglag hanggan nafalo nafalfas it sakop, Yakanga tam fag fasayagdog hanya. 69Hanya nafabangkad yadi hantam sadik Famaliwa, marigon wa dahol, Hanyan Diyos sogowan is Dabid, it hasokfonan. 70Hyabi hyabi is Diyos ha togonan hantam git manga fangampang maliyaw kitay, 71hanya bomawi intam gintam manga kalaban Hanggan gis manga taw ka kadwat iglag intam. 72Hanya ha togonan yadi hantam manga magorang kitay, hanya kaawa has taw. Hanya tomohod yadit fiya fag taranggapan. 73To kan Diyos nafatohoyan fiya fiya hantam hafofowan fag ama is Abraham kitay, 74Hanya bomawi intam gintam manga kalaban, Kaarakitay tam somyagan mamasayagdog hanya, idwa ha fakadalaon, 75Imbali maliyaw hanggan maslong intam manga ogali sat faglagan, no kandogay day tam no boyagan yapdi. 76Kati haw man angko anak kangko fagwason. Maskin haw gomona kagfon intam, kaarakitay igfatalagat manga bato lahawan, Yakanga ta ngomayan hyamo kitay, haw wat fangampang, ka Abwat-man-has-fagayo-fagayo-it-kangayanan. 77Haw fomwayong hat sakop no kinday ta nombawi, No kinday it manga ogali dwat nomliyam. 78Maskin intam Diyos maawaon wa dahol dahol, Ka mayawa ka bomawi intam kaakbang wagfayawa intam, 79Kaarakitay igyawa ka manga basad marom yapdi, ka manga sas daga gohom kahatayan, Hanggan tomaban intam has dalan kahowayan. 80Ka anak, is Hwan, no kadahol wan, kabali yadi marigon it fangayofan a, nabanwanan basad fakahyabogan nodyan bali ha bantog sas manga banwanan Israil.

will be added

X\