HODAS 1

1Ahos Hodas in Kiristo Hisos sogowan sadi, hanggan in Santyago fadwasay kagsorat. 2Hogsorat has manga taw kan Diyos intam Ama fagalwasiyon, kat nafatawag hanggan in Kiristo Hisos faganoon. Ham nangos fag domog kitay is Diyos kaawa wa dahol hayo, igfalokmay hayo manga fangayofan fiya fiya, hanggan galwasi wa dahol hayo. 3Angko manga fakilalaon, no kitay di, ho kasaya wa dahol dahol igsorat ha hayo itfagonan, no kinday is Diyos nogbawi intam fagayo. Dapat kati hogdog idwa fiya aho nodwag faaronganon ha hayo kitay, ham fag marigon no gapin intam fakatiwalaon, kan Diyos nadisag sadi di ginan, hanggan hosto wa tonya has aban aban, hat sakop fag manga taw. 4Maskin hogfatagak hayo, ha akwa manga taw inaktom hantam mafyaloman. To fag manga taw iglaban in Diyos. Tagbalyo odi kastay sas baba daga fag manga dwat, han Diyos disag kafiyaon. Ta dayo homilala in Kiristo Hisos, ka sadi di kagfon intam hanggan intam Hari. Ka fadosaan kantalaga has taw danwan tohoyan hyabi yapdi. 5Nyawa ham natwa wan, ho kasayag fatohod ya domwag hayo kitay, nonsagaya wa nabawi in Israil tifonan gis banwanan Ihipto, is Diyos nafahatay wan ka mangadwan tiwala hanya. 6Hanggan ka manga anghil tiba kagyod hyabi in Diyos disag kangayanan ha hanya, nadayot banwanan, yakangas Diyos nafagafos kadina kadwam bogloy tonya fag manga anghil, hanggan nafaporiso, hawas fakabokngan basad fakaharoman hanggan wa has Sirang Fangabayan. 7Tam fag tohod yadi ka manga banwa Sodoma hanggan Gomora hanggan it manga faakbang banwa. Ka manga taga sinya gogali dwat has ka taw, kagsagaya ogali, nyawa has ina, nyawa has ama. Ginyas Diyos nafadosa has taw basad afoy kadwa kapsa, kaarakitay igfatagak has fagayo. 8Ka kati fag manga taw kaglaban in Diyos kitonya yadi. Kawa tagtagimfan madolaw, yakanga ta gibolon dwat hat sadili habilogan, dayog fasakop in Diyos, hanggan igyod ka manga sam tongod. 9Nyawas Migil, in Diyos anghil ka abwat man tibat kangayanan, kadalag yod kitonya nogfabohag han Satanas, kawa han Mwisis habilogan baliwa. Is Migil no gato in Satanas nalwang odi kitay, Kagfon intam fadosa hyamo. 10To fag manga taw igyod odi ka manga bagay ta nodwa natwa wagdog. Ginya madi, kawat fakatwawon kito odis hayopan, tagfadwat yadit sadili. 11Isyay wan to fag manga taw. Tagtolad odi in Kain ogali. Kawa ta kasaya kwarta tagtolad madali in Balaam nafalamang. To fag manga taw kiton da Kori hyabi, ta nalaban has ha kangayanan a, inliyam yadi wa makitonyaan. 12Ham manga fadwasay intiwala nogsayowan, to fag manga taw mahaya wa kalag non-aktom ha hayo, igbilog wa ka tiba, tadwa ha fagisipon no bohonwat sadili. To fag manga taw bilang odi linyabo, bagyo odi kagdiya, idwa yadi kwayan. Bilang odi manga fon hayo kadwag bohad nyawa dayo famohadon, no kitay di. Hanggan wa ngap it dalid in-goyod wan, natay wa orongan. 13Bilang odi taob dagat dahol, it manga fakadiyaon igboraan wan. Bilang odi manga fanggasan kagtalang, intalaga wa ngap has basad marom wa dahol dahol, hanggan aban aban. 14Is Inok, ka fafito fag hasokfonan gin Adan, danwa nafwayong kawa hanya fag manga taw, no nalwang kitay, hyabi yapdi, Fanlag ngay, intam Fon indasog wan, libo libo fag maliyaw fag manga ofod mahoyogan yadi hanya, 15kaarakitay fatohoyan has fadosaan hanggan fadosa fagayo kadwa kilala in Diyos, kawat manga ibolon dwat, hanggan tagyod in Diyos. 16To fag manga taw mamanawon ya, masogaton ya. Mahogod ya ngadi no goyon it bali fangayofan masayaon. Mafatakaon ya ngadig dog, dapat bilang wa fakiyason it hampang has taw no ha fagsagadon. 17Dapat ay, angko manga fakilalaon, tam fag fagaba matohodan in Kiristo Hisos kagfon intam it togon git manga Fandiya Barita, ta no nafaadal hantam. 18Hyabi yapdi ta nafwayong hantam kitay, sas ginanan fag kasohodan, hambangkad aban manga fanlibak kadwa kasaya han Diyos, ka katanog odit bali fangayofan masayaon. 19To fag manga taw kagfasarowayan hayo nagkasadiyan. Ta goyon kastay is baba daga fag manga ogali. Ka Maliyaw fag Falad idwa yadi sas taw. 20Dapat angko manga fakilalaon, tam fag karigon nogsyag han Diyos. Kantam, fag ka mandintam fakatiwalaon kafiyaon. Fag syag ka Maliyaw fag Falad togbong tam nogdarangin. 21Tam fag idwa kaoman no galwasi in Diyos hanggan fag gagwanta wagfanaya ka haboyagan kadwa ha katabowanan kan Kiristo Hisos kagfon intam fagdisagon hantam, maskin kaawa intam. 22Tam fag kaawa hanggan farigon ka manga gadowan it fangayofan. 23Lakwian wan ka tiba ka kaakbang has afoy. Ka tiba intam fakawaon, dapat tam fag matagahan yadi kat manga ogali kadwa fiya. Fag idwam lafit hantam kat manga ogali dwat, fag kitos igbaybay ista rotay sitam sitam, ta no bangbangon, halimbawa. 24Is Diyos ka syagan gano intam kaarakitay tam idwag falamang. Hanya ka syagan yadig fadasog intam hat atobangan kafiyan, idwa ha dwat ngadi ogbot ogbot, masolong wa dahol. 25Tam fag fasayagdog hanya, ka sadi dik Diyos intam Famawi, gin Kiristo Hisos kagfon intam. Tam fag faanod kitay hanya ka ha kafiyan, kadaholan, karigonan hanggan kangayanan, gi yapdis hyabi hyabi, hanggan wa kati, hanggan wa aban aban. Fag kitonya wa ngay.

will be added

X\