HWAN 9

1Ginya madi, da Hisos noglahaw, ta nalag sadik ama danwa bota, gi yapdis anak dararag. 2In Hisos manga katogbong gintaw hanya kiti, Haw kagfaadal, faktaw ka ha ogali dwat, ngatay to fag ama, ngatay it manga magorang, maskin insagaya anak dararag bota? 3Is Hisos igsagot, Bohonwa mawat. Bohonwa kitay ngatay to fag ama, ngatay it magorang ha ogali dwat maskin hanyan sagaya anak dararag danwa bota. Dapat ay, to fag ama bota wan kaarakitay in Diyos kadonongan imlag gi hanya. 4No sirang yapdi tam fag gibolon ka nasogo angko manga ibolon madolaw. Araw yabi wan, ginya idwa ha taw twa gibolon no yabi. 5Aho no sayapdis baba daga, aho ka yawa istay is baba daga. 6Is Hisos no nalwang di nga kitonya, natofay has daga, nayomid ka daga hanggan tofay, ginya nafyad ka lotok has ama bota boknga mata. 7Ginyag lwang, Haw fag lahaw wan. Yamosan im mata sas bolbogan sas Siloi. Santam sanglitan ka ngayan Siloi, it kahologan, Nasogo. Ginya madi ka ama bota inlahaw wan, nayamos it mata a, no goli wan infoga wan. 8Kat manga faakbang balay hanggan ka mangag lag hanya, hanya no fagabag sagad igsagad odi gis taw, indolaw wan, ta nangarintawan, Bohonwa awkin to fag ama ka danwa matokawan fagaba sas bahalan dalan igsagad igsagad togbong? 9Intibag lwang, Tonya wa ngay kagsagad igsagad itfagonan. Intibag lwang, Bohonwan, bilang odi kitonyat manga walong. Dapat ka ama nalwang, Aho wa ngay. 10Ta gintaw hanya, Twa oman im mata nonfoga? 11Ka amag sagot kitay, Kawasta fagngayanon ama, is Hisos, ka nayomid daga a, nafyad hangko mata, ginya nasogo angko has Siloi, fag yamos hono angko walong. Yakanga ho hanya wan a, aho no nayamos wangko mata, honfoga wan. 12Ta gintaw hanya, Hadawas Hisos kati? Hanyag lwang, Hodtwa man. 13Ginya ta nataban has manga Farisiyo ka ama ka bota haraw. 14Yabay sawas Sirang Kafahowayan is Hisos no nayomid ka daga hanggan nafafoga tonya fag ama it mata. 15Sadi ya ginan ka manga Farisiyo naintaw hanya no kinday it mata nonfoga. Ka ama nasagot, Hanya nafyad lotok angko mata, ginya ho nayamos a, kati honfoga wan. 16Ka manga Farisiyo iglwang, Ka naibolon to idwa gin Diyos, maskin idwa katanog intam Batasan Hodyo kawa has Sirang Kafahowayan. Dapat ay tibag lwang, Kinda nangos sadik ama omibolon manga madolaw kitonya no sonson wa dwat it manga ogali? Ka manga taw kabali wa dowak layonan. 17Yakanga ka manga Farisiyo naintaw ya domwag has ama, Haw iglwang hanya nafafogam mata, kanam fwayongon no kindak taw tonya? Ka ama nasagot, Hanyan Diyos fangampang. 18Ka manga fagtahinan Hodyo nodyag fatawag it manga magorang, kafang yapdi katiwala kitay tonya fag ama bota hyabi, dapat kati iglag wa fiya fiya. 19Yakanga ta gintaw hat manga magorang, Hayo anak awkin to? Ham iglwang danwa bota gis anak dararag ginan, fiya oman kati iglag wan? 20Ginya madit manga magorang nasagot, Mi twa kitay hyami wa anak, danwa bota gis ogbot ginan. 21Dapat ay, midwa twa no kinday hanggan no faktaw ka nafafogat mata. Ham intawan hanya, maskin hanya dahol yadi wan. Hanya fadi wadtwa fomwayong hayo. 22It manga magorang nafwayong kitonya kawa ta kadala ka manga fagtahinan Hodyo maskin ka manga fagtahinan nangoyonan kitay nyawa faktaw nogfaanod kitay is Hisos kan Diyos-natogon-Famawi, ta domayo hanya gis fanimbaan tifonan Hodyo. 23Maskin ngay it manga magorang nafwayong, Hanya dahol wan, intawan hanya. 24Yakanga ka manga Farisiyo nafasonson ya ka bota hyabi a, naintaw hanya matangon wa kitay, Im bibig hampang fag ka fakaoronganan wan kawas Diyos igdog wan. Mi twa wan ka ama ka nafafiya hyamo ha ogali dwat. 25Ka ama nasagot kiti, Hodwa twa ngatay hanya ha ogali dwat, ngatay idwan. Dapat ay sadik bagay ho twa wa fiya fiya. Ho bota wan itfagonan, dapat kati hoglag wan. 26Ta naintaw hanya, Kanat naibolon ha hyamo? Kinday no nafafoga im mata? 27Ka ama nasagot has taw, Gwadi ho nafwayong hayo haraw, ham dayo katiwala. Kana ham no kasayag fasaysayan ya domwag angko? Ham aw kasaya yadi kabalit manga katogbong? 28Ta namaswag odi ka ama a, nalwang, Haw mandi kat katogbong, dapat hami in Mwisis manga katogbong. 29Tam twa matohoyanan kitay is Diyos nahampang in Mwisis, dapat ay, no kadi tonya fag ama, is Hisos, midwa twa no ginday fag banwanan. 30Ka ama nasagot, Yabay yabay, ham idwa twa, mangharaw, hanya no ginday fag banwanan, dapat tonya wa ka nafafoga angko mata. 31Tam twa kitay is Diyos idwag talinga hasta manga darangin ka ha manga ogali dwat, dapat ay is Diyos igtalinga has mangag fasakop hanya, hanggan katanog it fwayong. 32Gi yapdis fabagowanan intam daga, tam idya ha donggon nyawa faktaw ka nafafoga ista mata ka bota gi yapdis anak dararag. 33Nangos to fag ama nodwa giwan Diyos, idwa ara nasyagan nafafoga angko mata. 34Ka manga Farisiyo nasagot hanya, Haw insagaya anak dararag danwa ha ogali dwat, dapat ay, haw man ka kasayag faadal hyami? Ginya madi ta natolod hanya gis basad fanimbaan. 35Is Hisos no nadog kitay ta natolod, gis basad fanimbaan, ka ama bota kanfiya, naoyan hanya a, naintaw, Haw awkin igsyag has ama Kanbali Taw? 36Ka ama naintaw, Ama, fakta kin tonya, kaarakitay ho kasyag hanya? 37Is Hisos nalwang, Haw nalag hanya a, aho wa tonya kam fakampangon kati. 38Ka ama nalwang, Yabay, angko Fon, hogsyag wa ha hyamo, ginya nalingkohodan san Hisos atobangan. 39Is Hisos nafwayong, Honbangkad hastay has baba daga kaarakitay ho fatohoyan ka manga taw kitay, ka manga bota fag lomag hanggan ka manga mafogan fag bilang wambota. 40Tiba manga Farisiyo ka san Hisos akbang nadog it hampang. Ta naintaw hanya, Haw awkin gayfan hami bota yadi wan? 41Is Hisos nasagot has taw, Ham nangos no bota, idwa ha somogat hayo, nyawa ham igsalan, dapat ay, ham iglwang ham mafogan wan, yakanga ta somogat hayo fiya fiya.

will be added

X\