1 dapat is Hisos hawas Moyod Oliboan. 2 Nonbago marom, dayo kayawa, is Hisos nwali has Fanimbaan-Dahol, nasakbaw has basad aladan. Fagayo fag manga taw nagobok hanya, yakangas Hisos intokaw wa a, igfaadal has taw. 3 Ginya ka mangag faadal Batasan Hodyo hanggan manga Farisiyo nataban sadik ina ista naiktan gis famabayowanan. Ta nafalindog tonya fag ina sasta fagbokngan. 4 Tagfwayong han Hisos, Haw kagfaadal, to fag ina ta natahod gis famabayowanan. 5 In Mwisis togon insorat sa hyami Kasoratan kitay, fahatayan, bintokan ka kitonya fag manga ina. Dapat haw, kinday haw noglwang no ha naibolon kitonya? 6 Tagtikis wa nangos igfasalan odi in Hisos, kaarakitay ha fagsombongon has manga gorangon, nangos iglaban hanya. Dapat is Hisos natarohongan odi, nasorat it timoyo sas boknga fogis daga. 7 Ta nodwag fagomon gintaw yapdi hanya, is Hisos nalindog a, igfwayong has taw, Nyawa faktaw sa hayo kadwa ha naibolon dwat, sogi, gonaan wa bintokan wa tonya fag ina. 8 Ginya madis Hisos natarohongan ya, igsorat ya sas boknga fogis. 9 Dapat ay, ka manga taw no nadog in Hisos fwayong, nanarowayan wa fagayo igsadig sadi. Ka magorang man ka nagona nalahaw. Is Hisos kan-goyan matarohongan yapdi hanggan ka ina malindogan sas dayo ogbot. 10 Ginyas Hisos nalindog a, naintaw has ina, Ina, hadawa ka manga taw kati? Idwa aw han-goyan fatohoyan hyamo has fadosaan? 11 Ka ina nasagot, Ama, fawa hansawad ka manga taw. Is Hisos nafwayong, No kitonya, ahodwa yadig fatohoyan hyamo has fadosaan. Nyawa ha goli wa kati, dapat hawa gogali dwat domwag. 12 Sadi ya ginan is Hisos igtoltol has manga Farisiyo, iglwang, Aho ka yawa sas baba daga. Kagtahin angko idwa lomahaw basad marom, nyawa ginahin, hanya ha akwa wan ka yawa kagfaboyag manga taw. 13 Ka manga Farisiyo iglwang han Hisos, Yabay haw lamang kagfaorongan ha hyamo, im hampang idwa ha kahologan no kitonya di. 14 Is Hisos igsagot, Yatokitay, nyawa ahog faorongan angko sadili, orongan wan angko fwayong maskin aho twa aho no ginda kanbangkad hanggan haday angko hadasogan aban. Dapat ay, ham idwa twa aho no ginda kanbangkad hanggan aho no haday aban. 15 No ham ka kabaya, kito odis ogali taw, dapat ahodwa kabaya nyawa haday fag taw. 16 Dapat ay, halimbawa, aho no kabaya, orongan wan, maskin bohondi aho kagfwayong, angko Ama ka nasogo angko sayadingko. 17 Insorat ngay sa hayo Batasan Hodyo kitay, no dowak taw igfaorongan sadik bagay, tam igfaanod ista manga hampang. 18 Ahogfaorongan angko sadili hanggan angko Ama ka nasogo angko igfaorongan yadi kawa angko. 19 Yakanga ta gintaw in Hisos, Siday im ama? Is Hisos igsagot, Ham idwa kilala angko aho no faktaw orongan. Ham idwa yadi kilala angko Ama. Ham nangos no kilala di aho no faktaw, ham kilala yadingko Ama. 20 Is Hisos igfwayong kitonya has manga Farisiyo nogfaadal yapdi basad aladan Fanimbaan-Dahol. Is Hisos sawasta akbang fandisagan. Idwa ha taw nagamat in Hisos maskin is Diyos idyag faangay gis nanya. 21 Sadi ya ginan is Hisos igfwayong has taw, Ho lomahaw wa aban a, ham somayak wangko dapat ham matay wan maskin ham igfadagos yapdi hayo manga ogali dwat. Ham idwa syagan omoyan angko hangko hadasogan. 22 Ginya madi ka manga fagtahinan Hodyo garintawan kitay, It kahologan aw ngatay somongon noglwang tam idwa somyagan domasog hat hadasogan? 23 Is Hisos igsagot kitay, Ham tagastay is baba daga, dapat aho taga di gim tongod, gin Diyos banwanan. Ham ka tagastay is baba daga, dapat ahodwa gistay is baba daga. 24 Kawa kitonya ahog fwayong hayo kitay ham matay wan ham nogfadagos hayo manga ogali dwat. Anod wan, ham nodwa katiwala kitay AHO AHO WAN, ham matay wan maskin ham igfadagos hayo manga ogali dwat. 25 Ta gintaw in Hisos, Fakta ngakin haw? Is Hisos iglwang, Gis bago bago aho danwa nafwayong hayo no faktaw aho. 26 No kitay di, aywan fag manga bagay ho twag fasogbo hanggan kabaya hayo. Dapat ay, kagsogo angko idwag bohag, kangko lamang donggon gi hanya kangko fagfwayongon has manga taw istay is baba daga. 27 Ka manga taw idwa natwagdog kitay in Hisos faglwangon kawat Ama. 28 Yakangas Hisos iglwang has taw, Aban ham nogfaabwat angko, sas tongod hayo, aho Kanbali Taw, ham tomwa wagdog kitay AHO AHO WAN, ginya madi ham tomwa fiya fiya kitay, ahodwa gibolon nyawa kana nongko di sadili fangayofan, dapat kangko Ama lamang togon angko, kangko fagfwayongon has manga taw. 29 Ka nasogo angko sa yadingko, idwa gobon angko sadi sadi, maskin aho gogali kat fagbayaon fagaba. 30 Is Hisos nogtoltol kitonya, aywan kagsyag ha hanya. 31 Yakangas Hisos igfwayong has manga Hodyo kagsyag hanya, Ham no katanog fagaba angko manga fwayong, ham orongan wan angko manga katogbong. 32 Ham homilala yadi ka fakaoronganan hanggan ka fakaoronganan fomalfas hayo. 33 Tagsagot in Hisos, Hami in Abraham wa hasokfonan. Nyawa ginahin hami bohonwasta manga nasali sogowan. Kana mayon haw noglwang kitay, ha fomalfas hyami? 34 Is Hisos igsagot is taw, Orongan wan angko fwayong hayo, bohonwa bohag kitay, nyawa faktaw ka ha ogali dwat, bilang ka ogali dwat nasali sogowan. 35 Ista sogowan nomtoon galin ya, dapat nyawa ginahin it anak, it anak wan. 36 Yakanga non Diyos wa Anak kagfalfas hayo, ham mafalfasan orongan gis ogali dwat. 37 Ho twa kitay ham in Abraham manga hasokfonan, dapat ay, nyawa kitonya, ham kasayag fahatay angko maskin ham kafang katanog angko manga fwayong. 38 Angko lagan aho no sawangko Ama, kangko fagfwayongon has taw. Dapat ka hayo ama fagfwayongon ha hayo ka hayo fakatanogon. 39 Taglwang han Hisos, Hyami hafofowan magorang kawas Abraham. Is Hisos igsagot is taw, Ham no orongan in Abraham manga hasokfonan, ham nangos somokfon yadit ogali. 40 Dapat ham kasayag fahatay angko nyawa hogtoltol ha hayo angko donggon fakaoronganan gin Diyos. In Abraham ogali idwa kitonya. 41 Hayo ama ibolon ka hayo fagtoladon. Tagsagot in Hisos, Hyami pinagkaama sadi di, kawas Diyos, hami bonwa manga anak gis famabayowanan. 42 Is Hisos iglwang has taw, Yabay, nos Diyos hayo pinagkaama, ham nangos galwasi angko maskin aho giwan Diyos kanbangkad hastay. Bohonwa angko odi sadili fangayofan kitay aho fag imbangkad hastay, angko Ama nasogo angko. 43 Kana mayon ham nodwa twagdog angko manga fwayong, ham gayfan? Maskin ham kadwat igdog angko barita. 44 Is Fandaya hayo ama a, ham it manga wa anak. Ham kasaya gibolon hayo ama manga fakasayaon. Gis bago bago hanya sadik fanlibon taw, idwa yadig baliwa ka fakaoronganan nyawa ginahin, maskin it manga hampang idwa ha maanod. Hanya nogbohag, kawat ogali danwa kitonya maskin hanya bohagon, hanggan hanya ka pinagkaama hasagbohag baliwa. 45 Dapat ay, hogfwayong hayo ka fakaoronganan, yakanga ham idwa katiwala angko. 46 Fakta fag taw sa hayo ka syagan igfatohoyan kitay aho ha ogali dwat, ham gayfan? Dapat ay, aho nogfwayong ka orongan, kana mayon ham nodwa katiwala angko? 47 In Diyos manga anak igtalinga in Diyos manga hampang. Dapat ay, ham idwag talinga hanya maskin ham bohonwan Diyos manga anak. 48 Ka manga fagtahinan Hodyo iglwang han Hisos, Anod, orongan wan hyami fwayong kitay haw taga Samariya, ngandi labang kagfapaong hyamo. 49 Is Hisos iglwang has taw, Idwa ha labang igfapaong angko. Hogfasayagdog angko Ama, dapat ham igfadwat igdog angko. 50 Hodwag sayak kitay manga taw fag fasayagdog angko. Dapat ay, ha akwa sadi ka kasaya kitay manga taw fag fasayagdog angko, hanya bahalag fatohoyan. 51 Orongan wan angko fwayong ha hayo kitay, nyawa faktaw no katanog angko togon fagaba, fawa domog kahatayan. 52 Taglwang han Hisos, Kati mi natwa wagdog fiya fiya kitay labang orongan igfapaong hyamo. Maskin is Abraham natay wan, hanggan ka manga fangampang natay yadi wan, dapat haglwang nyawa faktaw no katanog im togon, idwa domog kahatayan, nyawa ginahin. 53 Hyami pinagkaama is Abraham natay wan. Haw awkin gayfan kitay hyamo kangayanan dahol man in Abraham? Ka manga fangampang natay yadi wan. Fakta odi haw, ha gayfan? 54 Is Hisos igsagot is taw, Idwa ha kahologan aho nogfasayagdog angko sadili. Angko Ama kagfasayagdog angko. Hanya ka hayo faglwangon hayo Diyos. 55 Dapat ham idwa kilala hanya, nyawa ginahin. Dapat ay, aho kilala hanya fiya fiya. Ahog bohag odi aho noglwang kitay ahodwa kilala hanya. Dapat ho kilala hanya a, ho katanog yadi fagaba it fwayong. 56 Hayo pinagkaama is Abraham insaya wagdog kitay hanya lomag no ginahin angko kabangkadan. Hanya nalag ngay, insaya waglag. 57 Ka manga fagtahinan Hodyo iglwang han Hisos, Gwadi haw idya limak safolo fangaraw im kadogayan, kinda tonya, haw noglwang kitay haw nalag in Abraham? 58 Is Hisos igsagot is taw, Orongan wan bohonwa bohag, hyabi is Abraham nodyan sagaya, dandi AHO AHO WAN. 59 Yakanga manga taw nafoyot manga bato kaarakitay bomintok in Hisos. Dapat is Hisos natago wa a, nadokson lamang gis basad Fanimbaan-Dahol.
