HWAN 7

1Ginya madi aban, is Hisos igsabang has manga banwanan sakop Galiliya. Gis nanya fag manga masohod is Hisos idwa kasayag sabang has sakop Hodiya maskin ka manga fagtahinan Hodyo sinya kasayag fahatay hanya. 2Kaakbang ka Hodyo Fanohodan Dongdongan. 3Yakanga in Hisos manga fadwasay ama igmaswag odi hanya, taglwang kiti, Haw fag hanya wan, fag hawas sakop Hodiya kaarakitay kam manga katogbong kagtahin hyamo lomag im manga ibolon madolaw. 4Kawadwa ha taw kwangit igfalag it ibolon has fakaaywanan no kasaya ha bantog. Maskin haw gibolon kitonya, gwadi fag falag im manga ibolon madolaw has fagayo fag manga taw. 5Gis nanya fag masohod nyawan Hisos manga fadwasay idyag syag ha hanya. 6Is Hisos igsagot hat manga fadwasay, iglwang, Idya fiya aho no has fakaaywanan manga taw. Dapat kadi ham, fiya di nyawa ginahin ham no hanya wan. 7Kastay is baba daga fag manga taw idwa kadwat iglag hayo, dapat aho kasta fakadwaton iglag maskin ahog fatohoyan kitay dwat ista manga ogali. 8Sogi, ham fag has Fanohodan. Ahodya has Fanohodan kati, maskin idya fiya aho no hanya wan. 9Is Hisos nalwang di nga kitonya, ginya nadogay yapdi ogbot sas sakop Galiliya. 10Dapat ay, in Hisos manga fadwasay nonlahaw has Fanohodan, is Hisos naoyan yadi, dapat idwag falagon fiya fiya is taw. 11Gis nanyas Fanohodan, ka manga fagtahinan Hodyo igsayak wa ngay in Hisos. Ta nangarintawan kitay, Hadawas Hisos? 12Sas fakaaywanan fag manga taw, aywan gidginasan kawa hanya. Intibag lwang, Fiya fag taw tonya. Intibag lwang, Yatokitay, idwa fiya, igfalamang odi manga taw. 13Dapat idwa ha taw kampang madogan kawa han Hisos maskin ta kadala ka manga fagtahinan Hodyo. 14Nogbokngan wa ka Fanohodan, is Hisos nasakbaw has basad Fanimbaan-Dahol, igfaadal has taw. 15Ka manga fagtahinan Hodyo indolaw wan. Taglwang, Twa oman to fag taw it kadonongan? Hanyadwa nangadal gis adalan ngadi sadi ginan. 16Is Hisos igsagot, Kangko fagfaadalon has taw idwa gingko sadili, dapat gin Diyos ka nasogongko. 17Nyawa faktaw no talaga wa gibolon in Diyos fakasayaon tomwa wagdog ngatay angko faadalon giwan Diyos, ngatay gi odingko sadili fangayofan. 18Kagfwayong it sadili fangayofan kasaya odig fataka, igfadaholon it sadili. Dapat ay, ka kasayag fadaholon kagsogo hanya, idwag bohag, sonson wa maanod it manga hampang. 19Bohonwa awkin is Mwisis ka nadisag in Diyos togon ha hayo? Dapat ngadi sadi sa hayo idwa ha katanog tonya. Kana mayon ham no kasayag fahatay angko? 20Ka fakaaywanan nasagot, Ha ngandi ha labang, fakta sa hyami ka kasayag fahatay hyamo? 21Is Hisos igsagot has taw, Angko ibolon sadi madolaw a, ginya ham fagayo kataka wan. 22Nomtoon ham igtoli ka manga anak ama nyawa sas Sirang Kafahowayan, maskin is Mwisis natogon hayo kitay fag fatoli hayo manga anak ama. Ka orongan tonya fag ogali gi yapdi hayo manga hafofowan, bohondi kitay gin Mwisis. 23No sawas Sirang Kafahowayan ham nogtoli ka manga anak ama nomtoon, kaarakitay ham idwag falamang in Mwisis togon, kana mayon ham no gisog angko maskin sas Sirang Kafahowayan aho no nafafiya sadik ama sadi wak dahonyat habilogan? 24Ham fag idya gato sadik taw maskin bilang idwa fiya it naibolon, ham fag twa no kinday ka orongan bago omato hanya. 25Intiba taga Hirosalim iglwang, Bohonwa awkin to fag ama ka manga fagtahinan fakasayaon fahatayon? 26Istay yapdi mangharaw. Hanggan no baliday kampang idwas fyaloman, tadwag laban hanya. Ngatay ka manga fagtahinan natwa wagdog awkin to fag ama kawan Diyos-natogon-Famawi, ham gayfan? 27Dapat ay, no todi to fag ama, tam fagayo wa twa hanya no ginday, dapat, in Diyos-natogon-Famawi nombangkad, idwa ha tomwa no gindak banwanan tonya. 28Yakangas Hisos nogfaadal yapdi sas basad aladan Fanimbaan-Dahol, kampang marigon, iglwang, Ham awkin gayfan kitay ham orongan kilala wangko hanggan aho no ginday? Bohonwa angko odi sadili fangayofan aho fag imbangkad hastay. Ka nasogo angko maanod it manga hampang. Ham idwa kilala hanya. 29Dapat aho kilala hanya maskin ahon bangkad gi hanya, hanggan hanya ka nasogongko. 30Yakanga ta kasaya wa gomamat in Hisos dapat idwa ha taw natawid hanya maskin, gis nanya, is Diyos idyag fagamat has taw in Hisos. 31Nyawa kitonya, aywan fag manga taw igsyag in Hisos. Taglwang, In Diyos-natogon-Famawi nombangkad aban, tam awkin ha fagasolopon yapdi kitay, hanya omibolon bohondi kitonya fag manga madolaw, ham gayfan? 32Ka manga Farisiyo no nadog kitay ka fakaaywanan gidginasan kitonya, kawa han Hisos, ka manga fagtahinan fagalanhan-Diyos hanggan manga Farisiyo nasogo manga polis kagbahala basad aladan Fanimbaan-Dahol kaarakitay gomamat hanya. 33Ginyas Hisos iglwang, Aho omofod yapdi ha hayo ngalay, ginya aho hawa hanya hasagsogo angko. 34Nyawa ham imyaya wagligaw angko aban, ham idwa lomag, maskin ham idwa syagan domasog hangko hadasogan aban. 35Ka manga fagtahinan Hodyo nangarintawan, Hada mayon it lahawan to fag ama tam nodwa lomag hanya? Mayon aw has manga Hodyo masoglatan ha sayo manga banwa Girigo, hanya man ik mamaadal aw is manga Girigo? 36Kanat kahologan noglwang kitay, tam idwa lomag hanya, nyawa tam somayak, hanggan tam idwa somyagan domasog hat hadasogan aban? 37Sas katabowanan Fanohodan fag sirang, ka mahalga man fag sirang, is Hisos nalindog, ginya nahampang marigon, nalwang, Nyawa faktaw ka kainom, fag gakbang angko, fag ginom wan. 38Kito kansorat sas Kasoratan, Nyawa faktaw kagsyag angko, giwat basad fangayofan bomolos manga safa danom kagfaboyag manga taw. 39In Hisos faglwangon istay, kawa ka Falad Maliyaw ka mangag syag hanya it fagtanggapon aban. Dapat ay, gis nanya fag masohod, is Diyos idyag disag it Falad Maliyaw has taw, maskin is Hisos idyan abwat hat kafiyan. 40Tibak taw sas fakaaywanan no nadog to fag manga hampang, iglwang, Orongan wan, to wa kan Diyos fangampang. 41Ka tibag lwang, To wa kan Diyos-natogon-Famawi. Dapat ka tibag lwang, Gwadi idwa gis Galiliya kan Diyos-natogon-Famawi nombangkad aban. 42Ka Kasoratan iglwang kitay hanya nombangkad aban, gin Gorangon Dabid hasokfonan, sas Bitlihim nomsagaya san Dabid sadili banwanan. 43Ginya tibak taw sas fakaaywanan igbaliwa in Hisos, tiba idwan. 44Tiba taw kasaya gomamat hanya, dapat idya ha taw natawid hanya. 45Ka manga polis nonfwali ya has manga fagtahinan fagalan hanggan has manga Farisiyo, ta gintaw has polis, taglwang, Yakana ham nodwa nataban in Hisos hastay? 46Ka manga polis igsagot, Nyawa ginahin midwa ha donggon taw kampang kitonya. 47Ka manga Farisiyo iglwang, Ham aw igfalamang yadi? 48Ham awkin ha donggon barita kitay ha manga fagtahinan ngatay Farisiyo intiwala ha hanya? Idwa akwa. 49Tonya fag fakaaywanan fag manga taw idwa natwagdog ka Batasan Hodyo, yakangas Diyos faliyam tonya fag manga taw. 50Dapat insadik Farisiyo ka sinya, kawas Nikodimo ka nasabang in Hisos itfagonan. Is Nikodimo iglwang, 51Maangay awkin santam Batasan Hodyo, ham gayfan, tam no fatohoyan has fadosaan sadik taw nodya nangampangan sas hampangan, nodya nadog fiya fiya gi hanya it naibolon? 52Tagsagot han Nikodimo, Anod, haw awkin taga Galiliya yadi? Haw fag gadal ka Kasoratan, ginya haw tomwa kitay idwa ha fangampang imbangkad gis sakop Galiliya. 53Ginya madi fagayo nangodgoliyan wan hat manga balay,

will be added

X\