HWAN 6

1Ginya madis Hisos hanggan it manga katogbong nadifay ka dahol fag linaw, linaw Galiliya, tibag lwang, linaw Tibiriyadis. 2Manga taw kaaywanon kaaywanon naoyan in Hisos, maskin ta nalag it kadonongan no nafafiya manga taw ha sagit. 3Is Hisos hanggan it manga katogbong hawas bohid has baba moyod a, tantokaw wa sinya. 4Gis nanya fag masohod ka Fanohodan Nagsagayan kaakbang wan, ta nogtohod ka anghil no nasagaya ista manga balay hyabi hyabi. 5Is Hisos nogbantay sas ligongan, iglag kaaywanan wa kaaywanan wa fag manga taw kaakbang hanya. Yakangas Hisos gintaw in Filipi, Ginday nangos tam no manah hanon hosto kaarakitay to fag manga taw mangwan? 6Is Hisos noglwang kitonya, igsolay odin Filipi, maskin is Hisos danwa natwa it bato ibolonon. 7Is Filipi igsagot, Dowak daan dinaryo korang yapdi fanali tinapay kaarakitay homosto, mafod has taw fagayo, ngadi ogbot. 8Is Andris, in Hisos katogbong sadi ya, in Simon Pidro fadwasay, iglwang han Hisos, 9Sadik anak ama istay ha balon limak tinapay dawa, hanggan dowak oyang. Dapat kinda araw, idwa mafod has fakaaywanan fag manga taw. 10Is Hisos iglwang hat manga katogbong, Fatokawan yap ka manga taw. Sinya malamnon, yakanga manga taw fagayo intokaw wan. Ka manga ama gamtanan manga 5,000. 11Is Hisos nabol ka manga tinapay, ginya no nabaya in Diyos, nafahoray has manga taw ka matokawan sinya. Kitonya yadi ka oyang nafahafod has taw no kayodawan ka kahanan. 12Ta no napsog wa fagayo, is Hisos nalwang hat manga katogbong, Tifonan yap kasta manga sawad nakanan kaarakitay idwam olan. 13Ginya ta natifon ista sawad tinapay dawa mafaarogbotan, safolo ha dowak boyog napno. 14Ka manga taw no nalag in Hisos nafalag madolaw, taglwang, Yabay yabay, to wa nga ka Kasoratan fagfwayongon in Diyos fangampang ka kabangkad hastay has baba daga. 15Is Hisos nasarom kitay ka manga taw kaakbang wa gomamat hanya kaarakitay pomilit hanya kabali ista gorangon. Yakangas Hisos nalahaw ya ngawan, hawas moyod, nabisok wan. 16Araw, myanit no kasangday wan, in Hisos manga katogbong hawas gobang linaw a, 17nasahay wa baloto, igdifay linaw nangos, hawas Kapirnaom baliwa. Ginya araw, tanyabi wan, dapat is Hisos idya kadasog has taw. 18Gis nanya igbagyo marigon, yakanga ka taob dagat kadaholon wan. 19In Hisos manga katogbong no nalwag manga lima, ngatay onom ik liho gis bahalan linaw, taglag in Hisos. Ta gafalad wan maskin is Hisos iglahaw baba danom, gakbang has baloto. 20Dapat ay, is Hisos iglwang has taw, Aho di, ham fag idwa kadala. 21Ginya ta nabaya wagfasahay in Hisos has basad baloto. Ginya tandasog wa dagos has gobang linaw hasta fangadagsaan baloto. 22Ginya madi nonbago marom, kat fakaaywanan fag manga taw kangoyan yapdi sas bali difay linaw, natohod kitay sadi dik baloto sas gobang linaw fafon. Ta galingawan in Hisos. Ta natwa kitay is Hisos idwan sahay, idwa nahoyog it manga katogbong. It manga katogbong lamang kanlahaw. 23Ginya, araw araw ogbot, handasog manga baloto tiba gis banwa Tibiriyadis, indagsa hantam Fon akbang nagfasalamatan manga tinapay, ginya madi ka fakaaywanan manga taw nahwan wan. 24Yakanga ka fakaaywanan fag manga taw no nalag kitay is Hisos idwa akwa sinya, nyawat manga katogbong, ta nasahay yadi wan tonya fag manga baloto, hawas Kapirnaom baliwa kaarakitay ta somayak in Hisos. 25Ka manga taw no nalag in Hisos sas difay linaw, ta naintaw ha hanya kitay, Rabi, ginahin haw nondasog istay? 26Is Hisos igsagot kiti, Orongan wan, bohonwa bohag, aho noglwang kitay ham idwag sayak angko maskin ham twagdog angko manga nafalag madolaw, dapat maskin ham nahwan ka fanganon hanggan ham napsog wan. 27Ham fag gibolon mahogod kaarakitay ha hanon kagfaboyag manga taw has haboyagan hanggan aban aban, bohonwa ka hanon ka ha kadwatan di. Aho, Kanbali Taw, ka domisag to fag fanganon ha hayo, maskin is Diyos angko Ama igfatohoyan kitay hawangko it kangayanan. 28Yakanga ta gintaw in Hisos, Kana araw hyami fakatanogon kaarakitay hami omibolon in Diyos wa fakasayaon? 29Is Hisos nasagot has taw, Kan Diyos fakasayaon, ham fag syag han Diyos nasogo. 30Ginya taglwang kitay, Kanam falagon madolaw ha hyami kaarakitay mimtiwala mi no lomag tonya? Kana kam ibolonon? 31Hyami manga hafofowan nahwan mana no basad yapdi fakahyabogan, kito kansorat, Hanya nadisag has taw ka fanganon gin Diyos banwanan sam tongod. 32Is Hisos iglwang, Orongan wan, bohonwa bohag angko fwayong ha hayo kitay, bohonwas Mwisis ka nadisag ha hayo ka fanganon gim tongod. Angko Ama kagdisag ha hayo ka fanganon orongan git banwanan sam tongod. 33Kawa kan Diyos fagdisagon fanganon kagdokson git banwanan sam tongod, igdisag yadi haboyagan has manga taw sas baba daga. 34Ta nanagad kitay, Ama kin, migyay to fag fanganon fagaba. 35Is Hisos iglwang kitay, Aho ka fanganon kagfaboyag manga taw. Ka gakbang angko idwam lonos nyawa ginahin, hanggan kagsyag angko idwa yadim inom domwag. 36Dapat ho nafwayong hayo kitay nyawa ham iglag wangko, ham idwag syag angko. 37Fagayo fag manga taw angko Ama bato disagon hangko, omakbang angko. Ahodwa domayo ngadi sadi, ngadi faktaw ka gakbang angko. 38Maskin ahonbangkad gin Diyos banwanan sam tongod kaarakitay omibolon kagsogo angko it fakasayaon, bohonwa angko sadili fakasayaon. 39To in Diyos fakasayaon ka nasogo angko hastay kitay, aho fag idwag liyam ngadi sadik taw kat nadisag hangko. Yatokitay, aban, sas ginanan fag sirang, aho fag fabangon ya tonya fagayo. 40Maskin angko Ama fakasayaon kito, fagayo kagsyag, hanggan kagbantay angko, it Anak, fag ha haboyagan hanggan aban aban. Ho fabangon ya tonya fag manga taw has haboyagan kadwa ha katabowanan sas ginanan fag sirang. 41Ginya madi ka manga Hodyo gidginasan ha sadi ha sadi, kahori in Hisos maskin hanyag fwayong kitay, Aho ka fanganon kanbangkad gin Diyos banwanan sam tongod. 42Yakanga taglwang, To fag is Hisos in Hosi odi anak, idwa aw? Tam kilalat ama hanggan wat ina. Kinday nangos tonya noglwang kitay hanyan bangkad hastay gin Diyos banwanan sam tongod? 43Is Hisos igsagot has taw, iglwang, Ham hawa gidginasan. 44Idwa ha omakbang angko no bohonwa angko Ama ka nasogo angko kagfaakbang hanya, hanggan aho faboyag ya hanya aban sas katabowanan fag sirang. 45Insadi san Diyos manga fangampang nasorat kitay, Is Diyos kagfatwagdog has manga taw fagayo fagayo. Fagayo kagtalinga hangko Ama, ginya twagdog it fwayong ka gakbang hangko. 46Bohonwa kitay ha taw nalag angko Ama, no bohonwa ka gin Diyos mandi, hanya lamang ka nalag angko Ama. 47Orongan wan, bohonwa bohag kangko fwayong hayo kitay, kagsyag angko ha haboyagan hanggan aban aban. 48Aho ka hanon kagfaboyag manga taw. 49Hayo manga hafofowan nahwan mana no sas basad fakahyabogan, dapat ta natay wa fagayo. 50Dapat ay, manga taw no kwan ka hanon kanbangkad gin Diyos banwanan sam tongod, idwa matay. 51Aho wa ngap ka hanon kagfaboyag manga taw, aho kanbangkad gin Diyos banwanan sam tongod. Nyawa faktaw no kwan to fag hanon, ha haboyagan hanggan aban aban. Angko habilogan kangko disag ha hanya, kwinta wat hanon. Tongko disag kaarakitay igfaboyag ka manga taw sadik baba daga. 52Ginya madi, kawas Hisos iglwang kitonya, ka manga Hodyo kagtalinga igfabodbohagan wan, taglwang, Kinda to fag taw no domisag intam it habilogan? Kinda tam no homwan? 53Yakangas Hisos igsagot has taw, Orongan wan bohonwa bohag angko fwayong ha hayo, ham nodwa homwan angko habilogan, aho Kanbali Taw, ham nodwa yadi ominom angko folot, ham idwa ha haboyagan orongan sa hayo sadili. 54Ka kwan angko habilogan hanggan ginom angko folot, tonya ka ha haboyagan hanggan aban aban, aho faboyag ya hanya sas katabowanan fag sirang. 55Maskin angko habilogan ka hanon orongan, hanggan angko folot ka inomon orongan. 56Ka kwan angko habilogan hanggan ginom angko folot kasadi fagaba sangko, hanggan aho kasadi yadi sa hanya. 57No kinday angko Ama boyagan ka nasogo angko, yakanga aho boyagan yadi, kitonya yadi ka kwan angko, kaboyag yadi kawa aho boyagan wan. 58Yakanga to ka hanon kanbangkad gin Diyos banwanan sam tongod, idwa kitos hanon hayo manga hafofowan nahwan, ginya natay aban. Ka kwan to fag hanon ha haboyagan hanggan aban aban. 59Is Hisos sas basad fanimbaan Hodyo sas Kapirnaom nogfaadal has taw kitonya. 60Aywan fag manga katogbong kagtahin in Hisos haraw, no nadog it manga hampang iglwang, Madolaw wa dahol to fag adal. Fakta ka syagan igfaanod tonya? 61Dapat is Hisos natwa kitay manga katogbong kagtahin hanya gidginasan kitonya, yakangag lwang, Ham awkin kabway wan maskin madolaw angko adal? 62Kinda nangos ham no lomag angko, Kanbali Taw, goli wan hangko banwanan hyabi? 63In Diyos Falad kagfaboyag manga taw. Ka habilogan taw idwa syagan igfaboyag manga taw. Angko manga nafaadal hampang ha hayo kan Diyos Falad hanggan haboyagan. 64Dapat ay, tiba sa hayo idwag syag angko. Gi yapdis bago bago is Hisos natwa wan no fakta fag manga taw idwa somyag hanya hanggan no fakta ka omoyon it kalaban aban. 65Is Hisos nadogang yat hampang, iglwang kitay, Maskin ngay hogfwayong hayo kitay, no bohonwa angko Ama kagfaakbang manga taw hangko, idwa ha syagan omakbang hangko. 66Gis nanya, aywan fag manga katogbong kagtahin in Hisos itfagonan, infwali ya, fawag tahin domwag. 67Ginyas Hisos naintaw hat manga katogbong safolo ha dowa, Ham aw kafang yadi wagtahin angko? 68Is Simon Pidro nasagot han Hisos, Hyami Fon, hada araw fag taw mi no somyag? Hyamo wa manga hampang kagfaboyag manga taw hanggan aban aban. 69Yabay mi katiwala hanggan twagdog fiya fiya kitay haw wa kan Diyos nasogo Maliyaw. 70Is Hisos nasagot has taw kitay, Bohonwa aw ham angko nafili safolo ha dowa? Dapat ay, insadi sa hayo kabali labang. 71In Hisos faglwangon kawas Hodas in Simon Iskariyoti anak. Nyawas Hodas insadi sas manga katogbong safolo ha dowa, is Hodas ka omoyon in Hisos kalaban aban.

will be added

X\