HWAN 5

1Ginya madis Hisos hawas bohid has banwa Hirosalim, maskin ha sadi yak Fanohodan kaakbang wan. 2Sas basad alad bato sas Hirosalim, sas akbang sakbawan manga topa, ha linaw gis bolbogan. Sas ligongan bolbogan ha balay, ha limak ansagan. It ngayan sas fangampangan Hodyo Bitisda. 3Aywan fag manga ha sagit, tiba bota, tiba gafilay, tiba idwa twa kimot, maigyanan sinya sas manga baba ansag. Tagfanaya no hagfafarisikan ka danom. 4Maskin nomtoon, intam Fon anghil igdokson, igfafarisikan ka danom. Ginya madi, nyawa fakta ka gomona has basad danom nomfafarisikan, imfiya wan nyawa kanat fagdogon. 5Sadik ama sinya tolok safolo ha walok fangaraw no ha sagit. 6Is Hisos no nalag hanya, hanggan natwa kitay dogay wa fag fangaraw no maigyanan sinya, naintaw, Haw aw kasayam fiya im sagit? 7Ka ama ha sagit nasagot, Kana wa kin ama, ahodwag dasog. Idwa hagtogbong angko no hagfafarisikan ka danom. Aho nyawa kaakbang has danom, tiba gona man angko kadokson. 8Is Hisos iglwang has ama, Haw fag kalindog, diyan wam sagmak, fag lahaw wan. 9Ka ama infiya wa dagos. Naanggong wat sagmak, nalahaw wan. Gis nanya fag sirang ka Hodyo fag Kafahowayan fag Sirang. 10Yakanga ka manga fagtahinan Hodyo iglwang has ama kanfiya, Kati Sirang Kafahowayan, idwa maangay has Batasan Hodyo haw nogdiya im sagmak kati. 11Dapat ay, ka amag sagot, Ka nafafiya angko nafwayong angko kitay aho fag diya angko sagmak, fag lahaw wan. 12Ta gintaw hanya, Fakta fag ama ka nafwayong hyamo kitay diyan wam sagmak, fag lahaw wan? 13Dapat ka ama kanfiya idwa kilala no faktaw is Hisos maskin is Hisos in-aktom has basad fakaaywanan manga taw sinya. 14Ginya madi araw, is Hisos nalag kat nafafiya fag ama sas basad aladan Fanimbaan-Dahol. Is Hisos iglwang hanya, Kati yabay, haw infiya wan. Haw fag idwag fadagos has ogali dwat, kaarakitay hadwa ha dogon mahori man inya. 15Ginya madi ka ama inlahaw wan a, nafwayong has manga fagtahinan Hodyo, kawas Hisos ka nafafiya hanya. 16Yakanga ka manga fagtahinan Hodyo igfabago igfahoriyan in Hisos maskin sawas Sirang Kafahowayan no nafafiya sadik taw. 17Dapat is Hisos igsagot has taw kiti, Nyawa ginahin hanggan wa kati, angko Ama gibolon hanggan aho kitonya yadi. 18Ka manga fagtahinan Hodyo no nadog in Hisos hampang kitonya, labi wan kasaya fahatay hanya. Bohondi kitay ka no nalaban ka Batasan Hodyo has Sirang Kafahowayan baliwa, dapat kawag lwang yadi kitay is Diyos it sadili Ama a, igfadaholon it sadili kito yadin Diyos. 19Yakangas Hisos iglwang has taw, Bohonwa gwadi bohag, orongan wan kangko fwayong hayo. Aho, in Diyos Anak, idwa gibolon basta odi angko sadili fangayofan, nodwag lag kitay kangko Ama gibolon kitonya. Maskin no kanangko Ama ibolon, aho it Anak gibolon yadi kitonya. 20Maskin angko Ama galwasi angko, it Anak a, igfalag yadingko it manga ibolon fagayo. Aban, hanya mamalag angko manga ibolon madolaw man to kat nafalag, ginya madi ham fagayo labi man imdolaw aban. 21Maskin no kinday angko Ama no nafaboyag ya domwag ka manga natay, kitonya yadi aho, it Anak igdisag haboyagan hangko manga fagfiliyon. 22Angko Ama idwag fatohoyan has fadosaan nyawa faktaw, dapat nafatohoyan hangko, it Anak, kitay fag aho ka bahala fatohoyan has fadosaan ka manga taw. 23Angko Ama nafabali angko ha kangayanan kitonya kaarakitay fagayo fag manga taw gomalang angko it Anak, kito yadi ta no galang angko Ama. Kadwa magalang angko, it Anak, idwa yadi magalang angko Ama ka nasogo ankgo. 24Orongan wa, bohonwa bohag angko fwayong hayo kitay, kagtalinga angko fwayong hanggan igsyag ha hanya ka nasogo angko, ha akwa wa haboyagan hanggan aban aban. Idwa ha fatohoyan hanya has fadosaan aban, dapat nalin wa gis kahatayan hawas haboyagan. 25Orongan wan angko fwayong ha hayo, bohonwa bohag kitay, kaakbang wa gis nanya fag masohod, no kitay di kati wan, ka manga mahatayan domog angko, in Diyos Anak, hasnog. No kayoday ka tomalinga angko imboyag wan. 26Maskin no kinday angko Ama ka syagan igfaboyag manga taw, kitonya yadi kat nadisag angko it Anak kitay, aho fag somyagan yadig faboyag manga taw. 27Angko Ama nafatohoyan kitay maangay no aho, it Anak, ka fatohoyan has taw it fadosaan maskin aho Kanbali Taw. 28Ham fag idwa kadolaw igdog aho nogfwayong hayo kitonya, maskin aban ogbot fagayo ka mahatayan sas manga lobgoban domog angko hasnog. 29Fagayo imbangon nyawa ginday. Ka manga naogali fiya imbangon has haboyagan, dapat ay, ka naogali dwat imbangon yadi, dapat ay imtohoyan di has fadosaan. 30Hodwa syagan igfatohoyan has taw ista fadosaan nongko di sadili fangayofan. Angko fatohoyan is taw angko lamang donggon gingko Ama. Yakanga aho nogfatohoyan ista fadosaan, sawas fakaoronganan. Maskin aho katanog ka nasogo angko it fakasayaon, bohonwa angko sadili kafangayofanan, yakanga sawas fakaoronganan aho nogfatohoyan ista fadosaan. 31No aho lamang kagfaorongan angko sadili, manga taw idwa twa ngatay orongan angko fwayong. 32Dapat sadi ya kagfaorongan yadi kawa hangko. Aho twa kitay orongan it manga fwayong kawa hangko. 33Itfagonan, ham no nasogo hayo manga sogowan han Hwan, is Hwan nafaorongan yadi kawa hangko. 34Nyawa hoglwang kitonya, ahodwa kasyag ka faorongan taw, dapat ka odi kitay hogfwayong kito kaarakitay ham imbawi wan. 35In Hwan manga fwayong ka bilang salong gigang hanggan igyawa, nafasayag dog hayo. Sadik ngalay ham insaya wagdog it manga hampang, ka bilang salong. 36Dapat ay, ha akwa sadik bagay ka marigon man in Hwan faorongan kawa hangko, kakitay angko Ama faibolonon hangko. To fag manga ibolon kagfaorongan aho no faktaw, hanggan igfaanod kitay angko Ama ka nasogo angko. 37Ginya madi angko Ama ka nasogo angko igfaorongan yadi kawa hangko. Nyawa ginahin ham idwa nadog angko Ama hasnog, ham idwa yadi nalag it walong. 38It manga fwayong hayo idwag dogayan sa hayo manga basad fangayofan maskin ham idwag faanod kitay aho kat nasogo. 39Ham manga Hodyo, ham igbasa fagaba ka manga Kasoratan kawa ham kasyag kitay ginyas Kasoratan ham no lomag haboyagan hanggan aban aban. Dapat ay, aho wa ngap kat fagfwayongon sinyas Kasoratan. 40Nyawa kitonya ham kafang gakbang angko kaarakitay ha haboyagan orongan. 41Hodwa kasyag kitay manga taw mamasayag dog angko. 42Dapat ho twa kitay ham idwa galwasi in Diyos. 43Ham igtanggap tiba taw fagaba ta no kabangkad sat sadili kangayanan, dapat ham idwag tanggap angko, nyawa angko kangayanan gi wangko Ama. 44Manga taw nogfasayag dog hayo, ham kasolong odig dog. Dapat ay, no hadin Diyos baliwa, kaarakitay is Diyos, ka sadi dik Diyos, ka mamasayagdog hayo, ham idwa katanog. No kitonya yapdi ham, kinday nangos ham gayfan ham no somyagan katiwala angko? 45Nyawa kitonya, ham fag idwa gayfan kitay aho ka somombong hayo hangko Ama. Is Mwisis, ka hayo fagsyagon kitay, hanya ka bomaliwa hayo, hanya mandi kagsombong kawa ha hayo. 46Ham nangos no katiwala orongan in Mwisis, ham katiwala yadingko maskin aho kat fagsoraton fagaba. 47Dapat ham nodwa katiwalat manga nasorat, kinda kin araw ham nomtiwala angko manga hampang, ham gayfan?

will be added

X\