1 Is Hisos no sayapdis sakop Hodiya, ka manga Farisyo nadog kitay kan Hisos fagfatognaon manga taw hanggan kanbali in Hisos manga katogbong aywan man kan Hwan. 2 Ka orongan, bohonwas Hisos kagfatogna manga taw, ka dit manga katogbong kagfatogna is taw. 3 Yakangas Hisos no nadog kitay manga taw igfadahit kitay kitonya, da Hisos nalahaw ginya, nwali has sakop Galiliya. 4 Noglahaw hanya, ka fiya da Hisos fag domalan sas sakop Samariya. 5 Ginya madi da Hisos indasog has sakop Samariya, has bahalan banwa Sikar. In Hakob nagtogonan iyab hyabi hyabi han Hosi, it anak, akbang yadi sinya. 6 Hanggan kan Hakob gobon hyabi hyabi sinya yapdi. Is Hisos inyaya wan kawa ayayot naglahawan, yakanga dagos wantokaw sas bilog salongawan gobon. Gis nanya manga boknga sirang ka myanit. 7 In Hisos manga katogbong nadagos ha basad banwa kaarakitay manali fanganon. Ista ginanan, sadik ina taga Samariya inbangkad has gobon kaarakitay managob danom. Is Hisos iglwang has ina, Ho kainom nangos. 9 Ka inag lwang han Hisos, Haw Hodyo wan, aho ina di, taga Samariya. Kana mayon haw nogsagad inomon gingko? Ka ina indolaw wan maskin ka manga Hodyo idwa gamigosan has manga taga Samariya. 10 Is Hisos igsagot has ina, Haw nangos, no natwa wagdog in Diyos disagon, hanggan no kilala no fakta kagsagad inomon danom, fag haw man nangos ka somagad gi hanya, kawa danom kagfaboyag manga taw it fagdisagon hyamo. 11 Ka inag lwang, Ama, hadwa ha fanarok a, abasad yadi ka gobon. Kinda haw no bomolay ka danom kagfaboyag manga taw? 12 Gwadi to fag gobon hyami yapdi hafofowan Hakob faobonan hyami hyabi hyabi. Is Hakob hanggan it manga anak, hanggan it manga hayopan fagayo, giwastay fag danom no ginom hyabi. Haw aw gayfan haw madonong man in Hakob? 13 Is Hisos igsagot, Fagayo ka ominom gistay fag danom, im-inom ya. 14 Dapat nyawa faktaw ka ginom kangko disag fag danom idwam inom domwag, nyawa ginahin. Maskin ka danom kangko fainomon ha hanya imbali bilang sadik bolbogan sat basad fangayofan, kagbolos danom fagaba kagfaboyag hanya hanggan aban aban. 15 Ka inag lwang, Ama, hogyay tonya fag danom kaarakitay hodwam inom domwag, idwa yadi hastay aban manarok. 16 Is Hisos iglwang has ina, Fagoli wan, tawagan im indogan a, tabanan hastay. 17 Ka inag sagot, Hodwa ha indogan. Is Hisos iglwang, Hadwag bohag ha noglwang hadwa ha indogan. 18 Maskin im manga indogan gis hyabi lima wan, hanggan kam ofod ama kati bohonwam indogan. Hadwag fyalom haw noglwang kitonya. 19 Ka inag lwang, Ama, kati ho natwa wagdog yabay, haw in Diyos wa fangampang. 20 Istay fag moyod hyami ha fofowan nogsimba han Diyos, dapat ham manga Hodyo iglwang, fag sas Hirosalim manga taw nogsimba han Diyos. 21 Is Hisos iglwang, Ina, haw fakatiwala angko fwayong. Aban idwastay baba moyod, idwa yadi sas Hirosalim manga taw no mamasayagdog hantam Ama. 22 Ham manga taga Samariya idwa kilala orongan ka hayo fagsimbaon. Dapat hami manga Hodyo, mi kilala fiya fiya ka hyami fagsimbaon, maskin gis Hodyo is Diyos no bomawi manga taw. 23 Dapat aban, hanggan nyawa kati madi ngap, in Diyos Falad kagfasyagan manga taw igfasayagdog hantam Ama kawa kilala hanya orongan, yakanga maangay nogfasayagdog hanya. Kitonya fag manga taw kantam Ama fagsayahon kaarakitay fasayagdog hanya. 24 Is Diyos Falad wan. Ka mangagsimba han Diyos, fag it Falad kagfasyagan igfasayagdog orongan. 25 Ka inag lwang, Ho twa kitay in Diyos-natogon-Famawi imbangkad aban, kasta faglwangon is Kiristo. Hanya, hono, nombangkad fomwayong hantam fagayo fag manga bagay. 26 Is Hisos iglwang, Aho ka kampang ha hyamo kati, aho wa ngap tonya fag taw. 27 Nalwang di ngay kitonya has ina, ginyan Hisos manga katogbong indasog wan, bago nwali gis banwa. Tandolaw wa dahol maskin ina in Hisos kahampang. Dapat tadwa ha namawat, tadwa naintaw has ina, Kanam fakasayaon? Tadwa yadi naintaw han Hisos, Kana mayon haw no kampang has ina? 28 Ginya madi ka ina naobon sinya it balanga fanagoban, nwali ya has banwa, nafwayong has taw, 29 Kalibang, tam hanya wan, famantay ha sadik ama kagfwayong angko fagayo angko naibolon. Ngatay tonya wa aba kan Diyos-natogon-Famawi? 30 Ta nalahaw wa yabay, nagobok in Hisos. 31 Gis nanya yadi in Hisos manga katogbong igfaaronganon hanya, iglwang, Rabi, haw fakwan hanon nangos. 32 Dapat is Hisos nasagot has taw, Ham idwa twa no kana kangko fanganon. 33 Yakangat manga katogbong nangarintawan, Mayon aw ha taw igdisag hanon ha hanya? 34 Is Hisos nalwang, Angko fanganon kawa aho no katanog kagsogongko it fakasayaon, hanggan igfatabo it faibolonon angko. 35 Idwa awkin ham iglwang, Ofat yak magdanon bago fanganiyon? Ahog fwayong hayo, fag bantay manga namay, fanlag ngay, dararag wat manga haway kati, kaani wan. 36 Ka gani ha tangdan hanggan igtifon it bohad has haboyagan idwa ha katabowanan, kaarakitay kagtanom hanggan ka gani pariho kasolong. 37 Bohonwa bohag ta noglwang, Bokod wa kagtanom, bokod wa ka gani. 38 Hogsogo hayo kitay ham fagani ka bohonwa hayo nakayayan. Ka tiba gibolon a, ginya ham korayan git nakayayan. 39 Aywan fag manga taga Samariya ginya fag banwa igsyag in Hisos no nadog ka ina faorongan kitay, Hanya nafwayong angko angko naibolon fagayo. 40 Yakanga ka manga taga Samariya no nagobok in Hisos, tagfaaronganon hanya nangos fag domogay yapdi sasta banwanan. Da Hisos nadogay yapdi sinya dowak yabi. 41 Yabay aywan man katfagonan kagsyag in Hisos no nadog in Hisos sadili fwayong. 42 Taglwang has ina, Kati migsyag in Hisos maskin hami wa ka nadog it sadili fwayong, bohondi kitay hyamo odi fwayong hyami. Kati mi natwa wagdog fiya fiya kitay, hanya wa ka orongan fag Famawi manga taw sadik baba daga. 43 Nonsagaya wa dowak yabi, is Hisos nwali ya has sakop Galiliya, 44 kawas Hisos mandi kaglwang, Nyawa siday fag manga taw tomalinga ka fangampang, dapat ka git sadili banwanan idwa tomalinga hanya. 45 Itfagonan manga taga Galiliya ginya yadis Hirosalim sas Fanohodan Nagsagayan a, nalag in Hisos naibolon fagayo sinya. Yakangas Hisos nondasog sas Galiliya, tagbaya wa dahol iglag hanya. 46 Ginya madis Hisos inbangkad ya has banwa Kana, sas sakop Galiliya. Sinya kan Hisos nagfabaliyan alak gis danom itfagonan. Kati fag masohod sadik anak ama sas Kapirnaom ha sagit. It ama ha kangayanan sas gobirno. 47 Kat ama no nadog kitay is Hisos indasog sas sakop Galiliya gis sakop Hodiya, ka ama hawan Hisos, igfaaronganon kitay fag hanyas lwad has banwa Kapirnaom, fafiyan nangos it anak, maskin kafos wat ipsaw. 48 Is Hisos iglwang hanya, Aho nodwa gibolon manga falagon madolaw, ham idwag syag angko. 49 Ka ha kangayanan iglwang, Ama, kalibang, tam hanya wan, tam nangos fag tomahod yapdingko anak. 50 Is Hisos iglwang, Fagoli wan. Im anak infiya yat sagit. Ka ama insaya wagdog in Hisos hampang, nwali wa ngay. 51 Noglahaw yapdi has lwad, goli wan, it manga sogowan igtagbo hanya, iglwang, Im anak infiya wat sagit. 52 Ka ama naintaw has taw no ginahin fag masohod it anak nonfiya. Taglwang, Fafon, myanit kabalihid wan nonfiya it hagnaw. 53 Ka ama natohod yabay gis nanya fag masohod fiya fiya is Hisos noglwang, Im anak kafiya wan. Yakanga ka ama hanggan it ofod sas balay fagayo igsyag in Hisos. 54 To ka fadowa fag falagon madolaw kan Hisos nafalag has taw nondasog has sakop Galiliya gis sakop Hodiya.
