HWAN 3

1Yabay, ha sadik ama fagtahinan Hodyo, gis layonan manga taw tagngayan manga Farisiyo, kawas Nikodimo. 2Gis nanya basad yabi, is Nikodimo nasabang han Hisos, iglwang, Rabi, mi twa waglag kitay haw sadi kagfaadal, kan Diyos nasogo, maskin nyawa faktaw idwa syagan gibolon kito fag manga falagon madolaw is Diyos nodwa sa hanya. 3Is Hisos iglwang, Orongan wan, bohonwa bohag, hogfwayong hyamo, nyawa faktaw nodwam sagaya ya domwag anak dararag bago, idwam aktom san Diyos sakop. 4Is Nikodimo gintaw kitay, Kinday araw sadik taw nomsagaya ya bago, no magorang wan? Idwa twa mwali ya hat ina basad tyan, ginyam sagaya ya. 5Is Hisos igsagot kitay, Orongan wan, bohonwa bohag hogfwayong hyamo, nyawa faktaw nodwam bali anak dararag gis danom hanggan gis Maliyaw fag Falad idwam aktom san Diyos sakop. 6Ka anak gis taw, taw mandi. Ka anak gis Falad, falad mandi. 7Haw fag idwa katakag dog aho noglwang ha hyamo, ham fagayo fag imsagaya ya bago. 8Ka bagyo igfalayfayan no hadat fakasayaon, tam igdog igfawas, dapat tam idwa twa no ginday ka bagyo hanggan no haday kamdiya. Kitonya yadi ka fagayo ka Maliyaw fag Falad nafaanak. 9Is Nikodimo gintaw, Kinda araw tonya nangos? 10Is Hisos igsagot han Nikodimo, Gwadi haw sadik famaadal sas Israil, dapat haw aw idwa twag dog to fag bagay? 11Orongan wan bonwa bohag kangko fwayong hyamo, migfwayong ka hyami natwa, migfaorongan yadi ka hyami mata lagan, dapat ham idwag faanod hyami barita. 12Ham nodwag faanod kangko fwayong hayo manga fakaoronganan sas baba daga, kinda araw ham nogfaanod angko fwayong hayo ka san Diyos banwanan sam tongod fag maga fakaoronganan? 13Idwa ha taw nasakbaw han Diyos banwanan ham tongod no bohonwa aho, Kanbali Taw, ka nadokson mandi gim tongod. 14No kinday hyabi is Mwisis nafaabwat sas tongod hayo ka abyanon tanso, ta no sas basad fakahyabogan, kitonya yadi, aho, Kanbali Taw, nomabwat aban, 15kaarakitay nyawa faktaw nogsyag hangko ha haboyagan hanggan aban aban. 16Maskin is Diyos galwasi wa dahol dahol ka manga taw sadik baba daga, yakanga hanya nadisag it anak sadi sadi, kaarakitay nyawa faktaw nogsyag hanya, idwa has kadwatan, dapat ay, imboyag hanggan aban aban. 17Kawas Diyos idwa nasogo angko, it Anak, has baba daga kaarakitay igfatohoyan manga taw has fadosaan, dapat kaarakitay gingko agwantaon, bomawi ka manga taw. 18Is Diyos idwag fatohoyan has fadosaan kagsyag hangko, in Diyos Anak, dapat ay, kadwag syag hangko, danwa nafatohoyan has fadosaan, maskin ngay tadwag syag hangko ngayan, kan Diyos Anak sadi sadi. 19Kiti is Diyos nogfatohoyan has fadosaan ka manga taw. Ka yawa inbangkad hastay is baba daga, dapat ay, manga taw kasaya man ka marom has mayawa, maskin dwat ista manga ogali. 20Nyawa fakta ka gogali dwat, kadwat iglag ka yawa, idwa yadi gakbang has mayawa maskin kadala kitay it manga ogali dwat imlag. 21Dapat ay, nyawa faktaw no fiya it ogali, idwa kwangit igfalag it manga ogali sas basad fakayawan, kaarakitay manga taw lomag fiya fiya kitay it ogali kitonya, maskin hanyan sadi san Diyos. 22Ginya madi aban, is Hisos hanggan it manga katogbong nadasog has sakop Hodiya a, ta nadogay ogbot sinya, hanggan is Hisos igfatogna manga taw. 23Gis nanya fag masohod, is Hwan igfatogna yadi manga taw sas Inon, akbang has Salim, kawa dahol yadi ka danom sinya. Manga taw gobok in Hwan hanggan is Hwan igfatogna manga taw sinya, 24kawa tadyag poriso in Hwan gis nanya. 25In Hwan manga katogbong hanggan sadik Hodyo igdaraogan kawa has ogali Hodyo bilang fagliyon ta nodwag linay hosto. 26Ginya madi in Hwan manga katogbong hawan Hwan, iglwang, Haw kagfaadal, haw igtohod aw kam nahablang itfagonan sas salogan myanit baliwa Hordan, kam nafasayag dog has taw? Yabay hanyag fatogna yadi manga taw, fagayo gobok hanya kati. 27Is Hwan igsagot, Nyawa faktaw idwa ha tanggapon kitonya no bohonwas Diyos kagdisag hanya. 28Ham mandi ka nadog angko bibig hampang aho nogfaorongan kitay bohonwa aho kan Diyos-natogon-Famawi. Is Diyos nasogo lamang angko kaarakitay gomona hanya. 29Sas fangsawan, ka ama mamabay kasolong wa dahol maskin hanya wan ka ina mangindogan. Dapat ay, ka ama kahilala sinya yadi sas fangsawan, igtalinga has ama mamabay, kasolong yadi wa dahol nogdog it hasnog. Kitonya yadi aho no kasolong wa dahol kati. 30It kangayanan fag kadahol wa kadahol wa nangos, dapat ay, kangko fag kaogbot wan. 31Ka gis tongod dahol man has fagayo it kangayanan. Ka taga daga gi odis baba daga a, ka odi manga bagay gis baba daga it manga fagfwayongon. Dapat ay, ka gin Diyos banwanan sam tongod, dahol man has fagayo it kangayanan. 32Nyawa hanyag faorongan it mata lagan, hanggan it talinga donggon, idwa hagfaanod it fwayong. 33Dapat ay, kagfaanod it fwayong igfaanod yadi kitay orongan wan in Diyos fwayong. 34Kan Diyos nasogo igfwayong yadi in Diyos manga hampang, maskin idwa ha korang is Diyos nogdisag it Maliyaw fag Falad ha hanya. 35Is Diyos, kat Ama, galwasi it Anak, nafaano yadi fagayo fag manga bagay hat Anak. 36Kagsyag han Diyos Anak ha haboyagan hanggan aban aban, dapat nyawa faktaw kadwa katanog it Anak, idwa lomag kitonya fag haboyagan, dapat hanya in Diyos odi fakaisogon fagaba.

will be added

X\