1 Yabay, nondasog sas sirang Simba, dayo marom marom yapdi, is Mariya Magdalina, inbangkad has lohib fanlobgobanan. Nalag kitay ka toplan bato gis sakbawan lohib inbol wan. 2 Yakangas Mariya nadalandan wan, hawan Simon Pidro hanggan sadik katogbong kan Hisos fagalwasiyon, nafwayong has taw, Ta nabol kagfon intam it habilogan gis basad lohib bato. Tam idwa twa no hadawan ta no nafwalid. 3 Yakangas Pidro, hanggan tonya fag katogbong sadi, inlahaw wan, hawas lohib fanlobgoban. 4 Tagbandalandanan wan, dapat ay, ka sadik katogbong nagona man in Pidro nadasog has lobgoban. 5 Tonya fag katogbong nogbantay has basad lohib, nalag ka manga fanamong rotay, dapat idwa nasakbaw has basad. 6 Is Simon Pidro man kandasog goyan, nasakbaw has basad lohib bato, nalag ka manga fanamong rotay. 7 Nalag yadi ka famogong rotay ka san Hisos alfoyo itfagonan, idwa mafaaktoman ka gis habilogan, bokod man di, mafogongan yapdi. 8 Ginya madi ka sadik katogbong, ka nagonan dasog has lobgoban, insakbaw yadi a, hanya nalag wan, haggan intiwala wan kitay is Hisos inboyag ya. 9 Dapat ay, ka manga katogbong idya twagdog kansorat sas Kasoratan kitay, hanya fag imboyag ya gis kahatayan. 10 Ginya madi ka dowak katogbong nwali wan hat manga fagoliyanan manga balay. 11 Dapat ay is Mariya idwan lahaw a, malindogan odi sas sokayan, akbang has lohib bato, goraw wan. No goraw yapdi, is Mariya igtarohongan kaarakitay bomantay has basad lohib. 12 Iglag dowak anghil, ha solong rotay abohay, matokawan sasta nagfwalidan in Hisos habilogan, insadi sas akbang alfoyo nangos, insadi sas akbang bitis. 13 Ka manga anghil gintaw in Mariya, Ina, kanam fagorawon? Is Mariya igsagot, Maskin ta naanggong kagfon angko it habilogan. Ahodwa twa ta no hadak nafwalid. 14 Is Mariya nogfwayong kitonya, inbalihid a, iglag wan Hisos malindogan sinya, dapat ay, idwa kilala kitay tonyas Hisos. 15 Is Hisos gintaw hanya, Ina, kanam fagorawon? Faktam fagsayahon? Is Mariya gayfan ngandi ka giyab sinya, yakanga nasagot kiti, Ama, no haw wa ka naanggong it habilogan, fwayongan angko, haw no hadak nafwalid. Aho bomol ya. 16 Is Hisos nangayan hanya, Mariya. Is Mariya insayango wa han Hisos, iglwang, sas fangampangan Hibriyo, Raboni. It kahologan santam sanglitan, Kagfaadal. 17 Is Hisos nafwayong han Mariya, Ha hagtawid yap angko maskin ahodyan sakbaw hangko ama sam tongod. Ha fag hawangko manga fadwasay, hangko manga katogbong, fwayongan has taw kitay ho goli wan hangko Ama has tongod, ha hayo yadi Ama, hawangko Diyos hanggan ha hayo yadi Diyos. 18 Ginya madis Mariya Magdalina hanya wan, nafwayong han Hisos manga katogbong kitay, Ho nalag kagfon intam, natoltol yadi has taw in Hisos fwayong. 19 No kayabi wan araw gis nanya mandi fag sirang, ka sirang gona sa sadik simba, in Hisos manga katogbong matifonan sa sadik balay, dapat matahopan di kawa ta kadala ka manga fagtahinan Hodyo. Ginyas Hisos indasog sasta fagbokngan, nafwayong has taw, Hayo manga fangayofan fag malokmay wan. 20 No nalwang di nga kitonya, is Hisos nafalag has taw it manga gamat, hanggan tagyangan. Ginya madi in Hisos manga katogbong kasolong wa dahol iglag kagfon intam. 21 Is Hisos naolit ya has taw, iglwang, Hayo manga fangayofan fag malokmay wan. No kinday angko Ama igsogo angko, kitonya yadi aho nogsogo hayo istay sas baba daga. 22 No nafwayong wa kitonya, is Hisos naoyop has taw, nafwayong, Ham fag tanggap ka Maliyaw fag Falad sa hayo manga basad fangayofan. 23 Ham nogfaliyam ista manga ogali dwat, is Diyos igfaliyam yadi tonya, dapat ham nodwag faliyam ista manga ogali dwat, is Diyos idwa yadig faliyam tonya. 24 Dapat ay, is Tomas, kasta fagngayanon, Singan, insadi gis Safolo ha Dowa, idwa sinya is Hisos nondasog. 25 Ginya ka tiba in Hisos manga katogbong igfwayong han Tomas kiti, Mi nalag kagfon intam. Dapat ay, is Tomas igfwayong has taw, Aho nodwa lomag ista nagbaranan pako sat gamat, angko timoyo nodyag dog yadi tonya, angko gamat nodyag dog it daga tagyangan, hodwa katiwala kitay hanyan boyag ya. 26 Nonsagaya sadik simba, in Hisos manga katogbong matifonan ya nga basad balay. Gis nanya yabay, is Tomas sinya yadi wan. Nyawa ta nafaganit ka tahop sakbawan, is Hisos igtolas di has basad balay, sawasta fagbokngan, iglwang, Hayo manga fangayofan fag malokmay wan, ham fag idwa kadala. 27 Ginya madi nafwayong han Tomas, Ha fandog istay im timoyo a, ha famantay angko manga gamat. Fag falogday im gamat, fandog angko daga tagyangan. Ha fag bohonwa kitay idwa katiwala, yatokitay, ha ngap fag katiwala wan. 28 Ginya madis Tomas iglwang, Haw wa kagfon angko, angko wa Diyos. 29 Is Hisos nasagot han Tomas, Maskin ha nalag wangko, ha awkin katiwala wa kati? Ka manga taw ka katiwala hangko, nyawadya nalag angko, ka bomaya wan. 30 In Hisos manga naibolon falagon madolaw sat manga katogbong faglagan, aywan di kadwan sorat istay fag kasoratan. 31 Dapat ay, kansorat istay insorat kaarakitay ham imtiwala kawas Hisos kan Diyos-natogon-Famawi, in Diyos yadi wa Anak, hanggan maskin ham igsyag hanya, ham ha haboyagan wan.
