HWAN 2

1Nonsagaya dowak yabi, ha fangsawan sas banwa Kana, sakop Galiliya. In Hisos ina sinya yadi. 2Ta nafatawag in Hisos hanggan it manga katogbong hasta fangsawan. 3No namin wan ista inomon alak, in Hisos inag lwang han Hisos, Ista alak namin wan. 4Is Hisos iglwang, Ina, nyawa hadwa fomwayong angko, angko ibolonon bon yapdi tonya. 5Ginya in Hisos ina igfwayong hasta manga sogowan, Ham fakatanog ha hanya, nyawa kanat sogoon hayo. 6Ka manga Hodyo ha ogali bilang wa fagliyon ta nodwag fatonglos. No faginan mangwan hanon, ta gonaw yap fiya fiya it manga bitis hanggan gamat. Yakanga ha onom ik tapayan sinya ista sohadan danom. Tonya fag manga tapayan no napno, manga dowak safolo, ngatay tolok safolok gawadan danom. 7Is Hisos iglwang hasta manga sogowan, Fahapnowan danom ka manga tapayan. Ginya ta nafahapno ngay balis bayang. 8Ginya madis Hisos nafwayong has taw, Kati sarokan ginya, dyan hasagbahala sas fangsawan. Ginya ta nadiya ngay. 9Tonya fag danom inbali alak a, hanggan kagbahala nandog nanginom ogbot. Hanyadwa natwa no ginday ka alak, dapat ay, kasta manga sogowan ka nasarok ka danom fadi wad natwa no ginday tonya. Ginya kagbahala nafatawag ka ama mamabay, 10nalwang ha hanya, Nogbanwan sas fangsawan, ta nogbangkad bago bago, kawa manga fiya fag alak, ginya madi, manga taw no nanginom wa fagayo, yabay bago di nabangkad kadwa bangan fiya, dapat kam nabangkad goyan goyan, fiya man ka gona. 11To in Hisos naibolon bago bago fag falagon madolaw sas banwa Kana, sakop Galiliya. Is Hisos nafalag has taw it kafiyan sinya, yakangat manga katogbong igsyag yadi ha hanya. 12Ginya madis Hisos hanggan it ina, it manga fadwasay hanggan it manga katogbong, hawas lwad has banwa Kapirnaom. Ta nadogay sinya manga fiyahin ik yabi. 13Aban, no kaakbang wa ka Fanohodan Nagsagayan, ka manga Hodyo nogtohod ka anghil no nasagaya ista manga balay hyabi hyabi, is Hisos hawas bohid, has banwa Hirosalim. 14Is Hisos nondasog has basad aladan Fanimbaan-Dahol, nalag ka mangag fasali manga baka, manga topa, manga salompati, hanggan kagfabalyo ista kwarta, matokawan sat bilog manga fwalidan kwarta sas basad aladan fanimbaan. 15Ginya madis Hisos nalanit ista manga tarabing, nafabali famakbak, nafalimo manga baka hanggan topa, nafaalin yadi was taw gis basad aladan fanimbaan. Nafasarabodan kasta kwarta ka mangag fabalyo kwarta a, nafahakfo ista manga fwalidan. 16Is Hisos nasogo ka manga taw kagfasali salompati, nalwang, Faalinan ka manga manok gis basad aladan. Ham fag idwag fabali angko Ama balay sadik balay fanalian. 17Ginyan Hisos manga katogbong natohod kitay insorat kiti, Angko Diyos, kawa ho kawili wa dahol im balay, kito was afoy ik mayanbong sangko basad fangayofan. 18Yakanga ka manga fagtahinan Hodyo kaglaban in Hisos, gintaw hanya, Kana fag madolaw kam fagfalagon hyami kaarakitay igfatohoyan kitay haw ha kangayanan gibolon kito? 19Is Hisos igsagot has taw, Nyawa ham fahakfo to fag Fanimbaan-Dahol, tolo lamang ik sirang ho fatobo ya. 20Ka manga Hodyo iglwang, Ha aw gayfan kitay haw somyagan fatobo ya to fag fanimbaan tolo lamang ik sirang? Gwadi hyabi, ofat ik safolo ha onom ik fangaraw bago dintabo kalig to fag fanimbaan. 21Dapat in Hisos faglwangon Fanimbaan-Dahol, kawat sadili habilogan. 22Ginya madi aban, is Hisos nonboyag ya domwag gis kahatayan, it manga katogbong natohod kawa hanya nalwang kitonya, yakanga ta katiwala kitay orongan in Diyos Kasoratan, hanggan in Hisos manga fwayong. 23Is Hisos no sayapdis basad banwa Hirosalim sas Fanohodan Nagsagayan, aywan igsyag ha hanya noglag it naibolon manga falagon madolaw. 24Dapat ay, is Hisos idwa yadi kasyag has taw, 25maskin hanya kilala fiya fiya fagayo fag manga taw. Nyawa idwa ha taw igtoltol hanya, is Hisos fadi wad twa sasta basad fangayofan.

will be added

X\