HWAN 19

1Ginya madis Pilato nafadokson in Hisos, nafabakbak is manga sondalo. 2Ka manga sondalo nahoskos di lamnon dogi a, nafasangbaw tonya in Hisos boknga alfoyo, ginya ta nafasolong yadi hanya rotay aba, boragaw. 3Tagmaswag odi hanya, igbarangkadan hat atobangan, iglwang, Anod, kafiyaon mangharaw ka gorangon manga Hodyo. Ginya tagtofa ya ngadin Hisos marigon. 4Sadi ya ginan is Pilato nadokson has sokayan a, igfwayong has taw, Fandog ngay, hogfadokson ya hanya ha hayo, kaarakitay ham tomwa wagdog kitay ahodwa ha donggon it kasalanan. 5Yakangas Hisos nadokson ya ngay, ha solong sangbaw dogi, hanggan balokas boragaw. Is Pilato igfwayong has taw, Fanlag ngay, to wa ka ama. 6Ka manga fagtahinan fagalan, hanggan ka manga polis gis Fanimbaan-Dahol, natawag marigon ta no nalag in Hisos, taglwang, Fapakowan hanya, fapakowan hanya sas nafatimbangan hayo. Is Pilato igfwayong, Sogi, tabanan wa hanya. Fag ham ka pomako hanya, sas nafatimbangan hayo. Maskin ahodwag dog it kasalanan. 7Aywan fag manga Hodyo ka nasagot, Hami ha togon kagfatohoyan kitay, hanya fag matay wan maskin igfabali hanya in Diyos wa Anak hono. 8Is Pilato labi wak kadalag fatohoyan in Hisos has kahatayan no nadog ista fwayong. 9Is Pilato nasakbaw ya ngawan has basad balay dahol, naintaw in Hisos, Ha taga ginday? Dapat is Hisos idwa nasagot hanya. 10Yakangas Pilato iglwang han Hisos, Ha awkin dayo kampang angko? Haw aw idwag tohod kitay aho ka bahala ngatay igfalfas hyamo, ngatay igfapako hyamo sas nafatimbangan hayo? 11Is Hisos nasagot hanya, Hadwa ha bahala angko no bohonwas Diyos kagfaangay kitonya. Yakanga ka manga nataban angko ha hyamo, it kasalanan dwat man hyamo. 12Is Pilato no nadog in Hisos fwayong, naligaw it halimbawan kaarakitay fomalfas nangos in Hisos. Dapat ka fakaaywanan fag manga Hodyo nanarawagan ya, Haw nogfalfas to fag taw haw bohonwan Sisar amigos. Kagfadaholon it sadili, sadik gorangon, iglaban in Sisar. 13Is Pilato no nadog ista fwayong nataban in Hisos has sokayan a, intokaw sas fanokawan fangabaya, sasta fagngayanon Salogan Bato. No sas fangampangan Hibriyo tagngayan tonya Gabata. 14Yabay kati kaboknga wa sirang sas sirang Fatalagaan has Fanohodan Nagsagayan. Is Pilato igfwayong has manga Hodyo, Fanlag ngay to wa hayo Gorangon. 15Ta nanarawagan di ngap, Mi dayo hanya, mi dayo wan, fapakowan wan sas nafatimbangan hayo. Is Pilato gintaw, Aho aw fapako hayo gorangon sas nafatimbangan hayo? Ka manga fagtahinan fag fagalan nasagot, Midwa ha gorangon no bohonwas Sisar. 16Ginya madi yabay, is Pilato nafabahala in Hisos has manga fagtahinan fagalan kaarakitay ta fapako wa hanya sas nafatimbangan hayo. Yakanga ta nataban in Hisos. 17Is Hisos noglahaw ha fasan nafatimbangan hayo kasta fag fapakowan araw hanya, hawas sadik foyo ta nogngayan, Botol Alfoyo, dapat no sas fangampangan Hibriyo, it ngayan Golgota. 18Sinya ta nafapako in Hisos sas nafatimbangan hayo hanggan dowa yak taw san Hisos dayo, myasa sadik taw mapakowan sas dowa yak hayo, baliw baliw sadi, is Hisos sasta fagbokngan. 19Is Pilato ka nafasorat is taw kasta sombong hanggan nafatokba san Hisos tongod alfoyo sas nafatimbangan hayo. Kansorat kiti, Is Hisos, taga Nasarit, ka gorangon manga Hodyo. 20Kaaywanon fag manga Hodyo kagbasa tonya fag sorat maskin akbang has banwa kasta nagfapakowan in Hisos sas nafatimbangan hayo. Ka sorat insorat sas sanglitan manga Hibriyo, manga taga Roma, hanggan manga Girigo. 21Ka manga fagtahinan fagalan-han-Diyos iglwang han Pilato, Fag idwag sorat, Gorangon manga Hodyo, dapat ka fiya, haw fag sorat kitay hanyag lwang, hono, hanya ka gorangon manga Hodyo. 22Is Pilato igsagot, Kangko nasorat aho nasorat wan. 23Ginya ka manga sondalo nontabo wagpako in Hisos, nabol in Hisos manga rotay kasta naloslos haraw. Ta nahoray ofat ik layonan, nafahafod has manga sondalo, dapat ka rotay aba, gis tongod hanggan wa has daga, inhalig sadik dahonya, idwa ha bolig. 24Yakanga tagtoltolan kiti, Tam fag idwag gisi toy. Anogon. Tam mamostahan yap no fakta ara ka domaog, toy ara hanya wan. Inbali kitonya kaarakitay kansorat sas Kasoratan hyabi im-anod wan, kitay, Ta nafahafod angko manga rotay has taw, Ta nafapostahan yap angko solong. Kitonya ngay ka manga sondalo naibolon. 25Dapat in Hisos ina, hanggan in Hisos ina fadwasay ina, malindogan san Hisos dayo, sas akbang nafatimbangan hayo. Sinya yadis Mariya, in Kilyopas babay, hanggan is Mariya Magdalina. 26In Hisos fagalwasiyon fag katogbong gofod yadis taw sinya. Is Hisos noglag it ina hanggan tonya fag katogbong, natogon it ina hanya, iglwang, Yabay, ina, to kam anak kati. 27Ginya natogon yadi hat katogbong, iglwang, Yabay, to wam ina kati. Ginya wa ginan yabay, tonya fag katogbong nafaoliyan in Hisos ina sat sadili balay. 28Ginya madi, is Hisos no natwa kitay gis nanya intonglos wan it manga bato ibolonon fagayo, kaarakitay im-anod kansorat sas Kasoratan, iglwang, Aho kainom. 29Ha sadik mangkok sinya it sohad langgaw. Ta natogna famasopsop sas langgaw ginya naosok sas tobwan bagahay, nafasopsop in Hisos bibig. 30Is Hisos no nasopsop ka langgaw, iglwang, In-anod wa kati. Ginya hanyan tarohong wan it alfoyo, nafalfas wat ipsaw. 31Kawa gis nanya fag sirang, famatalagaan was Fanohodan Nagsagayan, ka manga Hodyo idwa kasayag fagoyan ka manga habilogan sas tongod nafatimbangan hayo, labi man kawa to fag Sirang Kafahowayan araw, bohondi kito ka tiba no mahalga. Yakanga ka manga fagtahinan Hodyo nasagad gin Pilato kitay, is Pilato faangayan nangos, fodan ista bitis kanpako sas nafatimbangan hayo. Ginya ta no natay wan, bomol ista manga habilogan ginya. 32Yakanga ka manga sondalo nabakbak marigon, nafod it manga bitis ka gona hanggan ka sadi ya, ista napako sas nafatimbangan hayo san Hisos akbang. 33Dapat ay, ta no gakbang in Hisos, taglag hanya danwa natay, yabay tadwa nafod it manga bitis. 34Dapat ka sadik sondalo naoros in Hisos daga tagyangan. Dagos wan-olan it folot hanggan danom. 35Ka nalag tonya kagfwayong it mata lagan kaarakitay ham katiwala wan. Kat fwayong orongan wan, hanggan hanya twa kitay hanya idwag bohag. 36In-anod kitonya kaarakitay imtonglos kansorat sas Kasoratan kitay, Idwa hamfod it botol, nyawa di sadi. 37Insorat yadi kitay, Ta bomantay hanya kat naoros. 38Ginya madi, araw ogbot, is Hosi, gis banwa Arimatiya, nanagad gin Pilato kitay, fiya di aw no bomol in Hisos habilogan. Is Pilato nafaangay wan. No kitay di is Hosi in Hisos katogbong yadi, dapat mafyaloman di, kawa kadala ka manga fagtahinan Hodyo. Yakangas Hosi nabol in Hisos habilogan. 39Hanggan is Nikodimo, ka nasabang in Hisos hyabi basad yabi, naofod in Hosi. Is Nikodimo ha diya banglo fag tagok mira, ha aktom banglo fag rogrog hayo, aloi. Ka famabanglo fagayo kayosagboknga haban fayay it kaaywanan. 40Ka dowak ama nadiya in Hisos habilogan a, nasafot sas rotay madamol, ha famabanglo yadi, no kinday ka ogali Hodyo nogfatalaga has lobgoban. 41Ha sadik iyab akbang sasta nagpakowan in Hisos sas nafatimbangan hayo. Sas basad iyab ha akwa sadik bago fag lohib lobgoban, idyapdi ha naglobgobanan taw sinya. 42Kawa gis nanya, sirang Famatalagaan has Fanohodan Nagsagayan, hanggan tonya fag lohib akbang di, yakanga ta sinya wak nafaigyan in Hisos habilogan.

will be added

X\