HWAN 14

1Hayo manga fangayofan fag idwa kabalaw. Ham fag syag in Diyos, fag syag yadingko. 2Kaaywanon fag manga lingoban sangko Ama balay. Nodwa kitonya hodwa hara nafwayong hayo kitay, ho gomona wa hayo kaarakitay mamatalaga hayo oliyanan. 3Ginya aho no gomona hayo, mamatalaga hayo oliyanan, ho kafwali ya hastay kaarakitay tomaban hayo. Ginya madi aho no siday, ham sinya yadi wa aban. 4Ham twa wan ka dalan hangko hadasogan. 5Dapat is Tomas iglwang han Hisos, Hyami Fon, midwa twa hyamo hadasogan, kinda ara hami no tomwa ka dalan hanya? 6Is Hisos igsagot hanya kiti, Aho ka dalan, aho ka fakaoronganan, hanggan aho ka haboyagan. Idwa ha domasog hangko Ama nodwa domalan langko. 7Ham no nahilala angko, ham kilala yadingko Ama. Gis kati ginan ham kilala wa hanya a, ham nalag wa hanya. 8Is Filipi iglwang han Hisos, Hyami Fon, falagan ha hyami im Ama nangos, mi no lomag hanya, yabay fiya wan. 9Is Hisos igsagot, Gwadi, Filipi, dogay wan tam no koyogan, ha awkin idyapdi kilala angko fiya fiya? Ka nalag angko nalag yadingko Ama. Kana haw nogfasolopan yapdi, kitay, falagan hayo angko Ama? 10Ha awkin idwa katiwala, Filipi, kitay aho kasadi sangko Ama hanggan angko Ama kasadi yadi sangko? Idwa gingko di sadili fangayofan kangko nafwayong ha hayo. Angko Ama kasadi hangko a, hanya kagfatonglos it sadili fakasayaon. 11Ham fag katiwala angko fwayong, kitay aho kasadi sangko Ama, hanggan angko Ama kasadi hangko, ngatay ham fag katiwala maskin ham nalag angko manga naibolon. 12Orongan wan angko fwayong hayo kitay, kagsyag angko omibolon yadi manga ibolon madolaw kito kangko naibolon. No kitay di, hanya omibolon istay bohon di kitongko maskin aho hawangko Ama. 13Nyawa kana hayo fagsagadon, sangko ngayan, homtanog wan kaarakitay gingko ibolon manga taw lomag angko Ama kafiyan. 14Nyawa kana ka hayo fagsagadon gingko, sangko ngayan, ho omibolon wa tonya. 15Ham no galwasi angko, ham imtanog wangko manga togon. 16Ho somagad yadi gingko Ama a, hanya somogo wa ha hayo sadi yak Fanogbong kaarakitay omofod hayo hanggan aban aban. 17Hanya ka Falad fakaoronganan. Ka taga istay sas baba daga fag manga taw idwa syagan igtanggap hanya ista Fanogbong maskin bohonwasta mata lagan, tadwa kilala hanya. Dapat ay, ham kilala hanya fiya fiya maskin hanya omofod hayo hanggan sawa hayo manga basad fangayofan aban. 18Ho no lomahaw, hodwa omobon hayo kitos manga olila. Aho kafwali ya ha hayo aban. 19Ngalay di aban ka taga istay sas baba daga fag manga taw idwa lomag angko domwag, dapat ham lomag angko aban. Maskin aho boyagan, ham imboyag yadi. 20Gis nanya fag sirang aban, nom-anod wan, ham tomwa kitay aho kasadi hangko Ama hanggan ham kasadi sangko, hanggan aho kasadi ha hayo. 21Kagfaanod angko manga togon hanggan katanog tonya, hanya ka galwasi angko. Ka galwasi angko, angko Ama yadi fagalwasiyon. Aho galwasi yadi hanya a, aho mamahilala angko sadili ha hanya. 22Is Hodas, bohonwa kan Iskariyoti anak fag Hodas, gintaw in Hisos kiti, Hyami Fon, kinda nangos haw no mamalag im sadili ha hyami, dapat idwa mamalag has baba daga fag manga taw? 23Is Hisos igsagot han Hodas kiti, Ka galwasi angko, imtanog yadingko hampang. Angko Ama galwasi yadi hanya a, mi sinya wak bomanwanan sasta basad fangayofan. 24Kadwa galwasi angko idwa yadi katanog angko manga hampang. Ka hayo donggon hampang idwa gingko sadili, gi dingko Ama ka nasogo angko. 25Hogfwayong hayo to fag manga bagay aho no gofod yapdi hayo. 26Dapat aban, angko Ama somogo ha hayo ka Fanogbong ka tomobos angko. Hanya ka faadal hayo fagayo fag manga fakaoronganan, fatohod ha hayo fagayo angko nafwayong. 27Kahowayan kangko faobonon ha hayo. Angko sadili kahowayan kangko disagon ha hayo. Idwa kito kastay is baba daga fag kahowayan kangko disag ha hayo. Hayo manga fangayofan fag idwa kabalaw, fag idwa yadi kadala. 28Ham nadog wan aho noglwang kitay, aho kalahaw wan, dapat ay, aho aba kabangkad ya ha hayo. Ham no galwasi nangos angko, ham igbaya wan maskin ho hawangko Ama kawat kangayanan dahol man angko. 29Kati hogfwayong hayo to fag manga bagay bagom anod, kaarakitay nom-anod wan, ham imtiwala angko manga fwayong. 30Kati ngalay odi aho no kampang yapdi ha hayo maskin kastay is baba daga fag gorangon kaakbang wan. Hanya idwa syagan igdaog angko. 31Dapat ay, ho katanog angko Ama manga togon, kaarakitay kastay is baba daga fag manga taw fag tomwa kitay aho galwasi angko Ama. Ginyas Hisos iglwang, Yabay, kati tam fag dokson wan, tam kalahaw wan.

will be added

X\