HWAN 13

1Ginya madi aban, ta no kaakbang mangwan ka Fanohodan Nagsagayan, is Hisos natwa kitay gis nanya fag masohod hanya kaakbang kaalin wan gistay gis baba daga, hawat Ama. Is Hisos danwa galwasi it sakop istay is baba daga, galwasi yapdi hanggan has katabowanan. 2Araw, da Hisos igsayowan kwan, igyafon wan. Is Fandaya danwa nafaisip in Hodas, in Simon Iskariyoti anak, kitay, hanya fag omoyon in Hisos maga kalaban. 3Is Hisos natwa kitay it Ama nadisag ha hanya fagayo fag kangayanan, natwa yadi kitay hanya giwan Diyos kan-ginan, hanggan hawan Diyos aban. 4Yakanga, taw no sas bilog fanganan, is Hisos nalindog a, naloslos ka balis babaw it solong rotay, ginya nafogong twalya sat awak. 5Is Hisos natalin danom has fanggonawan, ginya madi nafabago nagonaw it manga katogbong bitis, ginya nafyad twalya kat fogong sat awak. 6Is Hisos no kaakbang wa gomonaw in Simon Pidro bitis, is Simon nahwangit wan, iglwang, Angko Fon, ha gayfan haw awkin gomonaw angko bitis? 7Is Hisos igsagot in Simon, No kati yapdi ham kadolaw angko ibolon, dapat aban ham tomwa wagdog. 8Is Pidro iglwang marigon, Nyawa kindawan, nyawa ginahin, hodwa mamagonaw angko bitis hyamo. Is Hisos igsagot han Pidro kiti, Haw nodwa fagonaw angko im manga bitis, hadwa kasadi hangko. 9Is Simon Pidro iglwang, Angko Fon, no kitonya, fag bohon di angko manga bitis, fag hanggan wangko manga gamat hanggan alfoyo. 10Is Hisos iglwang, Ka nanyagos, maangay wan it habilogan sadik dahonya. Nyawadwag fyagos domwag sadik dahonya habilogan, bitis lamang ka fagonawon. Ham maangay wan, no kitay di, dapat idwa fagayo. 11Is Hisos danwa twa no faktaw ka omoyon hat kalaban, yakangag lwang, Ham bonwa fagayo maangay. 12Is Hisos nontabo wa gonaw ista manga bitis, nasolong ya kat naloslos balokas haraw, ginya nwali ya has fanganan. Is Hisos naintaw has taw, Ham awkin natwa wagdog no kana kat kahologan kangko naibolon ha hayo kati kati? 13Ham igngayan angko hayo Famaadal hanggan hayo Fon. Maangay ham nogngayan angko kitonya, maskin aho wa ngap tonya. 14No aho kagfon hayo, hanggan hayo Famaadal, nagonaw hayo bitis, ham fag kitonya yadi. Ham aba fag gonaw yadi ista manga bitis. 15Aho nafalag hayo sadik fagtoladon kaarakitay ham tomolad yadi kitongko naibolon ha hayo. 16Orongan wan, bohonwa bohag angko fwayong hayo, nyawa gafo nasali sogowan idwa abwat man it fon it kangayanan, hanggan kasta nasogo idwa abwat man kagsogo hanya it kangayanan. 17Ham no twa wagdog to fag manga bagay, ham bomaya yadi ham no gogali kitonya. 18Bohonwa ham fagayo kangko fagfwayongon. Ho fadi wad kilala kangko manga nafili. Dapat ay, ka Kasoratan fag im-anod wan. Ka Kasoratan iglwang, Insadi kagsayo angko omoyon angko kalaban. 19Hogfwayong hayo kati bagom anod tonya kaarakitay nom-anod aban, ham imtiwala kitay AHO AHO WAN. 20Orongan wan bohonwa bohag angko fwayong hayo, kagtanggap angko sogowan, aho yadit fagtanggapon. Kitonya yadi kagtanggap angko, kagsogo angko it fagtanggapon yadi. 21Is Hisos no nalwang di nga kitonya, inhori wa dahol dahol it fangayofan, iglwang, Hogfwayong hayo, orongan wan, bohonwa bohag, insadi sa hayo omoyon angko manga kalaban. 22In Hisos manga katogbong namarantayan ha sadi ha sadi. Ta gadowan no faktaw kan Hisos fagfwayongon. 23In Hisos katogbong, it fagalwasiyon fiya fiya, masorayan sas fanganan, it alfoyo san Hisos akbang dobdob. 24Yakangas Simon Pidro nafaaman hanya kitay, Fwayongan hyami no faktaw kat faglwangon ka omoyon it kalaban? 25Kawa masorayan kitonya, ka katogbong gintaw kiti, Hyami Fon, fakta fag taw tonya? 26Is Hisos igsagot, Ka taw kangko fagdisagon to fag lifong tinapay aho no natogna wan, ya tonya wan. Ginya madis Hisos no natogna ka lifong tinapay, nadisag han Hodas, in Simon Iskariyoti anak. 27Is Hodas no nabol ka lifong tinapay, is Satanas hawan Hodas basad fangayofan, igfasognod hanya. Ginyas Hisos iglwang han Hodas, Sogi, fatonglosan madali im bato ibolonon. 28Ka tiba taw sas fanganan idwa twagdog no kana mayon is Hisos noglwang kitonya. 29Intiba gayfan, kawas Hodas kagbotang ista sohadan kwarta, ngandayo is Hisos igsogo hanya kaarakitay manali ista fakasayaon sas Fanohodan. Ngatay is Hisos igsogo in Hodas kawa ha fagdisagon has manga myabog, ta gayfan. 30Is Hodas nontabo wa kwan ka lifong tinapay, dagos wa nadokson. Yabi wan gis nanya. 31Is Hodas nondokson wan, is Hisos iglwang, Kati manga taw lomag angko kafiyan, aho Kanbali Taw. In Diyos kafiyan imlag yadi wa sangko kati. 32Ginya in Diyos kafiyan nomlag sangko, is Diyos mamalag yadi angko kafiyan, aho Kanbali taw, kaakbang wa falag tonya kati. 33Angko manga anak, ngalay odi tam no gofodan gis kati. Ham somayak angko dapat hogfwayong hayo kito yadi kangko nafwayong has manga fagtahinan Hodyo, kitay ham idwa syagan domasog hangko hadasogan. 34Kati aho ha togon ya domwag bago ha hayo kitay, ham fag gadgalwasiyan ha sadi ha sadi. No kinday aho no galwasi hayo, ham fag kitonya yadi no galwasi ha sadi ha sadi. 35Ham no gadgalwasiyan ha sadi ha sadi, fagayo tomwa kitay ham angko wa manga katogbong. 36Is Simon Pidro gintaw in Hisos kiti, Hyami Fon, ha hadawa nangos? Is Hisos igsagot, Kati hadya syagan tomahin hangko hadasogan, dapat aban, yabay, hanggan wa haw omoyan angko. 37Is Pidro gintaw ya domwag, Hyami Fon, yakana aho nodya tomahin hyamo kati? Nyawa aho hanggan wa matay kawa ho galwasi hyamo. 38Is Hisos igsagot han Pidro kiti, Hadwa aw kafang matay kawa hangko, ha gayfan? Yatokitay, lag nga araw, tabag nodyag taraok, haw tomangkod tolo ginan kitay hadwa kilala angko.

will be added

X\