HWAN 12

1Ginya madi no onom ik sirang aban ka Fanohodan Nagsagayan, is Hisos indasog has Bitanya han Lasaro banwanan. Is Lasaro kan Hisos nafaboyag ya gis kahatayan. 2In Hisos manga fakilalaon nanyahod hanon kawas Hisos inbangkad. Is Marta sadi kaglag hanon, hanggan is Lasaro sadi ka gofod in Hisos sas bilog fanganan. 3Ginya madis Mariya nabol sadik sohadan famabanglo nardo, dahol it sali, idwa ha aktom iba, nafyad ka famabanglo han Hisos bitis. Ginyas Mariya nalidgid it bok in Hisos bitis a, sadi wak balay kaayok banglo. 4Dapat is Hodas Iskariyoti, in Hisos katogbong sadi, ka omoyon aban in Hisos kalaban, igfwayong kiti, 5Gwadi balay balay no nafasali yap man ka famabanglo, tolok daan dinaryo, ginyag disag ka sali has myabog. 6Is Hodas noglwang kitonya, bohonwa kitay maskin kaawa ka manga myabog, dapat kawag nahaw wan. Hanya kagbotang ista tifonan kwarta a, inyayom wagbol ginya. 7Dapat is Hisos iglwang, Fabayaanan wan in Mariya. Nyawas Mariya igfatalaga it naibolon kawa has aban aho nomlobgob. 8Ka manga myabog idwa ha fagalinan gi hayo akbang, dapat aho idwa fagaba maofodan hayo aban. 9Ka fakaaywanan fag manga taw, no natwa kitay is Hisos sinyas Bitanya, hanya yadi wan. Bohondis Hisos kat faggobokon, ta kasaya yadi lomag in Lasaro kan Hisos nafaboyag ya gis kahatayan. 10Yakanga ka manga fagtahinan fagalan talaga wa fahatay in Lasaro yadi, 11maskin aywan fag manga Hodyo dayo igfasakop has manga fagalan, hawan Hisos nogsyag, kawa gin Lasaro nadalanan. 12Nonbago marom ka fakaaywanan fag manga taw kanbangkad has Fanohodan nadog kitay is Hisos kadasog has banwa Hirosalim. 13Yakanga ta nabol manga labong tagisi, nalahaw gis banwa kaarakitay managbo in Hisos. Tagtarawagan marigon, iglwang, Kafiyaon kafiyaon, ka kadasog hastay kati, san Diyos ngayan, Hanya, kan Israil sakop gorangon, fag bomaya wan, 14Is Hisos nalag sinya sadik anak habayo libaba, nasahay wan, kito kansorat sas Kasoratan, 15Ham fag idwa kadala, banwa Siyon, Lag ngay, tya wamlwad, hayo gorangon kadasog wan, Masahayan baba anak habayo libaba. 16Gis nanya yapdi fag masohod, in Hisos manga katogbong idya natwagdog in Hisos kabangkadan basad Hirosalim kitonya. Dapat aban in Hisos kafiyan nonlag, ta bago di natohod kitay insorat kitonya, hanggan in-anod wan ta nogfasayagdog in Hisos. 17Ka fakaaywanan fag manga taw ka nalag in Hisos itfagonan, is Hisos no natawag in Lasaro gis basad lohib, hanggan nafaboyag ya hanya gis kahatayan, nafadahit has taw ista mata lagan. 18Yakanga manga taw kaaywanon natagbo in Hisos maskin ta nadog tonya kat naibolon falagon madolaw. 19Ginya madi ka manga Farisiyo nanoltolan, taglwang, Yabay, yabay, tam idwa ha halimbawan. Fagayo fagayo fag manga taw igtahin wa hanya. 20Ha akwa manga Girigo hawas Hirosalim yadi, kaarakitay manimba han Diyos sas masohod Fanohodan Nagsagayan. 21Ta naakbang in Filipi, ka taga Bitsayda, sakop Galiliya. Ta garonganon han Filipi, taglwang, Ama, mi kasaya wa dahol lomag nangos in Hisos. 22Is Filipi nafwayong han Andris, ginya ta fagayo dowa naakbang han Hisos, nafwayong hanya ka manga Girigo fakasayaon. 23Is Hisos nasagot has taw, Kati wa fag masohod intohoyan kitay angko kafiyan, aho Kanbali Taw, fag imlag wan. 24Orongan wan, bohonwa bohag angko fwayong hayo kitay, sadi odik bolhog ka tirigo nodyan tanom has basad daga, hanggan wanboyok ka bolhog gona, ginya madi ha natobo ya ka bomohad aywan aban. 25Nyawa faktaw no fagaba kawili odit sadili haboyagan, imliyam di tonya aban, dapat ay kadwa kwangit it haboyagan istay is baba daga, ha akwa wa haboyagan hanggan aban aban. 26No ha kasaya kabali angko sogowan, fag tahin yadi wangko. Aho no siday, angko sogowan sinya yadi wan. Nyawa faktaw kangko sogowan, angko Ama gomalang hanya. 27Kati angko fangayofan kahori wa dahol dahol. Kana ara angko fagfwayongon, ham gayfan? Aho awkin fag lomwang, Mama bawiyan nangos angko gingko fagdalanon mahori kati? Idwan. Maskin ngay honbangkad hastay kaarakitay omagwanta ka kati fag mahori. 28Mama, fag im ngayan kafiyan kamlag kati. Ginya ha nahampang gin Diyos banwanan sam tongod, iglwang, Ho nafalag angko ngayan kafiyan has taw, hanggan ho mamalag ya tonya aban. 29Ka fakaaywanan fag manga taw malindogan sinya nadog ka nahampang. Tibag lwang kitay nadalogdog. Tibag lwang, Sadik anghil nahampang hanya. 30Dapat ay, is Hisos igfwayong has taw, Bohonwa aho kat fagfarigonon no nalwang kitonya, ka nahampang kitonya kasayag farigon hayo fangayofan. 31Kati wan is Diyos fatohoyan kastay is baba daga it fadosaan. Kati yadi kagbahala istay is baba daga im-okas wan has sokayan. 32Dapat ay, aho nom-abwat sas baba daga, aho faakbang hangko fagayo fag manga taw. 33Is Hisos noglwang kitonya, it fagfalimbayon no kinday hanya no matay aban. 34Dapat ay, ka fakaaywanan fag manga taw iglwang, Migbasa sa hyami manga Batasan Hodyo kitay in Diyos-natogon-Famawi igdogayan hanggan aban aban. Kana haw noglwang Kanbali Taw fag im-abwat kitonya? Faktaw to kam faglwangon Kanbali Taw? 35Is Hisos iglwang has taw, Sadik ngalay ka yawa sawa hayo yapdi. Fag fadagos yapdi hayo lahawan ka yawa no sawa hayo yapdi kaarakitay ka marom idwa tomahod hayo. Kaglahaw basad marom idwa twa no hadat hadasogan. 36Ka yawa no sawa yapdi hayo, fag syag hanya kaarakitay ham im-aktom sas sakop mayawa. Is Hisos no nalwang di nga kitonya, inlahaw wan, nafasamanon gis taw. 37Nyawas Hisos naibolon kayonya fag manga falagon madolaw sasta faglagan, tadyag syag hanya. 38Inbali kitonya kaarakitay in Isayas, in Diyos Fangampang fwayong, im-anod kitay, Diyos, fakta kantiwala hyami natoltol barita, haw gayfan? Haday fag taw is Diyos nogfalag it karigonan? 39Yakanga tadwa twa katiwala, maskin is Isayas nafwayong ya domwag, 40Is Diyos nafabota ista manga mata, nafaganit yadista manga fangayofan, Kaarakitay tadwa lomag, Idwa yadi tomwa wagdog, Idwa yadi hangko nogdali kaarakitay mamafiya it manga sagit. 41Is Isayas nahampang kitonya maskin nalag no kinday in Hisos kafiyan aban, ginya natoltol kawa ha hanya. 42Nyawa kitonya, aywan fag manga fagtahinan Hodyo igsyag in Hisos, dapat tadwag fadog has taw maskin ta kadala kitay, ka manga Farisiyo domayo has taw gis fanimbaan tifonan Hodyo. 43Maskin ka mahalga has taw, fag manga taw kagbaya hanya, nyawas Diyos idwag baya. 44Ginyas Hisos nahampang marigon, iglwang, Kagsyag angko bohondi aho kat fagsyagon. Hanyag syag yadi hasagsogo angko. 45Kaglag angko iglag yadi kagsogo angko. 46Aho ka yawa kanbangkad hastay has baba daga, kaarakitay fagayo kagsyag angko idwam goyan sas marom. 47Hodwa fatohoyan has fadosaan kagdog angko manga hampang, dapat idwa katanog angko, maskin honbangkad ngay istay kaarakitay bomawi manga taw istay is baba daga, hodwan bangkad kaarakitay fatohoyan manga taw has fadosaan. 48Iba bagay ka fatohoyan has fadosaan kagdayo angko, hanggan idwag faanod angko manga hampang. Angko natoltol manga hampang kagfatohoyan hanya aban has fadosaan sas ginanan sirang. 49Kawa angko manga fwayong idwa gingko odi sadili fangayofan, angko Ama ka nasogo angko ka nafasognod angko angko bato fwayongon fiya fiya. 50Ho twa yadi wagdog kitay it fasognod kagdisag has taw haboyagan hanggan aban aban. Yakanga angko fagfwayongon ka lamang angko Ama fasognod angko kitay, aho fag fwayong kitonya.

will be added

X\