HWAN 11

1Is Lasaro, sadik ama taga Bitanya, ha sagit wan. It manga fadwasay ina, da Mariya da Marta igbanwanan yadi sinya. 2To fag Mariya ka nafwalid famabanglo hantam Fon bitis, ginya nalidgid in Hisos bitis it bok. It fadwasay, is Lasaro, ka ha sagit. 3Yakanga in Lasaro manga fadwasay ina nasogo sogowan han Hisos, iglwang, Hyami Fon, im fakilalaon ha sagit wan. 4Dapat ay, is Hisos, no nadog, nalwang, In Lasaro sagit bohonwa fakatayon fiya fiya. Is Lasaro insagit kaarakitay manga taw fasayagdog in Diyos kafiyan, hanggan in Diyos Anak kafiyan imlag yadi. 5Yabay is Hisos kaawa in Marta hanggan it fadwasay ina hanggan in Lasaro. 6Dapat ay, nyawa kaawa no kitay di, ta no nafadog in Hisos kitay is Lasaro ha sagit, is Hisos idyapdin ginan ginya dowa yak yabi, kaarakitay mamantay in Lasaro. 7Ginya madi aban bago diglwang hat manga katogbong, Tam hanya ya has sakop Hodiya. 8It manga katogbong nasagot kiti, Haw kagfaadal, ngalay yapdi itfagonan, ka manga Hodyo sinya kasayag bintok hyamo. Haw awkin kafwali ya has Hodiya? 9Is Hisos igsagot, Idwa aw ha safolo ha dowak oras sa sadik sirang? Kaglahaw sirang idwam tahid maskin kalag ka yawa istay sas baba daga. 10Dapat kaglahaw yabi imtahid wan maskin idwa ha yawa sa hanya. 11Is Hisos no nalwang di nga kitonya, nafwayong ya domwag, Intam fakilalaon is Lasaro intoyog wan, dapat ho hanya wa a, ho fomolaw hanya. 12Ka manga katogbong iglwang han Hisos, Hyami Fon, nogtoyog wan, hanya kafiya wan. 13Kan Hisos fagfwayongon kawas Lasaro natay, dapat ta naayfan kat fagfwayongon kawa matoyogan igfahoway. 14Yakangas Hisos nafatigna fiya fiya, nalwang, Is Lasaro natay wan. 15Dapat ay, hogbaya wan kitay hodwa natahod kaarakitay ham katiwala wan. Sogi, tam hanya wan. 16Is Tomas, kasta nangayan Singan, nafwayong hat manga kapariho katogbong, Tam mahin yadi wa hanya nyawa ara tam matay yadi wan. 17Ginya madis Hisos nondasog sas Bitanya, nadog kitay is Lasaro ofat wak yabi mafwalidan sas basad lohib bato. 18Ka tifonan balay Bitanya akbang has banwa Hirosalim, manga odi tolok liho it kaayayowan. 19Aywan fag manga Hodyo igsabang inda Marta da Mariya kaarakitay iglibang ista fangayofan kawat fadwasay no natay. 20Is Marta no nadog kitay is Hisos kadasog wan, hanyag tagbo wan Hisos, dapat is Mariya idwan tanog, matokawan di sas balay. 21Is Martag lwang han Hisos, Angko Fon, haw nangos no natahod di, idwa ara natay angko fadwasay. 22Dapat ay, ho twa kitay, nyawa kati, is Diyos domisag hyamo nyawa kanam fagsagadon. 23Is Hisos iglwang han Marta, Im fadwasay imboyag ya. 24Is Martag lwang, Ho twa kitay angko fadwasay imboyag ya aban has ginanan sirang. 25Is Hisos iglwang hanya, Aho kagfaboyag ya ka manga natay hanggan aho ka haboyagan. Kagsyag angko nyawa kitay hanya matay, imboyag ya. 26Ka orongan boyagan hanggan igsyag angko fawa matay orongan, nyawa ginahin. Haw awkin igsyag kitonya? 27Is Martag sagot, Anod, angko Fon, hogsyag ngay. Hogsyag kitay haw kan Diyos-natogon-Famawi, in Diyos Anak kan Diyos faglwangon kitay imbangkad hastay has baba daga. 28Is Marta no nalwang di ngay kitonya, nwali has balay, nafwayong han Mariya, dapat idwa sasta fagdogan iba taw, nalwang kitay, Intam Famaadal indasog wan, igfatawag hyamo. 29Is Mariya no nadog kitonya, madali wanlindog, inlahaw wa hanya. 30No kitay di is Hisos idyapdin dasog fiya fiya sinya, sayapdit nagtagbowan in Marta. 31Ka manga taw ka gofod in Mariya sas balay, kaglibang hanya, no nalag is Mariya madalin lindog, nadokson yadi wa a, naoyan hanya. Ta gayfan is Mariya hawas lobgoban kaarakitay omoraw sinya. 32Is Mariya nondasog wan san Hisos nagdasogan, hanggan nalag hanya, nanlibabaan sat atobangan a, nalwang, Angko Fon, haw nangos no natahod di, idwa ara natay angko fadwasay. 33Is Hisos noglag kitay is Mariya goraw, hanggan ka manga koyog hanya goraw yadi, is Hisos in-awa waglag, inrongkot wa dahol it fangayofan. 34Is Hisos naintaw has taw, Ham hadawak nafwalid hanya? Tagsagot, Hyami Fon, tam hanya wan, famantay ngay. 35Is Hisos nangoraw wan. 36Ka manga Hodyog lwang, Fanlag nga kin no galwasi in Lasaro. 37Dapat ka tibag lwang, Bohonwa awkin to fag ama ka nafafoga ka ama bota mata? Idwa aw nasyagan kitay is Lasaro fag idwa natay? 38Ginya yabay is Hisos inrongkot ya domwag a, hawas lobgoban lohib, ka matahopan bato dahol dahol. 39Is Hisos nasogo is taw, Bol ka bato. Is Marta ka natay it fadwasay, iglwang, Hyami Fon, no kati wan baboyok wan. Ofat wak yabi itfagonan no natay wan. 40Is Hisos iglwang han Marta, Ho nafwayong hyamo kitay haw nogsyag dingko, haw lomag in Diyos kafiyan, idwa aw? 41Ginya ta naboklas ka tahop bato. Is Hisos natangdan it mata has tongod a, iglwang, Mama hogbaya hyamo maskin haw igtalinga angko. 42Ho danwa twa kitay haw igtalinga angko nyawa ginahin. Dapat ay, hoglwang kitonya kaarakitay ka manga taw istay sas ligongan imtiwala kitay haw wan ka nasogo angko. 43Is Hisos no nalwang di ngay kitonya, natawag marigon, Lasaro, ha fag dokson wan. 44Is Lasaro nadokson wa ngay, it manga gamat hanggan bitis masafotan yapdi rotay, it alfoyo matamongan yadi. Is Hisos nafwayong has taw, Lohasan wan, falahawan wa hanya. 45Yabay, aywan fag manga Hodyo kagsabang in Mariya, no nalag in Hisos naibolon, igsyag yadi hanya. 46Dapat ay, tiba hawas manga Farisiyo, nafasogbo in Hisos naibolon. 47Ginya madi ka manga fagtahinan fagalan, hanggan tonya fag manga Farisiyo nafatifon ka manga fagtahinan Hodyo kaarakitay mangampangan. Ta nangarintawan, Kinda odi intam halimbawan? Yabay, aywan to fag ama ibolon falagon madolaw. 48Tam nogfabayaan hanya, fagayo fag manga taw hanya wak somyag. Ginya madi aban ka manga gorangon manga taga Roma ngandayo imbangkad hastay, domwat intam Fanimbaan-Dahol, hanggan domaog intam sadik layonan taw manga Hodyo. 49Dapat ay, insadi, it ngayan is Kayfas, ka gorangon fag fagalan gis nanya fag masohod nafwayong has taw, Ham idwa ha fakatwawon. 50Ham awkin idwa twagdog kitay, fiya man hantam no sadi dik taw ka matay kaarakitay ha sadik layonan taw? Ginya idwam daog sadik kayonya. 51Ka orongan, bohonwan Kayfas odi sadili fangayofan kitay, hanya fag lwang kitonya. Dapat kawa gis nanya fag masohod, hanya ka gorangon has manga fagalan-han-Diyos, hanya nagona wa nafwayong kitay is Hisos matay kaarakitay ha sadik layonan manga Hodyo. 52Hanggan bohondi kitay ha sadi odik layonan manga taw, is Hisos no matay, dapat kaarakitay in Diyos manga anak fagayo ka nanarowayan imtifon ya aban sa sadik tifonan. 53Yakanga ginya ginan ka manga fagtahinan Hodyo igfatalaga no kinday nangos ta no fahatay in Hisos. 54Kawa kitonya is Hisos noglahaw, idwag falag hanya bangan ha sayo manga banwanan Hodiya, dapat nalin has banwa Ifraim sas bahalan manga banwanan taw. Sinya wak maoliyanan hanggan it manga katogbong. 55Gis nanya kaakbang wa manga Hodyo Fanohodan Nagsagayan, ta nogtohod ka anghil no nasagaya ista manga balay hyabi hyabi. Nodya Fanohodan wan, aywan gis manga ligongan hawam bohid has banwa Hirosalim kaarakitay igfahosto it manga ogali hasagfalinay baliwa. 56Ka manga taw igsayak in Hisos. Ta garintawan nogtifonan basad aladan Fanimbaan-Dahol. Kinda ara, ham gayfan? Is Hisos imbangkad aw has Fanohodan? 57Ka manga fagtahinan fagalan hanggan ka manga Farisiyo nafasognod has taw kitay, nyawa faktaw no natwa is Hisos no siday, fwayongan wan kaarakitay ta gomamat hanya.

will be added

X\