HWAN 1

1Gis fabagowanan, ka daga nodyan halig, ka Hampang dan wa ha akwa, dan wa san Diyos. Ka Hampang Diyos yadi. 2Gis fabagowanan ka Hampang dan wa san Diyos. 3Ka Hampang in Diyos fangalig no nahalig fagayo fag manga bagay. Ngadi sadik bagay kanhalig idwa ha nahalig iba. 4Ka Hampang kagfaboyag fagayo. It haboyagan ka yawa kagfayawa has manga taw. 5Ka yawa igfayawa has basad marom, dapat, nyawa ginahin, ka marom idwag fahapsa ka mayawa. 6Ginya madi, is Diyos nasogo hastay, has baba daga, sadik ama, it ngayan is Hwan. 7Is Hwan inbangkad kaarakitay faorongan ka yawa kagfayawa has manga taw, kaarakitay fagayo domog hanggan katiwalat fwayong. 8Bohonwas Hwan ka yawa. Is Hwan inbangkad kaarakitay mamaorongan lamang tonya fag yawa. 9Tonya ka yawa orongan ka kabangkad hastay hanggan igfayawa has fagayo fag manga taw istay sas baba daga. 10Ka Hampang sawas baba daga. Dapat ay, nyawa hanya in Diyos fangalig no nahalig intam daga, ka manga taw sas baba daga idwa nahilala hanya no faktaw. 11Ka Hampang inbangkad hat sadili banwanan, dapat kat manga kapariho taw idwa natanggap ha hanya. 12Dapat ay, no kayoday ka natanggap ha hanya, ka manga nasyag ha hanya, hanya nafaangay kitay ta fag imbali in Diyos manga anak. 13Tonya fag manga taw inbali in Diyos manga anak maskin is Diyos ka kasaya kabali it Ama, idwa kitos anak dararag no kabali ista anak maskin it ama taw ka kasaya anak. 14Ka Hampang inbali taw, nabanwanan santam faglagan. Mi nalag it kafiyan, kat Ama nadisag hat Anak sadi sadi, orongan hanggan mahoway wa dahol. 15Is Hwan igfaorongan kawa hanya. Is Hwan igtawag, Tya ngay kangko faglwangon ka kabangkad balingko ginanan, ka dahol man angko it kangayanan, kawa hanya danwa ha akwa gi yapdis hyabi, nyawa hodyan sagaya. 16Maskin malooy wa dahol it kahowayan, hanyag disag fagaba hantam it kahowayan. 17Is Mwisis ka nafadonong in Diyos manga togon has taw, dapat is Kiristo Hisos kagfalag has taw no kinday is Diyos orongan, hanggan it malooy fag kahowayan. 18Idwa ha taw iglag in Diyos. In Diyos Anak sadi sadi, ka sawat Ama akbang fagaba, tonya kagfahilala has manga taw no kinday is Diyos. 19Ginya madi ka manga fagtahinan Hodyo gis Hirosalim nasogo han Hwan manga fagalan-han-Diyos hanggan in Libi manga hasokfonan tiba, kaarakitay ta omintaw kitay, Ha ginda fag taw? 20Is Hwan idwa kadalag sagot, nafwayong fiya fiya, Bohonwa aho kan Diyos-natogon-Famawi. 21Ta naintaw ya hanya, No kitonya, fakta di haw? Ha aw is Iliyas? Is Hwan nasagot, Bohonwas Iliyas aho. Ta naintaw ya domwag, Ha aw kan Diyos fangampang? Is Hwan nasagot, Bohonwa aho yabay. 22Ta gintaw yapdi, Fakta nga haw? Fwayongan hyami mi ara fomwayong hasagsogo hyami. Kanam sadili fwayongon haw no ginda fag taw? 23Is Hwan nafwayong, Aho kan Isayas, in Diyos fangampang fagfwayongon noglwang, Aho wa Kagtawag marigon marigon, sas basad fakahyabogan, Fahaslongan in Diyos dalan bato lahawan. 24Ginya madi ka manga taw ka manga Farisiyo nasogo, 25naintaw ya domwag, Haw no bohonwa kan Diyos-natogon-Famawi, bohonwa yadis Iliyas, bohonwa yadi kan Diyos fangampang, fakta ka nahalig hyamo ha kangayanan igfatogna manga taw sas danom? 26Is Hwan nasagot has taw, Ahog fatogna ngay manga taw sas danom, dapat ay, ha akwa sadik taw malindogan sa hayo fagbokngan kati, ham idwa kilala hanya no faktaw. 27Nyawa hanya goyan man angko indasog, ho kaya manlohas it siyok lapak. 28Gis nanya fag masohod da Hwan sas banwa Bitanya sas salogan myanit baliwa safa Hordan, san Hwan fagfatognaan manga taw. 29Nonbago marom is Hwan nalag in Hisos gakbang ha hanya. Is Hwan iglwang, Tya ngay kan Diyos fangafiyan Anak Topa kagfaliyam ka manga ogali dwat sadik baba daga. 30Tonya wa nga kangko faglwangon ha hayo, ka goyan gingko ginanan fag ama, dapat ay, dahol man angko it kangayanan maskin hanya danwa ha akwa hyabi, nyawa hodyan sagaya. 31Aho yadi idwa kilala hanya fiya fiya hyabi, dapat ay, ahon bangkad igfatogna manga taw sas danom kaarakitay igfahilala hanya has manga taga Israil. 32Is Hwan nafaorongan kiti, Aho nalag ka Maliyaw fag Falad gin Diyos banwanan sam tongod, igyokfo hanya kitos salompati, idwa yadi galin gi hanya. 33Nyawa aho hyabi, hodya kilala hanya fiya fiya, dapat is Diyos kagsogo angko kaarakitay igfatogna manga taw sas danom, hanya danwa nafwayong angko kitay, Ka hyamo lagon aba ka Maliyaw fag Falad it fagyokfowan, idwa yadi malin gi hanya, tonya wa ngay kagfatogna manga taw sas Maliyaw fag Falad. 34Is Hwan iglwang, Kati in-anod wan. Angko wa mata lagan. Hogfaorongan wa nga kitay to in Diyos wa Anak. 35Nonbago marom, is Hwan sinya ya ngay, hanggan it katogbong dowa. 36Is Hwan igbantay in Hisos, is Hisos nogdalan, ginyag lwang, Yabay, tya ngay, kan Diyos Anak Topa. 37Ginya madi in Hwan katogbong dowa ka nadog it fwayong, natahin in Hisos. 38Is Hisos no natakfili, nalag kitay ta goyan hanya, naintaw has taw, Kana hayo fagsayahon? Tagsagot in Hisos, Rabi, sida kin haw no goli? Ta noglwang Rabi, it kahologan, Kagfaadal. 39Is Hisos nasagot, Hawi, tam hanya wan, ham lomag wa araw. Ta natahin in Hisos a, ta nalag kitay sinya no goli. Ka myanit kalibaba wan gis nanya, yakanga ta ngap nigya wa sinya. 40Insadi ka nadog in Hwan fwayong, ginya natahin han Hisos, kawas Andris, in Simon Pidro fadwasay. 41Is Andris nadagos wa hat fadwasay Simon, nafwayong hanya kitay, Mi nalag in Diyos-natogon-Famawi kat kahologan is Kiristo. 42Ginya nataban in Simon han Hisos. Is Hisos nadoro in Simon a, nafwayong hanya, Haw mangharaw is Simon, in Hwan anak, dapat aba ta ngomayan hyamo is Sifas. To fag ngayan kawas Pidro yadi, it kahologan, bato. 43Nonbago marom yabay, is Hisos kasaya has sakop Galiliya. Ginya madi, nondasog sinya, is Hisos nalag in Filipi a, nalwang hanya, Tahinan wangko. 44Is Filipi taga Bitsayda yadi, ginda Andris da Pidro banwanan. 45Is Filipi nasayak in Natanail a, nafwayong hanya, Mi nalag kan Mwisis fagsoraton sas Batasan Hodyo, kan Diyos manga fangampang fagsoraton, kangas Hisos, gis banwa Nasarit, in Hosi anak. 46Is Natanail naintaw in Filipi, Da ngap, tam awkin ha fagasolopon fiya gis banwa Nasarit? Is Filipi nasagot, Hawi, tam hanya wan, fanlag ngay. 47Is Hisos nalag ngay in Natanail no kaakbang ha hanya, nafwayong has taw kawa han Natanail, Yabay, to orongan kan Israil hasokfonan sadi. Maanod it manga hampang fagayo. 48Is Natanail nalwang han Hisos, Twa oman ha no nahilala angko? Is Hisos nasagot, Haw no masarirongan daga fon igos, is Filipi nyawa idyag tawag hyamo, aho dandig lag hyamo haraw. 49Is Natanail nalwang, Rabi, haw wa nga in Diyos Anak. Haw wa ka gorangon manga taga Israil. 50Is Hisos nalwang, Hantiwala wangko maskin aho nalwang ha hyamo kitay, hoglag hyamo haraw, haw no sayapdis daga fon igos? Bondi kitonya fag madolaw kam manga lagon aban. 51Is Hisos iglwang ya kitay, Orongan wan, bohonwa bohag, hogfwayong ha hayo, ham lomag ka banwa sam tongod idwa hagfarom, in Diyos manga anghil igdokson yagsakbaw ya sangko, aho Kanbali Taw.

will be added

X\