SANTYAGO 5

1Ka manga maakwa santam fag gisip fiya fiya. Ham fag goraw wan hanggan fag ngongoy wan, kawa ham lomag mahori wa dahol aban. 2Hayo kaakwaan inboyok wan. Hayo manga rotay ka kafiyaon, losbongon losbongon odi, kawa tipakong ka kagat. 3Hayo ginto hanggan pilak aningga odi ka kwan. Hanggan tonya fag manga aningga kagfatohoyan kitay, idwa fiya hayo ibolon. Tonya fag manga aningga ka homamin hayo manga habilogan aban, bilang ka afoy has alfotong. Ham natifon hayo kaakwaan, dapat kastay is baba daga kaakbang has katabowanan fag sirang. 4Fandog ngay ka manga famalo hadwa nabayad, nafalingo odi, igtawag marigon nogsombong han Diyos ka hayo nadaya. Hanggan kam nadaya im manga fangibolon ka gani, it hasnog ta nogmanaw, kadog wan hanggan wa hasagfon intam, ka marigon man has fagayo. 5Ham insolong odi hayo kaakwaan istay sas baba daga. Ham nafahapsog hayo fagaba, kitos hayopan bato sogbaon. 6Ham naato hanggan wa nafahatay ka fiyat ogali, tadwa nalaban hayo. 7Dapat tam, manga fadwasay, no kandogay day kagfon intam nodyan bangkad, tam fag gagwanta yapdig fanaya. Tam fag kitos gamas nogfanayat ani, gagwantag fanaya yadi ka bago bago fag mwayan hanggan ka goyan kagfalangbat manga tanom. 8Tam fag gagwanta yapdi kawa kaakbang wa dahol kagfon intam no kadasog. Maskin ngay, tam fag marigon intam manga fangayofan. 9Manga fadwasay, tam fag idwag sarogatan kaarakitay is Diyos idwa omato intam. Maskin ngay ka fangabaya istay, bilog wa sakbawan. 10Manga fadwasay, fag in Diyos manga fangampang ogali kantam fagsokfonon. Aywan it manga naagwanta nogtoltol intam Fon hampang. 11Idwa awkin tam lomwang kitay masolong kadwag fagomon hanggan has katabowanan? Ham nadog wan no kinday is Hob idwa nafagomon, yakanga no has ginanan, intam Fon nadisag ya fiya fiya hanya, kawantam Fon mahoway hanggan maawaon. 12Dapat ka fiya man has iba, manga fadwasay, sakwag ngayan nyawa kana fag bagay sam tongod, ngatay sas baba daga, nyawa kana fag hampang tiba, kaarakitay igfaorongan intam fwayong, ginya kagfon intam idwa omato intam. Fag idwag sad wan. No ala, ya ala wan, no bohonwan, bohonwan. 13No ha akwa santam ka ha fakahoriyon, hanya fag darangin wan. No ha fagbayaon, fag gambahan ya ngadi. 14Ngatay ha kasagit santam? Tawagan ka manga fagtahinan sas Tifonan kaarakitay domarangin kawa ha hanya, lidgidan lana hanya. Fag lwang, Tam igsyag hasagfon intam, hanggan mi lomidgid lana hyamo. 15Ka darangin igsyag hantam Fon kagfafiya hanya. Intam Fon igfarigon ya hanya, hanggan no ha naogali dwat, intam Fon faliyam yadi tonya. 16Maskin ngay, tam fag soyo ha sadi ha sadi intam manga naogali dwat, hanggan igdarangin kawa ha sadi ha sadi, kaarakitay imfiya ya intam manga sagit. Ka taw maslong it ogali nogdarangin, fagaba im-anod it fagdaranginon. 17Hyabi is Iliyas taw yadi kitontam. Hanya nandarangin mahogod kitay, fag idwa kwayan, ginya madi in-anod wan, idwa nahwayan balis tolok fangaraw hagboknga. 18Is Iliyas nandarangin ya domwag kitay, Fag homwayan ya, ginya madi nahwayan ngay, ka manga tanom namodbohadan ya. 19Angko manga fadwasay no ha taw santam kagfafwali has fakaoronganan kagtalang, 20hanya fag twa kitay, hanya nogfafwali sadik taw gis ogali kagfalamang, tonya fag taw imbawi gis kahatayan, hanggan aywan fag manga ogali dwat imliyam yadi wan.

will be added

X\