SANTYAGO 4

1Kanat tigadan tam no fagaba kahodhoriyan, manga gagran, ham gayfan? Idwa awkin kawantam manga bali fangayofan masayaon idwa kaoman, yakangag sadili odi, iglaban hantam bali fangayofan fiya? 2Tam igfayafo wan, dapat ay, tam idwa somyagan omafo, yakanga tam kaingli wa dahol hanggan wagfahatay, no nangos imbolay di tonya gi hanya. Tam hanggan wa kaarisogan hanggan wa garogwanan. Maskin tam idwag sagad gin Diyos, tam idwag bolay intam fakasayaon. 3Nyawa tam somagad wan, halimbawa, tam idwa yadi lomag maskin tam igfalamang nogsagad. Intam fakasayaon igsadili odi. 4Tam goyon yapdin Diyos kalaban. Tam idwa aw twa kitay tam nogfabali mahalga kastay fag baba daga fag manga ogali, tam iglaban han Diyos? Maskin ngay, nyawa faktaw kagfahalga kastay is baba daga fag manga ogali, in Diyos wa kalaban. 5Tam awkin gayfan kanfwalid sas Kasoratan idwa ha kahologan noglwang, Is Diyos maskin galwasi wa dahol kat disag fangayofan hantam, kabalaw no ha kagaw intam gi hanya? 6Dapat marigon man in Diyos disag togbong hantam, kawa ka Kasoratan iglwang yadi, Is Diyos igtaktak ka manga ha takan, dapat igtogbong has mangag fasolon it fangayofan. 7Maskin ngay, tam fag fasolon han Diyos. Tam fag laban in Fandaya, ginya madi hanya lomagyo wan. 8Tam fag gakbang han Diyos, ginya madis Diyos omakbang yadintam. Tam ka ha manga naogali dwat, fag sonson wa fiya kati intam manga gamat ibolonon. Tam ka manga gadowan fagaba, fag sonson wa malinay kati intam manga fagayfanon. 9Tam fag goraw wagdayo intam ogali dwat. Fag bohondi ogbot no goraw. Tam fag idwag baya. Fag karongkot wa ngap. 10Tam fag falibaba intam fangayofan hasagfon intam, hat atobangan, ginya madi hanya farigon ya intam. 11Manga fadwasay, tam fag idwa fagabag fadwat igdog ha sadi ha sadi. Kagfadwat igdog, ngatay gato it fadwasay, igfadwat igdog hanggan gato ka Batasan Hodyo. Tam no gato ka Batasan, tam bohonwa manga katanog, tam inbali wa fangato. 12Sadi di ka natogon ka Batasan Hodyo, tonya yadi ka fangabaya. Hanya lamang ka ha kangayanan ngatay igbawi, ngatay igfadosa manga taw. Dapat fakta tam ka gato intam kapariho taw, ham gayfan? 13Tam fag gisip fiya fiya. Tam madali odig lwang kitay, Araw, ngatay bago marom, tam hawas nwa fag banwa, tam bomanwanan sinya sadik fangaraw, tam mamalidya yadi, ginya tam lomag dahol fag kwarta. Fayag lwang kitonya. 14Tam idwa twa no kinday tam aba no marom. Intam haboyagan bilang kito odis songaw sinyahod, nyawa tam iglag kati, araw araw idwa akwa. 15Kito ka fiya intam bato fwayongon, Intam Fon nogfaangay, ngatay kito, ngatay kitonya intam ibolonon. 16Dapat tam kati igbaya hanggan igfadaholon intam sadili fagsyaganon. Tam igfatakagdog. Dwat no kitonya intam ogali. 17Tam no natwa sadik bagay fiya intam bato ibolonon, ginyadwag fatonglos tonya, ya tam ha ogali dwat.

will be added

X\