SANTYAGO 3

1Manga fadwasay, tam fag idwa aywan ka kasaya kabali famaadal kawa tam twa kitay ka tam ka mangag faadal, mahigpit kagfon intam no omato intam, tam nogfalamang, bohondi kito ka tiba. 2Tam fagayo fagabag falamang. Dapat ay, inhosto intam ogali, nyawa faktaw, nodwa masalanon, twa yadig dahan it sadili nyawa kana. 3Tam nogfwalid aramri ogbot ogbot basad bibig habayo kaarakitay igfalahaw, ka habayo katahin odi, nyawa haday tam nogfalahaw. 4Kitonya yadi ka manga sahayan baba dagat, nyawa gorangon, hanggan marigon ka bagyo nogtolod, ka ogbot ogbot fag fangabang, daga habot sahayan, igfabalihid ka sahayan no hadawat fakasayaon kagfalahaw, ya hanya wan. 5Kitonya yadintam manga bibig. Nyawa ogbot ogbot fag sangkap sas habilogan, aywan nogfatakagdog is taw. Fanlag kin, sadik igang ogbot ogbot syagan digfahayab sadik talon dahol dahol. 6Ka bibig taw bilang wa afoy. Sadi wak kayonya manga ogali dwat kalafit gis bibig ha sadi wak dahonya habilogan. Ka afoy bibig intongo gis oliyanan fadosaan. Ginya madi ka bibig bilang wa afoy igfalafit ogali dwat has manga taw, ta no boyagan yapdi. 7Manga taw syagan igfahagop fagayo fagayo fag manga manok, manga hayopan kaglahaw, hanggan ka gilafang, hanggan manga oyang. Korang, syagan gidfahagop. 8Dapat ay, nyawa faktaw idwa ha syagan igfahagop ka bibig taw. Ka bibig taw dwat wa dahol, idwa kahoway. Bilang wa ha dalit fakatayon. 9Tonya yadi fag bibig kagfasayagdog kagfon intam hanggan intam Ama. Tonya yadi fag bibig ka kampang dwat has taw kanhalig igtolad in Diyos. 10Sadi dik bibig kagfasayagdog hanggan igfadwat igdog. Angko manga fadwasay, fag idwa ha akwa kitonya santam. 11Tam awkin gayfan ha danom matabang hanggan mayat gi sadi dik bolbogan? 12Idwan, manga fadwasay. Ka fon igos idwa bomohad olibo nyawa kindawan, hanggan ka fon obas idwa bomohad igos. Danom matabang idwa yadi bomolos gis bolbogan mayat. 13Fakta santam ka ha kadonongan hanggan twagdog fiya fiya? Fag imlag sat fiya fag ogali, kawat kadonongan igfasolon di has taw. 14Dapat it fangayofan no sonson wa kahori, kaingli, hanggan igsadili odi, fag idwag fatakagdog kitay hanya ha kadonongan, fag idwag fabohag ka fakaoronganan. 15Ka kitonya fag kadonongan idwa gin Diyos, kadonongan odi sas baba daga, gis bali fangayofan masayaon, gin Fandaya. 16Maskin no siday kasta fangayofan maingliyon hanggan igsadili odi, sonson wa gagran hanggan fagayo fag manga ogali dwat sinya yadi wan. 17Dapat ay, ka ha kadonongan gin Diyos, bago bago maliyaw it fangayofan, mahoway, magop, hanggan idwag faagran, maawaon, dagos wa gogali fiya. Idwa ha fagihidon taw. It ogali fiya bondi kitay famalagon odis taw. Tonya wa ka fakatwawon gin Diyos. 18Ka manga galwasi kahowayan bilang wagtanom kahowayan. Ginya madi, tonyag bohad kahaslongan.

will be added

X\