SANTYAGO 2

1Angko manga fadwasay, kawa tam mangam tiwala han Kiristo Hisos, kagfon intam, hanggan kagfon kayawaan, tam fag idwa ha fagihidon taw. 2Maskin, halimbawa, handasog hantam fanifonan sadik taw, singsing di bay ginto a, balokasan di maangay wan. Ginya madi sadi yak taw myabog indasog yadi, it rotay dwat dwat odi. 3Ginya tam iglwang has fiya it rotay, Haw fag istay sas fiya fag tokawan. Ginya madi, iglwang ya has myabog, Haw fag is nyamo di malindogan, ngatay, fag matokawan is nwa, baba daga, sangko dayo bitis. 4Tam no gibolon kitonya, tam ha fagihidon taw. Tam igfalamang igfili maskin idwa fiya intam fangayofan. 5Angko manga fagalwasiyon fag manga fadwasay, ham fag matalingan. Is Diyos nafili ka manga myabog sas baba daga, kaarakitay imbali maakwa sas fangayofan nogsyag hanya. Ginya ka myabog ka omafo yadin Diyos sakop it natogon bato disagon has manga galwasi hanya. 6Dapat ay, tam igyod ka manga myabog. Bohonwa aw ka maakwa kagfalingon tam, ham gayfan? Kigpitan intam, igdiya intam has manga fangabaya sas banwa? 7Bohonwa awkin ka yadi manga maakwa kagyod ka maangay fag ngayan kan Diyos nafangayan intam? 8Kafiyaon tam no gafanod ka togon gin Diyos ka hari, kito kat nafasorat kitay, Haw fag galwasim kapariho kito yadim sadili. 9Dapat tam no ha fagihidon taw, tam ha ogali dwat, hanggan in Diyos togon iglwang, ka ha ogali dwat fiya wa fadosaon. 10Nyawa faktaw no katanog in Diyos togon aywan, dapat nasway ka sadik togon, nasway wa fagayo. 11Is Diyos kaglwang kitay, Haw fag idwag fabayowan, iglwang yadi, Haw fag idwag libon taw. Dapat tam, nyawadwag fabayowan, dapat tam iglobon taw, halimbawa, tam nasway wan in Diyos togon sadik dahonya. 12Yakanga tam fag madahan tam no kampang, hanggan intam manga ogali fag fiya, maskin tonya yadi fag togon kagfalfas intam, omato yadintam tam nogsway tonya. 13Kadwa twa kaawat ofod, ka fangabaya idwa yadi kaawa hanya. Dapat ay, ka manga maawaon idwa kadala ka fangabaya. 14Angko manga fadwasay, kanat kahologan, ham gayfan, ka sadik taw noglwang, not hampang di, Aho orongan wantiwala han Diyos, dapat ay, idwa fiyat ogali? Ham gayfan awkin tonyam bawi wan nomtiwala kitonya? 15Halimbawa, ka sadik fadwasay nodwa rotay, idwa yadi ha fanganon, 16ginya madi sadi gintam lomwang kitay, Is Diyos nangos tomogbong hyamo. Fag solong wam rotay. Fakapsog wan. Hampang odi kandog, dapat ay idwa yadi ha fagdisagon kasta kakorangan. Fiya awkin no kitonya, ham gayfan? 17Nyawa faktaw noglwang kitay, hanyan tiwala wan, dapat idwa ha fagfalagon fiya fag ogali, tonya fag taw idwa ngap intiwala. 18Abi di man sadik taw noglwang kitay, Haglwang haw intiwala wan, dapat ahog lwang, Angko ogali ka fiya. Angko sagot kito, Ha no kasayag faorongan kitay haw intiwala, nyawadwa fiyam ogali, ho falag yadi hyamo kangko fag manga ogali fiya kagfaorongan kitay, ho katiwala wan Diyos. 19Haw katiwala kitay is Diyos sadi di. Fiya ngay no kitonya. Dapat ay, nyawa ka manga labang idwag fabohag kitay is Diyos idwam dowa. Ta karokog yadi wa fag kadala hanya. 20Polos polos haw. Haw awkin kasaya yapdi kitay ho fatohoyan ha hyamo ka orongan? Bohag odi fag iglwang kitay ha katiwala wan nodwa fiyam ogali. 21Is Diyos nalwang kitay is Abraham, intam pinagkaama, nangafiyan han Diyos kawat ibolon fiya, nodwa nahwangit han Diyos it anak, is Isaak, nyawa nadiya wa has baba danglayan. 22Hadwa awkin twagdog kitay is Abraham katiwala wan hanggan gibolon fiya, tonya fag dowak bagay koyogan mandi. Ka nafatohoyan kitay is Abraham idwa korang no katiwala, kawat naibolon fiya. 23In-anod yadi wan ka kasoratan fwayong kitay, Maskin is Abraham katiwala in Diyos, yakangas Diyos igfatohoyan kitay is Abraham nangafiyan hanya. 24Sinya wa tam no lomag kawas Diyos iglwang kitay tam nangafiyan wa hanya, bohondi kitay kawa tam no katiwala, dapat tam nogfadagos yadi has ogali fiya. 25Idwa awkin kitonya yadis Rahab, sadik ina fabayowan wa dahol, dapat nafalag fiya it manga ibolon han Israil manga sogowan ka namantay mafyaloman ista banwanan? Is Rahab nafasakbaw ka manga sogowan a, natagos taw, ginya nafwayong yadi ka tiba dalan kaarakitay ta lomagyo. Yakangas Diyos iglwang kitay, is Rahab nangafiyan wa hanya. 26No kinday tam mahatayan intam falad no nalahaw gintam habilogan, kitonya yadi ka katiwala no masamanan gis fiya fag ogali.

will be added

X\